1-2. (a) I cani cikatwazwa kutwalilila kuzizimizya intazi cila wanda? Londololini. (b) I vyani vino tumasambilila mu cipande cii?

“NDI nelenganya pa ntazi zino napitamo, nkalola ukuti ntanga nzicimvye ku maka yane sile.” Uzye namwe mwatala mwayuvwapo vivyo? Sweingi vyatucitikilapo. Limwi mwazizimizye intazi imwi ipisye ili wa kulwala nanti kufwilwa wino mwatemwa. Nga mwelenganya pa ntazi iyo mukauvwa ukuti mwazizimizye pa mulandu wakuti umupasi wakwe Yeova uwa muzilo wamupeezile “amaka” aakafuma kuli Leza pakuti muzizimizye.—2 Kol. 4:7-9.

² Swensi kwene tukalondekwa umupasi wa muzilo pakuti tuzizimizye intazi zyaya mu nsi ii yakwe Ciwa. (1 Yoa. 5:19) Nupya, tukalondekwa umupasi kwene uu pa kulwisya “imipasi yankota iya mulwelele.” (Efes. 6:12) Tumalanda pa nzila ziili zino umupasi wakwe Leza ukatwazwilamo mu ntazi zino tukapitamo. Lyene tumalanda na pali vino tungacita pakuti mupasi wa muzilo utwazwe.

3. Iinzila ci yonga ino Yeova akatwazwilamo kuzizimizya intazi?

³ Mupasi wakwe Yeova ukatwazwa nu kutupeela amaka nu kukomeleka pakuti tuombe ningo milimo asi mulandu ni ntazi. Mutumwa Paulo wayuvwanga ukuti wali nu kukwanisya kuombela Yeova pa mulandu wakuti ‘Klistu watwalilile kumupeela amaka.’ (2 Kol. 12:9) Lino wali pa lwendo lwakwe ciili lwa umisyonali, Paulo ataombesyanga sile mu mulimo wa kusimikila lelo waombesyanga na pakuti aisakamala muli vino walondekwanga. Wikalanga mu ng’anda yakwe Akwila na Pulisila lino wali mu Kolinto. Antu yaa yaombanga mulimo wa kusuma matenti. Pa mulandu wakuti Paulo nawe wamanyile ukusuma matenti,  waombanga nayo manda yamwi. (Mili. 18:1-4) Umupasi wa muzilo walenzile Paulo kukwata amaka ya kuiombela nu kuomba mulimo wa kusimikila.

4. Kulingana na 2 Kolinto 12:7b-9, i ntazi ci ino Paulo wakweti?

⁴ Welengini 2 Kolinto 12:7b-9. Uzye Paulo walozizye mwi lino walanzile amazwi aaya mu vikomo vii aakuti waculanga nu “munga mu mwili” wakwe? Ndi cakuti umunga wamutota mu mwili, munguvwa kuwaya. Fwandi Paulo walandanga pa kuwaika kufuma ku ntazi zino wapitangamo. Wamile intazi zino wakweti ukuti “nkombe yakwe Satana” ino wazumilizye kumuma. Limwi asi Satana uwalenganga ukuti Paulo akwate intazi zya musango uu. Nomba lino mipasi ii ipe yaweni ukuti Paulo wakweti “umunga” ifwile yatandike kumucuzya nu kumupatikizya pakuti auvwa sana kuwaika. Uzye Paulo wacisile uli?

5. Uzye Yeova waswike uli mapepo yakwe Paulo?

⁵ Pa kutandika, Paulo walondanga Yeova amufumizye “umunga.” Umwineco wailandiile ukuti: “Maila yatatu napapasile Mwene kuti asisye kucula kuu.” Lelo, nanti icakuti Paulo wapepanga sana, umunga uno wakweti utafumiziwepo. Uzye cii cikusenula ukuti Yeova ataswike mapepo yakwe Paulo? Awe. Waswike. Yeova atafumizye munga mu mwili wakwe Paulo, lelo wamupeezile amaka ya kuzizimizya. Yeova wamunenyile ukuti: “Pano maka yane yakaombesya lilyo lino watonta.” (2 Kol. 12:8, 9) Nupya pa mulandu wakuti Leza wamwazwile, Paulo uvwileko ningo nupya watwalilile kuya ni nsansa.—Filipi 4:4-7.

6. (a) Uzye Yeova angasuka uli mapepo itu? (b) A mapaalo ci ali mu malembelo ali muli palaglafu ii yano yangamukomelezya?

⁶ Wakwe vino Paulo wacisile, uzye namwe mwatala mwapepa kuli Yeova ukuti afumyepo intazi ino mwakweti? Ndi cakuti pa cisila ca kupepa intazi iyo yatwalilile, uzye mwatandike kusakamala nu kulola kwati Yeova atamwisileko mano? Nga avino cili, mwaiusya ivyacitikile Paulo. Wakwe vivi kwene vino Yeova waswike mapepo yakwe Paulo, namwe kwene alasuka mapepo inu. Limwi Yeova atanga afumyepo intazi. Lelo, nga wamupeela umupasi wa muzilo mungazizimizya intazi iyo. (Masa. 61:3, 4) Insita zimwi ‘yangamufwanta’ nomba Yeova atalamusya.—2 Kol. 4:8, 9; Filipi 4:13.

7-8. (a) U munzila ci muno umupasi wa muzilo waya wa muza? (b) Uzye Petulo walondolwile uli vino umupasi wa muzilo ukaomba?

⁷ Inzila ci na yuze ino umupasi wa muzilo ukatwazwilamo? Wakwe vino uwato ukaomvya umuza ukupunga kufuma ku ntunga isuma pa kuti wapita ningo nanti cakuti pali yemba pali mayimbi, avino naswe umupasi wa muzilo ukatwazwa kutwalilila kuombela Yeova asi mulandu ni ntazi zino tukakwata mpaka tukingile nu mu nsi ipya.

⁸ Vino Petulo wali a kavuwa wa nswi, wamanyile ningo sana ivya kupisya uwato. Fwandi ali mulandu uno waomvizye icilangililo cii pa kulondolola vino umupasi wa muzilo ukaomba. Walemvile ukuti: ‘Kutaya ilandwe lya usemo ilyafuma ku kulonda kwa muntu. Lelo antu yatungulwilwe nu mupasi wa muzilo lino yavwanganga ilandwe ilyafumile kuli Leza.’—2 Pet. 1:21.

9. I cani cino Petulo walondanga antu yaelenganyapo lino walanzile ukuti “yatungulwilwe” nu mupasi wa muzilo?

⁹ I cani cino Petulo welenganyangapo lino walanzile ukuti “yatungulwilwe”? Luka, kalemba wi buku lya Milimo, waomvizye izwi lya Cigiliki likolineko na lii, pa kulondolola uwato ‘ukusendwa’ nu muza. (Mili. 27:15) Uwasambilila umwi walanzile ukuti, lino Petulo  walemvile ukuti ya kalemba yakwe Baibo “yatungulwilwe” waomvizye amazwi ali nu kulenga antu ukalaelenganya pa kupisya uwato. Petulo walandanga ukuti, wakwe vivi kwene vino umuza ukalenga uwato ukuya kuno ufwile ukuya, avino nu mupasi wa muzilo walenzile ya kalemba yakwe Baibo ukuomba umulimo uno yapeezilwe. Uwasambilila wii walanzile nu kuti: “Ya kasema yaipekinye ukuomba umulimo uno umupasi wa muzilo wali nu kuyanena ukuomba.” Yeova waomvile vino walondanga. Wayapeezile “umuza,” nanti umupasi wa muzilo. Ya kalemba yakwe Baibo yaomvile umulimo uno yapeezilwe. Yaomvile ukulingana na vino umupasi wayatungulwile.

10-11. I vintu ci viili vino tulinzile ukucita pakuti umupasi wa muzilo watutungulula? Langililini.

¹⁰ I cacumi ndakai Yeova asizumilizya umupasi wa muzilo ukulenga antu kulemba mabuku amuli Baibo. Nomba Yeova acili akaomvya umupasi wa muzilo ukutungulula aomvi yakwe. Yeova acili akaomba vino alinzile ukuomba. Tungacita uli pa kuti umupasi wa muzilo watutungulula? Tulinzile ukusininkizya ukuti tukuomba vino tulinzile ukuomba. Tukacita uli vivyo?

¹¹ Elenganyini pa cilangililo cii. Ndi cakuti kapisya wa wato akulonda ukuti umuza umwazwe, alinzile ukucita ivintu viili. Ca kutandikilako, alinzile ukupindulwila uwato wakwe kuno umuza ukupungila. Nga atacisile vivyo, uwato wakwe utanga waya inkoleelo. Cakwe ciili, alinzile ukusimuzya uwato nu kuyula matanga. Alino nanti kuli umuza, uwato ungaya sile inkoleelo ndi cakuti umuza wazula umu matanga. Naswe kwene, tungakwanisya ukuombela Yeova ndi cakuti umupasi wa muzilo ukutwazwa. Pakuti umupasi wa muzilo utwazwe tulinzile ukucita ivintu viili. Ca kutandikilapo, tulinzile ukucita ivintu vino umupasi wa muzilo ukunena aomvi yakwe ukucita. Cakwe ciili, tulinzile ukucita ivintu kulingana na pano maka itu yapezile. (Masa. 119:32) Nga twacita vii,  umupasi wa muzilo ulatupeela amaka akutwalilila ukuombela Yeova na ucisinka mpaka nu mu nsi ipya yakwe Leza.

12. I vyani lyene vino tumalandapo?

¹² Ukufika paa twasambilila pa nzila ziili muno umupasi wa muzilo ukatwazwila. Umupasi wa muzilo ukatupeela amaka nu kutwazwa ukutwalilila ukuya acisinka nanti icakuti tuli ni ntazi. Nupya ukatulenga ukutwalilila ukuomba umulimo uno Yeova akulonda tuombe nupya ukucita vivyo kulalenga tukaye nu umi wa manda pe. Lekini lyene tulande pa vintu 4 vino tulinzile ukucita pakuti umupasi wa muzilo watwazwa.

13. Ukulingana na 2 Timoti 3:16, 17, i vyani vino Malembelo yangacita uku umi witu, nomba i vyani vino tulinzile ukucita?

¹³ Ca kutandikilapo, mwasambilila Izwi Lyakwe Leza. (Welengini 2 Timoti 3:16, 17.) Amazwi yakuti “yafuma kuli Leza” yakapiliula ukuti “Leza wapuusilemo.” Leza waomvizye umupasi wakwe uwa muzilo “ukwika” amelenganyo yakwe umu melenganyo yakwe ya kalemba yakwe Baibo. Ndi twawelenga Baibo nu kwelenganya pali vino twawelenga, masunde yakwe Leza yakaingila umu melenganyo nu mu mwenzo witu. Yakatulenga ukusenula umi witu pakuti twazanzya Yeova. (Ayeb. 4:12) Nomba pakuti umupasi wa muzilo utwazwe, tulinzile ukupaatulako insita iya kuisambilizya Baibo lyonsi nu kwelenganya sana pali vino tukuwelenga. Lyene Izwi Lyakwe Leza lilatwazwa ukuzifya vino tukavwanga na vino tukacita.

14. (a) U mulandu ci uno tungalandila ukuti pa kulongana pakaya umupasi wa muzilo? (b) I vyani vino tulinzile ukucita pakuti umupasi wa muzilo utwazwe lino tuli pa kulongana?

¹⁴ Cakwe ciili, mwapepela pamwi. (Masa. 22:22) Ku kulongana kwa Ina Klistu ali kuno kukazanwa umupasi wakwe Yeova uwa muzilo. (Umbw. 2:29) U mulandu ci uno tungalandila vivyo? Pano nga twakomenkana na ina na ya nkazi, tukaleenga umupasi wa muzilo kuli Leza, kwimba inyimbo zya Wene izyasintilila pi Izwi lyakwe Leza, nupya tukauvwa amasunde yano aina asontwa nu mupasi wa muzilo yakalanda akafuma muli Baibo. Nupya umupasi wa muzilo kwene uu ukaazwa ya nkazi kupekanya nu kulanda ningo malyasi yano iyapeelwa. Pakuti umupasi wa muzilo utwazwe tulinzile ukupekanya ukwasukapo pa kulongana. Nga twacita vii, ale ituipekanya ukulondela vino umupasi ukutunena wakwe vino kapisya wa wato akacita.

15. Uzye umupasi wa muzilo ukatwazwa uli lino tukusimikila?

¹⁵ Cakwe citatu, mwasimikila. Nga tukuomvya Baibo umu mulimo witu uwa kusimikila nu kusambilizya, tukazumilizya umupasi wa muzilo ukutwazwa. (Loma 15:18, 19) Nomba pakuti umupasi wa muzilo utwazwe sana tulinzile ukuomba umulimo wa kusimikila lyonsi nu kuomvya Baibo lyonsi lino calondekwa. Inzila yonga ino mungalanzyanyizizyamo ningo na antu yano mukusimikila u kuomvya mazwi aakutwazwa ukusimikila akazanwa umu Kabuku Aka Kuomvya mu Kulongana Kwakuti Swe Ina Klistu nu Mulimo Witu.

16. Iinzila ci yonga sile ino tungakwatilamo umupasi wa muzilo?

¹⁶ Cakwe cini, mwapepa kuli Yeova. (Mate. 7:7-11; Luka 11:13) Inzila yonga sile ino tungakwatilamo umupasi wa muzilo u kupepa kuli Yeova. Kusi icili consi icingalesya amapepo itu ukufika kuli Yeova nupya kusi icingalesya umupasi wa muzilo ukutwazwa nanti tuli umu cifungo nanti sile a Satana kwene. (Yako. 1:17) Uzye tulinzile ukupepa uli pakuti umupasi wa muzilo utwazwe? Pakuti twasuke iuzyo lilyo, lekini tusambilile api ipepo umu cilangililo  icalembwa sile umwi Buku li Landwe lyakwe Luka. *

17. I vyani vino tukusambilila api ipepo ku cilangililo cakwe Yesu icaya pali Luka 11:5-9, 13?

¹⁷ Welengini Luka 11:5-9, 13. Icilangililo cakwe Yesu cikalangilila vino tulinzile ukulenga umupasi wa muzilo. Umu cilangililo cii, umonsi wiya wapeezilwe vino walondanga “pa mulandu wa muzonda wakwe.” Ataatinyile ukulenga uwazwilizyo kuli cuza wakwe nanti icakuti wali usiku sana. (Lolini mwb18 Julai.) I vyani vino Yesu walanzile ukuti ali vino cilangililo cikutusambilizya api ipepo? Walanzile ukuti: “Lengini nga mumapeelwa, londini nga mumazana, konkonsyini nga mumayulilwa.” I vyani vino tungasambililako fwandi? Pakuti umupasi wa muzilo utwazwe, tulinzile ukulenga nu muzonda pakuti Yeova atupeele.

18. Ukulingana ni cilangililo cakwe Yesu, u mulandu ci uno tungasininkizizya ukuti Yeova alatupeela umupasi wa muzilo nga twamulenga?

¹⁸ Icilangililo cakwe Yesu cikatwazwa nu kumanya umulandu uno Yeova alinzile ukutupeelela umupasi wa muzilo. Umonsi uwaya umu cilangililo cii walondanga ukusakamala umwenyi wakwe. Wayuvwile ukuti walondekwanga ukupeela ivyakulya umwenyi uwizile usiku. Yesu watiile umwinamupalamano wamupeezile vino walondanga pa mulandu wakuti wali nu muzonda. I vyani vino Yesu wasambilizyangapo? Ndi cakuti umuntu aatamalilika angaitemelwa ukupeela umwinamupalamano wakwe vino akulonda pa mulandu nu muzonda, tungasininkizya fwandi ukuti Tata witu uwa kwi yulu alaazwa yonsi akamulenga umupasi wa muzilo nu muzonda. Fwandi tungapepa nu kutaila ukuti Yeova alaasuka mapepo itu ndi cakuti twamulenga umupasi wa muzilo.—Masa. 10:17; 66:19.

19. U mulandu ci uno tungazizimizya intazi?

¹⁹ Tungasininkizya ukuti tulatwalilila ukuzizimizya nanti icakuti Satana atalata ukutulwisya. U mulandu ci? Pano umupasi wa muzilo ukatwazwa umu nzila ziili. Ica kutandikilako, ukatupeela amaka ya kuzizimizya intazi. Cakwe ciili, a maka akatwazwa ukutwalilila ukuombela Yeova ukufika umu nsi ipya. Lekini fwandi twalondesya ukuti umupasi wa muzilo watwazwa.