CIPANDE CA KUSAMBILILAMO 48
“Mwaelenganya pa Vya ku Nkoleelo”
“Leka amanso yako yalolekesye uku nkolelo, nu kutontomezya amanso apalungatane nawe.”—MAPI. 4:25.
LWIMBO NA. 77 Luswepo ku Yantu Aaya Umu Mfinzi
VINO TUMASAMBILILAPO *
1-2. Tungalondela uli ukusunda ukwaya pa Mapinda 4:25? Langililini.
ELENGANYINI pa vilangililo vii vitatu. Nkazi uwacikoloci akwelenganya pa vintu ivisuma ivyamucitikile umu umi. Nanti icakuti ivintu iivimutalila, watwalilila ukuombesya umu mulimo wakwe Yeova. (1 Kol. 15:58) Cila wanda akwelenganya ukuti ali pamwi nu lupwa ni vyuza umu Paladaise. Nkazi muze nawe wiusya ukuti umwi umu cilongano wacisile vimwi ivyamusosizye sana, nomba wapingulapo ukukanaelenganya pali vino vyacitiike. (Kolo. 3:13) Umwina wiusya iviipe vino wacisile uku cisila, lelo wapingulapo ukutwalilila ukuya uwa cisinka kuli Yeova.—Masa. 51:10.
2 A muli vyani muno Aina Klistu yaa yatatu iyakolanamo? Yonsi kwene yakwiusya ivyayacitikiile mpiti, lelo yasikutwalilila ukwelenganya pali vivyo kwene. Asi mulandu na vivyo, yakutwalilila ukwelenganya pa vya ku nkoleelo.—Belengini Mapinda 4:25.
3. U mulandu ci uno tulinzile ukulaelenganyizizya pa vya ku nkoleelo?
3 U mulandu ci uno cacindamila ukulaelenganya pa vya ku nkoleelo? Wakwe vivi kwene vino umuntu atanga apite ningo ndi cakuti akulolekesya uku cisila, avino naswe kwene tutanga tutwalilile ukuombela Yeova ndi cakuti tukwelenganya pali vino vyatucitikiile nanti vino twacisile ku cisila.—Luka 9:62.
4. I vyani vino tumasambililapo umu cipande cii?
4 Mu cipande cii, tumalanda pa vintu vitatu ivingalenga twaika sana amano pa vintu vya ku cisila. Ivintu vii a (1) kulaelenganya sana pali vino ivintu vyali mpiti, (2) kutwalilila ukusokela yauze, na (3) kutwalilila ukuyuvwa uwa mulandu. Mu vintu vii vyonsi vitatu, tumalola vino ivisinte vya muli Baibo vingatwazwa “ukwilila vya cisila nga nu kwika mwenzo onsi ku vya nkolelo.”—Filipi 3:13.
KULAELENGANYA SANA PALI VINO IVINTU VYALI MPITI
I vyani vingatulesya ukwika amano ku vintu vya ku nkoleelo? (Lolini mapalaglafu 5, 9, 13) *
5. I vyani vino tutalinzile ukucita vino ilembelo lyakwe Kasambilizya 7:10 likalanda?
5 Belengini Kasambilizya 7:10. Cikomo cii cisilanda ukuti i ciipe ukuyuzya ukuti “Uzye pacani ivintu vyali ningo mu manda yampiti?” Ukwiusya ivisuma ivyacitiike mpiti u wila ukufuma kuli Yeova. Lelo icikomo cii cikalanda ukuti: “Mutauzya muti, ‘Uzye pacani ivintu vyali ningo mu manda yampiti ukuluta ivintu vya mu manda ya ndakai?’” Fwandi tulinzile ukucenjela ukukanakolanya vino ivintu vyali mpiti umu umi witu kuli vino ivintu vili ndakai nu kwelenganya ukuti vikuya vikwipilako sile lyene.
Pa cisila ca kufuma umu Ejipti, i vyani vino Aina Izlaeli yaluvyanyizye? (Lolini palaglafu 6)
6. U mulandu ci uno citazipila ukwelenganya ukuti ivyatucitikilanga kucisila vyali ningo? Langililini.
6 U mulandu ci uno citazipila ukwelenganya ukuti ivyatucitikilanga kucisila vyali ningo? Cingalenga twaelenganya sile pa visuma ivyatucitikiile mpiti nu kwilila uku viipe. Elenganyini pali vino vyacitikiile aina Izlaeli. Lino yafumile umu Ejipti, iilile zuwa pali vino ivintu vyayatalile. Yene yelenganyanga sile pa vyakulya ivisuma vino yaipakizyanga. Yalanzile ukuti: “Swemo twiusya inswi zino twaipakizyanga ku Eguputo ukwaula kuviculila. Ni viimbi, ni vibiliki, na yaliiki na kanyense, pali pamwi na galiki.” (Mpe. 11:5) Nomba uzye icacumi yalyanga “ukwaula ukuviculila?” Awe foo. Aina Izlaeli yacuulanga sana nupya yali aazya umu Ejipti. (Kufu. 1:13, 14; 3:6-9) Lelo, yiliile pali vyonsi vino yacuulanga nu kuluuka ivintu vya mpiti. Yasoolwilepo ukwika amano ku vintu vya mpiti ivisuma ukucila ukwika mano kuli vino Yeova wayacitilanga. Yeova ataatemilwe pali vino yacitanga.—Mpe. 11:10.
7. I vyani vyazwilizye nkazi umwi ukukanaelenganya ukuti ivintu vyali ningo uku cisila?
7 Tungacita uli pakuti tutaelenganya ukuti ivintu vyali ningo uku cisila? Elenganyini pali vino vyacitikile nkazi uwatandike ukuombela apa Betele ya ku Brooklyn umu 1945. Lino papisile imyaka imwi, wizile atwalwa uku mwina uwaombelanga apa Betele kwene nupya yaombiile pamwi apa myaka iingi. Lelo, umu 1976, ya iya izile iyatandika ukulwala. Walanzile ukuti lino ya iya izile iyamanya ukuti yali umu kufwa, yamukomelizye pali vino vyali nu kumwazwa nga yafwa. Yalanzile yati: “Twali ni nsansa umu cupo citu. Antu aingi yataatazile yaipakizyepo insansa zii.” Nupya yamunenyile nu kuti: “Utalatala uwilile ivintu vino twacitilanga pamwi, lelo utaikako sana mano nanti ukulaelenganyapo sana. Lino insita ikuya ikupita ulanda ulaya ukucepako. Utalinzile ukutoovoka nu kuvwa uyi pali vino vyakucitikila. Uwatwalilila ukuya ni nsansa pa nsita yonsi ino twaombela Yeova capamwi. Ukwiusya ivyatucitikile u wila ukufuma kuli Leza.” Uzye musikuzumilizya ukuti kwali u kukomelezya ukusuma sana kuu?
8. Uzye ukuvwila amazwi yakwe iya kwazwile uli nkazi wii?
8 Nkazi uvwilile vino iya wamunenyile. Watwalilile ukuombela Yeova na ucisinka ukufika na lino wizile afwa ala ali ni myaka 92. Imyaka inono lino atatala wafwa walanzile ukuti: “Nga nelenganya pa myaka 63 ino naombela Yeova mu mulimo wa nsita yonsi, ningalanda ukuti naya sana ni nsansa.” U mulandu ci? Walondolwile ukuti: “Tungaya ni nsansa pa mulandu wakuti twaya umu lupwa lwa ina na ya nkazi nupya twakwata upalilo wa kwizaikala pamwi nayo umu Paladaise pano nsi nu kuombela Kaumba Mukalamba, Leza wa cumi wenga sile Yeova, amanda pe.” * Tungasambilila ivingi sana kuli nkazi wii uwatwalilile ukwika mano pa malayo yakwe Yeova.
MUTAATWALILILA UKUSOKELA YAUZE
9. Wakwe vino ilembelo lyakwe Levi 19:18 likalanda, a lilaci lino cingatutalila ukweleela uwatatuluvyanya?
9 Belengini Levi 19:18. Insita zimwi cikatutalila ukweleela lino umwi uwa mu cilongano, cuza witu nanti lupwa watuluvyanya. Nkazi umwi wabepizye nkazi muze ukuti watamwiyila ulupiya. Pa cisila, nkazi uwamubepizye walenzile uweleelo. Nomba nkazi wino yabepizye wasosile sana nupya watwalilile ukwelenganya pali vino vyacitike. Uzye namwe mwatala mwayuvwapo vivyo? Nanti icakuti ca musango uwo citatala catucitikilapo, sweingi twatwalilile ukusoka nu kulanda ukuti tutalatala tweleele umuntu uwatuluvyanyizye.
10. I vyani vingatwazwa nga twasoka?
10 I vyani vingatwazwa nga twasoka? Cino tulinzile ukwiusya i cakuti, Yeova akalola ivintu vyonsi. Akamanya vino tukupitamo nanti sile lino yamwi yatufyenga. (Ayeb. 4:13) Akauvwa sana uyi nga tukucuula. (Eza. 63:9) Nupya walaya ukuti alafumyapo vyonsi ivikalenga twacuula pa mulandu nu lufyengo.—Umbw. 21:3, 4.
11. I visuma ci ivilacitika nga twata ukusokela yauze?
11 Nupya tukalonda nu kulaiusya ukuti nga tusikutwalilila ukusoka, ivintu vikatuzipila. Vikwene avino na nkazi wino yabepizye wizile aiusya. Mu kuya kwa nsita, wizile aeleela nkazi uwamubepizye nupya watiile ukumusokela. Wizile ailuka ukuti ndi cakuti tukweleela yauze, naswe kwene Yeova alatweleela. (Mate. 6:14) Wamanyile ukuti nkazi waluvyanyizye sana pali vino wacisile, lelo wasolwilepo ukumweleela. Ni cacitike i cakuti nkazi wizile aaya ni nsansa nupya watwalilile ukuombela Yeova.
MUTALINZILE KUTWALILILA UKUYUVWA UWA MULANDU
12. I vyani vino tukasambilila pali 1 Yoane 3:19, 20?
12 Belengini 1 Yoane 3:19, 20. Swensi kwene tukayuvwa amulandu insita zimwi. Yamwi yakayuvwa amulandu pa mulandu na vino yacisile lino yataatala yasambilila icumi. Yamwi nayo yakayuvwa amulandu pa viipe vino yacisile pa cisila ca kubatiziwa. (Loma 3:23) Kuya kwene, tukalonda ukucita ivisuma. Lelo “Lili lingi swensi kwene tukaluvyanya.” (Yako. 3:2; Loma 7:21-23) Nanti icakuti tusiuvwa ningo ukuyuvwa amulandu, insita zimwi mungafuma ivisuma. U mulandu ci? Pano nga tukuyuvwa amulandu, cingalenga tusenuke nu kulondesya ukukanaswilizyapo vino twaluvyanyizye.—Ayeb. 12:12, 13.
13. U mulandu ci uno tutalinzile ukutwalilila ukuyuvwa sana amulandu?
13 Lelo insita zimwi, tungatwalilila ukuyuvwa sana amulandu nanti icakuti twalapila na Yeova watweleela. Kuyuvwa vivyo kwaipa sana. (Masa. 31:10; 38:3, 4) U mulandu ci? Elenganyini pali nkazi umwi uwatwalilile ukuyuvwa uwa mulandu pali vino waluvyanyizye mpiti. Watiile: “Nayuvwile ukuti i casilesile ukuombesya umu mulimo wakwe Yeova pano namanyile ukuti ntalapusuka.” Sweingi tungayuvwa wakwe vino nkazi wii wayuvwanga. Fwandi tulinzile ukucenjela pakuti tutatwalilila ukuyuvwa sana amulandu. U mulandu ci? Pano Satana angatemwa sana nga twata ukuombela Yeova, nanti icakuti Yeova wene watweleela!—Loliniko na 2 Kol. 2:5-7, 11.
14. Uzye tungasininkizya uli ukuti Yeova akalonda ukutweleela?
14 Nanti ciye vivyo, limwi tungasakamala ukuti, Uzye kwene Yeova wanjeleela? Nga mwayuzya iuzyo lii, ale cikulangilila ukuti Yeova angamweleela. Imyaka iingi uku cisila, Lupungu Lwa Mulinzi lwalanzile ukuti: “Limwi tungaswilizyapo ukucita iviipe ivili vimwi kwene pa nsita izingi, cingaya a pa mulandu wakuti tutaatile ukucita ivintu vivyo lino tutatala twatandika ukuombela Leza. . . . Nanti ciye vivyo, mutalinzile ukutoovoka. Mutalinzile ukulaelenganya ukuti mwacita uluyembu luno Yeova atanga aeleele. Vii avino Satana akalonda mwaelenganya. Ukuvwa ulanda nu uyi pa viipe vino mwacita, kungalangilila ukuti musi antu aipe sana yano Yeova angafilwa ukweleela. Mwatwalilila ukuya aicefye nu kulapepa kuli Leza ukuti amweleele, kumwazwa ukuya na kampingu musanguluke nupya. Mwalenga Yeova amwazwa lyonsi lino mwakwata intazi, wakwe vivi kwene vino umwana akautukila kuli yaisi lino wakwata intazi, na Yeova alamupeela vino mukulondekwa pa mulandu nu luse lwakwe.”
15-16. Uzye yamwi yakayuvwa uli nga iluka ukuti Yeova wayeleela?
15 Aomvi yakwe Yeova aingi yazana ukuti yakakomeleziwa nga yamanya ukuti Yeova wayeleela. Imyaka imwi ukucisila, umwina umwi wakomeleziwe sana pali vino wabelenzile mu cipande cimwi cakuti: “Baibo Ikaavwa Antu Ukusenuka.” Umu cipande cii, nkazi walondolwile ukuti pa mulandu ni viipe ivyamucitikiile mu umi, camutalile ukuzumila ukuti Yeova angamutemwa. Nupya watwalilile ukulayuvwa vivyo kwene pa myaka iingi na pa cisila ca kubatiziwa. Lelo lino welenginye pa mfwa yakwe Yesu, calenzile azumile ukuti Yeova wamutemwa sana. *
16 Uzye ivyacitikile nkazi vyazwile uli umwina? Umwina walemvile ukuti: “Lino nali umwance, natemilwe sana kutamba vikope vya ucizelele. Likwene sile, naciswilizyepo ukutamba ivikope kwene vii. Nanenyile ya eluda ukuti yangazwe, nupya nkwezya na maka ukucimvya intazi ii. Ya eluda yangazwile ukuzumila ukuti Leza wantemwa nupya akalonda ukunjeleela. Nomba insita zimwi nkailola uwasilesile, nupya nkalola kwati Yeova atantemwa. Ukubelenga ivyacitikiile nkazi wii, kwangazwa sana. Ndakai lyene niluka ukuti nga nkwelenganya ukuti Leza atalanjeleela ale nkulanda ukuti imfwa yakwe Yesu itakwata amaka pa maifyo yane. Naputwile icipande cii pakuti nabelenga nu kwelenganyapo lyonsi lino nayuvwa ukuti Yeova atantemwa.”
17. Uzye umutumwa Paulo wacisile uli pakuti atatwalilila ukulayuvwa uwa mulandu?
17 Malyasi ya musango uu yakatwiusyako pa mutumwa Paulo. Lino atatala waya umwina Klistu, wacisile iviipe ivingi sana. Paulo wiusyanga vino wacisile, nomba ataatwalilile ukwelenganya pali vivyo kwene. (1 Tim. 1:12-15) Wazumiile ukuti angeleelwa ukupitila mu mfwa yakwe Yesu, nu kuti impolelwa yali u wila uno Leza wamupeezile. (Gala. 2:20) Fwandi Paulo ataatwalilile ukuyuvwa uwa mulandu, lelo watwalilile ukwika sana amano ku kuombela Yeova.
MWAIKA MANO PA VYA KUNKOLEELO
Lekini twaika amano pali vino vilacitika uku nkoleelo (Lolini mapalaglafu 18-19) *
18. I vyani vino twasambilila mu cipande cii?
18 I vyani vino twasambilila umu cipande cii lino itukulanda pa vingalenga twaika sana amano pa vintu vya ku cisila? (1) Ukwelenganya pa visuma ivyacitike mpiti u wila ukufuma kuli Yeova, nomba asi mulandu na vino ivintu vivyo vyazifile, ivintu umu nsi ipya vilazipisya ukuluta. (2) Antu yauze yangatusosya, nomba nga twasoololapo ukuyeleela, tungatwalilila ukwika amano ku kuombela Yeova. (3) Ukuyuvwa sana amulandu kungalenga tutaaombela Yeova nu luzango. Fwandi, wakwe Paulo, naswe kwene tulinzile ukumanya ukuti Yeova watweleela.
19. Uzye twamanya uli ukuti umu nsi ipya mutalaya ukwiusya ivyatucitikiile mpiti ivyalenganga twauvwa uyi?
19 Twakwata upalilo wa kwikala amanda pe. Nupya lino tulaya umu nsi ipya, tutalaiusya ivili vyonsi ivilalenga twauvwa uyi. Pa nsita iyo, Baibo ikalanda ukuti: “Ivyampiti vyonsi vilililika, yatalaviusya nupya.” (Eza. 65:17) Tale elenganyini: Swe yamwi itukotela umu kuombela Yeova, lelo umu nsi ipya tulaya ance nupya. (Yobo 33:25) Fwandi, lekini tutaika amano pali vino vyatucitikiile mpiti. Lelo, lekini twaika amano pali vino vilacitika uku nkoleelo nupya twaombesya pakuti tukaye umu nsi ipya!
LWIMBO NA. 142 Twalukutaila Ukuti Vintu Vilaziipa
^ pala. 5 Cingazipa sana ukwelenganya pa vintu ivyatucitikila umu umi. Nomba nga tukwelenganya sana pali vino vyatucitikile, tungata ukuombela Yeova ukulingana na vino tulinzile ukumuombela. Nanti limwi tungata ukwelenganya pa ulayo wakwe Yeova uwakuti kulaya Paladaise. Mu cipande cii, tumalanda pa vintu vitatu vino tutalinzile ukucita ivingalenga twaelenganya sana pali vino vyatucitikiile. Tumalola vino ivyalembwa muli Baibo ni vyacitikiile aina na ya nkazi vingatwazwa ukukanaelenganya pa vintu vii.
^ pala. 8 Lolini Lupungu Lwa Mulinzi lwakwe Julai 1, 2004, pa mafwa 23-29.
^ pala. 15 Lolini Lupungu Lwa Mulinzi lwakwe Ogasiti 1, 2011, mafwa 20-21.
^ pala. 57 ULONDOLOZI WA CIKOPE: Kulaelenganya sana pali vino ivintu vyali mpiti, kutwalilila ukusokela yauze nu kutwalilila ukuyuvwa uwa mulandu vyaya kwati ivisendo ivinyome ivingalenga tufilwe ukutwalilila ukupita umu nzila ya ku umi.
^ pala. 64 ULONDOLOZI WA CIKOPE: Ndi cakuti twata ukucita ivintu vii, tutalayuvwa anyomelwe nupya, tulaya ni nsansa nupya tulaya na maka. Lyene tulika amano ku vya ku nkoleelo.
