1. Iuzyo ci lino tulinzile ukuyuzya?

UZYE insita zimwi mukasakamala pali vino vyasya vicitike likwene, wakwe ukononwa kwa mipepele ya ufi, ukuzanza kwakwe Gogi wa ku Magogi ni nkondo ya Amagedoni? Uzye mukatala imuyuzyapo ukuti, ‘Uzye ndatwalilila ukuya nu utailo ukome lino ivintu vii vilacitika?’ Ndi cakuti mwatala mwelenganyapo pa mauzyo yaa, amazwi yano Yesu walanzile yano tumalandapo aali umwi lembo apafumile icipande yamamwazwa sana. Yesu wanenyile asambi yakwe ukuti: “Mutasakamala. Tailini Leza.” (Yoa. 14:1) Utailo ulatwazwa ukuzizimizya asi mulandu ni vilacitika uku nkoleelo.

2. Tungakomya uli utailo witu, nupya ivyani vino tumalandapo umu cipande cii?

² Nga twelenganya pali vino tukacita ndakai nga twakwata intazi izingezya utailo witu, tungamanya ndi cakuti utailo witu ulatwalilila ukuya ukome. Nga twelenganya pali vivyo, tulamanya muno tulinzile ukuombela pakuti tukomye utailo witu. Lyonsi lino twazizimizya intazi, utailo witu ukakomelako. Ukucita vivyo kulatwazwa ukuzizimizya intazi zino tungakwata uku nkoleelo. Umu cipande cii tumasambilila pa vintu 4 ivyacitikile asambi yakwe Yesu ivyalangilile ukuti yalondekwanga ukuya nu utailo ukome. Tumalanda na pali vino tungazizimizya intazi kwene zizyo ndakai na vino ukucita vivyo kungatwazwa ukuzizimizya intazi izingiza uku nkoleelo.

3. Wakwe vino Mateo 6:30, 33 ikalanda, i cisinka ci icikalanda pa utailo cino Yesu walanzilepo?

³ Caya sile ningo ukuti umutwe wa lupwa alondesya ukupekanyizizya ama lupwa lwakwe ivyakulya, ivyakuzwala, nu  mwakwikala. Ukucita vii kutanguka sana sana umu manda kwene yaa atale. Aina yamwi na ya nkazi incito zyasila nupya yakaezya na maka ukulonda incito zyuze nomba yasizizana. Yamwi nayo yakakana ukwingila incito zino aina Klistu yatalinzile ukuomba. Ndi cakuti ivya musango uu vyacitika, tukalondekwa ukutaila ukuti Yeoa alatupeela vino tukulondekwa pakuti tusakamale ulupwa lwitu. Yesu walondolwelile ningo asambi yakwe icisinka cii umwi Lyasi lya pa Mwamba. (Belengini Mateo 6:30, 33.) Nga twasininkizya ukuti Yeova atalatala atusye, cilalenga twike mano uku kumuombela. Nga twalola vino Yeova akutwazwa muli vino tukalondekwa, tulamulola ukuti u wa cumi cumi nupya tulapalama kuli aliwe.

4-5. I cani icazwile amu lupwa lumwi lino yasakamile pa mulandu wakuti yatakweti vino yalondekwanga?

⁴ Lolini vino amu lupwa lumwi ulwa ku Venezuela yailoliile vino Yeova wayazwile lino yasakamalanga pali vino yalondekwanga. Mpiti ulupwa lwakwe ya Castro yakwatanga impiya izingi lino yaombanga pa famu ino yakweti. Lyene aonsi yamwi aali ni zyamfuti yaposile famu nu kuyazinga. Ya Miguel yatiile: “Lyene tukalima sile apa ncende inono ino twalenga sile kuli umwi. Cila wanda nkapepa kuli Yeova ukuti atupeele vino tukulondekwa pa wanda kwene uwo.” Ivintu vyatala sana umu lupwa lwakwe ya Castro, nomba yataila sana Tata witu uwaya nu kutemwa ukuti wakulayasakamala muli vino yakalondekwa cila wanda, nupya lyonsi yakazanwa umu kulongana nu kuombako umulimo wa kusimikila. Yakakoleezya Uwene inkoleelo nupya Yeova akayapeela vino yakulondekwa.

⁵ Pa nsita yonsi ino ivintu vyayatalila, ya Miguel na aci ya Yurai, yakaika mano pali vino Yeova akayasakamala. Insita zimwi Yeova akaomvya aina na ya nkazi ukuyapeela vino yakulondekwa nanti ukwazwa ya Miguel ukuzana incito. Pa nsita zyuze napo Yeova akaomvya iofesi lya musambo ukuyazwa muli vino yakulondekwa. Yeova atatala wayalekelezya. Cii calenga yailolele vino utailo wa lupwa lwao wakomelako. Pa cisila ca kulanda pa nzila imwi ino Yeova wayazwililemo, umwanao umukazyana Yoselin watiile: “Cikatukomelezya sana ukulola vino Yeova watwazwile. Nkalola Yeova ukuti acuzane nupya nataila ukuti lyonsi alangazwa.” Walanzile nu kuti: “Intazi zino ulupwa lwitu lwazizimizya zyalenga tuipekanye uku ntazi zino tungakwata uku nkoleelo.”

6. Mungakomya uli utailo winu nga mutakweti impiya izya kukalila vino mukulondekwa?

⁶ Uzye cikumutalila ukuzana impiya? Nga vino cili ale imikalile yatimitalila sana. Nomba, mungaomvya insita kwene iyo ukukomya utailo winu. Pepini kuli Yeova nu kubelenga amazwi yakwe Yesu aaya pali Mateo 6:25-34 nupya mwelenganyepo sana. Elenganyini pa visuma vimwi ivikacitikila  yamwi ndakai ivikalangilila ukuti Yeova akaavwa yayo aakamuombela umu milimo ipusanepusane. (1 Kol. 15:58) Nga mwacita vivyo cilalenga mutaile sana ukuti Yeova alamwazwa wakwe vivi kwene vino wazwile yauze aakweti intazi ili imwi na ino mukweti. Wamanya vino mukalondekwa nupya wamanya na vino angamucitila. Nga mwalola vino Yeova akumwazwa, utailo winu ulakomelako pakuti muce muzizimizye intazi izikulu izingiza uku nkoleelo.—Haba. 3:17, 18.

7. Ukulingana na Mateo 8:23-26, uzye icimuza icipisye calenzile uli utailo wa asambi yakwe Yesu ukweziwa?

⁷ Lino Yesu wali umu wato na asambi yakwe icimuza cakatwike umu kupumikizya, Yesu waomvizye insita ii ukuyazwa ukumanya ukuti yalinzile ukukomya utailo wao. (Belengini Mateo 8:23-26.) Icimuza cali icikalamba sana icakuti na manzi yatandike nu kwingila umu wato nomba Yesu wene ala watalala. Lino asambi yakwe yuvwile intete nu kuzyula umwene ukuti ayapususye, wayakalipile ati: “U mulandu ci uno mukuvwila intete, mwe ya utailo unono?” Asambi yaya auvwile intete yalinzile ukwiluka ukuti Yeova wali nu kupususya Yesu alino na yonsi yano wali nayo. I vyani vino tungasambililako? Ukuya nu utailo ukome kungalenga tucimvye intazi izikome izingaya wa “cimuza icikalamba”.

8-9. Uzye nkazi Anel weziwe uli, nupya i cani camwazwile?

⁸ Elenganyini vino utailo wakwe nkazi Anel akaikala uku Puerto Rico wakomiileko lino wazizimizye intazi. Intazi ii yali i cimuza cacumicumi. Intazi ii yatandike umu 2017 lino imvula ya cimuza yononyile ing’anda yakwe nkazi Anel. Nupya pa mulandu wa cimuza kwene cii, incito yasizile. Nkazi Anel watiile: “Pa nsita iya lino nali ni ntazi nasakamikwanga sana, nomba nasambilile ukutaila muli Yeova ukupitila umu kupepa nu kukanaleka intazi zintoovole.”

⁹ Nkazi Anel walanzile ukuti icuvwila naco camwazwile ukuzizimizya intazi zino wakweti. Watiile: “Ukulondela utunguluzi wi uvi lyakwe Yeova kwangazwa ukuya umuteekele. Yeova wangazwile ukuomvya aina na ya nkazi aankomelezyanga nu kumpeela vino nalondekwanga.” Nupya watiile: “Yeova wampeezile ivintu ivingi sana nupya utailo wane wakomiileko.”

10. I vyani vino mungacita ndi cakuti mwakwata intazi ikulu?

¹⁰ Uzye imukwata intazi ikulu? Limwi mukucula pa mulandu nu uzanzo wa kuiponela. Limwi mwalwala ulwale uwipisye uwalenga mutoovoke nupya mutamanyile ivya kucita. Insita zimwi mungasakamikwa sana, nomba mutalinzile ukuleka ukusakamikwa kuko kumulesye ukutaila Yeova. Mwapepa pakuti mupalame kuli aliwe. Mwakomya utailo winu lino mukwelenganya pali vino Yeova wamwavwile  mpiti. (Masa. 77:11, 12) Mungataila ukuti atalatala amusye.

11. U mulandu ci uno tulinzile ukulalondesya ukuvwila yano yakatungulula?

¹¹ I cani cuze icingamwazwa ukuzizimizya intazi? Nkazi Anel watiile, i cuvwila. Mwataila yano Yeova na Yesu yataila. Insita zimwi, limwi aonsi aasontwe yangatunena ukucita ivintu vimwi vino swemo tungalola ukuti vitacindime. Nomba Yeova akapaala yonsi aya ni cuvwila. Ivyaya muli Baibo ni vyacitikila aomvi yakwe Yeova acisinka vikalenga tusininkizye ukuti cuvwila cikapususya. (Kufu. 14:1-4; 2 Mila. 20:17) Mwaelenganya pa vintu vivyo. Ukucita vivyo kulalenga mwalondesya ukuvwila utunguluzi wi uvi lyakwe Yeova pali ino nsita alino nu ku nkoleelo. (Aeb. 13:17) Na cico cilalenga mutatiina ucuzi ukalamba uuli umupipi.—Mapi. 3:25.

12. Uzye ilembo lyakwe Luka 18:1-8 likalangilila uli ukulemana ukwaya pa utailo nu kuzizimizya nga yatufyenga?

¹² Yesu wamanyile ukuti ulufyengo lwali nu kwezya utailo wa yasambi yakwe. Pakuti ayazwe ukuzizimizya ulufyengo luu, wayapeezile icilangililo icaya umwi buku lyakwe Luka. Yesu walanzile pali mukamfwilwa uwatwalilile ukupapata kuli kapingula aatali umulungame ukuti akamupingule ningo. Wasininkizye ukuti kapingula wiya wali nu kumwavwa ndi cakuti watwalilila ukumupapata. Kapingula wasusile wazumila ukucita vino mukamfwilwa wamulenzile. I vyani vino tukusambililako? Yeova ataya nu lufyengo. Yesu watiile: “Uzye fwandi Leza, atalalenga ukuti kuye umulinganya pa yantu yakwe asoololwe aakalilila kuli aliwe kasanya nu usiku?” (Belengini Luka 18:1-8.) Yesu walanzile nu kuti “Uzye lino Umwana wa muntu aliza, alazana utailo wa musango uu pano nsi?” Ndi cakuti yatufyenga, tulinzile ukulanga ukuti twaya nu utailo ukome lino tuli ateekele nu kuya nu mute wakwe mukamfwilwa. Nga tukweti utailo wa musango uwo, tungasininkizya ukuti Yeova alatwazwa. Tulinzile nu kutaila ukuti ipepo lyakwata amaka. Insita zimwi, mapepo itu yangasukwa umu nzila zino tusikwenekela.

13. Uzye ipepo lyavwile uli ulupwa lumwi luno yacuzizye?

¹³ Elenganyini pali vino vyacitikiile nkazi Vero aakaikala uku Democratic Republic of the Congo. Ya Vero, ya iya aasi ya Nte nu mwanao umukazyana uwa myaka 15 yapuusile umu muzi lino asilika yazanzile umuzi wao. Lino yali umu nzila, yazanyile asilika aaimike nu kuyatiinya ukuti yamayakoma. Lino ya Vero yatandike ukulila, umwanao umukazyana watandike ukuyateekezya ala akupepa kuli Yeova umwi izwi lyuvwike. Lino wamazile ukupepa, umukalamba wa asilika wamuuzizye ati, “We mwance we, a weni uwakusambilizya ukupepa? Waswike ati: “Ya mayo ansambilizya ukupepa  umu nzila iyalondololwa pali Mateo 6:9-13.” Umukalamba wa asilika watiile: “Mupite umutende pamwi na avyazi yako, nupya Yeova Leza winu amucingilile.”

14. I vyani vingezya utailo witu, nupya i cani cingatwazwa ukuzizimizya?

¹⁴ Ivya musango uu vikalenga twalola vino ipepo lyacindama. Nomba nga ndi cakuti ipepo linu litaswikwe zuwa nanti ukwasukwa umu nzila ino mukulonda? Wakwe mukamfwilwa uwa mu cilangililo cakwe Yesu, mwatwalilila ukupepa, ukutaila ukuti Leza atalatala amusye nu kuti alasuka amapepo inu pa nsita ilinge. Mwatwalilila ukulenga umupasi wakwe Yeova. (Filipi 4:13) Mwaiusya ukuti likwene sile Yeova alamupaala nupya mulilila na vino mwaculanga. Ndi cakuti Yeova wamwazwa ukuzizimizya intazi ndakai, mulakwata amaka ya kuzizimizya intazi iziliza uku nkoleelo.—1 Pet. 1:6, 7.

15. Ukulingana na Mateo 17:19, 20, iintazi ci ino asambi yakwe Yesu yakweti?

¹⁵ Yesu wasambilizye asambi yakwe ukuti utailo wali nu kuyazwa ukucimvya intazi. (Belengini Mateo 17:19, 20.) Pa nsita imwi yafizilwe ukufumya iviwa nanti cakuti yacitanga vivyo pa nsita izingi. I cani calenzile? Yesu walondolwile ukuti yalondekwanga ukukwata utailo ukome. Wayanenyile ukuti nga yakwata utailo ukome yali nu kucimvya intazi izikulu wa mwamba. Na ndakai kwene, tukakwata intazi izingi izingalenga twafilwa ukuombesya.

16. I cani cavwile ya Geydi ukuzizimizya lino ya iya yayakomile?

¹⁶ Uvwini ivyacitikiile nkazi Geydi uwa ku Guatemala. Ya iya ya Edi yayakomile ale yakufuma umu kulongana. Uzye utailo wavwile uli ya Geydi ukuzizimizya ulanda uno yakweti? Yatiile: “Ipepo likangavwa ukunena Yeova masakamika yane yonsi, na cico cikalenga naya nu mutende. Nkalola vino Yeova akansakamala ukuomvya ya lupwa yane na ina umu cilongano. Ukwika amano ku mulimo wakwe Yeova kukalenga ntaika sana amano ku viipe vino vyancitikila nupya kukalenga ntasakamikwa pali vino vilacitika mutondo. Ivyancitikila vyalenga nsambilile ukuti asi mulandu ni ntazi izingiza uku nkoleelo, Yeova, Yesu na ina umu cilongano yalangazwa pakuti ntwalilile ukuzizimizya.”

17. Tungacita uli ndi cakuti twakwata intazi ikulu sana?

¹⁷ Uzye mukuloosya pa mulandu wakuti mwafwilwa umutemwikwa winu? Mwakomya utailo winu umu kutuutuluka lino mukubelenga ivipande vya muli Baibo ivikalanda pali yayo aatutulwilwe. Uzye muli nu ulanda pa mulandu wakuti lupwa winu wazingwa umu cilongano? Mwaisambilizya pakuti musininkizye ukuti inzila ino Yeova akatusundilamo ali yampomvu. Asi mulandu ni ntazi  zino mukweti, mungalenga intazi kwene iyo imwazwe ukukomya utailo winu. Mwanena Yeova vyonsi vino mukuyuvwa. Mutaitalusya ku antu, lelo mwapalama sana ku ina na ya nkazi. (Mapi. 18:1) Mwacita ivintu ivingalenga muzizimizye intazi nanti cakuti ukucita ivintu vivyo kungalenga mulile nga mwiusya ivyacitike. (Masa. 126:5, 6) Mwatwalilila ukuzanwa mu kulongana, kuombako umulimo wa kusimikila nu kubelenga Baibo. Nupya mwatwalilila ukwelenganya pa vintu ivisuma vino Yeova walaya ukumucitila uku nkoleelo. Nga mwalola vino Yeova akumwazwa ndakai, utailo winu ulaya ukukomelako.

18. I vyani vino mungacita ndi cakuti mwalola ukuti utailo winu usi ukome sana?

¹⁸ Ndi cakuti intazi ino mwakweti mpiti nanti ino mukweti ndakai yalenga mulole ukuti mutakwata utailo ukome, mutalinzile ukutoovoka. Mwalola ukuti intazi iyo ingamwazwa ukukomya utailo winu. Mwalenga Leza wakwe vino atumwa yakwe Yesu yacisile, yalenzile ukuti: “Twavwe ukuya nu utailo ukome.” (Luka 17:5) Nupya mwaelenganya pa yantu yano itulandapo umu cipande cii. Mwaiusya insita zyonsi zino Yeova wamwazwile wakwe vino ya Miguel na ya Yurai yacisile. Mwaya nu mute wa kupepa kuli Yeova sana sana lino mukwata intazi ikulu, wakwe vino ya Anel nu mwana wakwe ya Vero yacisile. Nupya wakwe vino ya Geydi yacisile, mwalola ukuti Yeova akatwazwa ukuomvya ya lupwa na ya cuza itu. Ndi cakuti mwaleka Yeova ukumwazwa ukuzizimizya intazi zino mukweti ndakai, cilalenga musininkizye sana ukuti alamwazwa ukuzizimizya intazi zili zyonsi zino mulakwata uku nkoleelo.

19. I vyani vino Yesu wasininkizye, nupya i vyani vino naswe tungasininkizya?

¹⁹ Yesu wazwilizye asambi yakwe ukumanya muno yalondekwanga ukuya nu utailo ukome, lelo atatwisikanga ukuti Yeova wali nu kuyazwa ukuzizimizya amezyo yano yali nu kukwata uku nkoleelo. (Yoa. 14:1; 16:33) Wamanyile ukuti utailo ukome wali nu kulenga amwi umba ilikalamba ukupusuka ucuzi ukalamba. (Kuso. 7:9, 14) Uzye mulaya pa yantu yayo aalapusuka? Ndi cakuti mukucita vyonsi vino mungakwanisya ndakai ukukomya utailo winu, Yeova alamwazwa ukupusuka.—Aeb. 10:39.