UZYE cikamutalila ukuisambilizya Baibo lyonsi alino nu kuipakizya lino mukuisambilizya? Swensi kwene insita zimwi cikatutalila. Lelo elenganyini pali vino tukacita cila wanda, wakwe ukufulala. Ukufulala kukalondekwa insita na maka, lelo pa cisila tukauvwa ningo. Vikwene ali vino caya nu ku kuisambilizya Baibo, ‘tukaiswefya na manzi aya umwi zwi lyakwe Leza.’ (Efes. 5:26) Lolini vimwi ivingamwazwa:

• Mwatantika ningo insita. Ukuisambilizya Baibo kwaya pa “vintu ivicindamisye” vino Umwina Klistu atalinzile ukutazyela. (Filipi 1:10) Pakuti mutailila insita ino mwatantika, mwalemba insita nu wanda api pepala, nu kwika pano mungalilola zuwa. Nanti mungika alamu kuli foni winu pakuti amwiusyako insita.

• Mwasoolola insita ni nzila iya kuisambilizyamo ivingamuzipila. Uzye i cili kwi icingamuzipila, ukulaisambilizya pa nsita itali nanti pa nsita inono? Mwamanya ningo insita ingamizipila. Mwalondela vino mwatantika. Ndi cakuti muvwa ukasu wa kuisambilizya lino insita iya kuisambilizya yafika, uzye mutanga muisambilizye nanti apa mamineti sile 10? Ukuisambilizya pa nsita inono sile, kukalenga musambilile ivingi sana. Nupya ndi cakuti mwatandika ukuisambilizya, cingalenga mwalondesya ukutwalilila.—Filipi 2:13.

• Mwasoolwela limwi ivya kuisambilizya. Ndi cakuti mukwelenganya pali vino mumaisambilizya pa nsita kwene iyo, ala ‘musikuomvya ningo insita.’ (Efes. 5:16) Mungezyako ukulemba ivisinka nanti malyasi yano mukulonda ukuisambilizya. Ndi cakuti mwazana iuzyo lino mutuvwikisye mungalilemba. Lyene pa cisila ca kuisambilizya, mungalemba ivisinka na vyuze vino mungatemwa ukuisambilizya umuku uze lino mulaisambilizya.

• Mwaitemelwa ukusenuka nga calondekwa. Icicindame sana u kulaisambilizya cila mulungu. Nga cingalondekwa mwasenula uwanda alino ni nsita, nanti malyasi yano mukulonda ukuisambilizya.

Ndi cakuti tukuisambilizya lyonsi tulaipakizya ivisuma. Tulapalama sana kuli Yeova, tulamanya ivya kupingula ningo pa vintu, nupya tulakomeleziwa.—Yoswa 1:8