CIPANDE CA KUSAMBILILAMO 47
LWIMBO NA. 103 Ya Kacema—A Mawila
Mwe Ina—Uzye Mukuombesya Pakuti Mungafikapo Ukuya Eluda?
“Ndi cakuti umwi akulondesya ukuya umwangalizi ala akulonda umulimo usuma.”—1 TIM. 3:1.
VINO TUMASAMBILILAPO
Cipande cii cimalanda pa miyele ino Baibo yalanda ukuti ali ino umwina alinzile ukukwata pakuti afikepo ukuya eluda.
1-2. I milimo ci ino ya eluda yakaomba?
NDI CAKUTI mwemwe aomvi aakatumikila, mufwile mwaombesya pakuti mukwate imiyele iingi iikalondekwa pakuti mufikepo ukuya eluda. Uzye mungaipeelesya ukuomba umulimo uu usuma?—1 Tim. 3:1.
2 I milimo ci ino eluda akaomba? Akaya pa nkoleelo mu mulimo wa kusimikila, akaombesya mu mulimo wa kucema nu kusambilizya, nupya akakomelezya amu cilongano ukupitila muli vino akalanda nu kucita. Fwandi tungalola umulandu uno Baibo ikaamila ya eluda aakaombesya ukuti “ivya upe umu yantu.”—Efes. 4:8.
3. Uzye umwina angafikapo uli ukuya eluda? (1 Timoti 3:1-7; Tito 1:5-9)
3 Mungacita uli pakuti mufikepo ukuya eluda? Imilimo ino umwi wamanya asi ingalenga ukuti afikepo ukuya eluda. Ndi cakuti mukulonda incito, icikalondekwa pakuti mwingile incito iyo, u kumanya sile imilimo ala yamamwingizya incito. Lelo pakuti musontwe ukuya eluda, mutalinzile sile ukuya ya kasimikila nanti ya kasambilizya yasuma. Lelo mulinzile nu kuya ni miyele iikalondekwa pakuti mufikepo ukuya eluda iyaya pali 1 Timoti 3:1-7 na Tito 1:5-9. (Belengini.) Umu cipande cii tumasambilila pa miyele imwi iyalumbulwa apa malembo yaa, kuli kuti: ukupanga izina ilisuma na amu cilongano alino na asi amu cilongano, ukulatungulula ningo amu lupwa, alino nu kuipeelesya ukulaombela amu cilongano.
UKUPANGA IZINA ILISUMA
4. Uzye cikapiliula cani “ukuya uwa kaele”?
4 Pakuti umwi afikepo ukuya eluda “alinzile ukuya uwa kaele,” kuli kuti alinzile ukumanyikwa ukuti waya ni miyele isuma uku ya mu cilongano. Nupya alinzile “ukuya umuntu aakasimikwa ningo uku yantu ya kunzi.” Antu asi ya kapepa yangalanda ivya ufi pali vino mwazumilamo, lelo yatalinzile ukulamilola ukuti mutaya na ucisinka nupya mutaya ni miyele isuma. (Dan. 6:4, 5) Mulinzile ukuyuzya mweineco ukuti, ‘Uzye antu asi ya kapepa alino na amu cilongano yamanya ukuti naya ni miyele isuma?’
5. Uzye mungalanga uli ukuti ‘mwatemwa usuma’?
5 Ndi cakuti ‘mwatemwa usuma,’ mulalola ivisuma muli yauze nupya mulayataizya pa miyele yao isuma. Nupya mulaya ni nsansa ndi cakuti mukucitilako yauze ivintu ivisuma. (1 Tesa. 2:8) U mulandu ci uno cacindamila kuli ya eluda ukuya ni miyele yii? Apa mulandu wakuti yalaomvya insita ikulu uku kucema amu cilongano alino nu kuomba imilimo ino yapeelwa. (1 Pet. 5:1-3) Nanti cakuti yakakwata imilimo iingi, yakaya sana ni nsansa ndi cakuti yakwazwa yauze.—Mili. 20:35.
6. Iinzila ci zino tungalangilamo ukuti ‘tukapokelela aenyi’? (Aebele 13:2, 16; loliniko ni cikope.)
6 Mungalanga ukuti ‘mukapokelela’ yauze ndi cakuti mukucitila yauze ivisuma, ukwikako sile na asi ya cuza inu apalamisye. (1 Pet. 4:9) Lupapulo lwa kulondelezyamo ivyeo lumwi lwalondolola umonsi aakapokelela aenyi ukuti: “Waya ni cikuuku nu ku yantu yano atamanya nupya akaya ni nsansa ukuyama uku ng’anda yakwe.” Mulinzile ukuyuzya mweineco ukuti, ‘Uzye yauze yamanya ukuti nkapokelela aenyi?’ (Belengini Aebele 13:2, 16.) Umonsi aakapokelela, akaazwilizyako aenyi, ukwikako sile na aomvi yakwe Yeova aakaombesya, wakwe angalizi ya viputulwa alino na ya kalanda ya malyasi aenyi.—Utan. 18:2-8; Mapi. 3:27; Luka 14:13, 14; Mili. 16:15; Loma 12:13.
Aina Klistu atwalane yapokelela umwangalizi na mamakwe umu ng’anda yao (Lolini palaglafu 6)
7. Uzye eluda akalanga uli ukuti ‘atatemwa impiya’?
7 “Aatatemwa impiya.” Cii cikupiliula ukuti mutalinzile ukwika sana mano uku kulondesya ivyuma. Asi mulandu mwakwata ivyuma nanti foo, mulinzile ukukolezya Uwene ukucila ukukolezya ivintu vyuze umu umi winu. (Mate. 6:33) Mulinzile ukuomvya insita inu, amaka, alino ni vintu vyuze vino mwakwata uku kupepa Yeova, kusakamala ulupwa lwinu, alino nu ku kuombela amu cilongano. (Mate. 6:24; 1 Yoa. 2:15-17) Mulinzile ukuyuzya mweineco ukuti: ‘Uzye nkalola uli impiya? Uzye nateeka umwenzo uku vintu vino nakwata? Nanti nika sana amano uku kupanga impiya nanti ukulondesya ukukwata ivintu ivingi?’—1 Tim. 6:6, 17-19.
8. Iinzila ci zimwi zino mukalangilamo ukuti mwaya “ni miyele isuma” nupya ‘mukaikaanya’?
8 Ndi cakuti mwaya “ni miyele isuma” nupya ‘mukaikaanya,’ mutalaumilila sile pali vino mukwelenganya. Cii cikupiliula ukuti mutalinzile ukwika sana mano uku kulya, ku kumwa, ku vyakuzwala nu kuiyemvya alino nu ku vyakuizanzya. Musikolanya mikalile ya antu asipepa Yeova. (Luka 21:34; Yako. 4:4) Mukatwalilila ukuya ateekele na lino yauze yamuluvyanya. Asi mwemwe ya “cakolwa”; nupya antu yatamumanya ukuti mukamwesya uwengwa. Mulinzile ukuyuzya mweineco ukuti, ‘Uzye vino nkacita vikalangilila ukuti naya ni miyele isuma nupya nkaikaanya?’
9. Uzye cikapiliula cani “kuya na mano” alino nu kukanaya ni “cimvulunganya”?
9 Ndi cakuti ‘mwaya na mano,’ mukaomvya masunde amu Baibo lino mukupingula pa vintu. Mukaelenganya sana pa masunde amu Baibo, na cii cikalenga mwailuka nu kupingula ningo pa vintu. Musipingula pa vintu ukwaula ukumanya ivisinka vyonsi. Lelo mukasininkizya ukuti mwamanya ivisinka vyonsi. (Mapi. 18:13) Na cii, cikalenga ukuti mwapingula pa vintu ukulingana na vino Yeova akaelenganya. Ndi cakuti mutaya ni “cimvulunganya,” mukatantika ningo ivintu nupya mukakonka insita. Mwatailwa nupya mukalondela utunguluzi. Ndi cakuti mwaya ni miyele yii ino itulandapo, mulamanyikwa ukuti mwaya ni miyele isuma. Lekini lyene tulande pa imiyele ino Baibo yalanda ukuti ali ino ya eluda yalinzile ukukwata pakuti yauze yangayakolanya.
MULINZILE UKULASAKAMALA NINGO AMU LUPWA LWINU
10. Uzye iya ‘akatungulula uli ana na amu ng’anda yakwe’?
10 Ndi cakuti mwemwe ya iya nupya mukulonda ukuya eluda, vino amu lupwa inu yakacita vingalenga ukuti mufikepo ukuya eluda nanti foo. Fwandi mulinzile ‘ukulatungulula ningo ana inu na amu ng’anda inu.’ Cii cikupiliula ukuti mulinzile ukulasakamala ningo ulupwa lwinu alino nu kulapingula ningo pa vintu ivikumile ulupwa lwinu. Mulinzile ukulatungulula ukupepa kwa lupwa, kusininkizya ukuti ulupwa lwinu lukuzanwa umu kulongana nu kuyazwa ukulaombesya umu mulimo wa kusimikila. U mulandu ci uno ukucitila vii kwacindamila? Umutumwa Paulo walanzile ati: “Ndi cakuti umuntu atamanya ivya kutungulula amu ng’anda yakwe, alasakamala uli icilongano cakwe Leza?”—1 Tim. 3:5.
11-12. Uzye vino amu lupwa yakacita vingakuma uli umutwe wa lupwa? (Loliniko ni cikope.)
11 Ndi cakuti mwemwe ya isi mwasininkizya ukuti ‘ana yali ni cuvwila nupya yali ni miyele isuma.’ Mulinzile ukuya nu kutemwa lino mukuyasambilizya. Ukuya kwene mukalonda yaya ni nsansa, kuseeka alino nu kucina wakwe vino ana yonsi yakacita. Lelo mulinzile nu kuyasambilizya ukuya ni cuvwila, mucinzi, alino nu kuya ni miyele isuma. Nupya mulinzile ukuyazwa ukukwata ucuza usuma na Yeova, kutwalilila ukulalondela masunde yakwe alino nu kulunduluka ukufika uku lubatizyo.
12 “Uwakwata ana atanga yapeelwe umulandu wakwe ucintuvwa nanti wakwe ucipondoka.” Ndi cakuti umwana winu nanti uwa mu lupwa lwinu wacita uluyembu ulwipisye, uzye lungamukuma uli? Ndi cakuti isi waya nu mulekelezya wa kusambilizya ana, ale atanga afikepo ukuya eluda.—Lolini Lupungu Lwa Mulinzi lwakwe Okotoba 15, 1996, ifwa 21, mapa. 6-7.
Umutwe wa lupwa akusambilizya ana yakwe ivya kuombela Yeova alino na amu cilongano (Lolini palaglafu 11)
MULINZILE UKULASAKAMALA AMU CILONGANO
13. Mungalanga uli ukuti ‘musiumilila sile pali vino mukwelenganya’ nu kuti ‘mutaya ni cilumba’?
13 Aina aya ni miyele ya Wina Klistu yakaazwa sana amu cilongano. Umuntu “aasiumilila sile pali vino akwelenganya” akalenga kuye umutende. Umuntu uwaya ni imiyele yii akakutika kuli yauze nupya akaezya ukuvwikisya vino yauze yakwelenganya. Wakwe, ndi cakuti mukulanzyanya na ya eluda yauze lyene vino aingi yapingulapo vikuvwana na masunde amu Baibo, uzye mungatungilila vino iyapingulapo nanti cakuti mwemo mukwelenganya vyuze? “Aataaya ni cilumba,” cikapiliula ukuti mutalinzile ukulacita sile vino mweineco mukulonda. Mwamanya ukuti cacindama ukulakutika na kuli vino yauze yakwelenganya. (Utan. 13:8, 9; Mapi. 15:22) ‘Mutaya nu lwete’ nupya ‘musisoka zuwa.’ Cii cikupiliula ukuti musisuusya yauze nanti ukupazyanya nayo, lelo mwaya ni cikuuku kuli yauze. Mukaombesya ukupanga umutende na yauze nanti cakuti ivintu ivitala. (Yako. 3:17, 18) Mukaomvya mazwi asuma lino mukulanda na yauze, ukwikako sile na yayo aakakanya vino mwazumilamo.—Yakapi. 8:1-3; Mapi. 20:3; 25:15; Mate. 5:23, 24.
14. Uzye amazwi akuti “atalinzile ukuya umupya mu utailo” na aakuti “uwa cisinka” yakapiliula cani?
14 Umwina aakulonda ukufikapo ukuya eluda “atalinzile ukuya umupya mu utailo.” Nanti cakuti patalinzile ukupita imyaka iingi ukufuma pano mwabatiziwilwe, mukalondekwa insita pakuti mukule muli vyakwe Leza. Lino mutatala mwasontwa ukuya eluda, mulinzile ukuya aicefye nu kulalolela ukuti Yeova akamupeele imilimo umu cilongano. (Mate. 20:23; Filipi 2:5-8) Mulinzile ukulangilila ukuti mwaya “acisinka” ukupitila umu kupalama sana kuli Yeova, kulondela masunde yakwe nu kulondela utunguluzi uno tukapokelela ukufuma umwi iuvi.—1 Tim. 4:15.
15. Uzye eluda alinzile ukumanyikisya sana ukulanda malyasi? Londololini.
15 Malembo yakalanda ukuti umwangalizi alinzile ‘ukufikapo ukusambilizya yauze.’ Uzye cii cikupiliula ukuti mulinzile ukulalanda ningo sana malyasi? Awe foo. Asi ya eluda yonsi amanyikisya sana ukulanda malyasi, lelo lino yakuya umu kusimikila nu kukomelezya aina na ya nkazi yakaomvya ningo Baibo. (Loliniko na 1 Kolinto 12:28, 29; Efeso 4:11.) Nanti ciye vivyo, mulinzile ukutwalilila ukuzifya imisambilizizye inu pakuti muye yakasambilizya yasuma. Mungacita uli pakuti muye kasambilizya musuma?
16. Uzye mungacita uli pakuti muye kasambilizya musuma? (Loliniko ni cikope.)
16 “Aakalondela sana mazwi ya cumi.” Pakuti muye yakasambilizya asuma, mulinzile ukusininkizya ukuti lino mukusunda na vino mukusambilizya vikufuma umwi Izwi lyakwe Leza. Pakuti mucite vii, mulinzile ukulaisambilizya Baibo alino nu kulabelenga impapulo zitu. (Mapi. 15:28; 16:23.) Lino mukuisambilizya, mwalola vino impapulo zyalondolola Malembo na vino mungaomvya ivyeo vivyo. Lino mukusambilizya, mwaezya na maka ukwazwa antu ukutemelwako Yeova alino nu kuyazwa ukulaomvya vino yakusambilila. Mungaya yakasambilizya yasuma ndi cakuti mukuzyako ya eluda amanyikisya ukusambilizya nu kucita vino yamunena. (1 Tim. 5:17) Ya eluda yalinzile ‘ukulakomelezya’ aina na ya nkazi; lelo insita zimwi yalinzile nu ‘kuyasunda.’ Lelo lino yakucita vivyo yalinzile ukuya ni cikuuku. Ndi cakuti muli ni cikuuku, kutemwa nupya mukomvya ni Izwi lyakwe Leza lino mukusambilizya, mulaya yakasambilizya asuma pano ala mukukolanya Yesu, Kasambilizya Mukalamba.—Mate. 11:28-30; 2 Tim. 2:24.
Umuomvi aakatumikila akusambilila ivya kusambilizya ukuomvya Baibo ala ali na eluda aakasambilizya ningo. Umuomvi aakatumikila akupekanya ivya kuyalanda ilyasi umu kulongana ala akuilola pali mila. (Lolini palaglafu 16)
MWATWALILILA UKUOMBESYA PAKUTI MUFIKEPO
17. (a) I vyani ivingazwa aomvi aakatumikila ukutwalilila ukuombesya pakuti yangafikapo? (b) I vyani vino ya eluda yalinzile ukulaiusya lino yakulola ndi cakuti umwina angafikapo ukuya eluda nanti foo? (Lolini kambokosi akakuti “ Mutaumilila Sile Pali Vino Mukwelenganya Lino Mukulola Aangafikapo Ukuya Eluda.”)
17 Pa cisila cakupituluka apa miyele iikalondekwa pakuti umwi afikepo ukuya eluda, aomvi aakatumikila yamwi yangayuvwa ukuti yatange yafikepo. Lelo mwaiusya ukuti Yeova ni iuvi lyakwe yasienekela ukuti mwalanga imiyele yii wa yantu amalilike. (1 Pet. 2:21) Nupya umupasi wakwe Yeova uwa maka ulamwazwa ukuya ni miyele yii. (Filipi 2:13) Uzye kuli imiyele imwi ino mungatemwa ukuzifyako? Mulinzile ukupepelapo kuli Yeova. Mwalondelezya pa miyele iyo, nupya mungalenga ya eluda ukuti yamunene vino mungacita pakuti muye ni miyele iyo.
18. I vyani vino aomvi aakatumikila yonsi yalinzile ukucita?
18 Lekini swensi kwene, ukwikako sile naya ya eluda aampiti, tutwalilile ukulaombesya ukuya ni miyele yii ino itulandapo umu cipande cii. (Filipi 3:16) Uzye mwemwe aomvi aakatumikila? Mwatwalilila ukulunduluka pakuti mukafikepo ukuya eluda. Mwalenga Yeova ukuti amusambilizya pakuti mwamuombela ningo alino nu kulaombela amu cilongano. (Eza. 64:8) Yeova alamupaala pali vino mukaombesya pakuti mufikepo ukuya eluda.
LWIMBO NA. 101 Twaombela Pamwi Umu Mutende
