CIPANDE CA KUSAMBILILAMO 46
LWIMBO NA. 49 Tukalondesya Ukuzanzya Yeova
Mwe Ina—Uzye Mukuombesya Pakuti Mungafikapo Ukuya Umuomvi Aakatumikila?
“Mu kupeela mwaya insansa izingi ukucila izyaya umu kupokelela.”—MILI. 20:35.
VINO TUMASAMBILILAPO
Tumasambilila pali vino aina abatiziwe yangakomeleziwa pakuti yalondesya ukuombesya pakuti yangafikapo ukuya aomvi aakatumikila.
1. Uzye umutumwa Paulo wayuvwanga uli pa aomvi aakatumikila?
AOMVI aakatumikila yakaomba imilimo icindame sana umu cilongano. Umutumwa Paulo walolanga ukuti aina yaa autailo yali acindame sana umu cilongano. Wakwe, lino walembelanga Aina Klistu aku Filipi, walamwike aomvi aakatumikila pamwi na ya eluda.—Filipi 1:1.
2. Uzye umwina Luis akayuvwa uli ukuya umuomvi aakatumikila?
2 Asi mulandu aina abatiziwa acance nanti aikolo, yakauvwa ningo ukuya aomvi aakatumikila. Wakwe ya Devan yali ni myaka 18 lino yayasonsile ukuya umuomvi aakatumikila. Lelo umwina Luis wasonsilwe ukuya umuomvi aakatumikila lino wacizile imyaka 50. Umwina Luis walanzile vino aina yakayuvwa, lino watiile, “Nkalola ukuti isyuko sana ukulaomba ngu muomvi aakatumikila, sana sana nga nelenganya pali vino amu cilongano yakandanga ukutemwa.”
3. A mauzyo ci yano tumaasuka?
3 Ndi cakuti mwemwe umwina umubatiziwe nupya mutatala mwaya umuomvi aakatumikila, uzye mungimika uyo uwo? I vyani vingamwazwa ukucita vivyo? Nupya imiyele ci ino Baibo yalanda ukuti ali ino mulinzile ukukwata pakuti mufikepo ukuya umuomvi aakatumikila? Icipande cii, cimaasuka mauzyo yaa. Lelo inkoleelo, lekini tulande pa milimo ino aomvi aakatumikila yakaomba.
IMILIMO CI INO AOMVI AAKATUMIKILA YAKAOMBA?
4. I milimo ci ino umuomvi aakatumikila akaomba? (Loliniko ni cikope.)
4 Umuomvi aakatumikila umwina umubatiziwe aakasoololwa nu mupasi wa muzilo pakuti aazwa ya eluda lino yakuomba imilimo ipusanepusane umu cilongano. Aomvi aakatumikila yamwi yakasininkizya ukuti ya kasimikila iyakwata ivifulo ivyakusimikililamo alino ni mpapulo izya kuomvya umu mulimo wa kusimikila. Yauze yakaazwilizyako ukuzifya nu kulingisya ivikononeka apa Ng’anda ya Wene. Aomvi aakatumikila yakaomba ukapyunga nu kuombela ku viombelo vya mazwi na mavidyo pa kulongana. Imilimo iingi ino aomvi aakatumikila yakaomba ikalondekwa ukuombesya. Ni cicindame icakuti, aomvi aakatumikila aaonsi atemwa Yeova nupya aakalondela masunde yakwe. Alino yatemwa sana aina na ya nkazi. (Mate. 22:37-39) Uzye umwina umubatiziwe angacita uli pakuti afikepo ukuya umuomvi aakatumikila?
Aomvi aakatumikila yakakolanya Yesu lino yakuipeelesya ukwazwa yauze (Lolini palaglafu 4)
5. Uzye umwina angacita uli pakuti afikilizye uyo uwa kuya umuomvi aakatumikila?
5 Baibo yalanda pali vino aina yalinzile ukucita pakuti yasontwe ukuya aomvi aakatumikila. (1 Tim. 3:8-10, 12, 13) Mungafikapo ukuya umuomvi aakatumikila ndi cakuti mukusambilila pa miyele ino Baibo yalanda ukuti ali ino mulinzile ukukwata alino nu kuombesya pakuti muye ni miyele kwene iyo. Lelo inkoleelo, mulinzile ukumanya umulandu uno mukulondela ukuya umuomvi aakatumikila.
U MULANDU CI UNO MUKULONDELA UKUYA UMUOMVI AAKATUMIKILA?
6. I cani cilinzile ukulenga mwaombela aina na ya nkazi? (Mateo 20:28; Loliniko ni pa nkupo.)
6 Elenganyini pali Yesu, vyonsi vino waombanga apa mulandu wakuti watemilwe Isi alino antu. Ukutemwa kuu, kwalenzile ukuti aombesya alino nu kulaomba imilimo ino yauze yalolanga ukuti iya pansi pakuti aazwe yauze. (Belengini Mateo 20:28; Yoa. 13:5, 14, 15) Ndi cakuti muli nu kutemwa, Yeova alamupaala nupya alamwazwa ukufikilizya uyo winu uwa kuya umuomvi aakatumikila.—1 Kol. 16:14; 1 Pet. 5:5.
Yesu wasambilizye atumwa yakwe ukupitila muli vino wacitanga ukuti yalinzile ukulaombela yauze ukucila ukulalondesya ukukwata icifulo ca papela. (Lolini palaglafu 6)
7. U mulandu ci uno umwina atalinzile ukulailola ukuti wacindama ukucila yauze?
7 Insita izingi antu amu nsi yii yakakumbwa antu aakailola ukuti yacindama. Lelo vii asi vino caya umwi iuvi lyakwe Yeova. Umwina uwatemwa yauze wakwe vino Yesu wali, asiilola ukuti wakwatisya amaka, ukulonda ukulatungulula yauze, nanti ukuilola ukuti wacindama ukucila yauze. Ndi cakuti umuntu aakailola ukuti wacindama ukucila yauze wasonsilwe umu cilongano, angafilwa ukulaomba imilimo ikaloleka ukuti iya pansi iikalondekwa pa kusakamala imfwele zyakwe Yeova. Angailola ukuti wacindama sana atanga aombe imilimo ya pansi. (Yoa. 10:12) Yeova atalapaala imilimo ya muntu uwa cilumba nanti aakailola ukuti wacindama ukucila yauze.—1 Kol. 10:24, 33; 13:4, 5.
8. I vyani vino Yesu wanenyile atumwa yakwe?
8 Pa nsita zimwi na ya cuza yakwe Yesu yalondanga ukupeelwa imilimo imwi, lelo yatalondanga ukupeelwa imilimo iyo pakuti yaazwa yauze. Elenganyini pali vino umutumwa Yakobo nu mutumwa Yoani yacisile. Yalenzile Yesu ukuti akayapeele icifulo icikulu umu Wene wakwe. Yesu atatemilwe pali vino yalenzile. Wanenyile antu yakwe 12 yonsi ati: “Wensi aakulonda ukuya umukalamba pali mwemwe afwile ukuya umuomvi winu, nupya wensi aakulonda ukuya uwa nkoleelo pali mwemwe alinzile ukuya umuzya winu mwensi.” (Mako 10:35-37, 43, 44) Aina aakalondesya ukulaazwa yauze—yalaazwa amu cilongano umu nzila izingi.—1 Tesa. 2:8.
I VYANI IVINGAMWAZWA UKULALONDESYA UKWAZWA YAUZE?
9. I vyani vingamwazwa ukulalondesya ukwazwa yauze?
9 Mwatemwa Yeova nupya mukalonda ukulaombela yauze. Nomba limwi mutanga mwalondesya ukulaomba imilimo ino aomvi aakatumikila yakaomba. I vyani ivingamwazwa ukulalondesya ukwazwa yauze? Mwaelenganya pa nsansa zino mulakwata ndi cakuti mukuombela aina na ya nkazi. Yesu watiile: “Mu kupeela mwaya insansa izingi ukucila izyaya umu kupokelela.” (Mili. 20:35) Vikwene ali vino Yesu wacitanga. Wali sana ni nsansa lino waombelanga yauze, nupya namwe kwene mulaya sana ni nsansa.
10. Uzye Yesu walangilile uli ukuti wayanga ni nsansa lino wazwanga yauze? (Mako 6:31-34)
10 Lolini vimwi ivikalangilila ukuti Yesu wali ni nsansa lino wazwanga yauze. (Belengini Mako 6:31-34.) Pa nsita imwi, Yesu na atumwa yakwe yatonsile. Yalondanga ukuya uku ncende ukutaali antu pakuti yakapuzeko. Lelo antu yayakolelile, pano yalondanga ukusambiliziwa na Yesu. Yesu nga wakanyile pano wene na atumwa yakwe “yataakweti ni nsita yakuti yalye.” Nanti limwi Yesu nga wasambilizye sile panono nu kuyanena ukuti yapite. Lelo pa mulandu wakuti wali nu kutemwa “watandike ukuyasambilizya ivintu ivingi.” Nupya watwalilile ukuyasambilizya ukufika “amanguzi.” (Mako 6:35) Yesu wacisile vii pa mulandu wakuti “wayuvwilile uluse” asi pa mulandu wakuti ali vino walinzile sile ukucita. Walondanga ukuyasambilizya pa mulandu wakuti wayatemilwe. Ukuombela yauze kwalenzile Yesu aya ni nsansa.
11. Uzye Yesu wazwanga uli antu muli vino yalondekwanga? (Loliniko ni cipoke.)
11 Lino Yesu waombelanga antu, atapelezile sile pa kuyasambilizya lelo wayazwanga na muli vino yalondekwanga. Yesu wayapeezile ivyakulya umu cizungusyo nupya wanenyile asambi yakwe ukuti yayankanye. (Mako 6:41) Lino wacisile vii, wasambilizye asambi yakwe ivya kuombela yauze. Nupya wayasambilizye nu kuti imilimo wakwe yii yacindama sana nupya ali milimo ino aomvi aakatumukila yakaomba. Elenganyini vino atumwa yali ni nsansa lino yaombiile pamwi na Yesu ukwankanya ivyakulya suka ‘yonsi aaliile iikuta.’ (Mako 6:42) Vii vino Yesu wacisile, a conga sile pa vikalangilila ukuti Yesu wisile sana amano kuli vino yauze yalondekwanga ukucila vino walondanga. Nupya wacisile vii umu umi wakwe onsi lino wali pano nsi. (Mate. 4:23; 8:16) Yesu wayanga sana ni nsansa lino wasambilizyanga yauze nu kuyazwa muli vino yalondekwanga. Ukwaula nu kutwisika, ndi cakuti muli nu kutemwa lino mukulondesya ukuya umuomvi aakatumikila mulaya ni nsansa.
Ukutemwa Yeova nu kulalondesya ukwazwa yauze kulalenga ukuti mwaombesya pakuti sile mwazwe aina na ya nkazi (Lolini palaglafu 11) a
12. U mulandu ci uno tutalinzile ukulaelenganyizizya ukuti pasi imilimo ino twamanya pakuti twaazwa aina na ya nkazi?
12 Ndi cakuti mukuyuvwa ukuti pasi imilimo ino mwamanya, mutalinzile ukutoovoka. Mufwile mwakwata imiyele isuma iingazwa amu cilongano. Mwaelenganya pa mazwi yano Paulo walanzile aaya pali 1 Kolinto 12:12-30 nupya mwalenga kuli Yeova ukuti amwazwa ukulola vino mazwi yaa yangamwazwa. Amazwi yakwe Paulo yakalangilila ukuti, umuomvi wakwe Yeova wensi wacindama nupya wakwata umulimo uno akaomba umu cilongano. Ndi cakuti pa nsita yii mutatala mwafikapo ukuya umuomvi aakatumikila, mutalinzile ukutoovoka. Lelo, mwacita vino mungakwanisya ukucita alino nu kulaazwa aina na ya nkazi. Mungasininkizya ukuti ya eluda yalalola nu kumupeela imilimo ino mungakwanisya ukuomba.—Loma 12:4-8.
13. I vyani ivikalondekwa sana pakuti umwina afikepo ukupeelwa imilimo?
13 Elenganyini vii: Imiyele ino mulinzile ukukwata pakuti mufikepo ukuya umuomvi aakatumikila, ali ino na Aina Klistu yonsi yalinzile ukukwata. Nupya Aina Klistu yonsi yalinzile ukupalama kuli Yeova, kuya ni nsansa lino yakupeela, alino nu kulaikala ukulingana na vino Leza akalonda. Nupya mwakwata imiyele iingi pali iikalondekwa pakuti muye umuomvi aakatumikila. Fwandi, i vyani vyuze vino mulinzile ukucita pakuti mufikepo?
VINO MUNGACITA PAKUTI MUFIKEPO
14. Uzye cikapiliula cani “ukwika mano uku vintu”? (1 Timoti 3:8-10, 12)
14 Lekini lyene tulole imiyele ino mulinzile ukukwata pakuti mufikepo iyaya pali 1 Timoti 3:8-10, 12. (Belengini.) Umuomvi aakatumikila alinzile “ukwika mano uku vintu.” Amazwi yaa yangasenula nu kuti “umuntu alinzile ukucita vintu ivingalenga yauze yamucindike.” Lelo cii cisikupiliula ukuti atalinzile ukukwatako ni nsita iya kucina. (Kasa. 3:1, 4) Lelo cikupiliula ukuti mulinzile ukuombesya nu kulamala imilimo ino mwapeelwa. Ndi cakuti mukuomba ningo nu kumala imilimo ino mwapeelwa, aina na ya nkazi umu cilongano yalamucindika nu kumitaila.
15. Uzye cikapiliula cani “ukuya ni ndimi ziili” alino nu kukwatila “ivyuma umu ucenjezi”?
15 “Yatalinzile ukuya ni ndimi ziili,” cii cikupiliula ukuti mulinzile ukuya acisinka nupya akutailwa. Mulinzile ukucita vino mwalanda nupya mutalinzile ukulabepa yauze. (Mapi. 3:32) “Aakakwatila ivyuma umu ucenjezi” cii cikupiliula ukuti mulinzile ukuya acisinka lino mukucita uculuzi na lino mukuomvya impiya. Mutalinzile ukulaliila aina na ya nkazi pakuti sile mwapanga impiya.
16. (a) Uzye amazwi aakuti “yatalinzile ukuya aakamwesya waini” yakapiliula cani? (b) Uzye cikapiliula cani ukuya na “kampingu musanguluke”?
16 “Yatalinzile ukuya aakamwesya waini,” cii cikupiliula ukuti mutalinzile ukulamwesya uwengwa nupya antu yatalinzile ukulamilola ukuti mukamwesya uwengwa. Ukuya na “kampingu musanguluke” cikapiliula ukuti mulinzile ukulalondela masunde yakwe Yeova. Nanti cakuti mutamalilika, mwakwata ucuza usuma na Yeova nupya ucuza uu ukalenga mwaya nu mutende wa mumelenganyo.
17. Uzye amazwi aakuti “Tale yeziwe ndi cakuti iyalinga” yakapiliula cani? (1 Tim. 3:10; Loliniko ni cikope.)
17 “Tale yeziwe ndi cakuti iyalinga,” cii cikupiliula ukuti ya eluda yalola ukuti mungakwanisya ukuomba imilimo ino yangamupeela nupya yamutaila. Fwandi lino ya eluda yamupeela umulimo umwi, mwalondela vino yamunena alino nu kulondela utunguluzi uno tukapokelela umwi iuvi. Mulinzile ukumanya vyonsi ivikulondekwa pakuti umulimo uwo uombwe na lino mulinzile ukuumala. Ndi cakuti mukuomba ningo imilimo nupya muli acincile, yauze umu cilongano yalalola ukuti mukaombesya nupya yalamutaizya. Ya eluda, mwasininkizya ukuti mukusambilizya aina abatiziwe. (Belengini 1 Timoti 3:10.) Uzye mu cilongano cinu mwaya aina acance abatiziwe? Uzye yakaisambilizya Baibo lyonsi? Uzye lyonsi yakaasukapo pa kulongana nu kuombako umulimo wa kusimikila? Ndi cakuti yakacita vivyo, mulinzile ukuyapeela imilimo ino yangakwanisya ukuomba kulingana nu musinku wao. Ndi cakuti mukucita vii, cilalenga ukuti aina yaa acance “yeziwe ndi cakuti iyalinga.” Lyene lino yakuya yakukula, yangafikapo ukuya aomvi aakatumikila.
Ndi cakuti ya eluda yakupeela aina abatiziwe imilimo ala yakuyezya pakuti yalole “ndi cakuti iyalinga” (Lolini palaglafu 17)
18. Uzye cikapiliula cani ukuya ‘aula umulandu’?
18 ‘Aula umulandu,’ cii cikupiliula ukuti kusi umuntu aali wensi angalanda ukuti mukacita iviipe. Ukuya kwene, Aina Klistu yangayabepezya. Na Yesu kwene yamubepizye, nupya walanzile ukuti na alondezi yakwe kwene yalaabepezya. (Yoa. 15:20) Fwandi ndi cakuti muli ni miyele isuma wakwe Yesu, amu cilongano yalamucindika.—Mate. 11:19.
19. Uzye cikapiliula cani ndi cakuti Baibo yati umwina uwatwala “alinzile ukukwata sile umuci wenga”?
19 “Alinzile ukukwata sile umuci wenga.” Ndi cakuti mwatwala nanti ukutwalwa, mulinzile ukulalondela masunde akalanda pa cupo—kuli kuti umonsi wenga nu mwanaci wenga. (Mate. 19:3-9) Umonsi Umwina Klistu atalinzile ukucita uzelele. (Aeb. 13:4) Kuli na vyuze vino atalinzile ukucita. Alinzile ukuya uwa cisinka uku muci wakwe, nupya atalinzile ukulalanga icintemwa uku anaci yauze.—Yobo 31:1.
20. Uzye umwina akasakamala uli ulupwa lwakwe?
20 “Alinzile ukuya umuntu aakatungulula ningo ana yakwe na amu ng’anda yakwe.” Ndi cakuti mwemwe umutwe wa lupwa, mulinzile ukulaomba imilimo ino mwapeelwa. Lyonsi mwatungulula ukupepa kwa lupwa. Insita izingi mwaomba umulimo wa kusimikila pamwi na aci inu alino na ana. Mwaazwa ana inu ukukwata ucuza usuma na Yeova. (Efes. 6:4) Umonsi aakasakamala ulupwa lwakwe, akalangilila ukuti angasakamala na amu cilongano.—Loliniko na 1 Timoti 3:5.
21. Ndi cakuti mutatala mwaya umuomvi aakatumikila, i vyani vino mulinzile ukucita?
21 Mwe ina, ndi cakuti mutatala mwaya aomvi aakatumikila, belengini sana ivyeo ivili umu cipande cii alino nu kupepelapo kuli Yeova. Musambilile pa vikalondekwa pakuti umwi afikepo ukuya umuomvi aakatumikila alino nu kuombesya pakuti mungafikapo. Mwaelenganya pali vino mwatemwa Yeova alino na ina inu na ya nkazi. Mwatemwa sana aina na ya nkazi nupya mwaelenganya na pa mulandu uno mukulondesya ukulayaombela. (1 Pet. 4:8, 10) Mwaombesya pakuti mukaye umuomvi aakatumikila nupya mulaya ni nsansa izikaiza pa mulandu wakuombela aina na ya nkazi umu cilongano. Si Yeova atwalilile ukumupaala lino mukuombesya alino nu kulondesya ukuya umuomvi aakatumikila.—Filipi 2:13.
LWIMBO NA. 17 ‘Ntemilwe’
a ULONDOLOZI WA VIKOPE: Kuli cimani, Yesu akuombela asambi yakwe; ukwi lunji, umuomvi aakatumikila akwazwa umwina uwacikalamba umu cilongano.
