CIPANDE CA KUSAMBILILAMO 44
LWIMBO NA. 33 Mwatuula Masakamika Inu Kuli Yeova
Vino Mungacita Pakuti Muzizimizye Ndi Cakuti Yamufyenga
“Utaaleka ukuti iviipe vyakucimvya, lelo uwacimvya iviipe ukupitila umu kucita ivisuma.”—LOMA 12:21.
VINO TUMASAMBILILAPO
Tumasambilila vino tungazizimizya ndi cakuti yatufyenga ukwaula ukulenga ivintu ukwipilako.
1-2. Uzye tunguvwa uli ndi cakuti yatufyenga?
YESU walanzile pa cilangililo cakwe mukamfwilwa uwalenzile ukuti kapingula akamupingule ningo pa mulandu wakuti kwali uwamufyenzile. Ukwaula nu kutwisika asambi yafwile yuvwikisye vino mukamfwilwa wiya wayuvwanga pa mulandu wakuti antu aingi yayafyenganga pa nsita iya. (Luka 18:1-5) Naswe kwene tunguvwikisya vino wayuvwile pano naswe kwene pa nsita imwi yatufyenzilepo.
2 Ndakai umu nsi, mwavula sana ulufyengo, mutitikizya na kapatulula, fwandi tutanga tuzunguke ndi cakuti ivya musango uu vyatucitikila. (Kasa. 5:8) Lelo tunguvwa sana uyi ndi cakuti umwina nanti nkazi aliwe watucitila vii. Nomba aina na ya nkazi yapusana na antu akatucuzya pano yasiitemelwa ukutufyenga. Icikalenga u kukanamalilika. Lelo tungasambililako kuli vino Yesu wacisile lino antu aipe yamufyenzile. Ndi cakuti tungateekelela antu akatufyenga, ale tungacizyanapo ukuteekelela aina na ya nkazi. Uzye Yeova akauvwa uli ndi cakuti antu yauze nanti yakapepa yanji yatufyenga?
3. Uzye Yeova akaikako mano ndi cakuti tukucula pa mulandu nu kufyengwa, nupya u mulandu ci?
3 Yeova akalonda ukuti yatatufyenga nupya akamanya ndi cakuti yauze yatufyenga. “Yawe [Yeova] watemwa ivilungame.” (Masa. 37:28) Yesu watulaya ukuti Yeova “alalenga ukuti kuye umulinganya . . . zuwa” lino insita ilafika. (Luka 18:7, 8) Nupya likwene ali nu ukufumyapo iviipe vyonsi ivikatucuzya nu lufyengo.—Masa. 72:1, 2.
4. Uzye Yeova akacita uli pa kutwazwa ndakai?
4 Lino tukuloleela ukuti umu nsi mukaye ulungami, Yeova akatwazwa ukumanya vino tungacita nga yatufyenga. (2 Pet. 3:13) Akatusambilizya ivyakucita pakuti tutacita iviipe ndi cakuti yatufyenga. Inzila yonga, u kutusambilizya pali vino Umwanakwe wacisile lino yamufyenzile. Nupya akatusambilizya vino tungacita ndi cakuti yatufyenga ukuomvya Baibo.
MWACENJELA PALI VINO MUKAPINGULAPO UKUCITA NGA YAMUFYENGA
5. U mulandu ci uno tulinzile ukucenjela pali vino tukapingulapo ukucita nga yatufyenga?
5 Ndi cakuti yatufyenga tunguvwa sana uyi. (Kasa. 7:7) Vikwene avino na aomvi yakwe Yeova acisinka yayuvwile, wakwe Yobo na Habakuku. (Yobo 6:2, 3; Haba. 1:1-3) Nanti cakuti caya sile ningo ukuyuvwa vivyo ndi cakuti yatufyenga, tulinzile ukucenjela pali vino tukapingulapo ukucita pakuti tutacita iviipe.
6. I vyani vino tukusambilila kuli vino Abusalomu wacisile? (Loliniko ni cikope.)
6 Ndi icakuti umwi watufyenga nanti wafyenga wino twatemwa, limwi tungalonda ukuti tulandule. Lelo ukucita vivyo kungalenga sile intazi ikulileko. Elenganyini pali vino vyacitikiile Abusalomu umwana wakwe Devedi. Wasosile sana lino Amunoni umwinakwe walazile na Tamala kaci wakwe pa maka. Ukulingana na Masunde yakwe Mose, Amunoni walinzile ukufwa pa mulandu na vino wacisile. (Levi 20:17) Nanti cakuti Abusalomu wakweti insambu izya kusoka, atazumiliziwe ukuti aliwe akome Amunoni.—2 Sam. 13:20-23, 28, 29.
Abusalomu wasosile sana lino yafyenzile Tamala nkazi yakwe (Lolini palaglafu 6)
7. Uzye kalemba wa masamu wayuvwile uli lino waweni ulufyengo lukucitika?
7 Ndi cakuti yano yatufyenzile yatasunzilwe, limwi tungatandika ukwelenganya ukuti pasi ivisuma ivikacitika ndi cakuti twacita icilungame. Elenganyini pali kalemba wa masamu uwaweni kuno antu acitanga iviipe yafyenganga antu acitanga ivisuma, nupya antu kwene yaa acitanga iviipe yalolekanga kwati yaipakizyanga sana umi. Watiile: “Antu aipe, Yene yakwata ivyuma ivingi.” (Masa. 73:12) Uvwanga sana uyi pa lufyengo ulwacitikanga nupya waweni ukuti citacindime ukuombela Yeova. Walanzile ati: “Nezizye na maka yane yonsi ukumanya muno ciile nanti ukuya kwene, cali icicuzye.” (Masa. 73:14, 16) Nupya walanzile ati: “Lelo nemo walanga nimponzya nu upalilo, kwempe nu kupumbuka.” (Masa. 73:2) Vikwene i vyacitikile nu mwina Alberto.
8. I vyani vino umwina umwi wacisile lino yamufyenzile?
8 Ya Alberto yayabepizye ukuti ivile impiya zya cilongano. Na cii, calenzile ukuti yayapoke imilimo ino yakweti umu cilongano nupya lino amu cilongano izile yamanya ivyacitike, yatile ukucindika ya Alberto. Ya Alberto yatiile: “Nuvwile sana uyi, nasosile, nupya natoovwike.” Yasosile sana icakuti yatile nu kulazanwa umu kulongana pa myaka 5. Vii ivyacitike, vikulangilila sile ivingacitika ndi cakuti twatwalilila ukusoka lino yatufyenga.
MWAKOLANYA VINO YESU WACITANGA LINO YAMUFYENZILE
9. I viipe ci ivyacitike vino Yesu wazizimizye? (Loliniko ni cikope.)
9 Yesu ali muntu uno tungakolanya sana ndi cakuti yatuzyenga. Antu aingi yamufyenganga kumwi sile na ya lupwa yakwe. Ya lupwa yakwe aatali ya kapepa yamunenyile ukuti atapena, ya simapepo yamubepizye ukuti waombelanga pamwi ni viwa, alino asilika Aina Loma yamutumfyanga, ukumuma, nupya izile iyamukoma. (Mako 3:21, 22; 14: 55; 15:16-20, 35-37) Lelo Yesu watwalilile ukuzizimizya lino yamufyenganga nupya atatazile ayembuke. I vyani vino tukusambililako kuli vino vyacitikile Yesu?
Yesu watulangilile ivyakucita ndi cakuti yauze yatufyenga (Lolini mapalaglafu 9-10)
10. Uzye Yesu wazizimizye uli ulufyengo? (1 Pet. 2:21-23)
10 Belengini 1 Petulo 2:21-23. a Yesu watulangilile ningo vino tulinzile ukucita lino yauze yakutucuzya. Wamanyile ningo insita ilinge iyakulanda ni yakukanalanda. (Mate. 26:62-64) Insita zimwi ndi cakuti yamubepezya, wasoololangapo ukukanalanda ivili vyonsi. (Mate. 11:19) Ndi cakuti walanda, atayatumfyanga nanti ukuyatiinya. Yesu waikaanyanga pa mulandu wakuti “waipeezile kuli Leza aakapingula umu ulungami.” Yesu wamanyile ukuti Yeova walolanga vino yamufyenganga. Wataile ukuti Yeova wali nu kufumyapo ulufyengo pa nsita ilinge.
11. Tungacita uli pakuti twaomvya amazwi asuma lino tukulanda? (Loliniko ni vikope.)
11 Tungakolanya Yesu lino umwi watusosya ndi cakuti tukuomvya mazwi asuma pa kulanda. Insita zimwi tungasuulako sile ndi cakuti yatatusosizye sana. Nanti tungasoololapo ukukanalanda ivili vyonsi pakuti intazi itakula. (Kasa. 3:7; Yako. 1:19, 20) Lyene insita zimwi, tungalondekwa ukulanda nu muntu uwatatufyenga nanti tungalondekwa ukulanda icisinka pali vino twazumilamo. (Mili. 6:1, 2) Ndi cakuti twasoololapo ukulanda, tulinzile ukwezya na maka ukulanda umu nzila isuma nupya iya mucinzi.—1 Pet. 3:15. b
Ndi cakuti yatufyenga tungakolanya Yesu ndi cakuti tukupingulapo insita ino tulinzile ukulanda (Lolini mapalaglafu 11-12)
12. Uzye tukaipeela uli “kuli Leza aakapingula umu ulungami”?
12 Naswe kwene tungakolanya Yesu ndi cakuti twaipeela “kuli Leza aakapingula umu ulungami.” Ndi cakuti yauze yatupingula nanti ukutufyenga tukataila ukuti Yeova aliwe watamanya ivisinka. Ukumanya ukuti Yeova alafumyapo ulufyengo kulatwazwa ukuzizimizya ndi cakuti yauze yatufyenga. Ndi cakuti twataila Yeova nu kutwalilila ukuloleela ukuti akafumyepo intazi zyonsi, tutalatwalilila ukusoka nanti ukupata yauze. Ndi cakuti twatwalilila ukusokela yauze cingalenga tucite iviipe, ukuta ukuya ni nsansa, nupya ucuza witu na Yeova ungononeka.—Masa. 37:8.
13. I vyani ivingatwazwa ukuzizimizya ulufyengo?
13 Ukuya kwene, tutanga tukwanisye ukucita vyonsi vino Yesu wacitanga. Insita zimwi, tungacita nanti ukulanda ivintu ivingalenga tulanguluke pa cisila. (Yako. 3:2) Nupya insita zimwi ndi cakuti yatufyenga, cingalenga ukuti tutwalilile ukuvwa uyi. Ndi cakuti ivya musango uu vikumucitikila, mwaiusya ukuti Yeova watamanya. Nupya Yesu wamanya vino mukayuvwa pano yamufyenzilepo. (Aeb. 4:15, 16) Ukulunda pa kukolanya Yesu, Yeova akaomvya Izwi lyakwe Baibo pa kutwazwa ukumanya ivyakucita ndi cakuti yatufyenga. Lekini tulole ivikomo viili vingatwazwa ivyaya umwi buku lya Ina Loma.
“MWASIILA LEZA UKUTI AWINO ALANGE UKALI”
14. Uzye cikapiliula cani ukuleka “Leza ukuti awino alange ukali”? (Loma 12:19)
14 Belengini Loma 12:19. Umutumwa Paulo wakomelizye Aina Klistu ukuti yasiila “Leza ukuti awino alange ukali.” Tukaleka ukuti Yeova alange ukali ndi cakuti tukuleka ukuti aliwe akafumyepo ulufyengo pa nsita yakwe nupya ukulingana nu kulonda kwakwe. Pa cisila lino umwina John yamufyenzile, walanzile ati: “Nalondekwanga ukuikaanya pakuti ntacita iviipe, nupya ukucita vii kutangwike. Loma 12:19 yangazwile ukuteekela nu kutaila Yeova.”
15. U mulandu ci uno cazipila ukuleka ukuti Yeova aliwe amale intazi?
15 Ivintu vikatuzipila ndi cakuti twaloleela ukuti Yeova aliwe afumyepo intazi. Ndi cakuti twacita vivyo tutalauvwa uyi nanti ukutoovoka pano ala tusikwezya ukumala intazi iyo sweineco. Yeova akalonda ukutwazwa. Watunena ukuti twaloleela nupya watulaya ukuti alafumyapo ulufyengo. Ndi cakuti twataila vino Yeova watulaya ukuti “nene ndalandula,” tutalatwalilila ukuya asoke pano twamanya ukuti alacita icilungame. Vikwene i vyazwile nu mwina John wino itulandapo. Watiile, “Ndi cakuti naloleela Yeova ukuti aliwe akamale intazi, ivintu vilazipa sana ukucila vino cingaya nga nezya ukumala intazi uku maka yane.”
“UWACIMVYA IVIIPE UKUPITILA UMU KUCITA IVISUMA”
16-17. Uzye ipepo lingatwazwa uli ukucimvya “iviipe ukupitila umu kucita ivisuma.” (Loma 12:21)
16 Belengini Loma 12:21. Paulo wakomelizye Aina Klistu ukuti yacimvya “iviipe ukupitila umu kucita ivisuma.” Umwi lyasi lwakwe Yesu ilya pa mwamba, Yesu watiile: “Mwatemwa alwani inu nu kupepelako aakamucuzya.” (Mate. 5:44) Vikwene ali vino wacisile. Tufwile tukaelenganya pali vino Yesu wazizimizye lino yamupopiile pa cimuti uku yasilika Aina Loma. Yesu yamucuzizye sana nupya wawaikanga sana. Tutanga tuvwikisye vino Yesu yayuvwanga lino wacuziwanga.
17 Yesu watwalilile ukuya nu kutemwa nu kuya uwa cisinka kuli Yeova nanti cakuti yamucuzizye sana. Yesu atalenzile Leza ukuti afulule asilika yaya, lelo wapefile ati: “Tata yelele, pano yatamanyile cino yakucita.” (Luka 23:34) Ndi cakuti twapepelako yayo atiyatufyenga, cilatwazwa ukuya ateekele nu kukanatwalilila ukuya asoke nupya cilatwazwa nu kukanayasokela.
18. Uzye ipepo lyazwile uli ya Alberto na ya John ukuzizimizya ulufyengo?
18 Ipepo lyazwile aina yaili yano itulandapo umu cipande ukuzizimizya lino yayafyenzile. Ya Alberto yalanzile ati: Napepelangako aina amfyenzile. Pa miku iingi napefile kuli Yeova ukuti angazwe ukuta ukusoka pali vino vyancitikile.” Cazipa ukuti ya Alberto yatandika ukuombela Yeova nupya. Ya John yalanzile ati: “Pa miku iingi, napepelangako umwina uwansosizye. Yeova wangazwile ukuta ukusokela umwina nu kukanamupingula. Nupya Yeova wangazwile ukuya nu mutende wa mu melenganyo.”
19. I vyani vino tulinzile ukucita lino tucili tukwikala umu nsi yii? (1 Petulo 3:8, 9)
19 Lino tukwikala umu nsi yii iipe, antu yangatufyenga. Asi mulandu ni intazi ino tulakwata, tutalata ukulenga Yeova ukuti atwazwa. Nupya tulinzile ukulakolanya vino Yesu wacisile lino yamufyenzile alino nu kutwalilila ukulaomvya ivisinte vya muli Baibo. Ndi cakuti tukucita vii tulasininkizya ukuti Yeova alatupaala.—Belengini 1 Petulo 3:8, 9.
LWIMBO NA. 38 Alamwazwa Ukuya Akome
a Umu vipande 2 na 3 ivyaya muli kalata ino umutumwa Petulo watandikilepo ukulemba, walondolwile ivyacitike lino Aina Klistu aakutandikilapo yayafyenganga uku yasambazi yao nanti kuli ya iya ataali Aina Klistu.—1 Pet. 2:18-20; 3:1-6, 8, 9.
b Tambini vidyo ikati Vino Ukutemwa Kukalenga Ikuya Umutende wa Cumi, pa jw.org
