1. U mu nzila ci zimwi muno tungaombela pamwi na Yeova?

KAUMBA waweni ukuti antu yalinzile ukuombela pamwi na aliwe pakuti ukulonda kwakwe kukafikiliziwe. Nanti icakuti antunze ndakai yatamalilika, antu aacumi yangaomba na Yeova cila wanda. ‘Tukaombela pamwi na Leza’ ndi tukuomba umulimo wa kusimikila ilandwe lisuma ilya Wene nu kupanga asambi. (1 Kol. 3:5-9) I syuko sana ukuombela pamwi na Kaumba wa vintu vyonsi umu mulimo uno umwineco akalola ukuti ucindame! Nomba, tukaombela pamwi na Yeova umu milimo na yuze. Icipande cii cimalanda pa nzila na zyuze zino tungaombelamo pamwi na Leza, kuli kuti, ukwazwa indupwa zitu na ya kapepa yanji, ukupokelela aenyi, ukuipeelesya umu milimo yakwe Leza, nu kulundulula imiombele itu mu mulimo wa kusimikila.—Kolo. 3:23.

2. U mulandu ci uno citanga cizipile ukukolanya imiombele inu kuli vino yauze yakaomba lino mukuombela Yeova?

² Lino tukusambilila ivyeo ivili umu cipande cii, mutalinzile ukukolanya vino mukaombela Yeova kuli vino yauze yakaomba. Mwaiusya ukuti antu yakapusanapusana umu myaka ya kuvyalwa, umi, ivikayacitikila, alino na maka ya miombele. Umutumwa Paulo walanzile ukuti: “Cila muntu aicecete pa vicitwa vyakwe. Ndi visuma,  lyene angaya ni cilumba pali vino umwisikulu watacita, kwaula kukolanya ni vintu vino umuze wacita.”—Gala. 6:4.

3. U mulandu ci uno tungalandila ukuti yonsi aakasakamala ningo indupwa zyao yakaombela pamwi na Leza?

³ Yeova akaenekela aomvi yakwe ukusakamala ningo indupwa zyao. Limwi cingalondekwa ukuti muzane incito iya kuomba pakuti mwazanila ulupwa lwinu impiya. Ya mama aingi aakwata ana yakaikala pa ng’anda pakuti yasakamala ana yao. Nupya ana yamwi atiyakula yangaasunga avyazi yao aakalwalilila. Imilimo ii yacindama sana. Izwi Lyakwe Leza likati: “Lelo ndi cakuti umwi asyasakamala akazi kakwe, maka maka amu ng’anda yakwe, ala wene wakana utailo nupya umwipisye kuluta wiyo atataila.” (1 Tim. 5:8) Ndi cakuti mwakwata imilimo ii, limwi mutanga mukwate insita ikalamba iyakuombako ni milimo yakwe Leza. Nomba cii citalinzile ukumusakamika sana! Yeova akatemwa sana ndi mukusakamala ulupwa lwinu muli vino lukalondekwa.—1 Kol. 10:31.

4. Uzye avyazi yangaakolezya uli imilimo yakwe Leza ukuluta ukukolezya imilimo yao, nupya i vyani ivingacitika?

⁴ Avyazi Aina Klistu yakaombela pamwi na Yeova ndi yakwazwa ana yao ukwimika mauyo muli vyakwe Leza. Aingi akacita vivyo yakazana ukuti ndi papita insita ana yao yakaya umu kuombela umulimo wa nsita yonsi ukutali nu ku mwao. Yamwi amisyonali, yauze aapainiya aaya umu kuombela ukukalondekwa ya kakosoola aingi, lyene yauze nayo yakaombela pa Betele. Ukuya umu kuombela ukutali, kungalenga ukuti amu ndupwa yataaya pamwi ilingi wakwe vino yangatemwa kuti ciye. Lelo, avyazi aipeelesya yakakomelezya ana yao ukutwalilila ukuombesya umu milimo yakwe Leza. U mulandu ci? Yakaya sana ni nsansa nupya yakauvwa ningo ukumanya ukuti ana yao yakukolezya ivya Wene umu umi wao. (3 Yoa. 4) Avyazi aingi pali yaa yakayuvwa ndi vino Ana wayuvwanga, uwalanzile ukuti ‘wapeezile’ umwanakwe Samueli kuli Yeova. Avyazi yaa yakalola ukuti ukuombela pamwi na Leza umu nzila ii i syuko sana. Yasilonda ukucita ivipusine na vii.—1 Sam. 1:28.

5. Uzye mungazwa uli amu cilongano cinu muli vimwi ivikulondekwa? (Lolini cikope ca kutandikilako.)

⁵ Ndi cakuti mutaakwata umulimo wa kusakamala ulupwa, uzye mungazwa ya kapepa yauzo yano yakasakamala ya lupwa yao akalwalilila, atiyakota, nanti aakulondekwa ukusakamalwa umu nzila na zyuze? Uzye mutanga mwezye ukulola yamwi umu cilongano cinu nu kwazwa akulondekwa uwazwilizyo? Limwi mungazwako nkazi umwi aakasakamala umuvyazi uwatakota, pa nsita ino nkazi wiyo akuomba imilimo yuze. Nanti limwi mungazwa yaayo akulondekwa uwazwilizyo ukuyatwala umu kulongana, umu kukala ivikulondekwa, ukuya umu kucita vimwi kuno yakulonda ukuya, nanti uku cipatala umu kutandalila umwi wino yateeka. Ukucita vivyo kungalenga mwaombela pamwi na Yeova lino akwasuka amapepo yakwe yamwi.—Welengini 1 Kolinto 10:24.

6. I vyani ivingacitika ndi cakuti tukupokelela aenyi?

⁶ Antu aakaombela pamwi na Leza yakamanyikilwa ku kuzengela aenyi. Mu Malembelo ya Cigiliki, izwi lyakuti “ukuzengela” likapiliula ukuti ukulanga icikuuku ku enyi. (Ayeb. 13:2) Izwi lyakwe Leza likalanda pali vimwi ivyacitike ivingalenga tusambilile ivyakuya nu kutemwa kwa musango uwo. (Utan. 18:1-5) Tungaya ni syuko lya kwazwa yauze cila nsita, asi mulandu tukapepa nayo nanti foo.—Gala. 6:10.

7. U mulandu ci uno mulinzile ukuipeelesya ukupokelela aya mu mulimo wa nsita yonsi?

⁷ Uzye mungaombela pamwi na Leza lino mukupokelela aaya umu mulimo wa nsita yonsi pa  nsita ino yakutandalila icilongano cinu? (Welengini 3 Yoane 5, 8.) Ukucita vivyo kukalenga ukuti paye ‘ukukomelezyanya.’ (Loma 1:11, 12) Elenganyini pali vino vyacitikiile Umwina Olaf. Akaiusya ukuti imyaka ingi iyapitapo, kutaali nanti aumwi umu cilongano cao uwalondanga ukupokelela umwangalizi wa ciputulwa, uwali umusimbe. Pa nsita kwene iyo lino umwina Olaf wali umwance, walenzile avyazi yakwe aatali ya Nte ndi cakuti umwangalizi wa ciputulwa angaya akikale nayo pa ng’anda. Yazumile, nomba yanenyile Olaf ukuti wene wali nu kulalala pa mupando. Vino yacisile vyali ningo sana. Olaf walanzile ati: “Mulungu uwa wazifile cuze! Nemo nu mwangalizi wa ciputulwa twazyukanga zuwa cila katondo nupya twalanzyanyanga amalyasi apusanepusane asuma ala tukulya icakulya ca katondo. Ukukomelezya kuno umwangalizi wa ciputulwa wankomelizye kwalenzile nalondesya ukuya mu mulimo wa nsita yonsi.” Pa myaka 40 iyapitapo, umwina Olaf waomba imilimo ipusanepusane muli umisyonali.

8. U mulandu ci uno tukayela ni cikuuku nanti icakuti pa kutandika cikuloleka kwati pasi vino tucisile? Landini ivyacitike.

⁸ Mungalanga ukutemwa ku yenyi mu nzila izipusanepusane nanti icakuti pa kutandika yatanga yamutaizye. Uvwini vimwi ivyacitike. Lino nkazi umwi uwa ku Spain watungululanga Yesika isambililo, waweni ukuti asikuta ukulila. Nkazi wii uzizye mulandu uno Yesika walililanga. Nawe walanzile ati lino atatala wakuuka wali umupina sana icakuti wanda umwi atakweti ni vyakulya. Wakweti sile amanzi yakupeela umwanakwe umukazyana. Yesika wezizye ukusunsuntizya umwana pakuti alale ku ala akupepa kuli Leza ukuti amwazwe. Pa cisila ca kupepa ya Nte yaili yamutandalile, nomba Yesika wayazaukile nu kulepola magazini wino ya nkazi yamupeezile. Lyene Yesika wayuzizye ati: “Lyene cii ali cakulya cino mukulonda mpeele umwanane?” Ya nkazi yezizye kumutekezya, nomba cali kwati yakuma sile muza. Lyene pa cisila izile iyamusila basiketi ya vyakulya pa mulyango pa ng’anda apaakwe. Icikuuku cino ya nkazi yaya yalangizye cafisile sana Yesika pa mwenzo nupya uvwile sana uyi lino wiwisye ukuti atisileko amano lino Leza waswike ipepo lyakwe. Ndakai lyene wasoololapo ukuombela Yeova. Ukapekape wakwe ya nkazi yaya walenzile ivisuma vicitike!—Kasa. 11:1, 6.

9, 10. (a) I vyani ivyacitikanga ivyalondekwanga aina Izlaeli ukuipeelesya ukuomba? (b) I milimo ci imwi ino aina aipeelesya yangaombako mu cilongano?

⁹ Mu nsita ya ina Izlaeli, ivyacitikanga pa nsita zimwi vyalondekwanga yakaomba aipeelesye. (Kufu. 36:2; 1 Mila. 29:5; Neem. 11:2) Na ndakai kwene, mwakwata masyuko aingi akuomvyezyako insita inu, ivikwatwa alino ni milimo ino mwamanya ku kwazwa aina inu na ya nkazi. Nupya mulapolelelwa wakwe cimwi nu kuya nu luzango ulukafuma mu kuipeelesya.

¹⁰ Izwi lyakwe Leza likakomelezya aina mu vilongano ukuombela pamwi na Yeova lino yakuombesya pakuti yapeelwe imilimo nu wangalizi mu cilongano. (1 Tim. 3:1, 8, 9; 1 Pet. 5:2, 3) Yonsi akacita vivyo yakalonda ukwazwa yauze muli vino yakulondekwa alino na muli vyakwe Leza. (Mili. 6:1-4) Uzye ya eluda yatala yamuzyapo ndi cakuti mungaitemelwa ukuya ya kazwa nanti ukuombela ku mpapulo, ukupeela antu ivifulo vya kuombelamo, ukuzifyako pa Ng’anda ya Wene nanti milimo yuze sile? Yayo akaombako imilimo iyo yalaminena ukuti yakaipakizya sana ukwazwa yauze.

11. Uzye ivintu vyazipiile uli nkazi umwi pa mulandu nu kuomba imilimo imwi umwi uvi?

¹¹ Yaayo aakaipeelesya ukuombako imilimo imwi umwi uvi ilingi yakapanga ivyuza na vyuze. Elenganyini pali nkazi Margie uwaomvileko umulimo wa kukuula Mang’anda ya Wene  pa myaka 18. Pa myaka iingi wasambilizya ya nkazi acance aingi. Wazana ukuti ukuombako umulimo uu iinzila isuma sana iya kukomelezezyanyamo muli vyakwe Leza. (Loma 1:12) Lino nkazi wii wakwatanga mezyo insita zimwi, ya cuza yano wapanzile lino wali umu makuule, yamukomelezyanga sana. Uzye mwatala mwaipeelesya ukuombako umu makuule ya musango uwo? Uzye mungaipeelesya ukuti mukaombeko nanti icakuti mutaamanya umulimo uwo?

12. Uzye mungacita uli pakuti mwazwilizye atiyaponelwa nu uzanzo?

¹² Ndi kwacitika uzanzo, antu yakwe Leza yakakwata isyuko lya kuombela pamwi na Leza lino yakwazwa aina. Yakasangula impiya izya kwazwilizya atiyaponelwa nu uzanzo. (Yoa. 13:34, 35; Mili. 11:27-30) Inzila yuze ino tukaombela pamwi na Leza u kuombako umulimo wa kuzifya nanti ukukuululula ivikuulwa vya kulonganilamo. Nkazi Gabriela uwa ku Poland wino ing’anda yakwe yononike pa mulandu na mulamba, watemilwe sana lino aina afumile uku vilongano vya mupiipi izile umu kumwazwilizya. Walanzile ukuti: “Nsilonda ukulanda pali vino naponzizye pano vyali ivikwatwa sile. Nomba nkulonda imineneko pali vino nakwatilepo. Ivintu vii ivyancitikile vyalenzile nsininkizye ukuti ukuya mu cilongano ca Ina Klistu i syuko iliiyele ilya kuya ni nsansa alino nu luzango.” Aingi aponelwapo na mazanzo yano yazwapo yakalanda ukuti yakwata ivingi sana ukuluta na pali vino yakweti mpiti. Nupya yayo akaombela pamwi na Yeova umukwazwilizya antu yayo yakaipakizya sana ukuombako umulimo uu.—Welengini Milimo 20:35; 2 Kolinto 9:6, 7.

13. Uzye ukuipeelesya ukuombako kukakomya uli ucuza witu na Yeova? Langililini.

¹³ Nkazi Stephanie na ya kasimikila yauze yaipakizye sana ukuombela pamwi na Leza ukwazwilizya ya Nte imbutusi aile uku United States. Yazwilizyangako ukulonda nu kuzifya ma ng’anda ya ndupwa izyafumanga uku ncende izyononike. Nkazi Stephanie watiile: “Insansa zino yakweti na vino yataizyanga pa mulandu nu kutemwa kuno aina na ya nkazi umu nsi yonsi yayalanganga kwalenzile ukuti tutwalilile ukuomba. Amu ndupwa zii yakwelenganya ukuti  ituyazwilizya nomba ukulanda sile icumi aliyo iyatwazwilizya sana.” Walanzile nu kuti: “Ukutemwa, ukulemana, utailo nu kusintilila pali Yeova vino itulola ivilenga tutemelweko sana Yeova, nupya icilenga twataizya sana pali vino tukapokelela umwi uvi lyakwe.”

14, 15. (a) I miyele ya musango ci ino kasema Ezaya wakweti? (b) Uzye ya kakosoola ya Wene ndakai yangakolanya uli kasema Ezaya?

¹⁴ Uzye mungatemwa ukuomba sana na Yeova? Uzye mungaitemelwa ukukuuka ukuya umu kumuombela uku ncende kuno ya kasimikila yacepa? Kwene, aomvi yakwe Leza yatalinzile ukukuuka ukuya uku ncende yuze pakuti sile yalange ukapekape wao. Nomba aina yamwi na ya nkazi yakakwanisya ukuombako. Yaipeelesya wakwe vino kasema Ezaya wacisile. Lino Yeova wamuzizye ukuti: “Aweni amaya inkombe itu?” Waswike ukuti: “Mukwai namayako! Ntumini nene.” (Ezaya 6:8) Uzye namwe mungakwanisya ukuipeela ukuombako imilimo yakwe Leza? I milimo ci ikulondekwa aomvi?

¹⁵ Yesu walanzile pa mulimo wa kusimikila nu kupanga asambi ukuti: “Uzombozi uukulu cuze, lelo aomvi yati yacepa. Caleka pepini ku mwine wa uzombozi kuti atume na yauze ku uzombozi wakwe.” (Mateo 9:37, 38) Uzye limwi mungaya mukaombeleko umulimo wa upainiya uku ncende kuno ya kasimikila yacepa? Nanti uzye mungazwilizyako yauze ukucita vivyo? Aina aingi na ya nkazi yazana ukuti inzila isuma iyakulangilamo ukuti yatemwa Leza na inamupalamano u kuombako umulimo wa upainiya umu ncende nanti ivifulo muno mukalondekwa sana ya kasimikila. Uzye mungelenganya pa nzila na zyuze zino mungalundulwilamo umulimo winu uwa kusimikila? Kucita vii kulamuletela sana insansa.

16, 17. A masyuko ci na yauze aayako ndi cakuti mukulonda ukulundulula umulimo winu kuli Yeova?

¹⁶ Uzye mungaitemelwa ukuyaombelako pa Betele nanti ukwazwilizyako umu mulimo wa kukuula ivikulwa vyakwe Leza pa nsita inono nanti umu manda sile yamwi? Antu akaitemelwa ukuombela Yeova ukulikonsi kuno yayatuma nanti ukuomba umulimo ulionsi uno yapeelwa yakalondekwa sana umwi uvi lyakwe. Antu ya musango uwo yangaitemelwa ukuyaomba uku ncende imwi nanti icakuti umulimo uwo yataumanya ni ncende kwene yataimanya. Nomba Yeova akataizya sana antu ya musango uwo akaitemelwa ukuomba kulikonsi ukukulondekwa aomvi.—Masa. 110:3.

¹⁷ Uzye mukalondesya ukusambiliziwa ningo pakuti mwaomba ningo imilimo ya muzilo? Nga avino cili, mungasambilila ivya kuomba ndi cakuti mwalinga ukuya ukwi Sukulu Lyakwe ya Kakosoola ya Wene. Ukwi sukulu lii, yakasambilizya ningo aonsi na anaci atemwa vyakwe Leza aaya umu mulimo wa nsita yonsi ukulundulula imilimo yao. Yayo aakauzya ndi cakuti yangaya yakazanweko ukwi sukulu lii yalinzile ukuitemelwa ukuzumila ukutandika ukuomba umulimo uli onsi uno yalapeelwa ndi cakuti yamala isukulu. Uzye mungaitemelwa ukuya ukwi sukulu lii pakuti mungaca muombeko imilimo na yuze icindame sana umwi uvi lyakwe Yeova?—1 Koli. 9:23.

18. I vyani vilamucitikila ndi cakuti mukuombela pamwi na Yeova cila wanda?

¹⁸ Pa mulandu wakuti sweswe yantu yakwe Yeova tukaya na ukapekape, usuma, icikuuku, nu kutemwa kuli kuti ukulanga ukuti tukasakamala yauze cila wanda. Ndi tukucita vivyo tukaya sana ni nsansa nu mutende. (Gala. 5:22, 23) Asi mulandu ni vikamucitikila umu umi mungaya ni nsansa ndi cakuti mukukolanya Yeova ukuya na ukapekape alino nu kuombela pamwi nawe.—Mapi. 3:9, 10.