1. I syuko ci lino twakwata?

I SYUKO sana ukuya mu cilongano cakwe Yeova! Twaya muli paladaise wa unkolanya umwaya antu aaya nu mutende ni nsansa. U mulimo ci uno mwakwata umu cilongano?

2. I cilangililo ci cino umutumwa Paulo waomvizye mu makalata aingi?

² Tungasambilila ivingi api lyasi lii ku cilangililo cino umutumwa Paulo waomvizye mu makalata aingi. Umu makalata yaa, Paulo wakolinye cilongano ku mwili wa muntu. Lyene wakolinye umuntu wenga na wenga ku vilundwa vya mwili.—Loma 12:4-8; 1 Kol. 12:12-27; Efes. 4:16.

3. A masambililo ci yatatu yano tumasambililapo?

³ Mu cipande cii tumalanda pa masambililo yatatu yano tungasambilila ku cilangililo cino Paulo waomvizye. Ca kutandikilapo, tumasambilila ukuti cila muntu wakwata umulimo * mu cilongano cakwe Yeova. Cakwe ciili, tumasambilila pali vino tungacita nga tukulola kwati tutaakwata mulimo uli onsi mu cilongano. Na cakwe citatu, tumalanda pali vino cila muntu alinzile ukwika mano ku milimo ino Yeova wamupeela umu cilongano.

4. Uzye ilembelo lyakwe Loma 12:4, 5 likatusambilizya cani?

⁴ Ca kutandikilapo cino tungasambilila ku cilangililo cakwe Paulo i cakuti swensi kwene twakwata umulimo ucindame uwa kuomba mu cilongano cakwe Yeova. Mu cilangililo cii, Paulo watandikilapo na mazwi yakuti: “Pano mwili waya ni vilundwa vingi, nga cila cilundwa cakwata mulimo uiyele. Mu musango uli onga kwene avino naswe twaya mwili onga muli Klistu, nupya swensi twailundanya kuli cila wenga ndi vino mwili onga waya ni vilundwa vipusanepusane.” (Loma 12:4, 5) Uzye Paulo walozizye mwi? Swensi kwene twakwata imilimo ipusanepusane mu cilongano, nomba swensi kwene twacindama.

5. I vyani vino Yeova wapeela amu cilongano?

⁵ Lino mwelenganya pa antu akwata imilimo mu cilongano, lilyo kwene sile mungelenganya pali yano yakatungulula umwi uvi. (1 Tesa. 5:12; Ayeb. 13:17) Mu cumi, Yeova wapeela “mawila mu antu” umwi uvi lyakwe kupitila muli Klistu. (Efes. 4:8) Pa “mawila mu antu” paya Iumba Ilikatungulula, aakaazwilizya umwi Umba Ilikatungulula, aaya muli Komiti ya Musambo, angalizi ya viputulwa, aakasambilizya mu masukulu ya uleza, ya eluda mu vilongano, na aomvi aakatumikila. Aina yaa yasontwa nu mupasi wa muzilo ku kusakamala imfwele zyakwe Yeova zicindamisye nu kukomelezya aina umu vilongano.—1 Pet. 5:2, 3.

6. Kulingana na 1 Tesalonika 2:6-8, i vyani vino aina asontwa nu mupasi wa muzilo yakaezya na maka ukucita?

⁶ Aina yakasontwa nu mupasi wa muzilo pakuti yaomba milimo ipusanepusane. Wakwe vivi kwene vino makasa, ingazo alino ni vilundwa vyuze vikaombela pamwi pakuti umwili waomba ningo, avino na ina aasontwa nu mupasi wa muzilo yakaombesya pakuti ivintu vyazipila amu cilongano. Yasiombesya pakuti yauze yayapeele umucinzi. Lelo yakaezya na maka ukwazwa nu kukomya aina na ya nkazi. (Welengini 1 Tesalonika 2:6-8.) Tukataizya Yeova pa kutupeela aomvi yaa aakakolezya vino yauze yakulonda ukucila vino aliyo yakulonda!

7. A mapaalo ci yano aaya mu mulimo wa nsita yonsi yakakwata?

⁷ Mu vilongano vimwi, yamwi yangasontwa ukuya ya misyonali, ya painiya aiyele, nanti ya painiya ansita yonsi. Nupya aina na ya nkazi umu nsi yonsi, yalenga umulimo wa kusimikila nu kupanga asambi ukuya ali mulimo ucindame sana. Pa mulandu na vino yasoolola, yazwa aingi ukuya alondezi yakwe Klistu Yesu. Nanti icakuti aingi pali yaa aakaombela Yeova mu mulimo wa nsita yonsi yasikwata impiya zingi nanti ivikwatwa, Yeova wayapeela ivintu ivingi visuma. (Mako 10:29, 30) Twatemwa sana aina yaa na ya nkazi nupya tukauvwa ningo ukuya nayo umu cilongano!

8. U mulandu ci uno kasimikila wi landwe lisuma wensi wacindamila kuli Yeova?

⁸ Uzye aina asontwa na yayo aya umu mulimo wa nsita yonsi, aliyo sile yacindama umu cilongano? Awe foo! Kasimikila wi landwe lisuma wensi wacindama sana kuli Leza nu ku amu cilongano. (Loma 10:15; 1 Kol. 3:6-9) Umulandu u wakuti cino amu cilongano yakalondesya ukucita, u kupanga asambi ya Mwene witu Yesu Klistu. (Mate. 28:19, 20; 1 Tim. 2:4) Yonsi aakasimikila, awatiziwe na asi yawatiziwe yakaezya na maka ukukolezya umulimo wa kusimikila.—Mate. 24:14.

9. U mulandu ci uno twacindikila ya nkazi?

 ⁹ Yeova akapeela ya nkazi imilimo mu cilongano pa kulanga ukuti yacindama sana kuli aliwe. Wacindika aci yaa, ya nyina, yamukamfwilwa na ya nkazi asimbe aakamuombela ni cisinka. Baibo ikalanda pa anaci aingi ali ni miyele isuma iyazanzyanga Leza. Ikayataizya pali vino yali na mano, utailo, kusipa, ukapekape ni milimo yuze isuma. (Luka 8:2, 3; Mili. 16:14, 15; Loma 16:3, 6; Filipi 4:3; Ayeb. 11:11, 31, 35) Tukataizya Yeova pa kutupeela ya nkazi yaa umu vilongano aaya ni miyele ii isuma!

10. U mulandu ci uno twacindikila akoloci yano twakwata umu vilongano?

¹⁰ Nupya twapaalwa sana ukukwata akoloci aingi. Mu vilongano vimwi mwaya aina na ya nkazi aaombela Yeova umi wao onsi na ucisinka. Akoloci yauze yene alino yasambilile icumi. Nomba akoloci aingi yakalwalilila pa mulandu nu ukote. Intazi zizyo zingalenga yataombesya mu cilongano nu mu mulimo wa kusimikila. Nanti ciye vivyo, akoloci yaa yakaezya papezile amaka yao ukuombako mulimo wa kusimikila nupya yakaomvya amaka yao ku kukomelezya nu kusambilizya yauze imilimo! Nupya tukasambilila ivingi kuli vino vyayacitikila. Yacindama sana kuli Yeova na kuli sweswe.—Mapi. 16:31.

11-12. Uzye acance aaya mu cilongano cinu yamukomelezya uli?

¹¹ Elenganyini na pa yacance. Yakakwata intazi zingi lino yakukula mu nsi ii yakwe Satana umwavula amano aipe. (1 Yoa. 5:19) Lelo tukakomeleziwa sana nga twalola acance yakwasuka pa kulongana, kuombako umulimo wa kusimikila, nu kuya asipe lino yakulanda pali vino yazumilamo. Mwe yacance, mwakwata umulimo ucindame sana mu cilongano cakwe Yeova!—Masa. 8:2.

¹² Aina yamwi na ya nkazi cikayatalilila ukuzumila ukuti yacindama sana ku amu cilongano. I cani cingatwazwa swensi wenga na wenga ukuyuvwa ukuti twacindama ku amu cilongano? Lekini tulole.

13-14. I cani cingalenga yamwi yayuvwa ukuti yatacindama umu cilongano?

¹³ Cakwe ciili cino tungasambilila uku cilangililo cakwe Paulo cikalenga twaelenganya pa ntazi ino aingi yakwata ndakai. Aingi cikayatalila ukuzumila ukuti Yeova angayaomvya umu cilongano. Paulo walemvile ukuti: “Ndi cali lwazo lwavwanga lwati, ‘Nemo nsi kasa, caleka nsi cilundwa ca mwili,’ uzye lwene lutangaya cilundwa ca mwili pamulandu wakwe cico? Ndi cali ikutwi lyavwanga lyati, ‘Nemo nsi linso, caleka nsi cilundwa ca mwili,’ uzye lyene litangaya cilundwa ca mwili?” (1 Kol. 12:15, 16) I vyani vino Paulo walondanga tusambilileko?

¹⁴ Nga mukuilinganya kuli yauze mu cilongano, cingalenga mutandike ukwelenganya ukuti mutacindama. Yamwi umu cilongano yakasambilizya ningo, yamwi nayo yamanya ukutantika ningo ivintu, yauze nayo yamanya ivya kukomelezya yauze. Limwi mukayuvwa ukuti mutanga mukwanisye kuomba wakwe vino antu yaa yakaomba. Cii cikalanga ukuti mwaicefya nupya mwafuuka. (Filipi 2:3) Nomba mulinzile ukucenjela. Ndi cakuti mwatwalilila ukuikolanya kuli yauze aakaomba ningo imilimo, mulatoovoka. Mungatandika nu kwelenganya ukuti mutaakwata umulimo umu cilongano wakwe vino Paulo walanzile. I cani cingamwazwa ukuta ukwelenganya vivyo?

15. Ukulingana na 1 Kolinto 12:4-11, i vyani vino tulinzile ukumanya pa mawila ali yonsi yano tungakwata?

¹⁵ Elenganyini pa cisinka cii: Yeova wapeezile Aina Klistu ya kutandikilako uwila wa kucita ivizungusyo kuomvya umupasi wa muzilo, lelo asi Ina Klistu yonsi apokeliile amawila ali yamwi. (Welengini 1 Kolinto 12:4-11.) Yeova wayapeezile mawila ni milimo ipusanepusane, lelo cila muntu wacindime kuli aliwe. Ndakai, tutapeelwa uwila wa kucita ivizungusyo kuomvya umupasi wa muzilo. Nomba vivi kwene vino cali mpiti avino caya na ndakai. Tutanga tumanye  imilimo ili imwi, lelo swensi twacindama kuli Yeova.

16. A mazwi ci yano umutumwa Paulo walanzile yano tulinzile ukulondela?

¹⁶ Ukucila ukulaikolanya ku Ina Klistu yauze, tulinzile ukulondela amazwi yano Paulo walanzile akuti: “Cila muntu aicecete pa vicitwa vyakwe. Ndi visuma, lyene angaya ni cilumba pali vino umwisikulu watacita, kwaula kukolanya ni vintu vino umuze wacita.”—Gala. 6:4.

17. I visuma ci ivilacitika nga tukulondela ukusunda kwa mutumwa Paulo?

¹⁷ Ndi cakuti tukulondela kusunda kwa mutumwa Paulo nu kuceceta miyele itu, tungatandika ukulola ukuti twamanya imilimo ino yauze yatamanya. Limwi eluda umwi asilanda ningo malyasi, nomba akaomba ningo umulimo wa kusimikila. Limwi atanga atantika ningo ivintu wakwe vino ya eluda yauze yakatantika, nomba angaya a eluda uwaya ni cikuuku nu kutemwa nupya wino ya kasimikila yangangukilwa ukulanda nawe. Nupya limwi waya ni miyele isuma nupya akapokeleela aenyi. (Ayeb. 13:2, 16) Nga tukwika mano ku mawila yano twakwata, tulayuvwa ningo nupya tulalola ukuti twakwata umulimo mu cilongano. Nupya tutalauvwila aina uzuwa pa milimo ino yapeelwa.

18. Uzye tungacita uli pa kuya ya kasambilizya yasuma?

¹⁸ Asi mulandu ni milimo ino twapeelwa umu cilongano, swensi tulinzile ukutwalilila ukulunduluka. Pakuti tutwalilile ukulunduluka, Yeova akatusambilizya ukupitila umwi uvi lyakwe. Mu kulongana kwa mukasi ka mulungu tukasambilila vino tungaomba ningo umulimo wa kusimikila. Uzye mukaomvya vino mukasambilila pa kulongana kuu?

19. Uzye mungacita uli pakuti mufikepo ukuzanwa ukwi sukulu lyakwe ya Kakosoola ya Wene?

¹⁹ Kwaya ni Sukulu Lyakwe ya Kakosoola ya Wene. Aina na ya nkazi ali ni myaka 23 kufika uku 65 yangazanwako ukwi sukulu lii. Limwi mungalola kwati mutanga muzanweko ukwi sukulu lii. Kuluta ukwika mano pa vingalenga mutazwanwako, mwaika mano pa vingalenga muzanweko. Tantikini ivingamwazwa kukwanisya ivikalondekwa pakuti mukazanweko. Yeova angamwazwa, nupya nga mwaombesya, mungakwanisya ukuomba vino mukulola kwati mutanga mukwanisye.

20. I vyani vino tungasambilila ku mazwi aaya pali Loma 12:6-8?

²⁰ Cakwe citatu cino tungasambilila ku cilangililo cakwe Paulo caya pali Loma 12:6-8. (Welengini.) Na pakwene Paulo walanzile ukuti amu cilongano yakwata mawila apusane. Paa pene Paulo walanda sana pali vino tulinzile ukuomvya uwila uno twakwata ku kulundulula icilongano.

21-22. I vyani vino tungasambilila kuli ya Robert na ya Felice?

²¹ Elenganyini pali vino vyacitikiile umwina wino tumaama ukuti Robert. Pa cisila ca kuombela ku mpanga yuze, wizile atandika ukuombela pa Betele mu mpanga ya kumwao. Nanti icakuti yamunenyile ukuti pasi vino waluvyanyizye pakuti yamupeele umulimo uze, walanzile ukuti: “Pa myezi iingi ntali ni nsansa pano nalolanga kwati nafizilwe ukuomba mulimo uno napeezilwe. Kwayanga insita zimwi lino nelenganyanga pa kuleka umulimo wa pa Betele.” I cani calenzile ukuti aye ni nsansa nupya? Eluda muze wamwiwisyeko ukuti Yeova akatusambilizya  mu milimo ino twaombanga mpiti pakuti tungaomba ningo mu milimo ino twapeelwa. Mwina Robert wizile ailuka ukuti walinzile ukuta ukwelenganya pa vya mpiti nu kwika mano kuli vino akuomba pa nsita iyo.

²² Ya Felice Episcopo nayo yakweti intazi ili imwi. Yene na ya mama yao yamazile Isukululu lya Gilyadi umu 1956 nu kutandika ukuomba mulimo wa ukangalila wa ciputulwa mu Bolivia. Umu 1964, izile iyakwata umwana. Ya Felice yalanzile iyati: “Catutaliile ukuta ukuomba umulimo uno twatemilwe sana. Ningati pa mwaka onga natoovwike. Nomba Yeova wangavwile ukusenuka muli vino nelenganyanga nu kwika mano ku mulimo upya uno nizile inkwata uwa kuya muvyazi.” Uzye namwe mukayuvwa wakwe ya Robert na ya Felice? Uzye namwe mukauvwa uyi pa mulandu wakuti ndakai musikuomba umulimo uno mwaombanga? Ndi cakuti avino mukayuvwa, mulaya ni nsansa nga mwasenuka nu kwika mano kuli vino mukuombela Yeova na ina ndakai. Twalililini ukuya acincile, mwaomvya mawila na vino mwamanya ku kwazwa yauze, nupya mulaya nu luzango lino mukulundulula icilongano.

23. I vyani vino tulinzile ukucita, nupya i vyani vino tulalandapo mu cipande cilondeliilepo?

²³ Swensi kwene twacindama sana kuli Yeova. Akalonda tuye umu lupwa lwakwe. Nga tukwelenganya pali vino tungacita pakuti twazwe aina na ya nkazi nu kuombesya ukucita vivyo kwene, tulayuvwa ukuti twakwata umulimo mu cilongano! Uzye tukalola uli yauze mu cilongano? Tungalanga uli ukuti twayatemwa nupya twayacindika? Ivisinka vii vicindame, vilalandwapo mu cipande icilondelilepo.