1. I vyani vino Yeova wapeela aomvi yakwe yonsi acisinka?

YEOVA wazumilizya aomvi yakwe yonsi acisinka ukuya umu cilongano cakwe. Nanti cakuti cila muntu wakwata imilimo ipusanepusane, swensi kwene twacindama nupya tukalondekwa ukwazwana. Umutumwa Paulo walenga tuvwikisye isambililo lii licindame. U mu nzila ci?

2. Ukulingana na Efeso 4:16, u mulandu ci uno tulinzile ukucindikilana nu kuombela pamwi?

² Wakwe vino ilembelo apafumile umutwe wa cipande cii likulanda, Paulo walangilile ukuti kusi anganena umuomvi muze wakwe Yeova ukuti: “Ntakukulonda foo!” (1 Kol. 12:21) Nga tukulonda umu cilongano muye umutende tulinzile ukucindikana nu kuombela pamwi. (Welengini Efeso 4:16.) Ndi cakuti tukuombela pamwi, amu cilongano yakayuvwa ukuti yatemwikwa nupya icilongano cilakoma.

3. I vyani vino tumasambilila umu cipande cii?

³ Iinzila ci zimwi zino tungalangilamo ukuti twacindika Aina Klistu yauze amu cilongano? Umu cipande cii, tumalanda pali vino ya eluda yangalanga ukuti yacindika ya eluda yauze. Lyene tumaiza tulande pali vino swensi wenga na wenga tungalanga ukuti twacindika aina na ya nkazi asimbe. Na pa kusyalikizya tumaiza tusambilile pali vino tungalanga  ukuti twacindika yano yasivwanga ningo ululimi lwitu.

4. U kusunda ci kwakwe Paulo ukwalembwa pali Loma 12:10 kuno ya eluda yalinzile ukulondela?

⁴ Ya eluda yonsi umu cilongano yakasontwa nu mupasi wa muzilo wakwe Yeova. Lelo cila muntu wakwata uwila upusane. (1 Kol. 12:17, 18) Yamwi alino yacisonsilwe nupya yatatala yayelezya. Yamwi nayo yatange yaombe imilimo iingi pa mulandu nu musinku nanti ukulwalilila. Lelo kusi eluda ali wensi alinzile ukulola eluda muze ukuti atacindama. Nomba, eluda wenga na wenga alinzile ukulondela ukusunda kwakwe Paulo ukwalembwa pali Loma 12:10.—Welengini.

5. Uzye ya eluda yakalanga uli ukuti yacindika ya eluda yauze, nupya u mulandu ci uno ukucita vivyo kwacindamila?

⁵ Ya eluda yakalanga ukuti yacindika ya eluda yauze ndi cakuti yakukutika lino eluda muze akulanda. Kucita vii kwacindama, sana sana lino iyakomaana kuti yalanzyanye pali vimwi vicindame. U mulandu ci? Uvwini vino Ulupungu Lwa Mulinzi lwakwe Okotoba 1, 1988 lwalanzile, lwatile: “Ya eluda yalinzile ukwiusya ukuti Klistu angaomvya umupasi wa muzilo ukwazwa eluda aliwensi mu cilongano ukulanda icisinte ca muli Baibo icingazwa ya eluda ukumanya ivya kucita pa mulandu umwi nanti ivya kupingulapo. (Mili. 15:6-15) Umupasi wa muzilo ukaazwa ya eluda yonsi mu cilongano asi eluda wenga sile.”

6. I vyani vingazwa ya eluda ukulaombela pamwi, nupya ukucita vivyo kungazwa uli icilongano?

⁶ Eluda uwacindika ya eluda yauze asilonda aliwe atandikilapo ukulanda lyonsi lino yakomaana. Asilandapo pali vyonsi nupya asilola ukuti vyonsi vino akalanda ali vyampomvu. Nomba akalanda vino akwelenganya umu nzila isuma. Akauvwa na kuli vino yauze yalanda. Ni cicindamisye i cakuti akalondesya ukunenako yauze ivisinte vya muli Baibo nu kulondela vino muomvi mutailwe uwa mano akalanda. (Mate. 24:45-47) Ndi cakuti ya eluda yakulanga ukuti yatemwana  nupya yacindikana lino yakulanzyanya pali vimwi, umupasi wa muzilo ulaya nayo nupya ulayazwa ukupingulapo ivintu ivilalenga icilongano ukukoma.—Yako. 3:17, 18.

7. Uzye Yesu walolanga uli usimbe?

⁷ Ndakai mu vilongano mwaya atwalane ni ndupwa. Lelo mwaya na ina na ya nkazi aingi asimbe. Uzye tulinzile ukulola uli asimbe? Tulinzile ukulayalola wakwe vino Yesu wayalolanga. Yesu atatwazile lino wali pano nsi. Watwalilile ukuya umusimbe nu kwika mano uku mulimo uno waombanga. Yesu ataatazile asambilizyepo ukuti Umwina Klistu alinzile sile ukutwala, ukutwalwa nanti ukwikala umusimbe. Nomba walanzile ukuti Aina Klistu yamwi yangasoololapo ukwikala usimbe. (Mate. 19:11, 12) Yesu wacindike sana asimbe. Atalolanga asimbe ukuti yatacindama nanti ukuti yulizya vimwi.

8. Ukulingana na 1 Kolinto 7:7-9, i vyani vino Paulo wakomelizye Aina Klistu ukulaelenganyapo?

⁸ Wakwe Yesu, umutumwa Paulo wali umusimbe lino wasimikilanga. Paulo ataatazile asambilizye ukuti iciipe Umwina Klistu ukutwala. Wamanyile ukuti cila muntu alinzile ukuipingwila. Nanti ciye vivyo Paulo wakomelizye Aina Klistu ukwelenganyapo ndi cakuti yangaombela Yeova lino yacili asimbe. (Welengini 1 Kolinto 7:7-9.) Paulo atalolanga Aina Klistu asimbe ukuti yatacindama. Alino, wapeezile Timoti Umwina uwacance umusimbe imilimo icindame. * (Filipi 2:19-22) Fwandi citange cizipe ukulola ukuti umwina angaomba ningo ndi cakuti watwala nanti umusimbe.—1 Kolinto 7:32-35, 38.

9. I vyani vino tungalanda pa cupo nu usimbe?

⁹ Yesu na Paulo yatalanzilepo ukuti Aina Klistu yalinzile ukutwala, ukutwalwa nanti ukwikala usimbe. I vyani fwandi vino tungalanda pa usimbe? Lupungu Lwa Mulinzi lwakwe Okotoba 1, 2012, lwalanzile ukuti: “Icupo nu usimbe a mawila kufuma kuli Leza. . . . Yeova asilola ukuti asimbe yalinzile ukuya nu ulanda pa mulandu wakuti yataatwala nanti ukutwalwa.” Fwandi tulinzile ukucindika aina na ya nkazi asimbe aaya mu cilongano.

10. Ndi cakuti twacindika aina na ya nkazi asimbe, i vyani vino tutalinzile ukucita?

¹⁰ Tungalanga uli ukuti twacindika vino  aina na ya nkazi asimbe yakayuvwa? Tulinzile ukulaiusya ukuti Aina Klistu yamwi yasoolola ukwikala sile ukwaula ukutwala nanti ukutwalwa. Yamwi yakalonda ukutwala nanti ukutwalwa, lelo yatatala yazana angayalinga. Yamwi yafwilwa ya wao. Asi mulandu ni calenga, tutalinzile ukulauzya aina na ya nkazi asimbe umulandu uno yatatwalila nanti ukutwalwa nanti sile ukuyuzya ndi cakuti tungayazwa ukuzana uwa kutwalana nawe. Kuya kwene, yamwi yangamunena ukuti muyazwe kuyalondelako uwa kutwalana nawe. Nomba ndi cakuti yatamunenyile alino mwayalondela, uzye yangayuvwa uli? (1 Tesa. 4:11; 1 Tim. 5:13) Lekini tulande pali vino aina na ya nkazi yamwi aaya na ucisinka yalandapo.

11-12. Uzye tungatoovola uli asimbe?

¹¹ Umwangalizi umwi uwa ciputulwa aakaomba ningo, walanzile ukuti mwaya ivisuma ivingi mu usimbe. Lelo, walanzile ukuti cikamutalila sana ndi cakuti aina na ya nkazi yakumuzya ukuti: “I cani cino utatwalila?” Umwina umusimbe aakaombela pi ofesi lya musambo walanzile ukuti: “Nalola ukuti aina na ya nkazi yakauvwila sana asimbe uluse. Cii cikalenga yalola kwati usimbe i cisendo asi wila foo.”

¹² Nkazi aakaombela pa Betele walanzile ati: “Aina na ya nkazi yakalola kwati asimbe yonsi yakalonda aakutwalana nayo, fwandi lyonsi lino yali api umba lya antu yakalola kwati apano yangazana uwa kutwalana nawe. Lino naile mu kuombela ku mpanga yuze, wanda umwi naile mu kulongana manguzi. Nkazi wino nikalanga nawe wanenyile ati kwali aina yaili mu cilongano. Watiile atanenyile vivyo pa mulandu wakuti walondanga kundondela uwa kutwalana nawe. Nomba lino twafisile sile mu Ng’anda ya Wene, wantwazile ku ina yayo yaili pakuti njalole. Ningalanda ukuti nuvwile insonyi, na ina kwene yaya yuvwile insonyi.”

13. I vyani vimwi ivyacitike ivyakomelizye nkazi umwi umusimbe?

¹³ Nkazi namuze aakaombela pa Betele walanzile ati: “Namanya ya painiya aikolo asimbe aaya ni miyele isuma, aika mano ku vintu, aipeelesya nupya aaya ni nsansa lino yakuomba umulimo nupya yakaazwa sana icilongano. Yakaelenganya ivisuma pa usimbe. Yasielenganya ukuti yaluta yauze pa mulandu wakuti yene asimbe, nanti ukwelenganya ukuti yatanga yaye ni nsansa pa mulandu wakuti yatakweti ya wao nanti ana.” Ali usuma uwa kuya mu cilongano muno yonsi yacindikana. Mulamanya ukuti aina na ya nkazi yasimyuvwila uzuwa, yamwikako mano nupya yasielenganya ukuti mwacindama ukuyaluta. Kukaya ukumanya sile ukuti yamitemwa.

14. Uzye tungalanga uli ukuti twacindika asimbe?

¹⁴ Aina na ya nkazi asimbe yalataizya sana nga tukuyacindika pa mulandu ni miyele isuma ino yakwata, asi kuyasuula pa mulandu wakuti yataatwala nanti ukutwalwa. Kuluta ukuyanena ivingayatoovola, cingazipa ukulayataizya pali vino yaya na ucisinka. Kucita vivyo kulalenga aina na ya nkazi asimbe ukukanayuvwa kwati tukuyanena ukuti “Ntakumulonda, foo!” (1 Kol. 12:21) Lelo yalamanya ukuti twayacindika nupya twacindika ni milimo ino yakaomba mu cilongano.

15. Uzye yamwi yakasenuka muli vyani pakuti yalundulule umulimo wa kusimikila?

¹⁵ Mu myaka ya likwene, ya kasimikila aingi yasambilila indimi zyuze pakuti yaombesya  mu mulimo wa kusimikila. Kucita vivyo kukalondekwa ukusenuka. Aina na ya nkazi yaa yasya ivilongano ivikaomvya indimi zyao pakuti yakaombele uku vilongano ivikaomvya indimi zyuze ukukalondekwa ya Kasimikila ya Wene aingi. (Mili. 16:9) Yaisoolwela ukucita vii pakuti yakoleezya ivya Wene. Nanti icakuti pakapita imyaka pa kuti yaelezye ululimi luze, yakaazwa icilongano. Miyele yao isuma ni vikayacitikila, vikakomelezya sana amu cilongano. Tukacindika sana aina yaa na ya nkazi pali vino yaipeelesya!

16. I vyani vino ya eluda yalinzile ukulola lino yakulinga umwina ukuya eluda nanti muomvi?

¹⁶ Ya eluda yatalinzile ukupingulapo ukuti umwina atanga asontwe pali ueluda nanti uomvi pa mulandu wakuti ataatala waelezya sana ululimi luno icilongano cikaomvya. Ya eluda yalinzile ukulola ukuti mwina watalinga ukuya eluda nanti umuomvi ukulingana na vino Malembelo yakalanda, asi kuomvya ululimi luno icilongano cikaomvya.—1 Tim. 3:1-10, 12, 13; Tito 1:5-9.

17. I vyani vino avyazi yalinzile ukupingulapo lino ulupwa lwakukila ku mpanga yuze?

¹⁷ Indupwa zimwi zyakuukila ku mpanga yuze pa mulandu ni ntazi zikacitika ku mwao nanti uku kulonda incito. Na cii calenga ana yao ukuya mu kusambilila pa masukulu yano yakaomvya ululimi lwa ku mpanga kwene iyo. Avyazi nayo kwene yakalondekwa ukusambilila ululimi lwa ku mpanga yuze pakuti yazane incito. Nga ndi cakuti kuli icilongano nanti iumba ilikaomvya ululimi lwa kuno yafuma? Uzye ulupwa lungaya ku cilongano ci? Uzye yangasoolola icilongano ca lulimi lwa ku mpanga iyo nanti ululimo lwa ku mpanga ya ku mwao?

18. Kulingana na Galatiya 6:5, tungalanga uli ukuti itucindika vino umutwe wa lupwa wapingulapo?

¹⁸ Umutwe wa lupwa alinzile kupingulapo kuno ulupwa lumalongananga. Pa mulandu na vivyo, umutwe wa lupwa alinzile ukwelenganya pali vino vingazipila ulupwa lwakwe. (Welengini Galatiya 6:5.) Tulinzile ukucindika vino umutwe wa lupwa watapingula. Vili vyonsi vino umutwe wa lupwa wapingula, tulinzile ukulondela nu kupokeleela ulupwa mu cilongano citu.—Loma 15:7.

19. I vyani vino imitwe ya ndupwa ilinzile ukwelenganyapo nu kupepelapo sana?

¹⁹ Amu ndupwa zimwi, yangasoolola ukulalongana mu cilongano cino yakaomvya ululimi luno avyazi yakaomvya, nomba ana yatanga yalanda ningo ululimi lulo. Ndi cakuti icilongano cayela mu ncende ino yakaomvya ululimi lwa ku mpanga iyo, cingalenga ana yacuula ukuvwikisya lino yali mu kulongana nupya yatanga yalunduluke. U mulandu ci? A pa mulandu wakuti ana limwi yangaasambilila pa sukulu pano yakaomvya ululimi  lwa mpanga kwene iyo ukuluta ululimi lwa mpanga kuno avyazi yao yafuma. Ndi cakuti ica musango uwo cacitika, imitwe ya ndupwa ilinzile kupepelapo nu kusoolola icingaazwa ana ukupalama sana kuli Yeova nu ku antu yakwe. Yangasoololapo kusambilizya ana yao ululimi lwao, nanti ukukuukila ku cilongano icikaomvya ululimi lwa ku mpanga kwene iyo luno ana yangauvwikisya. Vili vyonsi vino umutwe wa lupwa wasoololapo, amu cilongano yalinzile ukuvicindika nu kupokeelela ulupwa lulo.

20. Tungalanga uli ukuti twacindika aina na ya nkazi aakusambilila ululimi luze?

²⁰ Wakwe vino itusambilila, mu vilongano ivingi mungaya aina na ya nkazi aakucuula pakuti sile yasambilile ululimi luze. Cingayatalila ukulanda vino yakwelenganya. Nomba nga tusikulola sile pali vino yakucuula ukusambilila ululimi, tulaalola vino yatemwa Yeova na vino yakalondesya ukumuombela. Nga twalola imiyele ii isuma ino aina na ya nkazi yakwata, tulayacindika. Tutalalanda ukuti “Ntakukulonda, foo” pa mulandu sile uwakuti yasilanda ningo ululimi lwitu.

21-22. U mulimo ci ucindame uno twakwata?

²¹ Tukataizya sana Yeova pali vino watupeela cila muntu incito ya kuomba mu cilongano. Nampo nga sweswe yonsi nanti ya mama, asimbe nanti atwalane, ance nanti aikolo nanti limwi tukalanda ululimi luze luno tutaamanya ningo, swensi kwene twacindama sana kuli Yeova nu ku antu yauze.—Loma 12:4, 5; Kolo. 3:10, 11.

²² Lekini twatwalilila ukuomvya ivyeo vicindame sana vino twasambilila ku cilangililo cino Paulo walanzile ica mwili wa muntu. Kucita vivyo kulatwazwa ukulola inzila zino tungaakomelezezyamo aina itu na ya nkazi. Nupya cilalenga tutwalilile ukuyatemwa nu kuyacindika.