CIPANDE CA KUSAMBILILAMO 32
Mwaya Aicefye Nupya Mwamanya Umwa Kupeleela
‘Wapita mu ufuuke na Leza wako.’—MIKA 6:8, NWT.
LWIMBO NA. 31 Mwapita Pamwi na Leza!
VINO TUMASAMBILILAPO *
1. I vyani vino Davidi walanzile pali vino Yeova waicefya?
UZYE umu cumi tungalanda ukuti Yeova waicefya? Ee. Pa nsita imwi Davidi watiile: “Ukancingilila nu kuntuula. Nacindama pano ukangazwa [“waicefya” NWT].” (2 Sam. 22:36; Masa. 18:35) Limwi Davidi welenganyanga pa wanda uno kasesema Samueli waile uku ng’anda ku mwao kukupaka uwali nu kuya umwene wa Izlaeli uwalondelelapo. Davidi wali umwance pa ana aonsi 8, lelo ali wino Yeova wasoolwile ukupyana Umwene Saulo.—1 Sam. 16:1, 10-13.
2. I vyani vino tumasambilila umu cipande cii?
2 Davidi angazumilizya amazwi aya pa Masamu 113 aakalanda pali Yeova ukuti: “Wino [Yeova] akalolekesya na pano nsi, apayela ulwelele ni nsi. Aliwe akakatusya umulanda . . . apakuti yaikala pamwi ni ntunguluzi zya antu yakwe.” (Masa. 113:6-8) Umu cipande cii, tumatandikila ukusambilila pa masambililo acindame pa kuicefya lino tumalandanga pali vino Yeova walanga imiyele ii. Lyene tumaiza tusambilile ivingi pa kuicefya kuli vino Umwene Saulo, kasesema Danieli na Yesu yacisile.
I VYANI VINO TUNGASAMBILILA KULI YEOVA?
3. I vyani vino Yeova akatucitila, nupya cico cikalangilila cani?
3 Yeova akalanga ukuti waicefya muli vino akacitila ya kapepa yakwe aatamalilika. Asipokelela sile ukapepa witu, lelo akatulola nu kuti sweswe ya cuza yakwe. (Yako. 4:8) Yeova watumile Umwanakwe ukwizafwa pa mulandu na maifyo itu pakuti citwangukile ukuya ya cuza yakwe. Yeova wakwatisya uluse!
4. I vyani vino Yeova watupeela, nupya u mulandu ci?
4 Lolini inzila na yuze ino Yeova akalangilamo ukuti waicefya. Vino Yeova a Kaumba, nga watuumvile umu nzila yakuti tutange twaisoolwela vino tukulonda ukucita. Nomba atacisile vivyo. Watuumvile umu cata cakwe nu kutupeela insambu zya kuisoolwela. Vino tukasoololapo ukucita vyacindama sana kuli Yeova nanti icakuti twacepesya sana ngu kuilinganya kuli aliwe, akalonda ukuti twamuombela pa mulandu wakuti twamutemwa nupya tukamuvwila. (Malan. 10:12; Eza. 48:17, 18) Tukataizya sana pali vino Yeova waicefya!
Cikope cikulangilila Yesu ali ukwi yulu. Ya kateeka yauze yali mupipi nawe. Yonsi kwene iika mano ku angeli imintapendwa. Angeli yamwi yakuya pa mpanga ya pansi ku kuomba umulimo uno Leza wayapeela. Yeova wapeela imilimo ku viumbwa vyonsi ivili pa cikope cii (Lolini mapalaglafu 5)
5. Uzye Yeova akacita uli pa kutusambilizya ukuya aicefye? (Lolini icikope icili pa nkupo.)
5 Yeova akatusambilizya ukuya aicefye muli vino akatucitila. Yeova ali Wino wakwatisya amano pa uumbo onsi. Nanti ciye vivyo, akauvwa kuli yauze nga yalanda. Yeova walesile Umwanakwe ukumwazwa ukuumba ivintu vyonsi. (Mapi. 8:27-30; Kolo. 1:15, 16) Nanti icakuti Yeova u wa maka yonsi, akapeelako yauze imilimo. Wasonta Yesu ukuya Umwene wa Wene Wakwe Leza, nupya wapeela ya 144,000 amaka ya kuya ya kateeka yauze na Yesu. (Luka 12:32) Nupya Yeova wasambilizya Yesu ukuya Umwene nupya Simapepo Mukulu. (Ayeb. 5:8, 9) Nupya akasambilizya na ya kateeka yauze na Yesu ivya kuomba umulimo uu, nomba asiyatungulula muli vyonsi lino yakuomba. Lelo, wataila ukuti yalaacita ukulonda kwakwe.—Umbw. 5:10.
Tukakolanya Yeova nga tukusambilizya yauze nu kuyapeela imilimo (Lolini mapalaglafu 6-7) *
6-7. I vyani vino tukusambilila kuli Tata witu uwa kwi yulu pa kupeela yauze imilimo?
6 Ndi cakuti Tata witu wino asilondekwa ukwazwiwa na aliwensi akapeelako yauze imilimo, fwandi swemo swe yantu tulinzile nu kucizyapo. Ndi cakuti mwemwe mutwe wa lupwa nanti eluda umu cilongano, mungakolanya uli Yeova? Mwapeelako yauze imilimo nu kukanayatungulula sana muli vyonsi vino yakuomba. Nga mukukolanya Yeova, mulaomba ningo nupya mulasambilizya yauze nu kuyazwa ukuomba ningo. (Eza. 41:10) I vyani vyuze vino aakatungulula yangasambilila kuli Yeova?
7 Baibo ikalanga ukuti Yeova akaika amano kuli vino angeli yakwelenganya. (1 Yamw. 22:19-22) Mwe yavyazi mungakolanya uli Yeova? Nga calinga, mwauzyako ana inu pali vino yakwelenganya pakuti umulimo umwi uombwe. Ndi cakuti vino yalanda vili sile ningo, mungavilondela.
8. Uzye Yeova walangilile uli ukuti wateekelile Abulaamu na Sala?
8 Inzila na yuze ino Yeova akalangilamo ukuti waicefya u kuteekela. Yeova akateekelela yayo aakamuombela ndi cakuti yatwisika vino watapingulapo ukucita. Uvwile kuli vino Abulaamu welenganyanga pali vino Yeova wapingwilepo ukonona umusumba wa Sodoma na Gomola. (Utan. 18:22-33) Nupya iusyini vino Yeova wacisile kuli Sala umuci wakwe Abulaamu. Atasosile lino Sala wasesile lino wamunenyile ukuti wali nu kukwata inda umu ukote. (Utan. 18:10-14) Nomba wamucindike.
9. I vyani vino avyazi na ya eluda yangasambilila kuli Yeova?
9 I vyani vino mwe yavyazi na ya eluda mungasambilila kuli Yeova? I vyani vino mukacita ndi cakuti ana inu nanti yamwi umu cilongano yatwisika vino imupingulapo? Uzye papo kwene mukatandika ukuipokolola? Nanti limwi mukaezya ukuvwikisya vino yakwelenganya? Amu lupwa na amu cilongano yakaya ni nsansa ndi cakuti aakutungulula yakukolanya Yeova. Kufika paa, itulanda pali vino tungasambilila pali vino Yeova waicefya. Lekini lyene tulole vino tungasambilila pa kuicefya uku malyasi aalembwa muli Baibo.
I VYANI VINO TUNGASAMBILILA KULI YAUZE?
10. Uzye Yeova akaomvya uli ivyacitikiile yauze uku kutusambilizya?
10 Vino Yeova a “Kasambilizya Witu wa Papelapela” watulembela malyasi umwi Izwi lyakwe pakuti tusambilileko. (Eza. 30:20, 21) Muli Baibo tukasambilila pa antu aali ni miyele iikazanzya Leza, pa miyele iyo paya nu ufuuke. Nupya tukasambililako na kuli vino vyacitikiile yayo afizilwe ukulanga imiyele kwene iyo isuma.—Masa. 37:37; 1 Kol. 10:11.
11. I vyani vino tukusambilila uku viipe vino Saulo wacisile?
11 Elenganyini pali vino vyacitikiile Umwene Saulo. Lino wali umulumendo wali umufuuke. Wamanyile umwa kupeleela nupya insita zimwi wakananga nu kupeelwa imilimo imwi ino walolanga ukuti atange akwanisye. (1 Sam. 9:21; 10:20-22) Patalengiile, Saulo wizile aya ni cilumba nu kutandika ukucita ivintu vino yatamunenyile ukucita. Imiyele ii yalolike lino wizile aya umwene. Pa nsita imwi wafizilwe ukuteeka umwenzo lino walolelanga kasesema Samueli. Ukucila ukutaila Yeova ukwazwa antu, Saulo wapeezile ilambo lya koca nanti icakuti atazumiliziwe ukucita vivyo. Na cico calenzile Yeova amukaane nu kumufumya pa wene. (1 Sam. 13:8-14) Tukaya na mano ndi cakuti twasambililako kuli vino vyacitikiile Saulo nu kukanacita ivintu vino tutapeezilwe insambu.
12. Uzye Danieli walangilile uli ukuti wali u mufuuke?
12 Elenganyini pa visuma vino kasesema Danieli wacisile ukupusanako ni viipe vino Saulo wacisile. Danieli watwalilile ukuicefya nu kufuuka nupya lyonsi walenganga Yeova ukuti amwazwe. Lino Yeova wamuomvizye ukwilwila Nebukadineza iciloto, Danieli atalanzile ukuti wilwile uku maka yakwe. Lelo wapeezile Yeova ululumbi nu mucinzi onsi. (Dan. 2:26-28) I vyani vino tukusambililako? Ndi cakuti aina yatemwa vino tukalanda malyasi nanti ivisuma ivikacitika lino tukusimikila, tulinzile ukwiusya ukuti ululumbi lonsi lulinzile ukuya kuli Yeova. Tulinzile ukwiluka ukuti vyonsi vino tukacita tutange tuicitile sile ukwaula ukuti Yeova atwazwe. (Filipi 4:13) Nga twacita vivyo tulalanga nu kuti tukukolanya Yesu. U mu nzila ci?
13. I vyani vino tukusambilila kuli Yesu ukulingana na mazwi aaya pali Yoane 5:19, 30?
13 Nanti icakuti Yesu wali umwana wakwe Leza mumalilike, wasintilile sana pali Yeova. (Welengini Yoane 5:19, 30.) Ataatazile aezye ukupoka amaka kuli Isi wa kwi yulu. Ilembelo lyakwe Filipi 2:6 likatunena ukuti Yesu “atatazile aelenganyepo ukuti angalingana na Leza,” NWT. Yesu wamanyile umwakupeleela nupya wacindike amaka yano Isi wakwata.
Yesu wamanyile umwakupeleela pa maka yano wakweti (Lolini palaglafu 14)
14. Uzye Yesu wacisile uli lino yamulenzile cimwi cino atakwetipo amaka?
14 Elenganyini pali vino Yesu wacisile lino asambi yakwe, Yakobo na Yoane pamwi na ya nyina yamulenzile cimwi cino wene atakwetipo amaka ya kuyapeela. Lilyo kwene sile, Yesu walanzile ukuti Isi uwa kwi yulu aliwe wakweti amaka akupingula aalinzile ukwikala ukwikasa lilunji ni limani lyakwe Yesu umu Wene. (Mate. 20:20-23) Yesu walangilile ukuti wamanyile umwakupeleela. Wali umufuuke. Atatazile acite icili consi cino Yeova atamunenyile ukucita. (Yoa. 12:49) Uzye tungakolanya uli Yesu?
Uzye tungakolanya uli vino Yesu wali umufuuke? (Lolini mapalaglafu 15-16) *
15-16. Uzye tungaomvya uli ukusunda ukwaya pali 1 Kolinto 4:6?
15 Tukakolanya Yesu nga tukulondela amazwi amuli Baibo api lembelo lyakwe 1 Kolinto 4:6. Paya mazwi yakuti: “Mwalondela ivyatantikwa mu malembelo.” Fwandi ndi cakuti yamwi yatunena ukuti tuyapandeko amano, tutalinzile ukuyapatikizya ukulondela vino tukulonda nanti ukulanda ukwaula ukwelenganyapo sana. Lelo tulinzile ukuyazwa ukuomvya ivisinte vya muli Baibo ni mpapulo izikalanda pali Baibo. Umu nzila ii ala twalanga ukuti twamanya umwa kupeleela. Nga twacita vivyo, tulalanga ukuti twaicefya pano ala tukulanga ukuti ukusunda kwakwe Yeova u kwazipa ukucila ukusunda kwitu.—Umbw. 15:3, 4.
16 Ukulunda pa kucindika Yeova, kwaya na vyuze ivingalenga tuye afuuke. Lyene tumalanda pali vino ukuicefya nu kufuuka kungatulenga ukuya ni nsansa nu kutwazwa ukulauvwana na yauze.
U MULANDU CI UNO CAZIPILA UKUYA AICEFYE NUPYA AFUUKE?
17. U mulandu ci uno antu aicefye nupya afuuke yakayela sana nu luzango?
17 Ndi cakuti twaicefya nupya twafuuka, tulaya sana nu luzango. U mulandu ci? A pa mulandu wakuti nga twazumila ukuti kwaya vimwi vino tutalinzile ukucita, tulataizya sana pali vyonsi vino yauze yakatucitila. Elenganyini ivyacitike lino Yesu wapozizye antu 10 aalwile tembwe. Wenga sile u wawezile kuli Yesu uku kutaizya pali vino wamupozizye ulwale uwa uwipisye uno kusi muntu aliwensi angaipolela sile umwineco. Umonsi wii uwali umuicefye nupya umufuuke wataizye pa wazwilizyo uno wapokeelile nupya walumbanyizye Leza pali vino wamucitiile.—Luka 17:11-19.
18. Uzye ukuicefya nu kufuuka kulatwazwa uli ukulauvwana na antu yauze? (Loma 12:10)
18 Antu aicefye nupya afuuke yakauvwana ningo na antu yauze nupya yakaya na ucuza usuma na yauze. U mulandu ci? A pa mulandu wakuti yakaya ni nsansa ukulola imiyele isuma ino yauze yakwata nupya yakayataila. Antu aicefye nupya afuuke yakaya ni nsansa nga yalola vino yauze yakuomba ningo imilimo isuma ino yapeelwa nupya yakayataizya nu kuyacindika.—Welengini Loma 12:10.
19. I vyani vingalenga twaezya na maka ukukanaya ni cilumba?
19 Nomba antu aacilumba cikayatalila ukutaizya yauze pano ali yano yakalonda yauze yataizya. Ilingi yakailinganya kuli yauze nu kwezya ukuilola kwati yacindama ukucila yauze. Ukucila ukusambilizya nu kupeela yauze imilimo, antu aacilumba yene yatemwa ukulanda ati, “Ndi cakuti ukulonda cimwi ciombwe ningo” ukulingana na vino ukulonda “ulinzile ukuiombela.” Umuntu uwa cilumba ilingi akalonda ukuya umucindame ukucila yauze nupya akauvwa uzuwa ndi cakuti yauze yakuomba ningo. (Gala. 5:26) Ilingi antu yayo yasikwata ya cuza. Ndi cakuti twalola ukuti itutandika ukuya ni cilumba, tulinzile ukupepa kuli Yeova ukuti atwazwe ‘ukupindulula imyelenganyizizye itu’ pakuti tutaya ni cilumba.—Loma 12:2.
20. U mulandu ci uno tulinzile ukuyela aicefye nupya afuuke?
20 Yeova waicefya fwandi tukasambililako kuli vino waya. Tukalola vino waicefya muli vino akacitila aomvi yakwe nupya tukalonda ukumukolanya. Nupya tukalonda ukukolanya ivintu visuma vino antu aali aafuuke aalembwa muli Baibo yacisile lino yaombelanga Leza. Lekini lyonsi twapeela Yeova umucinzi nu lulumbi vino akalondekwa. (Umbw. 4:11) Nga twacita vivyo, tulaya ya cuza yakwe Yeova manda pe, pano watemwa antu aicefye nupya afuuke.
▪ LWIMBO NA. 123 Lyonsi Twatontela Vino Leza Watantika
^ pala. 5 Umuntu uwaicefya waya nu luse ni cikuuku. Fwandi tungati Yeova waicefya. Mu cipande cii, tumasambilila vino ukukolanya ukuicefya kwakwe Yeova kungatwazwa. Nupya tumasambilila ivingi pa kuicefya kuli vino Umwene Saulo, kasesema Danieli na Yesu yacisile.
^ pala. 58 ULONDOLOZI WA CIKOPE: Eluda akusambilizya umwina uwacance ivya kwankanya ivifulo vya kusimikilamo. Lino papita insita eluda wiyo asikutungulula umwina uwacance muli vyonsi sile lelo wamuleka ukuti aombe umulimo uwo wenga sile.
^ pala. 62 ULONDOLOZI WA CIKOPE: Nkazi akuzya eluda ndi cakuti cili sile ningo ukuyazanwako uku winga ulayela umu calici. Eluda atamunenyile vino akwelenganya umwineco lelo wamulanga ivisinte vya muli Baibo ivingamwazwa.
