1-2. Ukulingana na Masamu 34:8, I vyani vino tulinzile ukucita pakuti tulole usuma wakwe Yeova?

ELENGANYINI ukuti umwi wamupeela ivyakulya vino mutatala mwalyapo. Mungamanya vimwi pa vyakulya vivyo ndi cakuti mwavilolekesya, ukununsya, ukumanya vino iikamo, nanti ukuzya yauze ndi cakuti yavitemwa. Nomba nga mwalya alino mungamanya ndi cakuti imuvitemwa.

² Tungasambilila vimwi pa usuma wakwe Yeova nga tukubelenga Baibo ni mpapulo izikalanda pali Baibo nu ku kuvwa kuli yauze pa visuma vino Yeova wayacitila. Lelo tulamanya ningo usuma wakwe Yeova ndi cakuti twayuvwila sweisikulu usuma wakwe. (Belengini Masamu 34:8.) Lekini tulangilile inzila yonga ino tungacitilamo vivyo. Tuti limwi tukulonda ukuombela Yeova umu mulimo wa nsita yonsi, nomba pakuti tufikilizye uyo uwo tulinzile ukwangupazya umi. Tuti limwi tukabelenga lyonsi pa ulayo wakwe Yesu uwakuti nga twakolezya uwene inkoleelo, Yeova alatupeela vyonsi vino tukalondekwa nomba tutatala twalolapo Yeova watucitila vivyo. (Mate. 6:33) Nomba pa mulandu wakuti twataila ulayo yakwe Yesu, tukaomvya ningo impiya, ukuomba amaawazi anono uku ncito, nu kusumba insita ikulu umu mulimo wa kusimikila. Nga twacita vivyo, tulalola ukuti Yeova akatusakamala muli vino tukalondekwa. Tukayuvwila usuma wakwe Yeova sweineco.

3. Ukulingana na Masamu 16:1, 2, aaweni yano Yeova akacitila ivisuma?

³ Yeova “umusuma kuli yonsi” kumwi sile na yayo aatamumanya. (Masa. 145:9; Mate. 5:45) Nomba akacita ivintu ivingi visuma kuli yayo amutemwa nupya akaezya na maka ukumuombela.  (Belengini Masamu 16:1, 2.) Lekini tulande pa visuma vimwi vino Yeova watucitila.

4. Uzye Yeova akalanga uli usuma wakwe kuli yano yatandika ukupalama kuli aliwe?

⁴ Lyonsi lino tukucita vino Yeova akatusambilizya tukalola vino akatwazwa. Lino twasambilile pali aliwe nu kutandika ukumutemwa, watwazwile ukuta ukwelenganya nu kucita ivintu vino wapata. (Kol. 1:21) Nupya lino twaipeezile kuli Yeova nu kubatiziwa, twailoliile usuma wakwe lino watupeezile kampingu musanguluke nu kulenga tuye na ucuza usuma na aliwe.—1 Pet. 3:21.

5. Uzye tukailolela uli usuma wakwe Yeova lino tuli umu mulimo wa kusimikila?

⁵ Tukatwalilila ukuilolela usuma wakwe Yeova lino tukuombako umulimo wa kusimikila. Uzye mwakwata insonyi? Antu yakwe Yeova aingi avino yaya. Limwi lino mutalala mwaya aomvi yakwe Yeova mutelenganyanga ukuti mungakonkonsya pa ng’anda ya muntu, pakuti mulanzyanye nawe pali Baibo. Nomba ndakai ali mulimo uno mukaomba lyonsi. Nupya Yeova wamwazwa ukulaipakizya lino mukuomba umulimo wa kusimikila. Yeova wamwazwa umu nzila na zyuze izingi. Wamwazwa ukutwalilila ukuya ateekela lino yano mukusimikilako yakana. Wamwazwile ukwiusya ilembo limwi ilyazwile wino mwasimikilangako. Nupya akamwazwa ukutwalilila ukusimikila asi mulandu antu yasikukutika kuli vino mukuyasimikila umu cifulo cinu.—Yele. 20:7-9.

6. Uzye vino Yeova akatusambilizya vikatulanga uli usuma wakwe?

⁶ Yeova watulanga usuma wakwe pa kutusambilizya ivya kuomba umulimo wa kusimikila. (Yoa. 6:45) Mu kulongana kwa mukasi ka mulungu yakatulangilila vino tungasimikila kuli yauze. Nupya tungaomvya ivyeo kwene vii lino tuli umu mulimo wa kusimikila. Pa kutandika tunguvwa intete ukuomvya inzila ipya nomba nga twacita vivyo, tungazana ukuti inzila ipya yaomba ningo umu cifulo cino tukasimikilamo. Nupya tukakomeleziwa pa kulongana na pa maukongano apa nzila izipusanepusane zino tungaomvya lino tukusimikila. Ukucita vii nako kwene kungalenga tuvwe intete, nomba nga twezya inzila zii Yeova alatupaala. Lekini lyene tusambilile apa visuma vino Yeova alatucitila ndi cakuti twataila muli aliwe nu kuomvya inzila izipya izya misimikilile lino tukwezya na maka ukumuombela, asi mulandu ni vikutucitikila umu umi. Tumasambilila na pali vino tungafikilizya mauyo itu.

7. I visuma ci ivilacitika ndi cakuti tukwezya na maka ukulundulula umulimo witu?

⁷ Tukapalama kuli Yeova. Elenganyini ivyacitikiile ya Samuel, * ya eluda aakaombela uku Colombia na aci yao. Atwalane yaa yaipakizyanga ukuomba upainiya pa cilongano ca kumwao, lelo yalondanga ukulundulula umulimo wao uwa kusimikila nu kwazwilizya uku cilongano ukwalondekwanga ya kasimikila. Pakuti yafikilizye uyo uwo, yalondekwanga ukuta ukucita vimwi vino yatemilwe. Ya Samuel yalanzile ukuti: “Twalondiile ivyaya pali Mateo 6:33 nu kuta ukukala ivintu vino tutalondekwanga. Nomba icatutalile sana ukucita, u kufuma umu ng’anda ino twikalangamo. Yakuuzilwe sile wakwe vino twalondanga nupya tutakongwile impiya izili zyonsi pakuti tuikuule.” Lino atwalane yaa yakukiile uku cilongano icipya, yazanyile ukuti yalondekwanga sile ukuomvya impiya izinono  ukucila zino yaomvyanga mpiti. Ya Samuel yalanzile ukuti: “Twalola vino Yeova akatutungulula na vino akaasuka mapepo itu. Tukayuvwa ukuti Yeova waya ni nsansa pali vino twapingulapo, nupya tukalola ukuti watutemwa ukupusanako na vino cali mpiti.” Uzye mungakwanisya ukulundulula umulimo winu uwa kusimikila umu nzila imwi? Ndi cakuti mungakwanisya, manyini ukuti mulapalama sana kuli Yeova nupya alamupeela vyonsi vino mukulonda.—Masa. 18:25.

8. I vyani vino mwasambilila kuli vino ya Ivan na ya Viktoria yalanzile?

⁸ Tukaya nu luzango umu mulimo witu. Uvwini vino ya Ivan na ya Viktoria, ya painiya atwalane aakaombela uku Kyrgyzstan yalanzile. Yangupiizye umi pakuti yaombako imilimo ili yonsi ino yapeelwa ukwikako sile nu mulimo wa makuule. Ya Ivan yatiile: “Twaombesyanga umu mulimo onsi uno twapeelwa. Nanti cakuti twatontanga, twayanga sana nu mutende ni nsansa pano ala itumanya ukuti ituomvya amaka itu uku kuombela Yeova. Nupya twali sana ni nsansa pano twapanzile sana ivyuza ivingi nu kucitila pamwi ivintu ivingi ivisuma vino twali nu kulaiusya.”—Mako 10:29, 30.

9. I vyani vino nkazi wacita pa kulundulula umulimo wa kusimikila asi mulandu nu ulwale uno walwala, nupya i visuma ci ivyacitika?

⁹ Nanti cakuti tungakwata intazi, tukaya sana nu luzango lino tukuombela Yeova. Nkazi Mirreh mukamfwila uwa ku West Africa, watandike ukuomba upainiya lino watiile ukuomba incito ino waombanga yakwe udokota. Ya Mirreh yakwata ulwale uwipisye ukalenga cayatalila ukupita, fwandi yakaomba umulimo wa kusimikila uku ng’anda ni ng’anda pi awala sile lyonga. Nomba yakasumba insita ikulu ukusimikila kuno kukazanwa sana antu. Yakwata yano yasimikileko aingi na masambililo ya Baibo yano yakalanzyanya nayo ukuomvya foni. I cani calenzile ya Mirreh ukulondesya ukuombela sana Yeova? Yatiile: “Natemwa sana Yeova na Klistu Yesu. Nupya lyonsi nkapepa kuli Yeova ukuti aangazwa ukuombesya apapezile amaka ukuomba umu mulimo wakwe.”—Mate. 22:36, 37.

10. Wakwe vino 1 Petulo 5:10 ikulangilila, i vyani vino Yeova akacitila yayo aakalondesya ukumuombela?

¹⁰ Yeova akatusambilizya ivintu na vyuze. Ya Kenny, ya painiya aakaombela uku Mauritius, yasininkizya icisinka cii. Lino yasambilile icumi, yafumilepo pa yunivesiti, iyabatiziwa nu kutandika umulimo wa nsita yonsi. Yatiile: “Nkaezya ukukolanya kasesema Ezaya uwalanzile ati: ‘Mukwai namayako! Ntumini nene!’” (Eza. 6:8) Ya Kenny yaombako umu makuule apusanepusane nupya yazwilizyako ukusenula impapulo izikalanda pali Baibo umu lulimi lwao. Ya Kenny yatiile: “Nasambilile ivyali nu kungazwa ukuomba ningo imilimo ino napeezilwe.” Yatasambiliziwe sile ivya kuomba imilimo iyo, lelo yasambiliziwe na vyuze ivingi. Yalanzile nu kuti: “Nasambilile pa vintu vino ntali nu kuomba na pa miyele ino nalinzile ukukwata.” (Belengini 1 Petulo 5:10.) Limwi namwe kwene mungasenukako muli vimwi pakuti Yeova amusambilizye umu nzila izingi.

11. I vyani vino ya nkazi uku South Korea yacisile pakuti yaombako umulimo wa kusimikila, nupya ivisuma ci ivyacitiike? (Lolini icikope icili pa nkupo.)

¹¹ Nanti sile antu aatiyaombela Yeova pa myaka iingi, yakalondekwa ukusambiliziwa inzila izipya izyamiombele. Mu nsita ya ulwale wakwe COVID-19, ya eluda aku South Korea yalemvile iyati: “Ya kasimikila yamwi aatasimikilanga pa mulandu nu kulwala, ndakai lyene yakasimikila ukuomvya iviombelo vyakwe vidyo. Ya nkazi yatatu aali ni myaka ukucila pali 80 yasambilila ivya kuomvya kompyuta  pa kusimikila nupya ndakai yakaombako umulimo wa kusimikila umupipi na cila wanda.” (Masa. 92:14, 15) Uzye namwe mungatemwa ukulundulula umulimo winu uwa kusimikila nu kuilolela usuma wakwe Yeova? Lolini vimwi vino mungacita pakuti mufikilizye uyo uwo.

12. I vyani vino Yeova walaya yayo aakataila muli aliwe?

¹² Mwasambilila ukutaila Yeova. Walaya ukuti alatucitila ivintu ivingi ivisuma ndi cakuti twamutaila nu kumuombela na maka itu yonsi. (Malaki 3:10) Nkazi Fabiola uwa ku Colombia wailoliile vino Yeova wafikilizye ulayo uu. Walondanga ukutandika upainiya pa cisila ca kubatiziwa. Nomba walondekwanga ukuombesya pakuti aasakamala ulupwa. Fwandi lino watiile incito, wapefile kuli Yeova ukuti amwazwe. Watiile: “Pakapita insita ikulu pakuti umuntu atandike ukupoka impiya zyakwe pensyoni, nomba nemo natandike ukupoka lino papita sile umwezi onga ukufuma pano nateelile incito. Cali kwati i cizungusyo.” Lino papisile imyezi iili, yatandike upainiya. Yali ni myaka ukucila pali 70 nupya yaomba upainiya ukucila pa myaka 20. Pa myaka yonsi ii, yazwa antu 8 ukulunduluka ukufika uku lubatizyo. Yatiile: “Nanti icakuti nkauvwa ukutoonta insita zimwi, Yeova akangazwa cila wanda pakuti ntwalilile ukuomba upainiya.”

13-14. I vyani vimwi ivingatwazwa ukutaila muli Yeova nu kulunduluka?

¹³ Mwasambilila kuli yayo aataile Yeova. Muli Baibo mwaya malyasi ya antu aaombesyanga  umu mulimo wakwe Yeova. Mwaya malyasi akalanda pa yantu yano Yeova wapaazile lino yalangizye ukuti yataile muli aliwe. Wakwe, Abulahamu wapaazilwe lino wasiile ing’anda yakwe “nanti cakuti atamanyile kuno wayanga.” (Aeb. 11:8) Yakobo wapaazilwe pa cisila ca kulwisyanya na malaika. (Utan. 32:24-30) Lino aina Izlaeli yali umupipi nu kwingila umu Mpanga ya Ulayo, yali nu kulamba Uluzi Lwa Yodani pa cisila cakuti ya simapepo yalyata umu manzi.—Yoswa 3:14-16.

¹⁴ Mungasambililako na kuli ya Nte aayako ndakai, aataila Yeova nupya aalunduluka. Wakwe, umwina Payton na mamakwe Diana, yaipakiizye ukubelenga malyasi ya ina na ya nkazi aalundulula umulimo wao uwa kusimikila wakwe aalondololwa umu cipande cakuti “Yaipeelisye Ukuomba.” * Ya Payton yatiile: “Nga tukubelenga malyasi pa ina na ya nkazi yaa tuvwanga kwati tukutamba umwi aakulya ivyakulya ivisuma sana. Lyonsi lino twabelenga, twalondesyanga ‘ukuyuvwila sweisikulu usuma wakwe Yeova.’” Lino papisile insita, ya Payton na ya Diana yaili umu kuombela ukwalondekwanga ya kasimikila. Uzye mwabelengapo ivipande vii? Uzye mwatala mwatambapo vidyo yakuti Ukusimikila Uku Cifulo Icisisimikilwako Sana—ku Australia ni yakuti Ukusimikila Uku Cifulo Icisisimikilwako Sana—ku Ireland aya pa jw.org? Mavidyo yaa yangamwazwa ukulola inzila zino mungalundulwilamo umulimo winu uwa kusimikila.

15. Uzye ya cuza asuma yangatwazwa uli?

¹⁵ Mwasoolola ningo ivyuza. Cikatwangukila ukwezya ivyakulya vino tutalyapo ndi cakuti tuli na antu aavitemwa. Fwandi ndi cakuti tukuzanwa pamwi na antu aakakolezya ukuombela Yeova, cilatwangukila ukulondesya ukuombela Yeova. Vikwene i vyacitikiile ya Kent na ya Veronica. Ya Kent yatiile: “Ivyuza na ya lupwa yatukomelezyanga ukwezya inzila izipusanepusane zino tungaombelamo Yeova. Twilwike ukuti ukuzanwa pamwi na antu aakolezyanga Uwene, kwalenzile twalondesya ukwezyako inzila izipya.” Ya Kent na ya Veronica lyene aapainiya aiyele uku Serbia.

16. Ukulingana ni cilangililo cakwe Yesu icaya pali Luka 12:16-21, u mulandu ci uno tulinzile ukuipeelesya ukuta ukucitako vimwi vino twatemwa?

¹⁶ Mwaipeelesya ukuta ukucita ivintu vimwi vino mwatemwa pakuti muombele Yeova. Tusilondekwa ukuta ukucita vyonsi vino twatemwa pakuti twazanzya Yeova. (Kasa. 5:19, 20) Nomba nga twasoololapo ukukanaika mano uku kuombela Yeova pa mulandu wakuti tusikulonda ukusya ivintu vimwi vino twatemwa, tungaya wa monsi uwa umu cilangililo cakwe Yesu uwaombisye ukukwata ivintu ivingi visuma nu kukanaika mano uku kuombela Leza. (Belengini Luka 12:16-21.) Umwina Christian aakaikala uku France watiile: “Ntaomvyanga insita yane na maka uku kuombela Yeova nu kusakamala ulupwa lwane.” Wene na mamakwe yapingwilepo ukutandika upainiya. Nomba pakuti yafikilizye uyo uwo, yatiile incito. Yatandike ukuzifizya antu mang’anda na maofesi pakuti yaisakamala nupya yatandike ukuya ni nsansa na lino yakweti sile impiya izinono. Uzye yaya ni nsansa pali vino yatiile ukucita ivintu vino yatemilwe pakuti yatandike upainiya? Ya Christian yalanzile nu kuti: “Ndakai tukaipakizya umulimo wa kusimikila nupya tukaipakizya ukulola yano tukasambilizya Baibo na yano tukaswilila umu kusimikilako yakusambilila pali Yeova.”

17. U mulandu ci uno cingatutalila ukwezyako inzila izipya izya misimikilile?

¹⁷ Mwaitemelwa ukuomvyako inzila izipya  lino mukuombela Leza. (Mili. 17:16, 17; 20:20, 21) Ya Shirley ya painiya aku United States, yalondekwanga ukusenula imiombele yao umu mulimo wa kusimikila mu nsita ya ulwale wakwe COVID-19. Pa kutandika, yatalondanga ukusimikila ukuomvya foni. Pa cisila ca kusambiliziwa lino umwangalizi wa ciputulwa watandalile icilongano cao, yatandike ukusimikila ukomvya foni lyonsi. Yatiile: “Pa kutandika nuvwanga intete, nomba ndakai nkaipakizya. Lyene tukusimikila uku yantu aingi ukucila vino twasimikilanga uku ng’anda ni ng’anda.”

18. I cani cingatwazwa ukucimvya intazi lino tukwezya ukulundulula umulimo witu uwa kusimikila?

¹⁸ Mwaimika uyo nu kwezya ukuufikilizya. Nga twakwata intazi, tukapepa pakuti Leza atwazwe nu kwelenganya pali vino tungacimvya intazi zizyo. (Mapi. 3:21) Nkazi Sonia, painiya uwa ku Ulaya aakaomba ni umba ilikalanda Iciromany, watiile: “Nkalemba vino nkulonda ukucita pipepala, nu kwika ipepala lilyo umupipi pano ningalilola zuwa. Nalenga imiseo iili api tembo iikaya uku ntunga izipusane. Nga nakwata ivya kupingulapo, nkalolekesya pa miseo ii nu kwelenganya pali vino napingulapo ndi cakuti vimangavwa ukufikilizya uyo wane nanti foo.” Nkazi Sonia akaezya ukukanaika mano uku ntazi ino akweti. Watiile: “Nkapingulapo ukulola intazi ino nkweti wa ciumba icingandesya ukufikilizya uyo nanti wa ulalo ungangazwa ukufikilizyo uyo.”

19. Tungalanga uli ukuti tukataizya pa visuma vino Yeova watupeela?

¹⁹ Yeova akatupaala umu nzila izipusanepusane. Tungalanga ukuti tukataizya pali vyonsi vino akatupeela ndi cakuti tukwezya na maka ukumulumbanya. (Aeb. 13:15) Tungaomba imilimo ipusanepusane umu mulimo wakwe Yeova nupya Yeova angatupaala sana. Lekini cila wanda, ‘twayuvwila sweisikulu usuma’ wakwe Yeova. Lyene tulaya wakwe Yesu uwatiile: “Icakulya cane u kucita ukulonda kwakwe wino wantumile nu kumalilila umulimo wakwe.”—Yoa. 4:34.