1, 2. Uzye vino Aina Klistu yakataila ukuti vilacitika vyapusana uli na vino antu aya mu nsi ii yataila? (b) A mauzyo ci acindame yano tumalandapo?

YEOVA watupeela ivintu ivingi vino tungataila. Swensi kwene, apakwe nanti “amfwele na zyuze,” tukalondesya ukwizalola kuno Leza akufikilizya vino walondanga ukuti vicitike pa kutandika alino nu kulenga izina lyakwe Yeova ukuya ilya muzilo. (Yoa. 10:16; Mate. 6:9, 10) Ivintu vii ali vino muntu wensi akalondesya ukulola. Nupya tukalonda ukwizalola kuno ulayo wa kuya nu umi wa pe ulafikiliziwa, nampo ngu kuya kwiyulu nanti pano nsi. (2 Pet. 3:13) Ndakai, tukataila ukuti impendwa ya yantu yakwe Leza imayanga ikukulilako sile.

² Yonsi yano yaya ku lusansa lwakwe Satana nayo kwene yakwata utailo, nomba yakatwisika ngi cakuti vino yakapaalila vilacitika. Ya kateya ya vyangalo vyakusitika yakataila ukuti yamacimvya, lelo yasisininkizya ngi cakuti icacumi yamacimvya. Umu nzila yuze utailo wa cumi uno swe Ina Klistu twakwata, u kutaila “ivintu vino tukupaalila.” (Ayeb. 11:1) Limwi mungasakamala ukuti, mungasininkizya uli ukuti vino mukapaalila vilacitika? Nupya i visuma ci ivingafumamo ngi cakuti muli nu utailo ukome muli vino mukapaalila ukuti vilacitika?

3. I vyani vino aina Klistu aya nu utailo yasininkizya ukuti vilacitika?

 ³ Kutaya umuntu akavyalwa nu utailo nanti ukuizila uweneco. Utailo ukaiza ndi cakuti umupasi wakwe Leza ukumutungulula. (Gala. 5:22) Baibo italandapo ukuti Yeova wakwata utailo nanti ukuti akalondekwa kukwata utailo. Nga twamanya ukuti Yeova uwa maka nupya uwa mano tukasininkizya ukuti alafikilizya ukulonda kwakwe. Yeova umwineco akalanda pa malayo yano walaya, kwati yacitika mpiti, akati: “Cati cicitwa.” (Welengini Umbwilo 21:3-6.) Aina Klistu ya utailo yasininkizya ukuti Yeova a Leza “uwakutailwa” aakafikilizya vino walaya.—Malan. 7:9.

4. Upaalilo ci uno aonsi na anaci a utailo a mpiti yakweti?

⁴ Mwi buku lya Ayebulai icipande 11 mwaya umutande wa mazina ya onsi na anaci ya utailo 16. Nupya calanda na pa yantu yauze alumbanyanga Yeova pa mulandu nu “utailo uno yakweti.” (Ayeb. 11:39) Yonsi kwene yaa yalolelanga “umwana” wa mwanaci kuti aize afumyepo ucipondoka uno Satana walesile alino nu kufikilizya ukulonda kwakwe Yeova. (Utan. 3:15) Yonsi yaa antu ya utailo yaafwile ala umwana uwalavilwe, Yesu Klistu atatala wayula inzila ya kukwata umi wa kwi yulu. (Gala. 3:16) Nanti ciye vivyo, mulinzile ukutaizya pa malayo yano Yeova watulaya, pano yaa yonsi yalatuutuluka nu kwizaya nu umi umalilike umu paladaise pano nsi.—Masa. 37:11; Eza. 26:19; Ose. 13:14.

5, 6. A pali cani pano Abulaamu nu lupwa lyakwe isile utailo wao, nupya yatwalilile uli ukukomya utailo wao? (Lolini cikope cakutandikilako.)

⁵ Ayebulai 11:13 yakalanda pa ina Klistu ya mpiti ukuti: “Mu utailo amuno yaa yonsi yafwilile. Yene yatapokelile vintu vino Leza wayalavile. Lelo yavilolelile kutali nu kuvizengela.” Wenga pali yaa a Abulaamu. Uzye watwalilile ukuya nu luzango nu kusekelela mu mwana uwalavilwe? Yesu waswike ningo sana iuzyo lilyo lino wanenyile amukanyanga ukuti: “So Abulaamu wali nu luzango pa kulola kwiza kwa wanda wane. Wauweni nga azanga.” (Yoa. 8:56) Vikwene avino caali na kuli Sala, Isaki, Yakobo alino na yauze ataile ukuti kuli nu kuya Uwene upya uku nkolelo uno “kelenganya na kakuula wakweo a Leza.” —Ayeb. 11:8-11.

⁶ Uzye Abulaamu nu lupwa lwakwe yatwalilile uli ukuya nu utailo ukome? Yasambililanga pali Leza ukupitila mu kuvwa ku ikolo aayakolelile akweti utailo, muli vino Leza wasokolola, nanti ukupitila umu kuwelenga ivyalembwa ivyaliko mpiti. Icicindame sana cino yacisile icakuti yatiilile vino yasambilile lelo yatwalilile ukulolela vino Leza wayalavile nu kulaelenganyapo sana. Pa mulandu wakuti yasininkizye ukuti vino yataile vyali ivya cumi, aonsi yaa na anaci yaiteinye uku kucuula konsi ukwali nu kwiza pa kuti sile yatwalilile ukuya acisinka kuli Leza.

7. I vyani vino Yeova watupeela pa kuti twakomya utailo witu, nupya i vyani vino tungacita pali vikwene vino watupeela?

⁷ Pa kuti tutwalilile ukukomya utailo witu, Yeova watupeela Izwi Lwakwe, Baibo. Pa kuti tuye ni nsansa nupya ‘aatunguluke’ tulinzile ukulawelenga Izwi Lyakwe Leza lyonsi. (Masa. 1:1-3; Welengini Milimo 17:11.) Nupya wakwe vino ya kapepa yakwe Yeova a mpiti yacisile, naswe kwene takalondekwa ukulaelenganya pa malayo yakwe Leza lyonsi alino nu kuvwila vino akutunena. Nupya Yeova akatusambilizya ivintu ivingi ukupitila muli vino ‘muomvi mutailwe uwa mano’ akatupekanyizizya. (Mate. 24:45) Fwandi ndi cakuti tukutaizya pali vino Yeova akatusambilizya ukupitila muli vino watupeela, tulaya wa yantu ya mpiti akweti utailo atapokelile ‘vino yapaalilanga’ pa Wene.

8. Uzye ipepo lingakomya uli utailo witu?

 ⁸ Ipepo nalyo kwene lyazwilizye Aina Klistu ya mpiti ukuya nu utailo. Utailo wao wakomelangako ngi cakuti yamanya ukuti Leza wasuka mapepo yao. (Neem. 1:4, 11; Masa. 34:4, 15, 17; Dan. 9:19-21) Naswe kwene tunganena Yeova vyonsi ivili umu mwenzo, ukumanya ukuti amaasuka mapepo nu kukomya utailo witu pa kuti twasipikizya nu luzango. Nupya ngi cakuti mapepo itu yasukwa, utailo witu ukakomelako. (Welengini 1 Yoane 5:14, 15.) Vino utailo waya pa miyele ino mupasi ukatulenga kukwata, tukalondekwa ukutwalilila ‘ukuleenga’ Yeova ukuti atupeele umupasi wakwe, ndi vino Yesu watunenyile.—Luka 11:9, 13.

9. Kucila sile ukulaipepela sweineco, aaweni yauze yano tungapepelako?

⁹ Lino tukupepa tutalinzile sile ukulenga ukuti Leza atupeele vino tukulonda. Kwaya ivintu ivingi wakwe cimwi “vino watucitila ivyakuzunguka” ivingalenga twataizya nu kumulumbanya cila wanda! (Masa. 40:5) Nupya mapepo itu yalinzile ukulanga ukuti ‘tukaiusya anyepwe, nupya tukayasakamala kwati twanyepwa nao mu ng’anda yaminyololo.’ Tulinzile nu kupepela aina na ya nkazi, maka maka ‘aangalizi itu.’ Tukazanga sana ndi twalola vino Yeova akaasuka amapepo itu!—Ayeb. 13:3, 7.

10. Tungakolanya uli aomvi yakwe Leza atwalilile ukuya acisinka, nupya i cani icalenzile yaye nu utailo ukome?

¹⁰ Mwi buku lya Ayebulai cipande 11, umutumwa Paulo walanzile apa mezyo yano aomvi yakwe Leza aingi atalumbulwa mazina yasipikizye. Umutumwa Paulo walumbwile anaci yamwi autailo afwililwe ana yao aonsi yano pacisila izile yazyukuka. Nupya walumbwile na yauze yano yacuzizye “suka yafwa, kwaula kuzumila kuti yasapulwe yaye antungwa. Yene yacisile cii kuti lino yalazyukuka yace yaye nu umi usuma.” (Ayeb. 11:35) Nanti ica kuti tutamanya ningo yano Paulo welenganyangapo lino walanzile vii, yamwi pali yayo a Naboti na Zekaliya, yano yatamile na mawe pa mulandu wa kuvwila Leza nu kucita ukulonda kwakwe. (1 Yamw. 21:3, 15; 2 Mila. 24:20, 21) Danieli nauze yatatu yakweti isyuko lya “kuzumila kuti yasapulwe” pa kuti yatatwalilila ukuya acisinka. Nomba yataile amaka yakwe Leza nu ‘kuyala milomo yakwe yacisama’ nu ‘kuzimya moto uwipisye.’—Ayeb. 11:33, 34; Dan. 3:16-18, 20, 28; 6:13, 16, 21-23.

11. Amezyo ci yano yakasema yamwi yasipikizye pa mulandu nu utailo wao?

¹¹ Kasema Mika alino na Yelemiya “yayasowike nu kuyanyambola, nu kuyatwala ku ng’anda yaminyololo” pa mulandu nu utailo uno yakweti. Yauze nayo aali wakwe Eliya “yapitananga wa mbutusi mu lwanga nu mu myamba, ala yakufisama mu macele nu mu mimba.” Yonsi kwene yasipikizye pa mulandu wakwe vino yataile ukuti vilacitika.”—Ayeb. 11:1, 36-38; 1 Yamw. 18:13; 22:24-27; Yele. 20:1, 2; 28:10, 11; 32:2.

12. A weni uwasipikizye sana amezyo wino swensi kwene tungakolanya, nupya i vyani ivyamwazwile ukusipa?

¹² Pacisila ca kulondolola aonsi na anaci yamwi yamwi akweti utailo Paulo walanzile na pa muntu mucindamisye wino swensi tungakolanya, ali kuti Yesu Klistu Umwene witu. Pa Ayebulai 12:2 pakati ‘wene atanenwike pamulandu wa mfwa yakwe pa cimuti, wene atelenginye cimwi pa kuzewana kwa mfwa yakwe pa cimuti, pa mulandu wa luzango luno lwali nkolelo. Ndakai atenzi kwi kasa lilunji lya cilimba cakwe Leza.’ Fwandi tulinzile ‘ukwelenganya’ pa vintu vino wene wapisilemo nu kuposya lino yamucuzyanga. (Welengini Ayebulai 12:3.) Wakwe vino Yesu wacisile aina Klistu akutandikilapo wa musambi Antipa yatwalilile sile ukuya na ucisinka wao. (Umbw. 2:13) Yene yakweti  isyuko lino antu ya mpiti a utailo yalolelanga ilya kututuluka nu kuya ukwiyulu, pano yenekelanga ukuti “yalazyukuka yace yaye nu umi usuma”. (Ayeb. 11:35) Lino papisile insita ukufuma pano Yesu watandikiile ukuteeka mu 1914, Aina Klistu apakwe aafwile yatutulwike nu kuya ukwiyulu, umu kuteeka pamwi nawe.—Umbw. 20:4.

13, 14. A mezyo ci yano ya Rudolf Graichen yapisilemo, nupya i cani icayazwizye ukusipikizya?

¹³ Ya kapepa yakwe Leza aingi andakai, yakakolanya vino Yesu wacisile lino yakutwalilila ukutaila ivilacitika ku nkolelo nu kukanaleka uwezyo uli onsi ukutonsya utailo wao. Uvwini vino ya Rudolf Graichen avyalilwe ku Germany umu 1925 yacisile, lino yali ance, avyazi yao yakowekanga ivikope ivyakwatanga amalyasi ya muli Baibo ku lung’umba lwa ng’anda yao. Yalemvile ukuti, “pa cikope conga pali umumbulu nu mwana wa mfwele, akana ka mbuzi ni nangu, umwana wa ng’ombe nu mwana wakwe cisama vyonsi ala vili nu mutende, kalume ala aliwe akuvicema. Ivikope viivi vyalenzile inje sana nu tailo.” (Eza. 11:6-9) Mu nsita ino ya kapokola ya ci Nazi yayacuzyanga, alino na amu kaungwe ka mu uteeko wa ku  East Germany, ya Rudolf yatwalilile sile ukuya nu utailo ukome uwakwiza ikala umu paladaise.

¹⁴ Amezyo yauze atale yano ya Rudolf yapisilemo, u kufwilwa ya nyina yano yatemilwe sana, aafwile ku ulwale uno yakati typhus umu nkambi ino yacuzizyangamo antu ku Ravensbrück, nu kulola kuno ya isi yatonsile umu utailo iyalemba ni cipepala cakulanga ukuti asi Inte Yakwe Yeova. Lino ya Rudolf yafumile umu cifungo, yaipakizye ukuombako umulimo wa kutandalila vilongano nupya yayamile nu kwi Sukulu lya Gilyadi. Yayatumile ukuya omba umisyonali ku Chile kuno yaile yaomba ngu mwangalizi wa ciputulwa nupya kwene. Nalyo kwene amezyo yako ya Rudolf yatasizile. Lino papisile umwaka onga ukufuma pano yafumalile nkazi Patsy misyonali muze, akamwana kao akakazyana kafwile. Nupya pacisila cakwe cico mamao wino yatemilwe sana nawe kwene wafwile ala ali sile ni myaka 43. Ya Rudolf yasipikizye amezyo yonsi kwene yaa, nanti cakuti yakuzile nupya yalwalililanga, lino ilyasi lyao lyalembwanga mu lupungu lwa mulinzi lwakwe Ogasiti 1, 1997, pa mafwa 20 ukufika ku 25, ala yakaomba upainiya wa nsita yonsi nupya yali aa eluda. ^[1]

15. Aante ci yamwi yamwi yano tungakolanya atwalilila ukusipikizya amezyo nu luzango?

¹⁵ Ya Nte Yakwe Yeova yatwalilila ukuomba nu luzango nanti cakuti yakayazunya. Aina na ya nkazi aingi yayanyepa mu vifungo ku Eritrea, ku Singapore, nu ku South Korea, pa mulandu nu kulondela amazwi yakwe Yesu aakukana omvya ulupanga. (Mate. 26:52) Pa yafungwa yonsi yano yanyepa paya naya Isaac, ya Negede, na ya Paulos, aaya mu cifungo ca ku Eritrea pa myaka 20. Pa myaka yonsi ii, yatatwala nanti kukwata isyuko lya kusakamala avyazi yao. Vino yakaloleka ansansa nga tukuyatamba pa webusaiti itu iya pa jw.org, cikalanga sile paswe ukuti yaya sana nu utailo ukome. Nanti sile aakalinda ya cifungo yayacindika sana.

16. Uzye ukuya nu utailo ukome kungamwazwa uli?

¹⁶ Antu yakwe Yeova aingi yataatala yakwatapo amezyo atale wakwe yaa yano aina yano itulandapo yapitamo. Nayo utailo wao weziwa mu nzila iziiyele. Yamwi yasipikizya pa mulandu ni nzala nanti ukucula mu nsita ya nkondo nanti ku vintu ivikaiponela sile ukwaula ukwenekela. Yauze nayo yaya wakwe Mose ni vikolwe vyuze acimvizye amezyo nu kutwalilila ukuombela Yeova. Yakalwisyanya nu wezyo wa kulondesya ukukwata ivingi, na ukaitemwe. I vyani ivikalenga yasipikizye amezyo yayo? U kutemwa kuno yatemwa Yeova alino nu utailo uno yakwata uwakuti alafumyapo ivipe vyonsi nu kupeela aomvi yakwe acisinka umi umu nsi ipya.—Welengini Masamu 37:5, 7, 9, 29.

17. I vyani vino mukulondesya ukucita, nupya i vyani vino tulasambilila mu cipande icilondelilepo?

¹⁷ Umu cipande cii, itulola vino tungatwalilila ukuya nu utailo ukome ngi cakuti tukupepa lyonsi nu kwelenganya sana pa malayo yano Leza watulaya. Cico cilalenga twasipikizya amezyo angalenga utailo witu ukutonta, lino tukulolela ukufikiliziwa kwakwe vino twataila ukuti vilacitika. Umu cipande icilondelilepo tulalanda pali vino cikapiliula ukuya nu utailo.