CIPANDE CA KUSAMBILILAMO 41
Mukatwalilile Ukuya Acisinka nu mu ‘Ucuzi Ukulu Cuze’ Kwene
“Si mwalukutemwa Yeova, mwe ya cumi kuli aliwe. Yeova akacingilila antu ya cumi.”—MASA. 31:23, NWT.
ULWIMBO 129 Tulatwalilila Ukuzizimizya
VINO TUMASAMBILILAPO *
1-2. (a) I vyani vino ya kateeka amu nsi yasya yakamanyisye antu uwanda uli onsi? (b) A mauzyo ci yano tukulondekwa ukumanya ivyasuko?
ELENGANYINI ukuti ya kateeka ya mu nsi yamanyisya antu icimanyisyo icasowilwe mpiti sana icakuti “mutende.” Yatandika nu kuitumika ukuti lyene insi yaticingililwa. Amu mauteeko yalalenga tukaelenganya ukuti yalamala intazi zyonsi umu nsi. Nomba yatalakwata amaka akulesya ivilacitika pa cisila ca kumanyisya ukuti “mutende.” U mulandu ci? Ukulingana na vino usesemo wa muli Baibo ukalanda, antu yaa “ulovyo ulayaponela uwa kupumikizya, . . . nupya yene yatalutuka.”—1 Tesa. 5:3.
2 Kwaya amauzyo acindame sana yano tulinzile ukumanya ivyasuko, amauzyo yayo akuti: I vyani vilacitika umu ‘ucuzi ukulu cuze’? I vyani vino Yeova alalonda ukuti tukacite? Nupya tungaipekanyizizya uli ndakai pakuti tukatwalilile ukuya acumi lino kulaya ucuzi ukulu cuze?—Mate. 24:21.
I VYANI VILACITIKA UMU ‘UCUZI UKULU CUZE’?
3. Ukulingana na Umbwilo 17:5, 15-18, uzye Leza alacita uli pa konona “Babiloni Mukulu”?
3 Welengini Umbwilo 17:5, 15-18. “Babiloni Mukulu” alononwa. Wakwe vino itulandapo, antu yatalakwata amaka akucita ivili vyonsi pali vino vilacitika pa nsita iya. U mulandu ci? Pano “Leza [aliika] mu myenzo yao kuti yafikilizye kulonda kwakwe.” U kulonda ci kuko? U kwakonona ukupepa kwa ufi konsi u kwikako ni mipepele yonsi ikaitunga ukuti iya Wina Klistu. * Leza alika amelenganyo yakwe umu myenzo ya “mpembe ikumi” zya “cilyanyi ciyenzu.” Impembe ikumi zikaimililako amauteeko yonsi aakatungilila “icilyanyi” kuli kuti United Nations. (Umbw. 17:3, 11-13; 18:8) Lino amauteeko yalakatukila imipepele ya ufi, cilaya icilangililo ca kutandika kwa ucuzi ukulu cuze. Ilaya insita ya kupumikizya nupya iya kutiinya ilacitikila antu yonsi pano nsi.
4. (a) I milandu ci ino limwi amauteeko yalapeela pa kulondolola icilalenga yazanze imipepele? (b) I vyani vino antu apepanga umu mipepele ya ufi yalacita?
4 Tutamanya imilandu ino amauteeko yalapeela pa kulondolola icilalenga yazanze Babiloni Mukulu. Limwi yalati imipepele ya mu nsi ikalenga ukuti kutaya umutende nu kuti ikaleta icimvulunganya umu mauteeko. Nanti limwi yalati imipepele ii yalonka sana icuma ni vikwatwa. (Umbw. 18:3, 7) Lino amauteeko yalazanza imipepele ya ufi yatalonona antu yonsi aaya umu mipepele ii. Lelo cikaloleka kwati yalasisyapo sile utuungwe twa mipepele kwene iyo. Ngi mipepele iyo yononwa, antu apepangamo yaliluka ukuti intunguluzi zyao zyafilwa ukufikilizya vino zyayalavile, fwandi yalataaluka uku mipepele iyo.
5. I vyani vino Yeova walaya pa ucuzi ukulu cuze, nupya u mulandu ci?
5 Baibo italanda utali wa nsita ya konona Babiloni Mukulu, nomba twamanya ukuti italatalimpa sana. (Umbw. 18:10, 21) Yeova walaya ukuti ‘alipimpazya amanda’ ya ucuzi ukulu pa kuti “asoololwe yakwe” nu kupepa kwa cumi vitakononwe. (Mako 13:19, 20) Nomba i vyani vino Leza akalonda ukuti tukacite lino ucuzi ukulu cuze ulatandika na lino kulaya Alamagedoni?
TWALILILINI UKUOMBELA YEOVA
6. I vyani na vyuze vino tulinzile ukucita pakuti tutaya umu mipepele ya ufi?
6 Wakwe vino twasambilile umu cipande icafumileko, Yeova akaenekela ya kapepa yakwe ukukanaya umu mipepele ya ufi. Nomba, tutalinzile sile ukutaluka kuli Babiloni Mukulu. Tulinzile nu kuipeelesya ukuombela Yeova. Lekini tulande pa nzila ziili zino tungacitilamo vivyo.
Tutalinzile ukuta ukulongana pamwi, na lino sile tuli ni ntazi (Lolini palaglafu 7) *
7. (a) Uzye tungatwalilila uli kuvwila masunde yakwe Yeova? (b) Uzye ilembelo lya Ayebulai 10:24, 25 likalanda uli pa mulandu uno cacindamila sana ukwika mano ku kulongana, sana sana ndakai?
7 Ca kutandikilako, tulinzile ukutwalilila ukuvwila masunde yakwe Yeova. Tutalinzile ukuzumilizya imiyele iipe iyaya umu nsi ii. Tutalinzile ukuzumilizya upulumusi wa misango ili yonsi, ukwikako sile nu kutwalana kwa yonsi yatupu nanti anaci yatupu ni miyele yuze ikozileko ii. (Mate. 19:4, 5; Loma 1:26, 27) Cakwe ciili, tulinzile ukutwalilila ukulalongana pamwi na ina na ya nkazi. Tukaezya na maka ukulongana kuye u ku Ng’anda ya Wene, nanti umu mang’anda ya ina na ya nkazi nanti umu umfisolo. Asi mulandu ni vingacitika, tutalinzile ukulenga icili consi citulesye ukulongana. Nupya tulinzile ukulongana pamwi lino tukulola “ukuti Wanda wa Mwene ukupalama pipi.”—Welengini Ayebulai 10:24, 25.
8. Uzye ilandwe lino tukasimikila ndakai lilasenuka uli ku nkoleelo?
8 Mu ucuzi ukulu cuze, ilandwe lino tukakosoola lilasenuka. Ndakai tukakosoola ilandwe lisuma ilya Wene nupya tukwezya na maka kupanga asambi. Nomba pa nsita iya, ilandwe lino tulakosoola lilaya ilya kutiinya nupya ilya mu kulungatika. (Umbw. 16:21) Tufwile tulasimikila pali vino insi yakwe Satana ilononwa. Likwene sile, twasya tuce tumanye ilandwe lilyo na vino tulaacita pa kusimikila. Uzye tulaomvya inzila ili imwi kwene na ino tukaomvya ndakai pa kusimikila na pa kusambilizya? Nanti limwi tulaaomvya inzila zyuze? Tulinzile kuloleela pakuti tukalole vino cilaya. Asi mulandu na vino tukacita pa kusimikila, cikaloleka kwati tulakwata isyuko lya kulangizya sana kusipa lino tulakosoola ilandwe lya upinguzi wakwe Leza!—Ezek. 2:3-5.
9. Uzye antu yalacita uli ukwi landwe lino tulakosoola pa nsita iya, nomba i vyani vino tungataila?
9 Ilandwe lino tulakosoola pa nsita iya lilalenga antu kwezya na maka kutulesya ukusimikila. Wakwe vino tukataila ukuti Yeova ndakai amatucingilila lino tukusimikila, avino cilaya na pa nsita kwene iya. Tungataila ukuti Leza alatupeela amaka akutwalilila kumuombela.—Mika 3:8.
MWAITEYANYA UKU KUZANZA UKULACITIKILA ANTU YAKWE LEZA
10. Wakwe vino casoowilwe pali Luka 21:25-28, uzye antu aingi yalacita uli ku vintu ivilacitika lino kulaya ucuzi ukulu cuze?
10 Welengini Luka 21:25-28. Lino kulaya ucuzi ukulu cuze, antu yalazunguka sana kulola ukuti vyonsi vino yataile ukuti vilatwalilila ukuyako vyafumiziwapo. Yalaya sana nu ulanda, nu kulondesya kupususya maumi yao lino yalaya mu mfinzi itatala yayako. (Zefa. 1:14, 15) Pa nsita iya, ivintu vilatala sana nanti sile uku antu yakwe Leza kwene. Pa mulandu wakuti tusyayika mu vikanza vya miteekele ya muno nsi, tungaca tucuule. Limwi tutalakwata ivintu vimwi.
11. U mulandu ci uno antu yalikila sana mano kuli Ya Nte Yakwe Yeova pa cisila ca kononwa kwa mipepele ya ufi? (b) U mulandu ci uno tutalinzile kutiinila ucuzi ukulu cuze?
11 Pa nsita imwi, antu aaya mu mipepele ilononwa yalasoka sana pa mulandu wakuti upefi wakwe Ya Nte Yakwe Yeova wasyala. Yalasininkizya ukuti antu yonsi yamanya pali vino iyasoka, nupya yalamanyisya na pa intaneti kwene. Antu kumwi na kateeka wao Satana, yalatupata pa mulandu wakuti kupepa kwitu u kulasyala sile ukwaula ukononwa. Yatalafikilizya kulonda kwao ukwakonona kupepa konsi ukwaya pano nsi. Yalika mano lyene kuli sweswe. Pa nsita ii inko zilaomba mulimo wakwe Gogi waku Magogi. * Yaluvwana ukuti yalwisye antu yakwe Yeova. (Ezek. 38:2, 14-16) Tungatandika kusakamala pali vino ivintu vilaya lino kulaya ucuzi ukulu cuze pa mulandu wakuti tutamanya ningo vino cilaya. Nomba twamanya ukuti tutalinzile kutiina ucuzi ukulu cuze. Yeova alatupeela masunde ya kulondela pakuti tukapusuke. (Masa. 34:19) ‘Tulimilila nu kwinula imitwe itu,’ pano tulamanya ukuti ‘kutuulwa kwitu kwati kupalama.’ *
12. Uzye ‘umuomvi mutailwe uwa mano’ akatwazwa uli ukuipekanya kuli vino vilacitika uku nkoleelo?
12 ‘Muomvi mutailwe uwa mano watwazwa vino tungatwalilila ukuya acumi lino tukuipekanyizizya ku ucuzi ukulu cuze. (Mate. 24:45) Akacita vii mu nzila izingi, nomba katulandeko pa nzila yonga: u kupitila umu maukongano ya citungu aliko kutandika umu 2016 kufika mu 2018. Pa maukongano yaa, twasambilile pa miyele ino tulinzile kukwata lino tukupalamila ku wanda wakwe Yeova. Lekini tulandeko panono pa miyele ii.
TWALILILINI UKUYA ACUMI, UKUZIZIMIZYA ALINO NU KUYA ASIPE
Mwaipekanya ndakai pakuti mukapusuke ‘ucuzi ukulu cuze’ (Lolini mapalaglafu 13-16) *
13. Tungacita uli pakuti tukomye ucisinka witu kuli Yeova, nupya i vyani vino tulinzile ukucita ndakai?
13 Acumi: Umutwe wa ukongano wa citungu mu 2016 watangi “Twalililini Ukuya Acumi Kuli Yeova.” Pa ukongano uu twasambilile ukuti ndi cakuti twatwalilila ukukomya ucuza witu na Yeova, tulaya acumi kuli aliwe. Yatwiwisye ukuti tungapalama kuli Yeova ndi cakuti tukupepa sana kuli aliwe nu kusambilila Izwi lyakwe. Ukucita vivyo kukatwazwa ukucimvya amezyo yonsi kumwi na atale sana. Lino ucuzi ukulu cuze ukupalama, tulinzile ukwenekela ukuti ucisinka witu kuli Leza nu ku Wene wakwe wakulaeziwa. Antu yalatwalilila ukutucuzya nu kutuseka. (2 Pet. 3:3, 4) Nu mulandu ukalamba sana uno yalatucitila vivyo uwakuti tusitungilila ivintu vya mu nsi ii yakwe Satana. Tulinzile ukutwalilila ukukomya ucisinka witu ndakai pakuti tukatwalilile ukuya acumi nu mu ucuzi ukulu cuze.
14. (a) U kusenuka ci ukulacitika pa ina akatungulula pano nsi? (b) U mulandu ci uno tulalondekwa ukuya acumi pa nsita iya?
14 Lino ucuzi ukulu cuze ulatandika, kulaya ukusenuka pa ina akatungulula pano nsi ndakai. Pa nsita imwi, apakwe yonsi acili pano nsi yalakonganikwa ukwi yulu uku kulwako inkondo ya Alamagedoni. (Mate. 24:31; Umbw. 2:26, 27) Cii cikupiliula ukuti amwi Umba Ilikatungulula yatalaya naswe pano nsi. Nomba amwi umba ilikulu cuze yalatwalilila ukuombela pamwi. Aina afikepo ukutungulula alafuma mu mfwele na zyuze aliyo yalatungulula. Tulalanga ukuti twaya acumi kuli Yeova ndi cakuti tulatungilila aina yaa nu kulondela vino yatunena ukucita vino Leza akuyanena. Fwandi tulinzile ukulondela vino yalatunena ndi cakuti tukulonda ukupusuka.
15. Tungacita uli pakuti tutwalilile ukuzizimizya, nupya u mulandu ci uno cacindamila ukucita vivyo?
15 Ukuzizimizya: Umutwe wa ukongano wa citungu mu 2017 watangi “Muteezya Ukutoovoka!” Ukongano uu watukomelizye ukutwalilila ukuzizimizya intazi. Twasambilile ukuti ukuzizimizya kutemelela sile pa kusila kwa ntazi. Tungatwalilila ukuzizimizya ndi cakuti tukutaila Yeova. (Loma 12:12) Fwandi lekini twaiusya lyonsi vino Yesu watulavile lino watiile: “Lelo wino wensi alaposya kufika nu ku mpelelekezyo wene alatuulwa.” (Mate. 24:13) Ulayo uu ukapiliula ukuti tulinzile ukutwalilila ukuya nu utailo asi mulandu ni ntazi zino tungakwata. Ndi cakuti tukuzizimizya intazi zyonsi ndakai, tulatwalilila ukuya akome lino ucuzi ukulu cuze ulatandika.
16. I cani cingalenga tuye asipe, nupya tungacita uli pakuti tuye asipe ndakai?
16 Ukusipa: Umutwe wa ukongano wa citungu mu 2018 watangi “Mwaya Asipe!” Amalyasi alanzilwe pa ukongano uu yatwazwilizye ukwiusya ukuti tutange tuye asipe sweiceco sile. Wakwe na vino caya uku kuzizimizya, tungaya asipe ndi cakuti tukutaila Yeova. Tungacita uli pakuti tutwalilile ukutaila sana Yeova? Tulinzile ukuwelenga Baibo cila wanda nu kwelenganya pali vino Yeova wakulula antu yakwe ukufuma na mpiti. (Masa. 68:20; 2 Pet. 2:9) Lino mauteeko yalatuzanza umu ucuzi ukulu cuze, tulalondekwa ukuya asipe nu kutaila sana Yeova ukucila na vino tukacita pali ndakai. (Masa. 112:7, 8; Ayeb. 13:6) Ndi cakuti twataila sana Yeova ndakai, tulaya asipe lino Gogi alatuzanza. *
MWALONDESYA UKUTI MUKATUULWE
Likwene sile Yesu na asilika yakwe akwi yulu yasya yalwe ulwi wa Alamagedoni ukunona alwani yakwe Leza! (Lolini palaglafu 17)
17. U mulandu ci uno tutalinzile ukutiinila Alamagedoni? (Lolini icikope icili pa nkupo.)
17 Wakwe vino twasambilile umu cipande icafumileko, sweingi twikala umi witu onsi umu manda akusyalikizya. Nomba twakwata upalilo wa kuti tulapusuka ucuzi ukulu cuze. Inkondo ya Alamagedoni iilamala amanda ya kusyalikizya. Nomba tutalinzile ukutiina icili consi. U mulandu ci? Pano ulwi uu u wakwe Yeova nupya swemo tutalalwako. (Mapi. 1:33; Ezek. 38:18-20; Zaka. 14:3) Lino Yeova alapeela isunde, Yesu Klistu alatungulula asilika yakwe Leza umu ulwi uu. Wene alaya pamwi na apakwe atuutuluka alino na angeli imintapendwa. Yene yalalwisya Satana, iviwa vyakwe alino na asilika yakwe aya pano nsi.—Dan. 12:1; Umbw. 6:2; 17:14.
18. (a) I vyani vino Yeova watulaya? (b) Uzye ilembelo lya Umbwilo 7:9, 13-17 likatupeela uli upalilo wakuti tulapusuka uku nkoleelo?
18 Yeova watulaya ukuti: “Icanzo consi cino yasuzile apakukulwisya, cilaposiwa ukuomba.” (Eza. 54:16) “Iumba likulu” lyakwe ya kapepa yakwe Yeova acisinka yalafuma umu “ucuzi ukulu cuze” apuma. Lyene yalatwalilila ukuombela Yeova imilimo ya muzilo. (Welengini Umbwilo 7:9, 13-17.) Baibo ikalenga tusininkizye ukuti tulakululwa uku nkoleelo. Twamanya ukuti “Yeova akacingilila antu ya cumi.” (Masa. 31:23) Yonsi atemwa Yeova nupya aakamulumbanya yalatemwa ukulola ukuti Izina lyakwe lyacindikwa.—Ezek. 38:23.
19. I vyani vino tukapaalila ku nkoleelo?
19 Elenganyini pali vino ilembelo lyakwe 2 Timoti 3:2-5 lingalondolola vino antu yalaya umu nsi ipya yano Satana asivulunganya amelenganyo. (Lolini kambokosi kakuti “ Vino Antu Yalaya Umu Nsi Ipya.”) Umwina George Gangas, uwali umwi Umba Ilikatungulula, walanzile ukuti: “Insi ingaya ningo sana ndi cakuti antu yonsi yapepanga Yeova! Likwene sile mulakwata isyuko lya kwikala mu nsi ipya. Mulikala umu nsi ii pano Yeova akuno waya. Tulikala amanda pee.” Upaalilo uu usuma cuze
ULWIMBO 122 Komelekini, Muzyansye!
^ pala. 5 Twamanya ukuti kulaya ‘ucuzi ukulu cuze’ uli nu kwizila antu likwene sile. I vyani vilacitikila aomvi yakwe Yeova apa nsita iya? I vyani vino Yeova alalonda ukuti tukacite? I miyele ci ino tulinzile ukukwata pakuti tukatwalilile ukuya acisinka? Tumaasuka amauzyo yayo umu cipande cii.
^ pala. 3 IZWI ILYATILILONDOLOLWA: Mipepele yonsi ikaitunga ukuti iya Wina Klistu ikalozya uku antu akalanda ukuti tukalondela Klistu nomba yasipepa Yeova ukulingana na vino akalonda.
^ pala. 11 IZWI ILYATILILONDOLOLWA: Izwi lyakuti Gogi wa ku Magogi (lino yakalemba nu kuti, Gogi) likalozya kwi umba lya antu aalazanza kupepa kwa cumi mu nsita ya ucuzi ukulu cuze.
^ pala. 11 Nga mukulonda ivyeo na vyuze ivingi ivikalanda pa vilacitika kufika na pa wanda wa nkondo ya Alamagedoni, lolini Lupungu lwakwe Julai 15, 2013 mafwa 3-8. Nga mukulonda kumanya pa kuzanza kwakwe Gogi wa ku Magogi na vino Yeova alapususya antu yakwe pa Alamagedoni, mulole Lupungu lwakwe Julai 15, 2015 mafwa 14-19.
^ pala. 16 Umutwe wa ukongano wa citungu mu 2019 uwakuti “Kutemwa U Kwa Pe!” ukutulenga ukusininkizya ukuti Yeova alatwalilila ukutucingilila.—1 Kol. 13:8.
^ pala. 64 ULONDOLOZI WA CIKOPE: Mu ucuzi ukulu cuze, kaliumba kanono kakwe ya Nte Yakwe Yeova kakulonganila mu mpanga.
^ pala. 66 ULONDOLOZI WA CIKOPE: Iumba likulu cuze lyakwe ya kapepa yakwe Yeova yalapusuka mu ucuzi ukulu cuze ale apuma nupya yalaya ni nsansa
