1. U mulandu ci uno Yeova alinzile ukupepwa sile wenga mpo?

YEOVA alinzile ukupepwa sile wenga pano ali Kaumba witu nupya ali Kapeela wa Umi. (Umbw. 4:11) Nomba tukakwata intazi. Nanti icakuti twatemwa Yeova nupya twamucindika, ivintu vyuze vingaya ivicindame sana umu umi witu icakuti vitandika nu kutulesya ukutemwa Yeova nu kumupepa wenga sile mpo wakwe vino tulinzile ukucita. Tulinzile ukumanya vino tungacita vivyo. Ca kutandikilako, lekini tulande pali vino cikapiliula ukupepa Yeova wenga sile mpo.

2. Kulingana ni lembelo lyakwe Kufuma 34:14, i vyani vino tulaacita nga twatemwa sana Yeova?

² Muli Baibo, ukutemwa sana Yeova kwalemana nu kumupepa wenga sile mpo. Tutalaleka icili consi nanti aliwensi ukucindama ukucila Yeova.—Welengini Kufuma 34:14.

3. U mulandu ci uno tulinzile kutemelwa sana Yeova?

³ Tukaombela Yeova pa mulandu wakuti twamumanya ningo. U mulandu ci? A pa mulandu wakuti tukasambilila ivisinka pali aliwe. Twatemwa imiyele yakwe isuma. Twamanya vino Yeova watemwa alino na vino wapata, nupya tukayuvwa wakwe vino akayuvwa pa vintu vivyo. Tukalondela vino akatunena nu kucita ukulonda kwakwe. Tukauvwa ningo pano watupeela isyuko lyakuya ya cuza yakwe. (Masa. 25:14) Vyonsi vino tukasambilila pali Kaumba witu vikalenga tupalame sana kuli aliwe.—Yako. 4:8.

4. (a) I vyani vino Ciwa akacita pa kutulenga ukuta ukutemwa sana Yeova? (b) I vyani vino tumasambililapo umu cipande cii?

 ⁴ Ciwa aliwe akatungulula insi ii, nupya akaiomvya uku kulenga ivintu vino antu yakalonda ukuya ivicindame sana umu umi wao nu kutulenga ukuvilwa ukuta ukulondela ivilondwa iviipe. (Efes. 2:1-3; 1 Yoa. 5:19) Akalonda ukuti twatemwa ni vintu vyuze pakuti tute ukutemwa Yeova wenga sile. Lekini tulande pa nzila ziili muno Ciwa akacitila vivyo. Inzila yonga iyakuti, akaezya na maka ukutulenga tutemwe impiya, na cakwe ciili icakuti akaezya na maka kutulenga tutasoolola ningo ivyakuizanzya.

5. U mulandu ci uno tulinzile ukucenjelela pakuti tutatandika ukutemwisya impiya?

⁵ Swensi kwene tukalonda ukulya ivyakulya ivilinge, ukukwata ivyakuzwala ivisuma alino nu kwikala umu ng’anda isuma. Nomba tulinzile ukuicingilila uku kutemwisya impiya. Antu aingi ndakai ‘yatemwisya impiya’ ni vintu vino impiya zingakala. (2 Tim. 3:2) Yesu wamanyile ukuti alondezi yakwe yangatunkwa ukutandika ukutemwa impiya. Watiile: “Pasi umuntu angaombela aene yaili; pano angapata wenga nu kutemwa umuze, nupya angayela wenga nu kusuula umuze. Mutangaombela Leza nga ni vyuma.” (Mate. 6:24) Umuntu akupepa Yeova nu kusumba insita ikulu na maka ukulonda ivyuma vya muno nsi ala akuombela aene yaili. Ala asikupepa Yeova wenga sile mpo.

6. I vyani vino tungasambilila ku mazwi yano Yesu wanenyile amu cilongano ca ku Lodesiya?

⁶ Umupipi nu ku kusila kwa nsita ya atumwa, amu cilongano ca mu musumba wa Lodesiya yayuvwanga ukuti “Nene mukama nupya nikala ningo. Ntulilwa cimwi.” Nomba kuli Yeova na Yesu yalolekanga kuti yali  ‘acuzi nupya alanda! yene apina, impafu nupya yali tupu.’ Yesu atayasunzile pa mulandu wakuti yali akama, lelo a pa mulandu wakuti yatemilwe impiya nupya calenganga yaonona ucuza wao na Yeova. (Umbw. 3:14-17) Ndi cakuti twalola ukuti itutandika ukutemwisya impiya, tulinzile ukusenula amelenganyo itu zuwa zuwa. (1 Tim. 6:7, 8) Nga tutacisile vivyo, tulatandika ukutemwisya ivintu vyuze nupya Yeova atalapokelela ukapepa witu. Wene “asizumilizya kupepa tuleza tuze.” (Malan. 4:24) Nomba uzye impiya zingacindama uli umu umi witu?

7-9. I vyani vino mukusambilila ukwi lyasi lya mwina David?

⁷ Umwina David, a eluda akaombesya sana uku United States. Akalanda ukuti wali umuomvi uwaombesyanga sana. Yamupeezile incito isuma nu kumulundila impiya izingi pa kampani pano waombangako, nupya antu yamulolanga ukuti wali akaomba musuma uwa mulimo uwo umupanga yonsi. Umwina David watiile: “Insita imwi, nelenginye ukuti vino naombanga ningo a Yeova uwampolelelanga.” Nomba uzye a Yeova uwamupolelelanga?

⁸ Umwina David watandike ukwiluka ukuti incito iya yononanga ucuza wakwe na Yeova. Watiile: “Nga ndi umu kulongana nanti umu mulimo wa kusimikila, nelenganyanga sile pa ntazi zya ku ncito. Nakwatanga sana impiya, nomba natandike ukutonta sana nupya umu cupo citu mwatandike ukuya intazi.”

⁹ Umwina David walondekwanga ukupingulapo icali icicindame sana kuli aliwe. Watiile: “Napingwilepo icintu icali nu kumala intazi ino nakweti.” Umwina David walondanga ukusenula imiombele yakwe, fwandi wanenyile uwamwingizye incito vino walondanga ukucita. I cani cacitike? Umwina  David wazinzilwe incito. Wacisile uli? Watiile: “Uwanda uwalondelilepo, nalembisye ukuombako upainiya wa nsita inono uwakutwalilila.” Umwina David na mamakwe yatandike ukuomba incito ya kuzifya pakuti yaisakamala. Lino papisile insita, watandike upainiya wa nsita yonsi lyene patalengile na mamakwe nawe kwene watandike upainiya. Atwalane yaa yasoolwilepo ukuomba umulimo uno antu yasuzile sana, nomba umulimo uwo utacindama sana kuli aliyo. Nanti icakuti kalupiya kano yakakwata kacepelako sana kulinganya na luno yafolanga, cila mwezi yakakwata sile vino yakalondekwa. Yakalonda ukukolezya Yeova, nupya yalola vino Yeova akasakamala antu akacita vii.—Mate. 6:31-33.

10. Uzye tungasunga uli imyenzo itu?

¹⁰ Nampo nga twakwata impiya nanti foo, tulinzile kusunga umwenzo witu. Uzye tungacita uli? Mutalinzile kutemwa sana ivyuma. Nupya mutalinzile kukolezya incito inu kuluta kukoleezya vyakwe Yeova. Uzye mungamanya uli ndi cakuti imutandika kucita vivyo? Mauzyo yamwi yano mungayuzya mweineco aakuti: Uzye nkaelenganya sana pa ncito ino nkaomba lino ndi mu kulongana nanti mu mulimo wa kusimikila? Uzye nkasakamikwa sana ndi cakuti ndakwata lupiya ku nkoleelo? Uzye impiya nanti ivyuma vikulenga twakwata intazi mu cupo cane? Uzye ningaipeelesya kuomba incito ino antu yasuula, ndi cakuti incito iyo ikunsilako insita ya kuombela Yeova? (1 Tim. 6:9-12) Lino tukwelenganya pa mauzyo yaa, twaiusya ukuti Yeova watutemwa nupya walaya yonsi aipeelesya kumuombela ukuti “Ntalatala imusye nanti kumutazyela.” Ali mulandu uno Paulo walembiile ukuti: “Mwaikala umi uwa kuntatemwisya impiya.”—Ayeb. 13:5, 6.

11. I vyani vingacitika ndi cakuti muntu atasoolwile ningo ivyakuizanzya?

¹¹ Yeova akalonda twaipakizya umi, nupya ivyakuizanzya vikatwazwa sana. Izwi lyakwe Leza likatunena ukuti “fwandi icintu cisuma cino umuntu ali wensi angacita, u kulya nu kumwa nga nu kuilyokezya pa vintu vino walonka.” (Kasa. 2:24) Lelo ivyakuizanzya ivingi ivyaya muno nsi vingatonona. Vikalenga antu kuya ni miyele ipe, nu kulenga antu kulacita ivintu vino Izwi lyakwe Leza lyakanya.

12. Kulingana na 1 Kolinto 10:21, 22, u mulandu ci uno tulinzile kusoolwela ningo ivyakuizanzya?

¹² Tukalonda kupepa Yeova wenga sile, fwandi tutalinzile ‘kulalya pa cipango ca Mwene  Yeova nga na pa cipango ca mipasi ya nkota.’ (Welengini 1 Kolinto 10:21, 22.) Kuliila capamwi ivyakulya kukalanga sana ucuza. Ndi cakuti tukusoolola ivyakuizanzya umwaya unkalwe, vya mipasi, vya uzelele nanti vintu vyuze iviipe vino imili itu ikalonda, ale tukuliila pamwi na anisi yakwe Leza. Ni cilacitika i cakuti, tulailetelela nupya tulonona na ucuza witu na Yeova.

13-14. Ukulingana na Yakobo 1:14, 15, u mulandu ci uno tulinzile ukucenjelela pa vyakuizyanzya vino tukasoolola? Langililini.

¹³ U mu nzila ci muno ivyakuizanzya vyakolanila ni vyakulya? Lino tukulya, tukasoolola ningo vino tumalya. Nomba ndi cakuti twamila, ala casila tutange tusoolole vino ivyakulya vimaomba umu mwili witu. Ivyakulya ivisuma vingatwazwa ukuya nu umi usuma, nomba ivyakulya iviipe vingalenga umi witu ukukanaya ningo. Tutange tumanya ivimacitika uku mwili witu papo kwene, lelo tungamanya nga papita insita.

¹⁴ Vivyo kwene avino caya na lino twasoolola ivyakutuzanzya, tungasoolola ivyakwika umu melenganyo itu. Ndi cakuti twasoolola, ivintu vivyo vingonona imyelenganyizizye itu nanti ukuizifya. Ivyakuizanzya ivisuma vingaya ningo sana kuli sweswe, nomba ivyakuizyanzya iviipe vingatonona. (Welengini Yakobo 1:14, 15) Tutange tumanye vino ivyakuizanzya vingacita uku umi witu papo kwene, lelo tungiza tumanye ndi papita insita. Ali mulandu uno Baibo ikatucelwila ukuti: “Mutaisomba mweisikulu. Kusi umwi angatumpika Leza. Muntu akazombola kulingana na vino wakomela. Muntu ndi walondela vilondwa vya untunze, wene alafwa.” (Gala. 6:7, 8) Fwandi cacindama sana ukutaluka uku vyakuizanzya vyonsi vino Yeova wapata.—Masa. 97:10.

15. U wila ci uno Yeova watupeela uwakutwazwa?

¹⁵ Antu yakwe Yeova aingi yatemwa sana ukutamba JW Broadcasting^®, puloglamu isuma sana iyaya pa mulawasa witu. Nkazi uwi zina lyakuti Marilyn watiile: “JW Broadcasting yangazwa ukuya sana ni nsansa, nupya ningatamba vyonsi ivilimo pano ikangazwa sana umu umi wane. Ndi nazukilwa nanti ukutoovoka, nkakomeleziwa ku malyasi akalandwamo nanti ndi natamba mapepo ya katondo. Cico cikalenga mpalame sana kuli Yeova nu kwi uvi lyakwe. Puloglamu ya JW Broadcasting yasenula sana umi wane.” Uzye namwe uwila wakwe Yeova ukamwazwa? Nupya ukuluta pali puloglamu ipya ikayako cila mwezi pa JW Broadcasting, paya ni vya kukutikako, mavidyo alino ni nyimbo zya kukomelezya vino mungakutikako nu kutamba insita ili yonsi.

16-17. U mulandu ci uno tulinzile kucefezyako insita ino tukasumba ku vyakuizanzya, nupya tungacita uli vivyo?

¹⁶ Tutalinzile sile ukwika amano uku musango wa vyakuizyanzya vino tukusoolola, lelo tulinzile nu kucenjela uku nsita ino tukasumba uku kucita ivintu vivyo. Ndi cakuti tutacisile vivyo, tungasumba insita itali uku vyakuizanzya ukucila uku kuombela Yeova. Aingi cikayatalila sana ukucefyako insita ino yakasumba uku vyakuizanzya. Nkazi ali ni myaka 18 uwi zina lyakuti Abigail watiile: “Ukutamba TV kukangazwa ukupuza pa cisila ca wanda uwakuomba sana. Nomba ndi cakuti ntacenjile, ningatamba TV pa nsita itaali sana.” Umwina uwacance Samuel watiile: Insita zimwi nkatamba utumavidyo utwipi utwingi pa intaneti. Nga natampa ukutamba konga, nsimanya na vino insita itisila iniza inzana sile ukuti papita maawazi 4 ukufuma pano intandikile.”

¹⁷ Mungacita uli pakuti mucefyeko insita  ino mukasumba uku vyakuizanzya? Ica kutandikilapo, mulinzile ukumanya insita ino mukasumba uku vyakuizanzya. Uzye mutange mulembe insita ino mulasumba umu mulungu onga? Mukalembe pali kalenda maawazi yano mukasumba ukutamba TV, pa intaneti nu kuteya ivyangalo vya pa foni. Ndi cakuti mwazana ukuti mukasumba sana insita uku vintu vii, pangini utantiko. Lembini insita ino mwakulaomvya uku vintu vicindame sana, lyene mupange ni nsita ino mumaomvyanga uku vyakuizanzya. Lyene mulenge kuli Yeova amwazwa kufikilizya vino mwatantika. Nga mwacita vivyo mulaakwata insita na maka akuisambilizya, kukwata ukupepa kwa lupwa, kupekanya ukulongana alino nu kuombesya mu mulimo wa kusimikila nu kusambilizya. Nupya mutalauvwa uyi ukuti mukusumba sile insita ku vyakuizanzya pano ale mukuiomvya ku kuombela Yeova.

18-19. Tungacita uli pakuti tulange ukuti tukapepa sile Yeova wenga mpo?

¹⁸ Pa cisila ca kulanda pa kusila kwa nsi ii yakwe Satana na pa nsi ipya ili nu kwiza, umutumwa Petulo watiile: “Acino, mwe yacuza, lino mucili mukulolela, mulinzile kusininkizya ukuti mwene akamuzane akaele, aula maifyo, nu kwikala mutende pakasi kinu na Leza.” (2 Pet. 3:14) Ndi cakuti tukuvwila ukusunda kuko nu kwezya na maka ukutwalilila ukuya ni miyele isuma nupya asanguluke, tulalanga ukuti tukapepa sile Yeova wenga mpo.

¹⁹ Satana na antu yakwe yalatwalilila ukutulenga ukukolezya ivintu vyuze umu umi witu ukucila ukukolezya Yeova. (Luka 4:13) Nomba asi mulandu ni ntazi zino tungakwata, tutalaleka aliwensi nanti icili consi ukutulesya ukutemwa sana Yeova. Tukalondesya ukupeela Yeova vino aliwe sile uwalinga ukupeelwa kuli kuti ukumupepa wenga sile mpo.