AAKALONDELEZYA pa vya micele walola icikope icikulangilila vino imicele imaya. Lyene walola imvula ya cimuza icipisye icikwiza zuwa zuwa uku ncende umwaya antu aingi sana. Pa mulandu wakuti watasakamala sana pa umi wa yantu, wezya na maka ukucelula antu lino kucili insita.

Umu nzila ili imwi kwene, Yeova akacelula antu apano nsi pa “wanda” ukwiza uwipisye ukucila imvula ya cimuza ino tunguvwa pali lipoti ikulanda pa micele. Uzye akucita uli vivyo? Nupya u mulandu ci uno tungasininkizizya kuti akucelula lino kucili insita pakuti tucitepo cimwi? Pakuti twasuke amauzyo yayo, lekini tale tusambilile pa kucelula kuno Yeova wapeezile antu mpiti.

Mu nsita ino ivyalumbulwa muli Baibo vyacitikanga, Yeova wacelwile antu pa vintu vimwi ivya kutiinya nanti pa upinguzi umwi uno wali nu kuletela antu atuvwilanga masunde yakwe uku mufulo sile. (Mapi. 10:25; Yele. 30:23) Cila nsita, wacelwile antu ataali ni cuvwila ala kucili insita iyakuti icintu cico cicitike, nupya wayanenyile vino yalondekwanga ukucita pakuti yamuvwile. (2 Yamw. 17:12-15; Neem. 9:29, 30) Ilingi waomvyanga aomvi yakwe acisinka aali pano nsi kwene ukuyanena upinguzi uno wali nu kuyaletela na vino upinguzi uwo wapamvizye pakuti yakomeleziwe ukusenuka.—Amo. 3:7.

Nowa waya pa antu yano Leza waomvizye ukunena antu upinguzi wakwe. Pa myaka iingi, wacelulanga antu acitanga uzelele nupya ankalwe pali Mulamba Mukalamba uwali nu kuyako pano nsi ponsi ukwaula intete. (Utan. 6:9-13, 17) Nupya wayanenyile na vino yalondekwanga ukucita pakuti yakapusuke nga Mulamba Mukalamba wiza, wasimikile sana icakuti lino papisile insita yatandike ukumwama ukuti kakosoola wa cumi pakuti antu yacita vyaololoke.—2 Pet. 2:5.

Nanti icakuti Nowa waombisye sana ukusimikila, antu aliko pa nsita iya yatuvwilile ilandwe lyakwe Leza. Yalangilile ukuti yatakweti utailo. Ni cacitike icakuti, yafwile lino Mulamba “wizile asenda yonsi kwene.” (Mate. 24:39; Ayeb. 11:7) Lino insita ya kuti Mulamba aize yayanga ikupalama, yatali nu kulanda ukuti Leza atayacelwile.

Pa nsita yuze, Yeova wacelwile antu yamwi ala kwasyala panono ukuti upinguzi wakwe ucitike. Nanti ciye vivyo, wasininkizye ukuti yonsi ali nu kononwa yapeelwa insita ilinge iyakusenuka. Wacelwilile limwi antu lino wali nu kuleta Ivinkunka 10 pa ina Ejipti. Yeova watumile Mose na Aloni ukucelula Falao na omvi yakwe pa cinkunka cakwe namba 7 pa mvula ya citalawe iyali nu kunona sana ivintu. Vino imvula iyo yali nu kuyako uwanda uwalondelelapo, uzye Leza wayapeezile insita ilinge iyakulonda umwakwikala pakuti yapusuke uku mvula iyo? Baibo ikati: “Yamwi muli yacilolo yakwe Falao yuvwa intete pa mazwi yano [Yeova] wavwanzile. Caleka yatoola azya yao ni nyama zyao yaziika umwakuuwa. Lelo yamwi yatasakamile kusoka kwakwe [Yeova] nga yata azya yao ni nyama zyao zyali zili palwalala.” (Kufu. 9:18-21) Cii cikulangilila ukuti Yeova wayacelwile ala kucili insita, na yonsi auvwilile ukucelula ivintu vyao vitononike wakwe vino vyononike kuli yano yatuvwilile.

Vivyo kwene avino Falao na omvi yakwe yacelwilwe ala kwasyala panono ukuti icinkunka icalenga 10 cicitike. Nomba yatuvwilile ukucelula kuko (Kufu. 4:22, 23). Ni cacitike i cakuti, ana aonsi maeli yafwile. Ala icintu cico caifile wakwe cimwi! (Kufu. 11:4-10; 12:29) Uzye nga yuvwilile  ukucelula kuko lino kucili insita? Ee. Mose zuwa zuwa wacelwile aina Izlaeli pa cinkuka cakwe namba 10 icali nu kwiza nu kuyanena ivya kucita pakuti yapususye indupwa zyao. (Kufu. 12:21-28) Antu yanga auvwilile vino Mose wayanenyile? Ukulingana na vino yapendulwike, cazanyilwe ukuti antu 3 milyoni, ukwikako na Ina Izlaeli ni “mpendwa ikulu ya antu yauze” ataali aina Izlaeli na ina Ejipti, yapuswike upinguzi wakwe Leza nupya yafumile mu Ejipti.—Kufu. 12:38.

Wakwe vino twalandapo, Yeova lyonsi wasininkizyanga ukuti antu iyakwata insita ikulu iyakuvwila ukucelula nu kucitapo cimwi. (Malan. 32:4) U mulandu ci uno Leza wacitilanga vivyo? Umutumwa Paulo walondolwile ukuti Yeova “asyalonda kuti muntu umwi akononwe. Wene akalonda kuti antu yonsi yazenzuke.” (2 Pet. 3:9) Leza wasakamile sana antu. Walondanga ukuti yalapile nu kusenuka lino upinguzi wakwe utali ufike.—Eza. 48:17, 18; Loma 2:4.

Na ndakai kwene, antu yonsi yalinzile ukuvwila ukucelula ukucindame ukukupeelwa ndakai umu nsi yonsi. Lino Yesu wali pano nsi, wacelwile antu ukuti ivintu vya mu nsi ii vili nu kononwa pa ‘ucuzi ukulu cuze.’ (Mate. 24:21) Wasoowile pa upinguzi uwali nu kuyako uku nkoleelo pali vino vyali nu kucitika vino alondezi yakwe yali nu kulola vikucitika lino insita ikuya ikupalama. Yesu walondolwile ivintu ivyali nu kucitika umu nsi yonsi vino tukulola ndakai.—Mate. 24:3-12; Luka 21:10-13.

Ukulingana nu usesemo uwo, Yeova ndakai akucelula antu yonsi ukusoolola ukumuombela nu kumuvwila. Akalonda ukuti antu ya cuvwila yaipakizya umi ndakai alino nu ku nkoleelo umu nsi ipya. (2 Pet. 3:13) Yeova akalonda ukwazwa antu ukutaila malayo yakwe. Pa kuyazwa ukucita vivyo, wayapeela ‘landwe lisuma lya Wene,’ lino Yesu wasoowile ukuti “lilakosolwa mu nsi yonsi kuya umboni ku antu amu nko zyonsi.” (Mate. 24:14) Leza wateyanya ya kapepa ya cumi kuti yapeela “umboni” nanti kukosoola ilandwe umu mpanga 240. Yeova akalonda antu aingi ukuvwila ukucelula pakuti yakapusuke pa wanda wa upinguzi wakwe uwololoke.—Zefa. 1:14, 15; 2:2, 3.

Fwandi icuzyo icicindame, asi cakuti Yeova akacelula antu ala kucili insita iyakuvwila ukucelula. Vino itulandapo vikulangilila kuti akacelula ala kuli insita. Nomba icuzyo icicindame icakuti: Uzye antu yaluvwila ukucelula kwakwe Leza lino kucili insita? Vino sweswe ya kakosoola a ilandwe lyakwe Leza, lekini tutwalilile ukwazwa antu aingi ukupusuka impela ya nsi ii.