1921—Ipapita Imyaka 100
UMU Lupungu Lwa Mulinzi lwakwe Januwale 1, 1921 mwali iuzyo ilyakumile Asambi ya Baibo ilyakuti: “U mulimo ci uuli nu kuombwa umu mwaka uu?” Lyene palondelile amazwi aya pali Ezaya 61:1, 2 aaiusyangako pa mulimo uno yakweti uwa kusimikila ilyasi lisuma. Apakati: “[Yeova] wampaka amafuta, wantuma ukukukosola ilandwe lisuma ku alanda . . . , wantuma nene apakuti indande ukuti insita lyene yatifika ino Leza alapususya antu yakwe, ino alacimvizyako anisi yao.”
YA KASIMIKILA ASIPE
Pakuti Asambi ya Baibo yaombe umulimo wa kusimikila, yalondekwanga ukuya asipe. Yali nu kusimikila “ilyasi lisuma” uku antu afuuke nu kunena antu aipe ukuti insita yatifika ino Yeova wali nu ‘kucimvya anisi’ yakwe.
Umwina J. H. Hoskin uwikalanga uku Canada, wasimikilanga ukwaula intete asi mulandu nu kukanya ukwaliko. Uku kutandika kwa mwaka wa 1921, wakomenkine na simapepo wa ku Methodist. Pa kutandika ukulanzyanya na simapepo wiya, Umwina Hoskin watiile: “Tulinzile ukulanzyanya pali Baibo umu mutende, nupya ndi cakuti twavilwa ukuvwana pali vimwi tulinzile ukumala ukulanzyanya kwitu umu mutende nu kutwalilila ukuya ivyuza.” Nomba vivyo vitacitike. Umwina Hoskin watiile: “Tutalanzyanyizye na pa nsita itali, simapepo wiya wafumile nu kupunka icisaasa icakuti nelenginye inti magilasi ali uku cisasa cici yali nu kutamika.”
Simapepo wakalipe nu kulanda ukuti: “U mulandu ci uno utange uye umu kulanzyanyizizya na asi aina Klistu?” Umwina Hoskin ataswike icili consi, nomba lino wafumanga welenginye ati, “Nkulola kwati nawe kwene asi mwina Klistu.”
Lino simapepo wasimikilanga uwanda uwalondelilepo umu ceici, walanzile iviipe pa Mwina Hoskin. Umwina Hoskin watiile: “Wanenyile antu ukuti nali nene wa ufi sana nupya nalinzile ukukomwa.” Nomba cico citalenzile umwina Hoskin ate ukusimikila, watwalilile ukusimikila nupya wasimikile antu aingi. Watiile: “Naipakizyanga sana ukusimikila kuku. Antu yamwi yalandanga nu kuti, ‘Imanya ukuti ukaomba umulimo wakwe Leza’ nupya yaipeelesyanga nu kumpeela ivintu vino nalondekwanga.”
KUISAMBILIZYA BAIBO NI SAMBILILO LYA LUPWA
Asambi ya Baibo yapanganga lyonsi amauzyo na masuko aalandanga pali Baibo ayanga muli magazini ino ndakai tukati Zyukini! pakuti yazwe antu ukuvwikisya Baibo. Kwayanga mauzyo ayance yano avyazi yalanzyanyanga na anao. Avyazi yuzyanga ana mauzyo yaa nu kuyazwa ukuzana masuko muli Baibo. Mauzyo wakwe, “A mabuku yanga aya muli Baibo?” yalenganga ana ukumanya ivintu vimwi ivyanguke pali Baibo. Mauzyo yauze wakwe “Uzye aina Klistu yonsi yalinzile ukwenekela ukuyacuzya?” yalenganga acance ukuya ya kasimikila asipe.
Nupya kwayanga mauzyo na masuko amuli Baibo aakumile antu aamanyile sana mpiti Baibo, nupya masuko yayanga umwi buku ilyatangi Studies in the Scriptures ibuku 1. Antu aingi yasambilile ivintu ivingi pa mulandu na mauzyo yaa, nomba kwali icimanyisyo cakuti mauzyo yaa yataali nu kutwalilila ukuyako. I cani calenzile?
IBUKU ILIPYA
Ibuku lyakuti The Harp of God
Utumakadi apalembwanga amafwa yano umuntu alinzile ukubelenga
Utumakadi apayanga mauzyo pali vino umuntu wabelenzile
Aina atungululanga izile iyamanya ukuti antu yalondekwanga ukusambilila Baibo panono panono. Umu Novemba 1921 yapanzile ibuku ilyatangi The Harp of God. Nupya aazumiile ukupokelela ibuku lii, yalembesizye nu mwisukulu lyakuti The Harp Bible Study Course. Isukulu lii lyazwilizye antu ukusambilila ukuti Leza walondanga ukupeela antu umi wa pe. Uzye cacitike uli cico?
Ndi cakuti umuntu wazumila ukupokako ibuku lii, yamupeelanga kakadi apalembwanga mafwa yano wali nu kubelengapo umwi buku kwene lii. Umulungu uwalondelelapo, wapokelelanga kakadi apali mauzyo alandanga pali vino wabelenzile. Nupya pa mpela yakwe kakadi payanga amafwa yano wali nu kubelenga nupya umulungu uwalondelelapo.
Cila mulungu pa milungu 12, umusambi wapokelelanga kakadi ukufuma uku cilongano icali umupipi. Ilingi aatumanga utumakadi tuu aakoloci nanti yayo aatakwanisyanga ukuya umu kusimikila uku ng’anda ni ng’anda. Wakwe, ya Anna K. Gardner, aku Millvale, uku Pennsylvania, U.S.A., yatiile: “Lino ibuku lyakuti The Harp of God lyafumile, ya Thayle ya mangulenzi yano catalilanga ukupita yakweti lyene umulimo wa kuomba u wakutuma utumakadi cila mulungu apayanga mauzyo.” Ndi cakuti umuntu wamala isukulu lii, umwi uwa mu cilongano wamutandalilanga pakuti akamwazwe ukumanya ivingi pali Baibo.
Ya Thayle Gardner ala iikala pa kajinga ka yalemale
UMULIMO UWALI NU KUOMBWA UKU NKOLEELO
Pa mpela ya mwaka, Umwina J. F. Rutherford watumile makalata uku vilongano. Walanzile ukuti “umulimo wa kusimikila pa Wene umu mwaka uu watiuombwa umu ncende izingi nu kwazwa sana antu ukucila imyaka yonsi uku cisila.” Nupya walanzile ukuti: “Umulimo ucili ukulondekwa ukuombwa. Komelezyini na yauze ukutandika ukuombako umulimo uu usuma.” Ukwaula nu kutwisika Asambi ya Baibo yacisile vino wayanenyile. Umu 1922 yasimikile sana ukucila vino cali umu myaka ya ku cisila nupya yacisile vivyo ukwaula intete.
