CIPANDE CA KUSAMBILILAMO 42
Mwasininkizya Ukuti Mwamanya Icumi
“Mwasininkizya ivintu vyonsi; mwalemasya uku kucita icisuma.” —1 TESA. 5:21.
LWIMBO NA. 142 Twalukutaila Ukuti Vintu Vilaziipa
VINO TUMASAMBILILAPO *
1. U mulandu ci uno antu aingi yakavulunganyiziwa?
KWAYA imipepele iingi ndakai iikalanda ukuti a ina Klistu nu kuti yakapepa ukulingana na vino Leza akalonda. Ali mulandu uno antu aingi yakavulunganyiziwa. Yakauzya ukuti, “Uzye kwaya ukupepa kwa cumi, nanti uzye imipepele yonsi ikazanzya Leza?” Uzye mwasininkizya ukuti swe ya Nte Yakwe Yeova tukasambilizya icumi nu kuti mipepele itu sile iikazanzya Yeova? Uzye tungacita uli pakuti tusininkizye? Lekini tusambilile.
2. Ukulingana na 1 Tesalonika 1:5, i cani icalenzile umutumwa Paulo ukusininkizya ukuti vino wasambilile ali cumi?
2 Umutumwa Paulo wasininkizye ukuti wamanyile icumi. (Belengini 1 Tesalonika 1:5.) Atasininkizye sile vivyo pa mulandu wakuti calenganga auvwa ningo. Lelo Paulo waisambilizyanga Izwi lyakwe Leza. Wazumile ukuti “Amalembo yonsi yafuma kuli Leza.” (2 Tim. 3:16) I vyani vino wasambilile? Paulo wazanyile umu Malembo usininkizyo uno ya simapepo Ayuda yasuuzile uwakuti Yesu umu cumi wali a Mesiya uwalavilwe. Yalandanga ukuti yasambilizyanga antu icumi pali Leza lelo yacitanga ivintu vino Leza wapata. (Tito 1:16) Paulo wene wapusineko na aliyo, atasoololanga vino alinzile ukuzumila na vino atalinzile ukuzumila. Waiteinye ukusambilizya nu kucita “ukulonda kwakwe Leza konsi.”—Mili. 20:27.
3. Uzye tulinzile ukumanya amasuko uku mauzyo yonsi pakuti tusininkizye ukuti vino twasambilila ali cumi? (Loliniko na kambokosi kakuti “ Vino Yeova Wacita na Vino Akalonda Ukutucitila ‘Vyavula Wakwe Cimwi.”)
3 Antu yamwi yakalola ukuti ukupepa kwa cumi kulinzile ukwasuka amauzyo yonsi kumwi sile na yano Baibo italandapo umu kulungatika. Uzye ivya musango uwo vingacitika? Lekini tusambilile pali Paulo. Wakomelezyanga ya kapepa yauze ukusininkizya ivintu vyonsi, lelo wayanenyile nu kuti nawe kwene kwali ivintu ivingi vino atamanyile. (1 Tesa. 5:21) Walemvile ukuti: “Twamanya sile vinono” nupya watile, “caya kwati tukalola muli miila wa cela.” (1 Kol. 13:9, 12) Paulo atuvwikisye vyonsi, naswe kwene avino caya. Nomba Paulo wamanyile ningo icumi cicindame pali Yeova. Vino wasambilile vyali nu kulenga asininkizye ukuti wamanyile icumi!
4. Tungasininkizya uli ukuti twazana icumi, nupya i vyani vino tumasambilila pa ina Klistu ya cumi?
4 Inzila yonga ino tungasininkizizyamo ukuti twazana kupepa kwa cumi u kukolanya vino ya Nte Yakwe Yeova yakacita ndakai kuli vino Yesu wacitanga. Mu cipande cii tumasambilila ukuti aina Klistu ya cumi (1) yakakana ukupepa ivilubi, (2) yacindika izina lyakwe Yeova, (3) yatemwa icumi, na (4) yatemwana sana.
TUKAKANA UKUPEPA IVILUBI
5. I vyani vino tukusambilila kuli Yesu pa nzila ino tulinzile ukupepelamo Leza, nupya tungacita uli pakuti twacita vino wasambilizye?
5 Pa mulandu wakuti Yesu watemilwe sana Yeova, wapepanga sile Yeova wenga lino wali ukwi yulu na lino wizile pano nsi. (Luka 4:8) Wasambilizye na asambi yakwe ukulapepa sile Yeova. Yesu na asambi yakwe yataomvyanga ivinkolanya pa kupepa. Leza asiloleka, fwandi kusi aliwensi aangapanga icili consi icikaloleka wakwe aliwe. (Eza. 46:5) Nomba uzye caya sile ningo ukupanga ivinkolanya vya antu yano antu yakaelenganya ukuti yali amuzilo nu kuvipepa? Umwi sunde lyakwe ciili pa Masunde 10, Yeova watiile: “Mutaipangila tuluwi mu unkolanya wa cintu icili consi ca mwiyulu nanti camu nsi . . . Mutafukamila unkolanya wakwe tuleza nanti kutupepa.” (Kufu. 20:4, 5) Antu aakalonda ukuzanzya Leza yamanya ukuti asilonda twamupepa ukuomvya ivinkolanya.
6. U kupepa ci kuno ya Nte Yakwe Yeova yakakolanya ndakai?
6 Antu asambilila pa malyasi ya mpiti yalanda ukuti umu nsita ya atumwa, aina Klistu yapepanga sile Leza. Ibuku limwi ilya mpiti likalanda pa mipepele ukuti aina Klistu yaya “yapasile” ukuomvya ivinkolanya pa kupepa. Ndakai ya Nte Yakwe Yeova yakakolanya vino aina Klistu ya kutandikilapo yacitanga. Tusipepa ivinkolanya vya atakatifu nanti ya malaika; nupya tusipepa na Yesu. Tusicita salyuti kuli fulagi nanti ukucita ivili vyonsi ivyakulangilila ukuti tukulumbanya uteeko nanti impanga itu. Asi mulandu na vino aliwensi angatulenga ukuti tucite, tukatwalilila ukuvwila amazwi yakwe Yesu akuti: “Yeova Leza wako ali wino ulinzile ukupepa.”—Mate. 4:10.
7. A muli vyani muno ya Nte Yakwe Yeova yapusanako ni mipepele yuze?
7 Ndakai, antu aingi yatemwa ukuvwa kuli ya simapepo amanyikwa sana. Yakatemwa sana ya simapepo yaa icakuti iyatandika nu kuyapepa. Antu aingi yakaya ku maceici yakwe ya simapepo yaa, kukala mabuku yao nu kuyapeela impiya izingi alino nu kusangwila uku tuungwe tuno yakatungilila. Antu yamwi yakazumila vyonsi vino yasimapepo yaa yalanda. Yakauvwa ningo sana ukulola ya simapepo yaa kwati yakulola sile Yesu! Ukupusanako na antu yaa, ya kapepa yakwe Yeova acumi yatakwata ya simapepo. Nanti cakuti tukacindika yayo akatungulula, tukalondela vino Yesu wasambilizye ukuti: “Mwensi mwemwe ina.” (Mate. 23:8-10) Tusipepa antu, asi mulandu i ntunguluzi zya antu nanti intunguluzi zya uteeko. Nupya tusitungilila imipepele yao nanti miteekele yao. Alino tusiika umu vikanza vya miteekele ni vintu ivyaya umu nsi ii. Ivintu vii vyonsi vyalenga tupusaneko sana na antu aakailola ukuti a ina Klistu.—Yoa. 18:36.
TUKACINDIKA IZINA LYAKWE YEOVA
Aina Klistu ya cumi yakauvwa ningo ukunenako yauze pali Yeova (Lolini mapalaglafu 8-10) *
8. Uzye twamanya uli ukuti Leza akalonda twacindika izina lyakwe nu kunenako yauze api zina kwene lilyo?
8 Pa nsita imwi Yesu wapefile ati: “Tata, cindika izina lyako.” Yeova waswike ipepo lili lino izwi lyakwe lyuvwikike ukufuma ukwi yulu nu kulanda ukuti wali nu kucindika izina lyakwe. (Yoa. 12:28) Lino Yesu waombanga umulimo wakwe, watwalilile ukucindika izina lyakwe Isi. (Yoa. 17:26) Fwandi aina Klistu ya cumi yakalola ukuti i syuko ukucindika izina lyakwe Leza nu kunenako yauze api zina kwene lilyo.
9. Uzye aina Klistu ya kutandikilako yalangilile uli ukuti yacindike izina lyakwe Leza?
9 Pa cisila sile lino icilongano ca ina Klistu capanzilwe, Yeova “wapiliukile uku yantu ya mu nko pakuti asoolole antu akaamilwa ukwi zina lyakwe.” (Mili. 15:14) Aina Klistu yaya yuvwanga ningo sana ukuomvya izina lyakwe Leza nu kunenako yauze api zina lilyo. Yaomvyanga izina lyakwe Leza lino yasimikilanga na lino yalembanga Baibo. * Vino yacisile vyalangilile ukuti aliyo sile yalenzile izina lyakwe Leza ukumanyikwa.—Mili. 2:14, 21.
10. Twamanya uli ukuti ya Nte Yakwe Yeova sile aliyo yakalenga yauze ukumanya izina lyakwe Yeova?
10 Uzye ya Nte Yakwe Yeova yalinga ukwamilwa ukwi zina lyakwe Yeova? Lekini tulole usininkizyo umwi. Ndakai ya simapepo aingi yezya na maka ukufisa icisinka cakuti Leza wakwata izina. Yasisya izina lyakwe Leza umu Mabaibo yao nupya yamwi yene yakalesya nu kuomvya izina lilyo umu maceici yao. * Ukwaula nu kutwisika ya Nte Yakwe Yeova aliyo sile yakacindika izina lyakwe Leza vino lilinzile ukucindikwa. Tukulenga izina lyakwe Leza ukumanyikwa uku antu aingi! Tukwezya na maka ukucita vino izina litu likapiliula ilyakuti ya Nte Yakwe Yeova! (Eza. 43:10-12) Twapanga Baibo wa Nsi Ipya Uwa Malembo ya Muzilo ukucila pali 240 milyoni umwaya izina lyakwe Leza ponsi pano Mabaibo yauze yalisisya. Nupya tukapanga impapulo umu ndimi ukucila pali 1,000 izikalanda pali Baibo nupya izikaomvya izina lyakwe Yeova!
TWATEMWA ICUMI
11. Uzye aina Klistu ya kutandikilako yalangilile uli ukuti yatemilwe icumi?
11 Yesu watemilwe icumi cikalanda pali Leza na vino alacita. Vino Yesu wacitanga vyalangililanga ukuti wamanyile icumi, nupya wanenangako yauze pa cumi kwene cico. (Yoa. 18:37) Alondezi yakwe Yesu acumi nayo kwene yatemilwe sana icumi. (Yoa. 4:23, 24) Umutumwa Petulo wamile utailo wa ina Klistu ukuti “icumi.” (2 Pet. 2:2) Pa mulandu wakuti aina Klistu ya kutandikilako yatemilwe sana icumi, yakananga imipepele yaufi, intambi alino na vino antu yamwi yelenganyanga ivituvwananga ni cumi. (Kolo. 2:8) Vikwene avino caya na ndakai kwene, aina Klistu yakaezya na maka “ukutwalilila ukuya umu cumi” lino yakuzumila nu kucita ivintu ukulingana na vino Izwi lyakwe Yeova likalanda.—3 Yoa. 3, 4.
12. I vyani vikacitika ndi cakuti amwi umba ilikatungulula yamanya ukuti tulinzile ukusenuka muli vimwi vino twamanyile na muli vino twacitanga ivintu, nupya u mulandu ci uno yakacitila vivyo?
12 Ya Nte Yakwe Yeova yasilanda ukuti lyonsi yakauvwikisya vyonsi ivyaya muli Baibo. Insita zimwi, yakaluvyanya muli vino yakalondolola vimwi ivyaya muli Baibo nanti vino yakatungulula iuvi. Cico citalinzile ukutuzungusya. Nupya Baibo yalondolola ningo ukuti lino insita ikuya ikupita, antu yakwe Leza yakaya yakuvwikisya icumi icayamo. (Kolo. 1:9, 10) Yeova akaya akusokolola icumi panono panono, nupya tulinzile ukuya ateekele ukufikila lino tuluvwikisya ningo. (Mapi. 4:18) Lino amwi Umba Ilikatungulula yamanya ukuti tulinzile ukusenuka muli vimwi vino twamanyile mpiti nanti muli vino twacitanga ivintu vimwi, lilyo kwene sile yakasenula. Amu maceici aingi yakasenula misambilizizye yao pa mulandu wakuti yakulonda ukuzanzya ayamo nanti ukulumbuka umu nsi. Nomba ya Nte Yakwe Yeova yene yakasenula ivintu pa mulandu wakuti yakulonda ukupalama kuli Leza nu kumupepa ukulingana na vino Yesu wacitanga. (Yako. 4:4) Tusisenula ivintu pa mulandu wakuti imyelenganyizizye ya antu umu nsi yatisenuka, lelo a pa mulandu wakuti ituvwikisya ningo icumi ca muli Baibo. Twatemwa icumi.—1 Tesa. 2:3, 4.
TWATEMWANA SANA
13. I miyele ci icindame ino aina Klistu ya cumi yakwata, nupya ya Nte Yakwe Yeova yakalanga uli imiyele iyo?
13 Aina Klistu ya kutandikilako yamanyikilwe uku miyele iingi isuma, nomba imiyele icindame sana ino yamanyikilweko u kutemwa. Yesu watiile: “Nga mukutemwana, alino yonsi yalamanya ukuti mwemwe yasambi yane.” (Yoa. 13:34, 35) Ndakai, ya Nte Yakwe Yeova umu nsi yonsi yatemwana sana nupya yalemana. Twapusanako ni mipepele yuze, twaya kwati uulupwa longa nanti icakuti sweswe ya ku mpanga izipusanepusane nupya tukalondela intambi zipusanepusane. Tukalola ukuti twatemwana lino tuli pa kulongana kwa pa cilongano na lino tuli pa maukongano anono na akalamba. Cii cikalenga tusininkizye na sana ukuti tukapepa Yeova umu nzila iikamuzanzya.
14. Ukulingana na Kolose 3:12-14, iinzila ci ino tungalangilamo ukuti twatemwana sana?
14 Malembo yakatunena ukuti tulinzile ‘twatemwana sana.’ (1 Pet. 4:8) Inzila yonga ino tungalangilamo ukuti twatemwana u kweleelana nu kwiusya ukuti swensi kwene tutamalilika. Nupya tukaezya ukulola inzila zino tungalangilamo ukakapekape nu kupokelela amu cilongano kumwi sile na yano yatusosya. (Belengini Kolose 3:12-14.) Nga tukulanga ukutemwa kwa musango uu ala tukulanga ukuti sweswe ina Klistu ya cumi.
“UTAILO ONGA”
15. U mu nzila ci na zyuze muno tukakolanyizizya aina Klistu ya kutandikilapo?
15 Tukakolanya aina Klistu ya kutandikilapo umu nzila na zyuze. Wakwe, iuvi litu likatantika ivintu wakwe vivi kwene vino aina Klistu ya kutandikilapo yacitanga. Twakwata angalizi ya viputulwa, ya eluda alino na aomvi aakatumikila wakwe vivi kwene vino cayanga na kuli aliyo. (Filipi 1:1; Tito 1:5) Nupya wakwe vivi kwene vino yacitanga, naswe kwene twacindika masunde yakwe Yeova aakalanda pa kupanga icupo na pa cupo, na pali vino Leza akalola ukuomvya uwazi alino nu kucingilila amu cilongano kuli ya kacita ya viipe aasilonda ukulapila.—Mili. 15:28, 29; 1 Kol. 5:11-13; 6:9, 10; Aeb. 13:4.
16. I vyani vino tukasambilila uku mazwi aaya pali Efeso 4:4-6?
16 Yesu watiile aingi yalalanga ukuti aasambi yakwe, nomba asi yonsi ali nu kuya asambi ya cumi. (Mate. 7:21-23) Nupya Malembo yakatunena ukuti umu manda aakusyalikizya antu aingi yalaloleka “kwati aakapepa.” (2 Tim. 3:1, 5) Nomba Baibo ikalanda ukwaula ukupita nu mumbali ukuti kwaya “utailo onga” uukazanzya Leza.—Belengini Efeso 4:4-6.
17. Aaweni aaya nu utailo onga nu kulondela Yesu ndakai?
17 Aaweni aaya nu utailo onga ndakai? Itusambilila pa usininkizyo. Itusambilila pa nzila ino Yesu wasambilizye iya kupepelamo Leza na vino aina Klistu ya kutandikilako yacitanga. Fwandi tungalanda sile ukuti aa Nte Yakwe Yeova. I syuko sana ukuya pa antu yakwe Yeova nu kumanya icumi pali Yeova na pali vino akalonda ukutucitila! Fwandi katwatwalilila ukusininkizya ukuti vino twasambilila ali cumi.
LWIMBO NA. 3 Wewe Maka Itu, Wewe Twasintililamo
^ pala. 5 Mu cipande cii tumalanda pa kupepa kwa cumi kuno Yesu walangilile na vino asambi ya kutandikilako yalondiile ukupepa kwene kuu. Tumalanda na pa vintu ivikalangilila ukuti ya Nte yakwe Yeova yakalondela ukupepa kwa cumi.
^ pala. 9 Lolini kambokosi kakuti “Uzye Aina Klistu ya Kutandikilako Yaomvyanga Izina Lyakwe Leza?” akali umu Lupungu Lwa Mulinzi lwakwe Julai 1, 2010 apifwa 6.
^ pala. 10 Wakwe, umu 2008, Papa Benedict XVI wafumizye isunde lyakuti izina lyakwe Leza “litalinzile ukuomviwa nu kulumbulwa” umu maceici yakwe ya Katolika lino yakwimba nanti lino yakupepa.
^ pala. 63 ULONDOLOZI WA CIKOPE: Iuvi lyakwe Yeova lyafumya Baibo wa Nsi Ipya Uwa Malembo ya Muzilo umu ndimi ukucila pali 200 pakuti antu yangabelenga umu lulimi lwao nupya muli Baibo wii mwaya ni zina lyakwe Leza.
