1-2. Iinzila ci isuma iyakubelengelamo nu kuisambilizya Baibo? Langililini.

 ELENGANYINI ukuti mukulonda ukukala ing’anda. I vyani vino mulinzile ukucita lino mutatala mwakala? Uzye mungalola sile vino ikuloleka pa nkoleelo apa cikope? Kwene mungaya mukalole vino ing’anda iyo ikuloleka umukasi, kulola miputule yonsi, alino na panzi. Limwi mungatemwa ukumanya na vino yakuuzile ing’anda iyo. Ukwaula nu kutwisika, mungasumbako sana mano uku ng’anda ino mukulonda ukukala.

² Vikwene ali vino tungacita lino tukubelenga nu kusambilila Baibo. Umwi uwasambilila sana walanzile ukuti “Baibo yaya wa cikuulwa icikulu nupya icitali icakuulwa pa mufula uzike.” Nomba tungamanya uli ningo ivyaya muli Baibo? Ndi cakuti mukubelengamo zuwa zuwa, mungasambilila sile “visambilizyo vya kutandikilako ivya mazwi yakwe Leza.” (Aeb. 5:12) Lelo wakwe vino mungacita pa kukala ing’anda, mulinzile ukwingila “umukasi” pakuti muvwikisye ivyaya muli Baibo. Inzila isuma iya kusambililamo Baibo u kulola vino ivyeo ivyayamo vikauvwana. Mwaombesya ukumanya vino mwazumilamo nu mulandu uno mwazumilila ivyaya muli Baibo.

3. I vyani vino Paulo wanenyile Aina Klistu yauze ukulacita, nupya u mulandu ci? (Efeso 3:14-19)

 ³ Pakuti tuvwikisye ningo ivyaya umwi Izwi Lyakwe Leza, kwaya ivintu vimwi vino tulinzile ukuisambilizyapo sana. Umutumwa Paulo wakomeliizye Aina Klistu ukuti yalinzile ukulaisambilizya sana Izwi Lyakwe Leza pakuti yamanye “vino icumi casalala, ukutalimpa, ukusanzama, nu kuzika.” Nga yacita vivyo yali nu kuzyansya nu kulimba imisisi umu utailo. (Belengini Efeso 3:14-19.) Naswe kwene ali vino tulinzile ukucita. Lekini lyene tulole vino tungacita lino tukulondelezya pakuti tuvwikisye ivyaya umwi Izwi Lyakwe Leza.

4. I vyani vino tulinzile ukucita pakuti tupalame kuli Yeova? Landiniko pali vimwi.

⁴ Swe Ina Klistu tusilonda sile ukumanya ivisambilizyo vya kutandikilapo ivyaya muli Baibo. Tukalonda ukusambilila ni “vintu kwene ivizike vyakwe Leza,” nupya umupasi wa muzilo ungatwazwa ukucita vivyo. (1 Kol. 2:9, 10) Limwi mungatandikilapo ukulondelezya ivingamwazwa ukupalama sana kuli Yeova. Wakwe, mungalondelezya pali vino walanganga ukutemwa uku yaomvi yakwe aliko mpiti na vino vikalangilila ukuti wamutemwa. Mungaisambilizya na pali vino Yeova walondanga ukuti Aina Izlaeli ya mupepa nu kuvilinganya kuli vino akalonda ukuti twamupepa. Nanti limwi mungaisambilizya sana pa masesemo yano Yesu wafikilizye lino waombanga umulimo wa kusimikila pano nsi.

5. Uzye kuli vino mukulonda ukulondelezyapo sana lino mukuisambilizya?

⁵ Yamwi aakalondelezya sana lino yakuisambilizya Baibo yalanzile pali vino yangatemwa ukulondelezyapo sana. Vimwi vino yalanzilepo vili umu kambokosi kakuti “ Vino Mungalondelezyapo Lino Mukuisambilizya.” Mulaipakizya ukuisambilizya apa malyasi amusango uu ala mu kuomvya Watch Tower Publications Index nanti Ibuku Ilya Kwazwa Inte Zyakwe Yeova Ukulondelezya Ivyeo. Ukuisambilizya sana kungakomya utailo winu nupya kungamwaza “kuzana vino ukumanya Leza kwaya.” (Mapi. 2:4, 5) Lekini lyene tulande  pali vimwi ivyaya muli Baibo vino tungalondelezyapo.

6. (a) Uupusano ci uwaya pa kupanga ivyakucita nu kulonda ukucita cimwi? (b) U mulandu ci uno tungalandila ukuti ukulonda kwakwe Yeova uku yantunze ni insi “ukwa manda pe”? (Efeso 3:11)

⁶ Wakwe, elenganyini pali vino Baibo ikalanda pa kulonda kwakwe Leza. Ukupanga ivya kucita kwapusana na vino tukulonda ukucita. Ukupanga ivya kucita tungakukolanya uku kusoloolala inzila ino mukulonda ukuomvya pakuti muye kumwi. Nomba ndi cakuti mwazana cimwi icicinga umu nzila mungafilwa ukufika kuno mukulonda ukuya. Lyene vino tukulonda ukucita tungavikolanya kuli kuno tukulonda ukuya. Tukamanya ningo kuno tukulonda ukuya lelo tungaomvya inzila izipusanepusane pakuti tufike uku ncende iyo. Ndi cakuti twazana cimwi icicinga umu nzila tungaomvya inzila yuze. Tukataizya sana pali vino Yeova watusokolwela “kulonda kwakwe” muli Baibo. (Efes. 3:11) Nanti ivintu vingasenuka uli, lyonsi Yeova akafikilizya ukulonda kwakwe pano “icintu consi kwaya cino waciumbile.” (Mapi. 16:4) Nupya vino Yeova akacita vilatwalilila ukuyako amanda pe. I vyani vino Yeova akalonda ukucita nupya i vyani vino wacita pa kufikilizya ukulonda kwakwe?

7. Pa cisila cakuti antu ya kutandikilapo yapondoka, i vyani vino Yeova wacisile pakuti afikilizye ukulonda kwakwe? (Mate. 25:34)

⁷ Leza wanenyile antunze akutandikilapo vino walondanga ukucita. Yawanenyile ukuti “vyalanini nu kuvula, mukumane insi nupya mwaisakamala nupya mwateeka . . . vyonsi ivya umi” ivya pano nsi. (Utan. 1:28) Lino Adamu na Eva yapondwike, yalenzile antu ukuyembuka, lelo ukulonda kwakwe Yeova kutasenwike. Lelo wasenwile vino wali nu kucita pa kulenga ukulonda kwakwe ukufikiliziwa. Papo kwene sile, walondesyanga ukwikako Uwene uwa kwi yulu uwali nu kufikilizya ukulonda kwakwe uku antunze pano nsi. (Belengini Mateo 25:34.) Apa nsita yakwe ilinge, Yeova watumile Umwana wakwe iyeli ukwiza pano nsi ku kusambilizya antu apa Wene wakwe alino nu kupeela umi wakwe ilambo pakuti atukulule uku luyembu ni mfwa. Lyene Yesu watuutulwilwe nu kuswililila ukwi yulu ukuya umu kuteeka ngu Mwene uwa Wene wakwe Leza. Nomba kuli na vyuze vino tungasambililapo apa kulonda kwakwe Leza.

8. (a) I vyani vino Baibo ikalandapo sana? (b) Ukulingana na Efeso 1:8-11, i vyani vyuze vino Yeova alacita? (Lolini icikope icili pa nkupo.)

⁸ Baibo ikalanda sana pali vino Yeova alafikilizya ukulonda kwakwe alino na vino alalenga izina lyakwe ukucindikwa ukuomvya Uwene uno Klistu ali mwene. Ukulonda kwakwe Yeova kutanga kusenuke. Walaya ukuti vyonsi kwene vilacitika ukulingana na vino walanda. (Eza. 46:10, 11; Aeb. 6:17, 18) Uku nkoleelo insi ilaya paladaise nupya ana yakwe Adamu na Eva alungami yalaya amalilike “nu longo amanda pe.” (Masa. 22:26) Lelo kwaya na vyuze vino Yeova alafikilizya. Alalenga aomvi yakwe ukuya alemane pano nsi nu kwi yulu. Lyene aomvi yakwe Yeova yonsi acisinka yalalondela utunguluzi wakwe. (Belengini Efeso 1:8-11.) Uzye cisikumizungusya ukulola inzila isuma uno Yeova akafikilizizyamo ukulonda kwakwe?

9. Nga tukubelenga Baibo, ivintu ci vimwi ivilacitika uku nkoleelo vino mungamanya?

⁹ Elenganyini pa usesemo uno Yeova walanzile umu calo ca Edeni uwaya pa Utandiko  3:15. b Usesemo uu walandanga pa vintu ivyali nu kucitika pakuti Yeova afikilizye ukulonda kwakwe, lelo cali nu kusenda insita ikulu pakuti ufikiliziwe. Wakwe, Leza wanenyile Abulahamu ukuti apa cisila ca myaka ingi muli wenga pa yamu yana yakwe mwali nu kufuma Klistu. (Utan. 22:15-18) Lyene umu 33 C.E., Yesu yamulumile uku citende wakwe vino casowilwe. (Mili. 3:13-15) Usesemo wa kufwanta Satana uku mutwe ulafikiliziwa umu myaka 1000 uku nkoleelo. (Kuso. 20:7-10) Baibo ikatunena ivilacitika lino Satana alaya umupipi nu kononwa.

10. (a) I vyani vimwi ivyasya vicitike likwene? (b) Tungapekanya uli amelenganyo nu mwenzo? (Lolini futunoti.)

¹⁰ Elenganyini pa vintu vya kuzunguka ivilacitika vino Baibo yasoowile. Ica kutandikilapo, amu nko yalapunda ukuti yakwikala “umutende nupya acingililwe!” (1 Tesa. 5:2, 3) Lyene ucuzi ukalamba ulatandika lino mauteeko yalazanza mipepele yonsi iya ufi. (Kuso. 17:16) Pa cisila cakwe vii, umu cizungusyo limwi tulalola “Umwana wa muntu akwiza na maka nu lulumbi ulukalamba ukufuma mu makumbi ya mwi yulu.” (Mate. 24:30) Yesu alapingula antunze yonsi, kupatukanya imfwele ni mbuzi. (Mate. 25:31-33, 46) Pa nsita ii, Satana alatwalilila ukulwisya Yeova. Pa mulandu wakuti wapata sana antu yakwe Leza, alalenga inko zino Baibo ikaama ukuti Gogi wa ku mpanga ya Magogi ukulemana nu kuzanza ya kapepa yakwe Yeova. (Ezek. 38:2, 10, 11) Pa nsita imwi apakwe asyala pano nsi yalakomenkana ukwi yulu nu kuya pamwi na Kistu alino na asilika yauze akwi yulu uku kulwa inkondo iya Amagedoni, nupya ikwene ilaya impela ya ucuzi ukalamba. c (Mate. 24:31; Kuso. 16:14, 16) Lyene Ukuteeka Kwakwe Klistu Ukwa Myaka 1,000 pano nsi kulatandika.—Kuso. 20:6.

11. Uzye ukumanya ukuti kulaya umi wa pe kukalenga mwayuvwa uli? (Loliniko ni cikope.)

¹¹ Lyene elenganyini ivilamicitikila pa cisila  ca myaka 1,000. Baibo ikalanda ukuti Kaumba witu wika umu myenzo itu ukulondesya ukwikala amanda pe. (Kasa. 3:11) Elenganyini vino cico cikupiliula kuli mwemwe na pali ucuza winu na Yeova. Ibuku lyakuti Palamini Kuli Yeova, apifwa 319, paya amazwi akuti: “Pa cisila ca kwikala imyaka iingi sana, tulamanya ivingi pali Yeova Leza ukucila vino twamanya ndakai. Lelo tulayuvwa ukuti kucili kuli na vyuze ivingi sana vino tulinzile ukusambilila pali aliwe. . . . Kwene umi ulazipa sana umu paladaise ukucila na vino tungelenganya, nupya icilazipisya sana icakuti swensi kwene tulapalama kuli Yeova.” I vyani vyuze vino tungasambilila ndi cakuti twatwalilila ukuisambilizya Izwi Lyakwe Leza?

12. Uzye tungalolekesya uli umwi yulu? Langililini.

¹² Izwi Lyakwe Leza lyatusokolwelako panono vino “ukwiyulu” kwaya. (Eza. 33:5) Baibo ikatunena ivintu vya kuzungusya pali Yeova na vino iuvi lyakwe ilya kwi yulu lyaya. (Eza. 6:1-4; Dan. 7:9, 10; Kuso. 4:1-6) Wakwe, Ezekeli waweni ivintu ivya kuzunguka umu cilolwa lino ‘iyulu lyayulike.’—Ezek. 1:1.

13. Ukulingana na Aebele 4:14-16, uzye mukayuvwa uli apa mulimo uno Yesu akaomba ukwi yulu?

¹³ Nupya elenganyini pali vino Yesu akutucitila ukwi yulu ngu Mwene witu aakuteeka nupya Simapepo Mukalamba uwakwata uluse. Yesu akalenga ukuti “tupalame uku cilimba ca wene ica cikuuku cikulu” cakwe Leza ukupitila umwi pepo nu kumulenga ukuti atuvwile uluse nu kutwazwa apa “nsita ino tukulondekwa uwazwilizyo.” (Belengini Aebele 4:14-16.) Cila wanda tulinzile ukulaelenganya pali vino Yeova na Yesu yatucitila na pali vino yakutucitila kufuma ukwi yulu. Kutemwa kuno yatutemwa kulinzile ukutulenga ukuya acincile lino tukupepa Yeova.—2 Kol. 5:14, 15.

14. I cintu ci cimwi icicindame cino tungacita pa kulanga ukuti tukataizya Yeova na Yesu? (Loliniko ni vikope.)

 ¹⁴ Inzila yonga ino tungalangilamo ukuti tukataizya Leza nu Mwanakwe, u kwezya na maka ukwazwa yauze ukuya ya Nte Yakwe Yeova nu kuya asambi yakwe Yesu. (Mate. 28:19, 20) Vikwene ali vino umutumwa Paulo wacisile pakulanga ukuti akataizya Leza na Klistu. Wamanyile ukuti ukulonda kwakwe Yeova u kwakuti “antu amisango yonsi yace yapusuke nu kumanya ningo icumi.” (1 Tim. 2:3, 4) Waombesyanga umu mulimo wa kusimikila ukufika pano angapezya pakuti ‘angapususyako yamwi.’—1 Kol. 9:22, 23.

15. Ukulingana na Masamu 1:2, i vyani ivingatulenga ukuya ni nsansa?

¹⁵ Kalemba wa Masamu walemvile ukuti umuntu wa nsansa awiyo “akazangila mu kuyela amazwi yakwe Yawe, nu kuyelenganya usiku nu musanya.” (Masa. 1:1-3) Kasenula umwi wakwe Baibo walanzile pa vikomo vii ukuti umuntu alinzile “ukulalondesya utunguluzi wakwe Leza icakuti angalondelezya, kuisambilizya, nu kwelenganyapo sana.” Nupya watile “ndi cakuti uwanda umwi wapita ukwaula ukuti umwi abelenge Baibo ala uwanda uwo ononeka.” Mungaipakizya ukubelenga Baibo ndi cakuti mukuvwikisya vino mukubelenga alino nu kulola vino malyasi yano mukubelenga yakulemana. Cikaleta sana insansa ukubelenga Izwi Lyakwe Leza.

16. I vyani vino tulalanzyanya umu cipande icalondelelapo?

¹⁶ Ivintu vino Yeova akatusambilizya umwi Izwi lyakwe vitatala ukuvwikisya. Umu cipande icilondelilepo, tulasambilila apa cumi cimwi icicindame, kuli kuti itempele lya unkolanya lyakwe Yeova lino Paulo walondolwile muli kalata ino walembiile Aina Klistu Aebele. Lekini ukusambilila api lyasi lii kumuletele sana insansa.