1. I vintu ci vimwi vino Yesu watupeela?

 KUTAYA umuntu uwaya na ukapekape wakwe Yesu. Lino wali pano nsi, waomvizye amaka yano Leza wamupeezile uku kwazwa yauze. (Luka 9:​12-17) Upe ukalamba sana uno watupeezile uwa kutufwila. (Yoa. 15:13) Kufuma pano Yesu watuutulwilwe, watwalilila ukutwazwa. Wakwe vino walavile, walenga kuli Yeova ukuti atupeela umupasi wakwe uwa muzilo pakuti watusambilizya nu kututeekezya. (Yoa. 14:​16, 17 ftn.; 16:13) Nupya lino tuli pa kulongana, Yesu watwalilila ukutupeela ivya kutwazwa kusambilizya antu umu nsi yonsi Baibo nu kuyalenga ukuya asambi.—Mate. 28:​18-20.

2. Aaweni aya pa ‘vya upe umu yantu’ aalandwapo pali Efes. 4:​7, 8?

² Kwaya upe nauze uno Yesu watupeela. Umutumwa Paulo walemvile ukuti lino Yesu waile ukwi yulu “wapeezile ivya upe umu yantu.” (Belengini Efeso 4:​7, 8) Paulo walondolwile ukuti Yesu wapeezile ivya upe umu yantu yaa pakuti yaazwa amu cilongano umu nzila izingi. (Efes. 1:​22, 23; 4:​11-13) Ndakai, pa “vya upe umu yantu” paya na aomvi aakatumikila, ya eluda na angalizi ya viputulwa. a Ukuya kwene aonsi yaa yatamalilika, fwandi insita zimwi yakaluvyanya. (Yako. 3:2) Lelo Umwene witu Yesu Klistu akayaomvya uku kutwazwa, aonsi yaa i vya upe vino watupeela.

3. Langililini vino swensi kwene tungazwilizya aonsi aaya “ivya upe mu yantu.”

³ Yesu wapeezile “ivya upe umu yantu” umulimo ucindame  sana uwa kukomelezya icilongano. (Efes. 4:12) Lelo swensi kwene tulinzile ukuyazwa pakuti yaomba ningo umulimo uu ucindame. Katulangilile: Yamwi yakaombako umulimo wa kukuula Mang’anda ya Wene. Yauze yakaazwilizyako ukupitila mu kupekanya ivyakulya, imipitile alino ni milimo yuze. Mu nzila ili imwi kwene, swensi nga tukwika amano kuli vino tukalanda na vino tukacita, tungazwa aomvi aakatumikila, ya eluda alino na angalizi ya viputulwa pakuti yakomelezya ivilongano. Lekini tulande pa visuma vino tukaipakizya pa mulandu na vino aonsi yaa yakaombesya alino na vino tungalanga ukuti tukayataizya nu kutaizya Yesu uwapeela “ivya upe mu yantu.”

AOMVI AAKATUMIKILA YAKAOMBA “IMILIMO YA KWAVWILIZYA”

4. I milimo ci imwi “ya kwavwilizya” ino aomvi aakatumikila yaombanga umu nsita ya ina Klistu akutandikilako?

⁴ Mu nsita ya Ina Klistu akutandikilako, aina yamwi yasontwanga ukuya aomvi aakatumikila. (1 Tim. 3:8) Cikaloleka ukuti aliyo yaombanga “imilimo ya kwavwilizya” ino Paulo walanzilepo. (1 Kol. 12:28) Nupya cikaloleka ukuti aomvi aakatumikila yaombanga imilimo icindame sana pakuti ya eluda yaika amano ku kusambilizya nu kucema imfwele. Wakwe, aomvi aakatumikila yafwile yazwilizyangako ukukopolola Malembo nanti ukukala ivintu vino yaomvyanga pa kukopolola Malembo.

5. I milimo ci imwi ya kwavwilizya ino aomvi aakatumikila yakaomba umu manda itu?

⁵ Elenganyini pa milimo imwi ino aomvi aakatumikila yakaomba umu cilongano cinu. (1 Pet. 4:10) Yamwi yakasakamala impiya, cifulo ca kusimikililamo, kuoda impapulo nu kupeela ya kasimikila, kuombela ku viombelo vya mazwi na mavidyo, ukapyunga alino nu kwazwilizya ukuzifya Ing’anda ya Wene. Imilimo yonsi ii ikalondekwa pakuti cilongano citwalilile ukuomba ningo. (1 Kol. 14:40) Nupya aomvi aakatumikila yamwi yakalandako malyasi umu Kulongana Ukwa kuti Swe Ina Klistu nu Mulimo Witu nu kulandako malyasi ya ku yantu yonsi. Umuomvi aakatumikila angasontwa nu kuya kaazwa wi umba lya mulimo. Insita zimwi, aomvi aakatumikila yangaya na ya eluda uku vipempu vya ucemi.

6. I vyani ivikalenga twataizya sana aomvi aakatumikila aakaombesya?

⁶ Uzye imilimo ino aomvi aakatumikila yakaomba ikaazwa uli amu cilongano? Nkazi Beberly, b aakaikala uku Bolivia walanzile ukuti “vino aomvi aakatumikila yakaomba vikalenga naipakizya ukulongana. Pa mulandu ni milimo ino yakaomba cikalenga naimba, ukwasukapo, ukukutika uku malyasi nu kusambililako uku mavidyo ni vikope. Yakasininkizya ukuti yonsi atiyazanwa umu kulongana iyacingililwa nu kuti yayo atazanyilweko yalongana ukuomvya intaneti. Pa cisila ca kulongana yakaazwilizyako ukuzifya, kulola impiya mu kambokosi nu kusininkizya ukuti impapulo izikulondekwa apano zili. Nkayataizya sana.” Ya Leslie aakaikala uku Colombia yano ya iya aa eluda yatiile: “Ya wane yakalondekwa uwazwilizyo ukufuma ku yaomvi aakatumikila pakuti yangaomba ningo imilimo ingi. Nkayataizya sana pali vino yaya acincile na vino yaipeelesya ukuyazwa.” Tusikutwisika ukuti vikwene avino namwe mukayuvwa.—1 Tim. 3:13.

7. Tungalanga uli ukuti tukataizya pa kukwata aomvi aakatumikila? (Loliniko ni cikope.)

⁷ Nanti cakuti tungayuvwa ukuti tukataizya pali vino aomvi aakatumikila yakaomba, Baibo ikatunena ukuti tulinzile ‘ukulanga ukuti tukataizya.’ (Kolo. 3:15) Umwina Krzysztof eluda akaikala uku Finland walanzile pali vino akalanga ukuti akataizya lino watiile, “nkayatumila kadi nanti meseji muno nkaika  ilembo nu kulanda umu kulungatika muno umuomvi aakatumikila wankomelizye nu mulandu uno nkutaizizya pali vino akaombesya.” Ya Pascal na ya Jael aakaikala ku New Caledonia ilingi yakapepelako aomvi aakatumikila. Ya Pascal yatiile, “Manda yaa tukataizya Yeova pa kutupeela aomvi aakatumikila nupya tukamulenga ukuti ayazwa lyonsi.” Yeova akakutika mapepo ya musango uu, na cii cikalenga amu cilongano yonsi yaipakizya.—2 Kol. 1:11.

YA ELUDA ‘YAKAOMBESYA’ UMU CILONGANO

8. U mulandu ci uno Paulo walembiile ukuti ya eluda aliko umu nsita ya Ina Klistu akutandikilako yaombesyanga? (1 Tesalonika 5:​12, 13)

⁸ Ya eluda aliko mu manda ya Ina Klistu akutandikilako yaombesyanga umu cilongano. (Belengini 1 Tesalonika 5:​12, 13; 1 Tim. 5:17) Yatungululanga icilongano, kuli kuti kutungulula ukulongana nu kupingula pa vintu ivikumile icilongano ngi umba lyakwe ya eluda. Nupya yazwanga nu kulungika aina na ya nkazi pakuti yatwalilile ukuya nu utailo ukome. (1 Tesa. 2:​11, 12; 2 Tim. 4:2) Nupya aonsi yaa yaombesyanga ukusakamala indupwa zyao nu kuisakamala muli vyakwe Leza.—1 Tim. 3:​2, 4; Tito 1:​6-9.

9. I milimo ci imwi ino ya eluda yakaomba ndakai?

⁹ Ndakai ya eluda yakwata ivyakucita ivingi. Yakasimikila ilyasi lisuma. (2 Tim. 4:5) Yakaya pa nkoleelo umu mulimo wa kusimikila, ukupekanya ningo pakuti twaombela mu cifulo cino cilongano capeelwa alino nu kutusambilizya pakuti twasimikila nu kulasambilizya ningo. Nupya yakapingula nu luse nupya ukwaula kapatulula. Ndi cakuti Umwina Klistu wacita uluyembu lwipisye yakaombesya ukumwazwa ukuzifya ucuza wakwe na Yeova. Pa nsita ili imwi kwene yakombesya pakuti cilongano citwalilile ukuya icisanguluke. (1 Kol. 5:​12, 13; Gala. 6:1) Umulimo ucindamisye uno ya eluda yakaomba u kucema. (1 Pet. 5:​1-3) Yakalanda malyasi ya Baibo, nu kwezya na maka ukumanya yonsi umu cilongano alino nu kutandalila aina na ya nkazi pakuti yayakomelezya. Ya eluda yamwi yakaombako imilimo na yuze wakwe kukuula Mang’anda ya Wene nu kulungisya, kupekanya maukongano nu kuombako muli Komiti ya Kulanzyanya ni Vipatala, nu mwi umba lyakwe ya eluda akapempula alwale. Mu cumi ya eluda yakaombesya.

10. I vyani ivikalenga twataizya sana ya eluda aakaombesya?

¹⁰ Yeova wasoowile ukuti ya kacema yalatusakamala ningo nupya tutalatiina nanti ukuvwa intete. (Yele. 23:4) Vikwene ali vino nkazi Johanna aakaikala uku Finland wayuvwile lino ya nyina yalwile. Watiile: “Nanti cakuti cikantalila ukunena yauze vino nkuyuvwa, eluda wino ntamanyile ningo sana wantekeliile, wapepile pamwi nani, nupya wanjiwisyeko ukuti Yeova wantemwa. Nsiiusya vino walanzile, lelo natiile ukusakamikwa. Yeova watumile eluda wiya umu kungazwa pa nsita ino nalondekwanga uwazwilizyo.” Uzye ya eluda umu cilongano cinu yamwazwa uli?

11. Uzye tungalanga uli ukuti tukataizya pali vino ya eluda yakaomba? (Loliniko ni cikope.)

¹¹ Yeova akalonda ukuti twataizya ya eluda ukufuma pansi ya mwenzo “pa mulandu nu mulimo uno yakaomba.” (1 Tesa. 5:​12, 13) Ya Henrietta aakaikala uku Finland, yalanzile ati: “Ya eluda yakaitemelwa ukwazwa yauze, lelo cii cisipiliula ukuti yakwata insita ikulu alino na maka ukucila yauze. Insita zimwi nkayanena sile inti: ‘Uzye imumanya? Mwemwe ya eluda aakaombesya. Inkulonda sile mumanye icisinka cii.’” Nkazi Sera aakaikala uku Türkiye walanzile ati: “Ya eluda yakalondekwa ukukomeleziwa pakuti yatwalilila ukuombesya umu umulimo wao. Fwandi tungayelemba  kadi, ukuliila pamwi nayo icakulya, alino nu kuombela sile pamwi nayo umu mulimo wa kusimikila.” Uzye mwamanyako eluda umwi umu cilongano aakaombesya wino mungatemwa ukutaizya? Mwalanga ukuti mukataizya pali vino akaombesya.—1 Kol. 16:18.

ANGALIZI YA VIPUTULWA YAKAKOMELEZYA YAUZE

12. Iinzila ci iya kukomelezezyamo amu vilongano iyaliko umu manda ya Ina Klistu aakutandikilako? (1 Tesalonika 2:​7, 8)

¹² Yesu wapeezile aonsi yamwi imilimo pakuti yaazwa amu cilongano umu nzila na yuze. Yesu waomvizye ya eluda umu Yelusalemu ukutuma Paulo, Banaba, alino na yauze ukulaomba umulimo wa kutandalila ivilongano. (Mili. 11:22) U mulandu ci? U mulandu uli umwi kwene na uno aomvi aakatumikila na ya eluda yakasontelwa: kuli kuti ukukomelezya amu vilongano. (Mili. 15:​40, 41) Aonsi yaa yakaipeelesya ukuomba imilimo yao, insita zimwi yakaika na maumi yao umu uzanzo pakuti sile yasambilizye nu kukomelezya yauze.—Belengini 1 Tesalonika 2:​7, 8.

13. I milimo ci imwi ino angalizi ya viputulwa yakaomba?

¹³ Angalizi ya viputulwa yakapita sana. Yakapita makilomita aingi sana nupya pa maawazi aingi. Cila mulungu, umwangalizi wa ciputulwa akalanda malyasi aingi, kucema amu cilongano, kutungulula ukukomaana kwakwe ya painiya nu kukomaana kwakwe ya eluda, alino nu kukomaana ukwa kuya umu mulimo wa kusimikila. Akapekanya malyasi alino nu kupekanya maukongano ya viputulwa alino na a vitungu. Akapekanya masukulu yakwe ya painiya, kupekanya kukomaana ukuiyele kwakwe ya painiya aaya umu ciputulwa cino akaombelamo, nu kuombela pali vyuze ivikulondekwa ukuombelapo zuwa vino aku musambo iyamupeela ukuombelapo.

14. I milandu ci imwi ino tulinzile ukulataizizya angalizi ya viputulwa aakaombesya?

 ¹⁴ Uzye amu vilongano yakaipakizya uli uku milimo ino angalizi ya viputulwa yakaomba? Umwina uwa ku Türkiye, walanzile pa angalizi aakatandalila ivilongano ati: “Lyonsi lino yatutandalila cikankomelezya sana ukulakwata insita ya kuya pamwi na ina na ya nkazi. Namanyana na angalizi ya viputulwa aingi; lelo pataya umwangalizi aliwensi pali yaa uwanenapo ukuti atapamviwa sana nanti ukuti asikulonda ukulanda nani.” Ya Johanna yano itulandapo, yaomvile nu mwangalizi wa ciputulwa umu mulimo wa kusimikila, lelo yatazanyile nanti aumwi pa ng’anda. Yatiile: “Ntalilila uwanda uwa. Ya nkazi yane yonsi yoili yafumilepo, nupya nayalusile sana. Umwangalizi wa ciputulwa wankomelizye nu kungazwa ukulola ukuti ndakai tutanga twaya pamwi na ya lupwa alino ni vyuza lyonsi, lelo umu nsi ipya tulatwalilila ukuya pamwi nayo.” Sweingi tukataizya sana pali vino angalizi ya viputulwa yakaombesya.—Mili. 20:37–21:1.

15. (a) Kulingana na 3 Yoani 5-8, tungalanga uli ukuti tukataizya angalizi ya viputulwa? (Loliniko ni cikope.) (b) U mulandu ci uno tulinzile ukulataizizya aci ya yangalizi aakaombesya, nupya tungacita uli vivyo? (Lolini kambokosi akakuti “ Mwaiusya Aci Yao.”)

¹⁵ Umutumwa Yoani wakomelizye Gayusi ukuti apokelela aina aayatandalilanga alino nu kuyazwa “ukulingana na vino Leza akalonda.” (Belengini 3 Yoani 5-8.) Inzila yonga ino naswe tungacitilamo vii, u kwamako umwangalizi wa ciputulwa ukuti tuliile capamwi icakulya. Inzila na yuze u kuzanwa uku kukomaana ukwa kuya umu mulimo wa kusimikila lino akutandalila icilongano. Ya Leslie yano itulandapo, yakalanga ukuti yakataizya angalizi umu nzila na zyuze. Yatiile: “Nkapepa kuli Yeova ukuti ayapeela vino yakulondekwa, nemo na ya wane tukayalembela makalata nu kuyanena vino tukataizya pali vino yakatwazwa  ndi cakuti yatutandalila.” Mwaiusya ukuti angalizi ya viputulwa nayo kwene yakakwata intazi wakwe sweswe nupya yakatonta. Insita zimwi yakalwala, yakasakamikwa, alino nu kutoovoka. Mazwi inu asuma nanti upe unono sile vingalenga ukuti ipepo lya mwangalizi lyasukwe.—Mapi. 12:25.

TUKALONDEKWA “IVYA UPE UMU YANTU”

16. Kulingana na Mapinda 3:​27, a mauzyo ci yano aina yangayuzya aineco?

¹⁶ Tukulondekwa aina umu nsi yonsi, aangaya “ivya upe umu yantu.” Ndi cakuti mwemwe umwina umubatiziwe, uzye mungaitemelwa ukwazwilizyako umu nzila yii? (Belengini Mapinda 3:27.) Uzye mungimika uyo uwa kuya umuomvi aakatumikila? Ndi cakuti mwemwe aomvi aakatumikila, uzye mutanga mwimike uyo uwa kuomba nga eluda? c Uzye mungasenukako muli vimwi pakuti mukazanweko ukwi Isukulu Lyakwe ya Kasimikila ya Wene? Isukulu lii lilamwazwa nu kumisambilizya pakuti Yesu amuomvya sana. Ndi cakuti mukuyuvwa ukuti mutanga mukwanisye, mwapepa kuli Yeova. Mwamulenga ukuti amwazwa ukuomvya umupasi wakwe uwa muzilo pakuti mwaomba umulimo onsi uno yamupeela.—Luka 11:13; Mili. 20:28.

17. Uzye “ivya upe umu yantu” vikalangilila vyani pa Mwene witu, Klistu Yesu?

¹⁷ Aina yano Yesu wasonta ukuya “ivya upe umu yantu” usininkizyo wakuti Yesu akatutungulula umu manda yaa akusyalikizya. (Mate. 28:20) Tukataizya pa kukwata Umwene uwaya nu kutemwa, ukapekape, nupya uwamanya vino tukalondekwa pa kutupeela aina afikepo aakatwazwa. Fwandi mwalonda inzila zino mungalangilamo ukuti mukataizya aonsi yaa aakaombesya. Nupya mutailila ukulataizya Yeova pano ali wino akapeela “ica upe consi icisuma nupya icimalilike.”—Yako. 1:17.