CIPANDE CA KUSAMBILILAMO 40
LWIMBO NA. 30 A Tata, Leza Wane, Napya Cuza Wane
Yeova Akapozya “Imyenzo Yakwe Yayo Aculisye”
“Aliwe alapozya imyenzo yakwe yayo aculisye, alayanyepela ni vilonda vyao.”—Masa. 147:3.
VINO TUMASAMBILILAPO
Yeova akasakamala sana yayo akaya nu ulanda. Umu cipande cii tumasambilila vino Yeova akatuteekezya ndi cakuti tuli nu ulanda alino na vino akatwazwa ukuteekezya yauze.
1. Uzye Yeova akayuvwa uli pa yaomvi yakwe?
YEOVA akamanya intazi zyonsi zino aomvi yakwe yakakwata. Akamanya ivikalenga twaya ni nsansa ni vikalenga twaya nu ulanda. (Masa. 37:18) Akauvwa ningo ndi cakuti walola tukwezya na maka ukulamuombela asi mulandu ni ntazi zino tukakwata. Nupya akalondesya ukutwazwa nu kututeekezya.
2. I vyani vino Yeova akacitila yayo aali nu ulanda, nupya i vyani vino tungacita pakuti atusakamala?
2 Pa Masamu 147:3 pakalanda ukuti Yeova ‘alanyepelela ivilonda’ vyakwe yayo aali nu ulanda. Ilembo lii likalangilila vino Yeova akasakamala yayo aali nu ulanda. Nomba i vyani vino tungacita pakuti Yeova atusakamala? Katulangilile. Dokota uwa manyikisya imilimo angazwa umuntu uwatacisika pakuti apole. Nomba pakuti umuntu wiyo apole alinzile ukulondela vino dokota akumunena. Umu cipande cii, tumalola vino Yeova walanda umwi Izwi lyakwe pali yayo aakacula umu melenganyo nupya tumalola vino tungaomvya ukusunda kuu.
YEOVA AKATWIUSYAKO UKUTI TWACINDAMA KULI ALIWE
3. I cani icikalenga yamwi yayuvwa ukuti yatacindama?
3 Tukwikala umu nsi muno antu yataya nu kutemwa, nupya ica ulanda icakuti antu aingi yakayuvwa ukuti yatacindama. Nkazi Helen a walanzile ati: “Avyazi yane yatali nu kutemwa. Ya tata yali sana nu unkalwe nupya cila wanda yanenanga ukuti nali uwa sile sile.” Wakwe ya Helen, limwi namwe yamucitilapo iviipe, kumitumfya, nanti sile ukuminena ukuti mwemwe asile sile. Ndi cakuti vii vyamucitikilapo, cingamutalila ukuzumila ukuti kwaya antu amutemwa.
4. Uzye Yeova akauvwa uli pali yayo aya nu ulanda nupya i vyani vino walaya ukuyacitila?
4 Nanti yauze yamucitila iviipe, mungasininkizya ukuti Yeova wamutemwa nupya wamwikako sana mano. Waya “umupipi sana na yayo ati yaputuka imisana.” (Belengini Masamu 34:18.) Ndi cakuti mukuyuvwa ukuti ‘imupelelwa amano,’ mwaiusya ukuti Yeova waweni ivisuma muli mwemwe i calenzile nu kuti amupalamike kuli aliwe. (Yoa. 6:44) Lyonsi waipekanya ukumwazwa pano mwacindama kuli aliwe.
5. I vyani vino tungasambililako kuli vino Yesu wacitilanga antu yano yauze yalolanga ukuti yatacindime?
5 Tungasambilila pali vino Yeova akayuvwa ndi cakuti twelenganya pali vino vyacitikile Yesu. Lino Yesu waombanga umulimo wa kusimikila pano nsi, wisile sana amano uku antu yano yauze yalolanga ukuti asile sile, nupya wayalanganga icikuuku. (Mate. 9:9-12) Lino umwanaci uwacuzile uku ulwale uwipisye walemile uku cakuzwala cakwe Yesu ala akwelenganya ukuti amapola ndi cakuti walemako, Yesu wamuteekizye nupya wamutaizye pali vino wali nu utailo. (Mako 5:25-34) Yesu akakolanya sana imiyele ino Isi wakwata. (Yoa. 14:9) Fwandi mungataila ukuti Yeova wamucindika nupya akaika sana amano uku miyele isuma ino mwakwata, kumwi sile nu utailo winu nu kutemwa kuno mwamutemwa.
6. Uzye umwi angacita uli ndi cakuti akuyuvwa ukuti atacindama?
6 I vyani vino mulinzile ukucita ndi cakuti mukuyuvwa ukuti mutacindama? Mwabelenga Malembo akalenga mwauvwa ukuti mwacindama kuli Yeova nupya mwaelenganyapo sana. b (Masa. 94:19) Ndi cakuti mwafilwa ukufikilizya uyo uno mwimika nanti musiomba wakwe vino yauze yakaomba, mutalinzile ukuipeela imilandu. Yeova asienekela ukuti mwacita vino mutangamukwanisye ukucita. (Masa. 103:13, 14) Ndi cakuti umwi wamucitiilepo iviipe, mutaipeela umulandu pali vino vyamicitikile. Asi mwemwe mwalenzile ukuti vicitike. Mwaiusya ukuti Yeova alapingula yayo aakacita iviipe, lelo alazwa yayo yano yakacitila iviipe. (1 Pet. 3:12) Ya Sandra, yano yacuzizyepo lino yali ance yalanzile ati: “Lyonsi nkapepa kuli Yeova ukuti angazwa ukulailola ukuti nacindama, wakwe vino akandola.”
7. Uzye ivyatucitikile mpiti vingatwazwa uli lino tukuombela Yeova?
7 Mutalinzile ukulatwisika ukuti Yeova angamiomvya ukwazwa yauze. Wamupeela isyuko ilya kuombela pamwi nawe umu mulimo wa kusimikila. (1 Kol. 3:9) Ivyamicitikila vifwile vyalenga mwaya ni cikuuku kuli yauze alino nu kumanya vino yakuyuvwa. Kuli vingi vino mungacita pakuti muyazwe. Ya Helen yano itulandapo mpiti, yapokelile uwazwalizyo nupya ndakai yakaazwako yauze. Yatiile: “Nayuvwanga uwa sile sile, lelo Yeova walenga nayuvwa ukuti natemwikwa nupya akambomvya uku kwazwa yauze.” Ya Helen yaya ni nsansa nupya yakaomba upainiya wa nsita yonsi.
YEOVA AKALONDA TWAYUVWA UKUTI WATWELELA
8. I vyani vino Yeova watunena pali Ezaya 1:18?
8 Aomvi yakwe Yeova yamwi yacili yakauvwa uyi pa membu zino yacisile mpiti, asi mulandu yacisile imembu zizyo lino yatatala yabatiziwa nanti pa cisila ca kubatiziwa. Lelo tusiilila ukuti pa mulandu wakuti Yeova watutemwa, watupeela ilambo pakuti twaelelwa imembu zitu. Fwandi mungasininkizya ukuti akalonda twapokelela upe uu. Yeova watulaya ukuti ndi cakuti ‘tuvwana’ c na aliwe, asitwalilila ukwiusya imembu zitu. (Belengini Ezaya 1:18.) Tukataizya sana pali vino Tata witu Yeova waya nu kutemwa na pali vino akailila uku membu zitu. Nupya pa nsita ili imwi asiilila visuma vino twacita.—Masa. 103:9, 12; Aeb. 6:10.
9. U mulandu ci uno tulinzile ukwikila mano uku vintu vino tukucita ndakai nu ku vya ku nkoleelo ukucila ukwika mano kuli vino twacisile mpiti?
9 Ndi cakuti mukauvwa sana uyi pali vino mwacisile mpiti, mulinzile ukwika mano kuli vino mukucita ndakai alino na kuli vino mulacita uku nkoleelo. Elenganyini pali vino vyacitikile umutumwa Paulo. Uvwanga sana uyi pali vino wacuzyanga sana Aina Klistu, lelo wamanyile ukuti Yeova wamwelezile. (1 Tim. 1:12-15) Uzye watwalilile ukwelenganya pa viipe vino wacisile? Awe atacisile vivyo, wakwe vino atatwalilile ukwelenganya pa vintu vino wacisile pakuti aye Umufaliseo umucindikwe sana. (Filipi 3:4-8, 13-15) Lelo wali umucincile umu mulimo wa kusimikila nupya wisile sana amano kuli vino wali nu kucita uku nkoleelo. Wakwe Paulo, mutanga musenule vino mwacisile mpiti. Lelo mungalumbanya Yeova nu kulamuzanzya ndakai, nupya mungaelenganya na pa vintu ivisuma vino wamulaya ukumicitila uku nkoleelo.
10. I vyani vino tungacita ndi cakuti vino twacisile mpiti vyasosya yauze?
10 Limwi mungauvwa uyi pa viipe vino mwacitiile yauze. I vyani ivingamwazwa? Mulinzile ukuombesya ukucita ivingayazipila. Nupya mulinzile ukulenga uwelelo ukufuma pansi ya mwenzo. (2 Kol. 7:11) Mwalenga Yeova ukuti azwe yano mwaluvyanyizye. Yeova angamwazwa alino na yano mwaluvyanyizye ukuzizimizya alino nu kuya nu mutende.
11. I vyani vino tungasambililako kuli vino vyacitikile kasesema Yona? (Loliniko ni pa nkupo.)
11 Mwasambilila kuli vino mwaluvyanyizye uku cisila, nupya mwaleka Yeova amuomvya ukulingana na vino umwineco akulonda. Elenganyini pali vino vyacitikile kasesema Yona. Leza wamunenyile ukuya uku Ninive, lelo Yona utukiile uku ncende yuze. Yeova wasunzile Yona, nupya Yona wasambilileko kuli vino wamusunzile. (Yona 1:1-4, 15-17; 2:7-10) Yeova atatiile ukuomvya kasesema Yona. Nupya kwene Yeova wanenyile Yona ukuya uku Ninive, nupya muku uu wene Yona wazumile papo kwene sile. Atalesile vino waluvyanyizye uku cisila vilenge afilwe ukuzumila umulimo uno Yeova wamupeezile.—Yona 3:1-3.
Pa cisila cakuti Yeova wapususya Yona umunda ya ciswi, wamunenyile nupya ukuti aye uku Ninive nu kuyasimikila ilyasi lino wamunenyile. (Lolini palaglafu 11)
YEOVA AKAOMVYA UMUPASI WAKWE UWA MUZILO PA KUTUTEEKEZYA
12. Uzye Yeova akalenga uli tuye nu mutende lino tuli sana nu ulanda nanti lino ivintu iviipisye vyatucitikila? (Filipi 4:6, 7)
12 Yeova akaomvya umupasi wakwe uwa muzilo pa kututeekezya lino tuli sana nu ulanda nanti lino ivintu iviipisye vyatucitikila. Elenganyini pali vino vyacitikile ya Ron na Carol. Ica ulanda icayacitikiile i cakuti, umwana wao umulumendo waikulike. Yalanzile ukuti: “Twakwatapo intazi izitale, lelo yii yene ifile sana. Insita izingi usiku tutalalanga fwandi twapepanga kuli Yeova nupya tuvwile umutende wakwe uno walandwapo pali Filipi 4:6, 7.” (Belengini.) Ndi cakuti mukuvwa ulanda pa viipe vino mwacisile, mwanena Yeova vyonsi vino mukuyuvwa pa nsita ili yonsi lino mukulonda nupya pa miku ino mukulonda. (Masa. 86:3; 88:1) Mwatwalilila ukulenga Yeova ukuti amupeela umupasi wa muzilo. Lyonsi alamwazwa.—Luka 11:9-13.
13. Uzye umupasi wa muzilo ungatwazwa uli ukutwalilila ukuombela Yeova na ucisinka? (Efeso 3:16)
13 Uzye mwatala mwakwatapo intazi iyalenzile muyuvwe ukuti mutakweti amaka akuzizimizya intazi iyo? Umupasi wa muzilo ungamwazwa ukutwalilila ukuombela Yeova na ucisinka. (Belengini Efeso 3:16.) Elenganyini pali vino vyacitikile nkazi Flora. Nkazi Flora na ya iya yaombelanga pamwi umisyonali lino ya iya yatiile ukuya na ucisinka kuli aliwe, nupya yatanine. Nkazi Flora watiile: “Nuvwile sana ulanda pali vino yatali ni cisinka nupya natwalilile sile ukwelenganya pali vikwene. Napefile kuli Yeova ukuti ampeele umupasi wa muzilo pakuti nzizimizye. Yeova wanteekizye nanti cakuti pa kutandika nalolanga kwati vitanga vicitike, nizile inkomeleka nupya nazizimizye.” Nkazi Flora akayuvwa ukuti Leza wamwazwa ukumutaila sana nupya wasininkizya ukuti Leza alatwalilila ukumwazwa ndi cakuti wakwata intazi. Nupya walanzile ukuti: “Amazwi aya pali Masamu 119:32 aakati: ‘Ndasimwilila uku kuyela amalamulo yako, pano ulampeelela kweneko ukwiluka,’ yangazwile sana.”
14. Uzye tungacita uli pakuti umupasi wakwe Leza watwazwa?
14 Ndi cakuti mwalenga Yeova ukuti amupeele umupasi wa muzilo, i vyani vino mulinzile ukucita? Mwacita ivintu ivilamwazwa pakuti Yeova amupeele umupasi wa muzilo. Pa vintu vivyo paya nu kulazanwa umu kulongana alino nu kusimikila antu. Mwabelenga Izwi lyakwe Yeova cila wanda nupya ukucita vii kulamwazwa ukulaelenganya wakwe vino akaelenganya. (Filipi 4:8, 9) Lino mukubelenga, mwaelenganya pali vino vyacitikile antu alembwa muli Baibo na vino Yeova wayazwile ukuzizimizya. Ya Sandra yano itulandapo, yaculanga ni ntazi izingi umu umi wao. Yatiile: “Ilyasi ilikalanda pali Jozefu lyamfisile sana pa mwenzo. Jozefu atalesile ukuti intazi zino wakweti na vino yamufyenzile vilenge afilwe ukutwalilila ukuya na ucuza usuma na Yeova.”—Utan. 39:21-23.
YEOVA AKAOMVYA AINA NA YA NKAZI PA KUTUTEEKEZYA
15. Aaweni aangatukomelezya, nupya yangatwazwa uli? (Loliniko ni cikope.)
15 Lino tukucula, aina na ya nkazi ‘aliyo yangatukomelezya.’ (Kolo. 4:11) Kukwata aina na ya nkazi ali nzila na yuze ino Yeova akalangilamo ukuti watutemwa. Ya kapepa yanji yangatuteekezya ndi cakuti yakuya pamwi naswe nu kukutika lino tukuyalondolwela vino tukuyuvwa. Yangatukomelezya ukuomvya Baibo nanti ukupepela pamwi naswe. d (Loma 15:4) Insita zimwi, umwina nanti nkazi angatwiusyako vino Yeova akaelenganya nupya cii cingatwazwa ukutwalilila ukuzizimizya. Nupya ya kapepa yanji yangatwazwa muli vino tukulondekwa, wakwe yangatupeelako ivyakulya pa nsita ino tukweti intazi.
Ya cuza aya ni miyele isuma nupya aatemwa Yeova yangatuteekezya nu kutwazwa (Lolini palaglafu 15)
16. I vyani vino tulinzile ukucita pakuti tupokelele uwazwilizyo kuli yauze?
16 Insita zimwi tunguzya yauze ukuti yatwazwe. Aina na ya nkazi yatutemwa nupya yakalonda ukutwazwa. (Mapi. 17:17) Lelo yatanga yamanye vino tukuyuvwa nanti vino tukulondekwa. (Mapi. 14:10) Ndi cakuti muli nu ulanda, mungalanda na ya cuza inu aakula muli vyakwe Leza nupya mungayanena vino mukuyuvwa. Mwaleka yamanya ivingamwazwa. Limwi munganenako eluda wenga nanti yaili yano mukulola ukuti cingamwangukila ukulanda nayo. Ya nkazi yamwi yazana ukuti yakateekeziwa ndi cakuti yalanda na nkazi muze uwakula muli vyakwe Leza.
17. Iintazi ci izingalenga tufilwe ukupokelela ukukomeleziwa, nupya tungacimvya uli intazi zizyo?
17 Mwakwata insita iya kuya pamwi na ina na ya nkazi. Insita zimwi mungauvwa uyi icakuti musikulonda nu kukwata insita iya kuya pamwi na yauze. Nupya insita zimwi, limwi aina na ya nkazi yangafilwa ukumuvwikisya nanti yangalanda amazwi angamusosya. (Yako. 3:2) Lelo mutalinzile ukuleka intazi zizyo zimulesye ukupokelela ukukomeleziwa kuno mukulondekwa. Eluda uwizina lyakuti Gavin, aakacuziwa nu ulwale wa mu melenganyo watiile: “Nsilonda ukuya pamwi na ya cuza yane insita izingi.” Lelo Gavin yakaezya na maka ukuya pamwi na ina. Nupya ilingi yakauvwa ningo ndi cakuti yacita vivyo. Nkazi Amy watiile: “Pa mulandu ni vyancitikile mpiti, cikantalila ukutaila antu. Lelo nkusambilila ivya kutemwa nu kutaila aina na ya nkazi wakwe vino Yeova wayatemwa nu kuyataila. Namanya ukuti ukucita vii kukalenga Yeova ukuya ni nsansa alino nani kwene nkaya ni nsansa.”
VINO YEOVA WATULAYA UKUTUCITILA UKU NKOLEELO VINGATUTEEKEZYA
18. I vyani vino tulinzile ukulaelenganyapo ivilacitika uku nkoleelo, nupya i vyani vino tulinzile ukucita ndakai?
18 Likwene sile Yeova wasya afumyepo ivintu vyonsi ivikalenga twaya nu ulanda alino na vyonsi ivikalenga twacuziwa. (Kuso. 21:3, 4) Apa nsita iya, ivintu vyonsi ivikalenga twaya nu ulanda ‘vitaliusyiwa.’ (Eza. 65:17) Wakwe vino itulola, na ndakai kwene Yeova akatusakamala lino tukucula. Yeova watupeela ivintu ivingi ivya kututeekezya nu kutwazwa. Fwandi mwapokelela ukwazwa kwakwe. Nupya mutatwisika “pano wene akamusakamala.”—1 Pet. 5:7.
LWIMBO NA. 7 Yeova Ali Maka Itu
a Asi mazina yao acumi cumi.
b Lolini kambokosi akakuti “ Yeova wamwikako mano.”
c Pakuti tuvwane na Yeova, tulinzile ukulanga ukuti itulapila nu kulenga ukuti atwelele pa membu zitu alino nu kusenuka muli vino tukacita. Ndi cakuti twacita uluyembu ulwipisye tulinzile ukulenga kuli ya eluda umu cilongano ukuti yatwazwe.—Yako. 5:14, 15.
d Mungabelenga Malembo aya pa mutwe wakuti “Kusakamikwa” nu wakuti “Kuteekezya Yauze” umwi buku lyakuti Malembo Aangazwa Aina Klistu.
