Amazwi alembwa pi lembelo lii yakulangilila ukuti Paulo walozyanga uku malyasi nanti mazwi asuma aakalanda pa kulonda kwakwe Leza, wakwe yano tukazana muli Baibo.

Ilembelo lya Ayebulai 4:12 ilingi likaambulwa mu mpapulo zitu kulanga ukuti Baibo yakwata amaka ya kusenula umi wa yantu, nu mu cumi avino ikacita. Nomba cingatwazwa sana ukumanya ningo vino amazwi aya pa Ayebulai 4:12 yakalanda. Paulo wanenanga Aina Klistu Ayebulai ukuomba ukulingana nu kulonda kwakwe Leza. Vino Leza walondanga ukuti yacita vyalembwa umu malembelo ya muzilo. Paulo waomvizye vino aina izlaeli yakulwilwe ukufuma umu Eguputo pa kulangilila Ayebulai vyakucita pakuti yaomba ukulingana nu kulonda kwakwe Leza. Yakweti utailo wakwingila umu ‘mpanga iyali ni ncende ikulu nupya ivunde cuze,’ muno yali nu kuipakizya umi usuma nu kupuza.—Kufu. 3:8; Malan. 12:9, 10.

Mazwi yayo yalangililanga ukulonda kwakwe Leza. Lelo aina Izlaeli izile yakomya imyenzo nupya yatakweti utailo, fwandi aingi yatingile umu upuzo. (Mpe. 14:30; Yoswa 14:6-10) Nupya Paulo walanzile nu kuti ‘ulayo wakwe Leza wa kwingila mu kupuza,’ ucilipo. (Ayeb. 3:16-19; 4:1) “Ulayo” uwo nao kwene wali amazwi alangililanga ukulonda kwakwe Leza. Wakwe vino Aina Klistu Ayebulai yacisile, naswe kwene tungawelenga pakuti tumanye ukulonda kwakwe Leza alino nu kuomba ukulinga na vivyo kwene. Pakuti Paulo akomaile ukuti ulayo uu walembwa umu Malembelo, wambwile mazwi aya pa Utandiko 2:2 na pa Masamu 95:11.

Mu cumi tulinzile ukumanya ukuti “ulayo wakwe Leza uwakuti tulingila mu kupuza ucilipo.” Tungasininkizya ukuti ulayo uu uno Baibo yalandapo uwa kwingila umu kupuza kwakwe Leza ulacitika, nupya twatandika na mpiti ukwingila. Tutacita vivyo pa mulandu wakuti tukasunga Masunde Yakwe Mose nanti pakuti Yeova atutemwe pa mulandu na vino tukacita. Lelo pa mulandu nu utailo, tukaya ni nsansa lino tukuombela Leza nu kutwalilila kucita ukulonda kwakwe. Nupya, wakwe vino ituvwa umu mazwi ali apapela, antu aingi ukuzinguluka insi yonsi yatandika ukusambilila Baibo nu kumanya ukulonda kwakwe Leza. Aingi yakaasenula imiyele yao, yakaya nu utailo ukome, alino nu kuwatiziwa pakuti yaye Aina Klistu. Ivikacitikila antu yaa vikalangilila umu cumi ukuti “Izwi lyakwe Leza i lya umi nupya likuomba.” Kulonda kwakwe Leza kuno Baibo yalanda kwasenula mpiti umi witu nupya kulatwalilila ukuomba umu umi witu.