“NAWATIZIWE ala indi ni myaka 15, nupya lino papisile imyezi 6 natandike ukuombako upainiya wakwazwilizya. Lino papisile umwaka onga, nalenzile ndi cakuti ningatandika ukuombako upainiya wa nsita yonsi. Lino namazile isukulu, nuzizye ndi cakuti kuli kuno ningaya umu kuombela kuno kukalondekwa ya kasimikila aingi. Nalondanga ukuya umu kuombela ukutali na kuno nkaikala alino nu kufuma pali mama ataali Inte Yakwe Yeova. Nuvwile uyi lino mwangalizi wa ciputulwa wanenyile ukuti cali sile ningo ukuombela umu ncende ino navyalilwemo! Ntalondanga ukuti umwangalizi alole ukuti ntuvwile ningo. Nafumilepo ukuti inje nkelenganyepo pali vino wanenyile ala nati ninama sile. Nanenyile wino twaombanga nawe umu mulimo wa kusimikila ukuti: “Nkulola kwati nkucita wakwe vino Yona wacisile. Nomba Yona waile uku Ninive. Fwandi nani kwene ningaya nkaombele kuno yanena ukuya ukukuombela.”

“Ipapita lyene imyaka 4 ukufuma pano natandikile upainiya wa nsita yonsi mu muzi wane kwene, nupya nkulola lyene vino cazipa ukukonka vino tukutungululwa. Ukulola iviipe muli yauze ali ntazi ikulu ino nakweti. Ndakai naya sana ni nsansa. Mu mwezi onga natungulwile amasambililo 24. Nkataizya Yeova ukuti natandike nu kusambilila Baibo na mama uwankanyanga.”

Musambi wakwe Baibo umwi uwa ku Fiji walondanga ukusoololapo pa kuya uku ukongano ukalamba nanti kuya kukuzevya uwanda wa kuvyalwa wakwe lupwa wakwe iya. Iya wamuzumilizye ukuya uku ukongano. Wanenyile iya ukuti namaiza ndi nafuma uku kulongana. Lino waswilile uku ng’anda ukufuma uku ukongano, waweni ukuti kulingana na vino wasambililanga walondekwanga ukutaluka uku vintu vyonsi ivingalenga ucuza wakwe na Leza ukononeka, fwandi ataileko.

Lyene lino iya wanenyile ya lupwa lwakwe ukuti mamakwe amaiza ndi cakuti wafuma kuno ya “Nte yakukomaanila,” yaswike yati, “Asikwiza, ya Nte Yakwe Yeova yasizevya uwanda wa kuvyalwa!” *

Ivyacitike ivya kuti, iya uvwile ningo sana pali vino mamakwe wacisile ukuomvya vino wazumilamo pakuti kampingu wakwe aye umusanguluke. Vino umwanaci wiya wacisile vyalenzile ukuti akwate isyuko lya kusimikila iya na antu yauze. I vyani lyene vyacitike? Iya wazumile ukutandika ukusambilila Baibo nupya yatandike ukuya yonsi yoili umu kulongana.