UZYE mukacita uli ndi mukulonda mumanye insita? Mukalola pa nkoloko ino imuzwala apikasa nanti ino mwika pa ciumba. Ndi cakuti cuza winu wamuzya ukuti mumunene vino insita ili, uzye mungasuka mutuuli? Kwaya inzila izipusanepusane izya kulandilamo insita. Uupusano ci uwayapo?

Lekini tuti papita iawala lyonga na mamineti 30 pa cisila cakuti ilanzi lyafika umutwe papela. Limwi mungasuka muti insita yaya 1:30. Ukulingana na kuno mukaikala alino ni ntambi izyayako, limwi mungalanda muti insita yaya 13:30. Ukulanda insita ukwa musango uu, kwasintilila pa kupenda maawala 24 umu wanda onga, pa nkoloko zino yapanga vivyokwene. Kwaya ni ncende zimwi kuno insita kwene ii ingalandwa ukuti insita yaya “afu 2,” kuli kuti kwasyala mamineti 30 ukuti 2 koloko ikwane.

Vino mwemwe ya kawelenga yakwe Baibo, limwi mungaelenganya ukuti uzye antu yalandanga uli insita mu nsita ino Baibo yalembwanga. Kutaali sile inzila yonga iyakulandilamo insita. Amalembelo ya Ciyebulai yakalanda pa nsita ya “katondo,” “umusanya pakasi,” na “manguzi.” (Utan. 8:11; 19:27; 43:16; Malan. 28:29; 1 Yamw. 18:26) Ukuya kwene umu vya kucitika vimwi insita yalumbulwa umu viputulwa.

Umu nsita ino Baibo yalembwanga, kwali ulutambi lwa kuomvya alinzi. Yalondekwanga sana umu nsita ya usiku. Imyaka ingi lino Yesu atali avyalwe, aina Izlaeli yapendanga insita ya usiku umu viputulwa. (Masa. 63:6) Pali Yakapingula 7:19 palumbula insita ya “usiku pakasi.” Umu manda yakwe Yesu, Ayuda yaomvyanga imipendele ya nsita iya usiku wakwe vino Agiliki na ina Loma yapendanga.

Amabuku ya malandwe yakalozya uku mipendele ya nsita iya usiku imiku ingi. Pamwi apakalanda vivyo aepa apakalanda ukuti Yesu wapisile pa manzi ala akulungama uku wato uwalimo asambi “pa macaca.” (Mate. 14:25) Umu cilangililo cimwi, Yesu walanzile ukuti: “Mwine ng’anda ndi amanyile insita ino aivi yakwiza, atangakasula nupya atangaleke yatame ng’anda yakwe.”—Mate. 24:43.

Yesu walanzile pa viputulwa 4 ivya nsita ya usiku lino wanenyile asambi yakwe ati: “Caleka, pempulini, pano mutamanyile kasita kano umwine wa ng’anda ali nu kwiza, limwi ku manguzi lino ilanzi lyawa, nanti usiku pakasi, nanti pa macaca, nanti lino ilanzi lyatunka.” (Mako 13:35) Iciputulwa ca kutandikilako pali vii, “ku manguzi lino ilanzi lyawa,” catandikanga ndi lanzi lyawa ukufika kuli 21 awazi manguzi. Ciputulwa cakwe ciili, “usiku pakasi,” catandikanga 21 awazi amanguzi ukufika usiku pakasi. Iciputulwa cakwe citatu, calandwa ukuti “pa macaca,’ nanti pali mukolwe, catandikanga usiku pakasi ukufika kuli 3 koloko akatondo. Limwi pa nsita kwene ii alino mukolwe walizile pa wanda uno yalemile Yesu usiku. (Mako 14:72) Iciputulwa icalenga 4 ica usiku, kuli kuti “lino ilanzi lyatunka,” catandikanga ni nsita yakwe 3 koloko umu katondo ukufika lino ilanzi lyatunka.

Fwandi nanti i cakuti inkoloko izyayako ndakai zitaaliko mpiti umu nsita ino Baibo yalembwanga, antu yakweti inzila yakulandilamo insita umusanya nanti usiku.