Amazwi yaa aaya pa cikomo cii akwelenganyapo sana yakati: “Utazunguka lino walola ukuti uteeko ukutitikizya apina nu kuyafyenga mu nsambu zyao. Cilolo wensi wacingililwa na wiyo akamwangalila, alino yaa yoili yacingililwa ni vilolo iviyalusile.”—Kasa. 5:8.

Ndi cakuti tusikwelenganya pali vino Yeova akaelenganya pa mazwi yaa, icikomo cii cikauvwika kwati cikulanda pa antu aakwata amaka umu uteeko. Nomba nga twelenganyapo sana, cikalanda na pa cisinka cimwi pali Yeova icingatuteekezya nu kutupeela usininkizyo.

Ilembelo lyakwe Kasambilizya 5:8 likalanda pali ya kateeka aakacuzya apiina nu kukanayapingula nu mulinganya. Kateeka alinzile ukwiusya ukuti pali umwi aamucizile nanti aakweti amaka kumucila umu uteeko aakumulola. Nupya kufwile ukuya na yauze aakweti sana amaka ukucila nu muntu wiyo. Icipako icakuti, ya kateeka yonsi yaa yaya na mafisakanwa, na cico calenga antu aingi kuculilamo.

Nanti icakuti ivintu vikuya vikwipilako sile nupya vikuloleka ukuti vitatala vizipe, tungateekeziwa ukumanya ukuti Yeova akalola na ya cilolo yonsi akwatisya amaka mu uteeko. Tungalenga Leza atwazwe nupya tungika masakamika itu pali aliwe. (Masa. 55:22; Filipi 4:6, 7) Twamanya ukuti “[Yeova] Leza akalola pa nsi yonsi pyu, nu kupeela akapeela amaka akucimvya kuli yayo yano imyenzo yao ikamufukilila.”—2 Mila. 16:9.

Fwandi ilembelo lyakwe Kasambilizya 5:8 likatwiusyako vimwi pa nsi ii ino tukaikalamo nu kuti lyonsi kukaya umwi aakakwatisya amaka. Ni cicindamisye cino icikomo cii cikatwiusyako i cakuti, Yeova aliwe wakwatisya amaka, kuli kuti ali Kateeka wa Papelapela. Ndakai akuteeka ukuomvya Umwanakwe Yesu Klistu ukuya Umwene wa Wene wakwe. Uwa Maka Yonsi akulola vyonsi na antu yonsi, wene waya nu mulinganya nupya nu Mwanakwe avino waya.