1-2. Uzye amazwi aaya pali Kasambilizya 11:6 yalemana uli nu mulimo wa kusimikila ilandwe lisuma ilya Wene?

UMU mpanga zimwi, antu yakalonda ukusambilila ivingi api landwe lisuma nga yuvwa. Cico kwene acino yakaloleela sile. Mu mpanga zyuze mwene antu yataatemwa sana vyakwe Leza na Baibo. Uzye antu yakacita uli kumwinu nga yuvwa ilandwe lisuma? Asi mulandu na vino antu yangacita nga yuvwa ilandwe lisuma, Yeova wene akalonda twatwalilila ukusimikila mpaka umulimo ukasile.

² Yeova watantika insita lino umulimo wakwe ulasila, nupya insita iyo nga yafika alino “impelelekezyo iliza.” (Mate. 24:14, 36) Lino insita iyo itatala yafika, tunguvwila uli amazwi yakuti “mutaleka makasa inu yapuuze”? *—Welengini Kasambilizya 11:6.

3. I vyani vino tumasambilila umu cipande cii?

³ Cipande icafumileko calanzile pali vino tulinzile ukucita pakuti tuye ya kasimikila yasuma. (Mate. 4:19) Cipande cii cimalanda pali vino vingatwazwa ukulondesya ukutwalilila ukusimikila asi mulandu ni ntazi zino tungakwata. Tumasambilila pa mulandu uno cacindamila (1) kutwalilila ukwika mano ku mulimo wa kusimikila, (2) kuteeka umwenzo, na (3) kutwalilila ukuya nu utailo ukome.

4. U mulandu ci uno tulinzile ukwikilako sana amano ku mulimo uno Yeova watupeela ukuomba?

⁴ Yesu wanenyile asambi yakwe vino ivintu vyali nu kuya ni  vyali nu kucitika mu manda ya kusyalikizya ivyali nu kulenga cayatalila ukwika mano ku mulimo wa kusimikila. Wanenyile asambi yakwe ukuya ‘apempule.’ (Mate. 24:42) Ndakai kwaya ivintu ivingi ivikalenga tutaika mano ukwi landwe lisuma wakwe vino cali mu manda yakwe Nowa. (Mate. 24:37-39; 2 Pet. 2:5) Ali mulandu uno tulinzile ukwikilako sana amano ku mulimo uno Yeova watupeela ukuomba.

5. Uzye ilembelo lya Milimo 1:6-8 likalangilila uli vino umulimo uu wali nu kuombwa?

⁵ Tulinzile ukwikisyako amano ku mulimo wa kusimikila pa Wene ndakai. Yesu wasoowile ukuti alondezi yakwe yali nu kutwalilila ukusimikila pa cisila ca mfwa yakwe nupya yali nu kuomba ukucila na vino waomvile lino wali pano nsi. (Yoa. 14:12) Lino Yesu wafwile, alondezi yakwe yamwi yaile iyatwalilila ukuomba umulimo wa kuvuwa. Lino watuutulwilwe, wacisile cizungusyo nu kwazwilizya asambi yakwe ukulema inswi izingi. Pa cisila ca kucita cizungusyo, Yesu walanzile sana ukuti umulimo wa kupanga asambi wacindama sana ukucila umulimo uli onsi. (Yoa. 21:15-17) Lino Yesu atatala waswilila ukwi yulu, wanenyile asambi yakwe ukuti umulimo wa kusimikila wali nu kusimikilwa umu ncende zyuze asi mu Izlaeli sile. (Welengini Milimo 1:6-8.) Lino papisile imyaka, Yesu walanzile Yoane icilolwa icalangililanga ivyali nu kucitika pa “Wanda wa Mwene.” * Pa vintu vya kuzungusya vino Yoane waweni pali nu mungeli uwasenzile “landwe lisuma lya manda pe” ilyasimikilwanga ku “antu amuno nsi amisango yonsi, mitundu, ni ndimi ni nko zyonsi.” (Umbw. 1:10; 14:6) Cii cikulanga sile ukuti Yeova akalonda twaomba umulimo wa kusimikila umu nsi yonsi mpaka ukasile.

6. Tungacita uli pakuti tutwalilile ukwika mano uku mulimo wa kusimikila?

⁶ Tungika amano ku mulimo wa kusimikila  nga tukwelenganya pali vino Yeova akatwazwa. Ndakai akutupeela impapulo, izipulintwe, izya pa intaneti, zikopwe izya mazwi yatupu, mavidyo alino na broadcast. Elenganyini pali vii: Pa webusaiti itu paya ivyeo umu ndimi ukucila pali 1,000! (Mate. 24:45-47) Antu umu nsi yapaatukana pa mulandu wakuti yakatungilila tuungwe utupusanepusane, yakapepa ukupusane nupya yamwi akankala yauze nayo apiina. Nomba aomvi yakwe Leza ukucila pali 8 milyoni yene yalemana umu nsi yonsi. Pali Cisano, pa 19, Epuleo 2019, ya Nte umu nsi yonsi yatamvile vidyo umwali ukulanzyanya ilembelo lya wanda. Pa wanda kwene uu amanguzi, antu 20,919,041 yakongine uku kuzefya imfwa yakwe Yesu. Nga twelenganya pa vintu ivikucitika nu kuombako imilimo iingi ikuombwa tukalondesya ukwikako sana mano uku mulimo wa kusimikila pa Wene.

7. Uzye vino Yesu wacitanga vingatwazwa uli ukwikako mano?

⁷ Inzila na yuze ingatwazwa ukwika mano uku mulimo wa kusimikila u kulondela vino Yesu wacitanga. Atalesile icili consi ukumulesya kusimikila icumi. (Yoa. 18:37) Atakonsile vino Satana wamutunsile lino wamunenyile ukuti wali nu kumupeela “mawene amu nsi yonsi nu lulumbi lwakweyo” nanti ukuzumila lino antu yalondanga ukumwika pa wene. (Mate. 4:8, 9; Yoa. 6:15) Nupya atalondile iciteyo ca kulondesya ivyuma nanti ukutoovoka pa mulandu na vino antu yamukanyanga. (Luka 9:58; Yoa. 8:59) Nga tweziwa, tungatwalilila ukwika mano uku mulimo wa kusimikila nga twiusya amazwi yano umutumwa Paulo walanzile. Wakomelizye Aina Klistu yonsi ukulondela vino Yesu wacitanga pakuti ‘yatatonta nu kunenuka.’—Ayeb. 12:3.

8. Uzye ukuteeka umwenzo kukapiliula cani, nupya u mulandu ci uno kwacindamila sana sana ndakai?

⁸ Kuteeka umwenzo u kuloleela ukuti cintu cimwi cisenuke. Tulinzile ukuteeka umwenzo lino tukuloleela ukuti ivintu vimwi iviipe visile nanti tukuloleela icintu cino twaloleela pa nsita itali cifikiliziwe. Kasesema Habakuku walondesyanga ukuti iviipe vino Ayuda yamwi yacitanga visile. (Haba. 1:2) Asambi yakwe Yesu yalondesyanga ukuti Uwene uloleke lilyo kwene nu kuyapususya uku uteeko wa Ina Loma. (Luka 19:11) Tukaloleela uwanda lino Uwene wakwe Leza ulasisyapo iviipe vyonsi nu kuleta insi ipya umulaya sile antu aololoke. (2 Pet. 3:13) Nomba tulinzile ukuteeka umwenzo nu kuloleela insita ino Yeova wimika ikafike. Lekini tulande pa nzila zimwi zino Yeova akatusambilizizyamo ukuya ateekele.

9. I vyani vikatulangilila ukuti Yeova wateekela?

⁹ Tungasambilila kuli vino Yeova wateeka umwenzo. Wapeezile Nowa insita ilinge iyakukuula ciwato ni ya kukosoola “cumi cakulenga antu yacita vyawololoke.” (2 Pet. 2:5; 1 Pet. 3:20) Yeova wakutikisyanga lino Abulaamu waswilizyangapo ukumuzya mauzyo pali vino wapingwilepo ukonona antu ya mu misumba ya Sodoma na Gomola. (Utan. 18:20-33) Pa myaka iingi Yeova watwalilile ukuteekelela uluko lwa ina Ina Izlaeli ulutali ni cisinka. (Neem. 9:30, 31) Tungalola ukuti Yeova wateeka umwenzo pa mulandu wakuti wapeela antu aakalonda ukuya ya cuza yakwe insita ikulu iyakuti “yazenzuke.” (2 Pet. 3:9; Yoa. 6:44; 1 Tim. 2:3, 4) Vino Yeova wateekela vikalenga naswe tuye ateekele lino tukutwalilila ukusimikila nu kusambilizya antu. Nupya akatusambilizya vino tungateeka umwenzo umu cilangililo icaya umwi Izwi lyakwe.

10. Uzye icilangililo ca mulimi icaya pali Yakobo 5:7, 8, cikatusambilizya vyani?

 ¹⁰ Welengini Yakobo 5:7, 8. Cilangililo ca mulimi cikatusambilizya vino tungacita pakuti twateeka umwenzo. I cacumi, vilimwa vimwi vikakula zuwa. Nomba ivingi, sana sana vivi vikaseeka ivizao vikalengela pakuti vikule. Ivimelwa umu Izlaeli vyakulanga mu myezi 6. Mulimi wakomelanga imbezu pa cisila ca mvula ya kutandikilapo ikaya pakasi kakwe Okotoba nupya wazombolanga ndi cakuti imvula ya kusyalikizyako ikaya pakasi kakwe Epuleo yasila. (Mako 4:28) Tulacita ningo sana ndi cakuti tukukolanya vino umulimi wateeka umwenzo. Nomba ukucita vii kutangupala.

11. Uzye ukuteeka umwenzo kungatwazwa uli lino tukusimikila?

¹¹ Antu aatamalilika yakalonda ivintu vino yakulonda vicitike lilyo kwene pali vino iyaomba. Nomba nga tukulonda ivilimwa vitu vikule nu kuseeka, tulinzile ukulavisakamala lyonsi, kuli kuti kulimilila, kusekwila nu kukontelela. Umulimo wa kupanga asambi nao ukalondekwa ukuombesya. Tukalondekwa insita ikulu iya kwazwa yano tukasambilizya Baibo ukukanaya na kapatulula nu kutemwa antu yauze. Ukuteeka umwenzo kulatwazwa ukukanatoovoka ndi cakuti antu yasikuvwa lino tukusimikila. Ndi cakuti antu yamwi yakulonda ukuvwa nu kusambilila, tulinzile ukuteeka umwenzo. Tutanga tupatikizye wino tukasambilizya Baibo ukuya nu utailo. Insita zimwi, na asambi yakwe Yesu kwene yatuvwikisyanga vino wayasambilizyanga. (Yoa. 14:9) Lekini twaiusya ukuti tungasimikila nu kusambilizya, lelo Leza aliwe angazwa antu ukuya nu utailo.—1 Kol. 3:6.

12. Tungacita uli pakuti tuteeke umwenzo lino tukusimikila ya lupwa itu asi ya Nte?

¹² Limwi cingatutalila sana ukuteeka umwenzo lino tukusimikila kuli ya lupwa asi ya Nte. Cisinte icaya pali Kasambilizya 3:1, 7 cingatwazwa. Pakati: “Kwaya insita ya kwikala cele  ni nsita ya kuvwanga.” Imiyele itu isuma ingalenga ya lupwa lwitu ukuvwa ukwi landwe, nupya tulinzile ukuiteyanya ukuyanenako pali Yeova. (1 Pet. 3:1, 2) Tulinzile ukuya acincile lino tukusimikila nu kusambilizya, lelo tulinzile nu kuteekelela yonsi kumwi na ya lupwa itu.

13-14. Aaweni yamwi ateesile imyenzo yano tungakolanya?

¹³ Tungasambilila ukuteeka umwenzo uku antu ali nu utailo alembwa muli Baibo alino na ayako ndakai. Habakuku walolelanga ukuti iviipe vyonsi visile, lelo walangilile ukuti wateekile lino walanzile amazwi yakuti: “Namayanga nga kalinda wa mpongolo akwimilila apapela yi linga.” (Haba. 2:1) Mutumwa Paulo walanzile ukuti walondesyanga kumala umulimo wakwe. Lelo wateesile umwenzo nu kutwalilila “kukosola ilandwe lisuma.”—Mili. 20:24.

¹⁴ Elenganyini pali vino vyacitikile atwalane aamazile Isukulu Lya Gilyadi nu kuyatuma ku mpanga ukutaali ya Nte aingi nupya kuno antu aingi yataali Aina Klistu. Antu anono sile aalondanga ukusambilila Baibo. Nomba auze yano yali nayo ukwi Isukulu Lya Gilyadi yano yaombelanga uku mpanga zyuze yayatumilanga nu kuyanena pali vino umulimo ukulunduluka na vino yakutungulula masambililo ya Baibo aingi. Atwalane yaa yatwalilile ukusimikila nanti icakuti antu mu cifulo cino yasimikilangamo yatuvwanga. Pa cisila ca kusimikila uku ncende kuno antu aingi yatuvwanga pa myaka 8, izile iyaya nu luzango ukulola kuno wenga apa yasambi ya Baibo yano yakweti wabatiziwa. I vyani vino tukusambilila ku Ina Klistu aliko mpiti na ayako ndakai? Antu yaa autailo yatatile ukuya acincile mu mulimo wa kusimikikila nanti ukuleka amakasa ukupuuza, nupya Yeova wayalambwile pali vino yateesile imyenzo. Lekini twakolanya “yao ataila nupya yano akateeka myenzo, nga yapokelela vino Leza walaya.”—Ayeb. 6:10-12.

15. Iinzila ci yonga ino utailo ukatwazwa kulalondesya ukuomba umulimo wa kusimikila?

¹⁵ Twataila ilandwe lisuma lino tukasimikila, fwandi tukalondesya ukunenako antu aingi api landwe lii. Twataila malayo aaya umwi Izwi Lyakwe Leza. (Masa. 119:42; Eza. 40:8) Twalola kuno mausesemo ya muli Baibo yakufikiliziwa ndakai. Twalola kuno antu aingi yakusenula imiyele yao ndakai ndi cakuti yatandika ukucita vino Baibo ikalanda. Vyonsi vii vikalenga tutaile sana ukuti ilandwe lisuma ilya Wene ali lino antu yonsi yalinzile ukuvwa.

16. Ukulingana na Masamu 46:1-3, uzye ukutaila Yeova na Yesu kungatwazwa uli ukutwalilila ukulalondesya ukusimikila?

¹⁶ Nupya twataila Yeova, umwineco wi landwe lino tukasimikila nupya uwasonta Yesu ukuya Umwene wa Wene wakwe. (Yoa. 14:1) Asi mulandu ni ntazi zino tukweti, Yeova alatwalilila ukutucingilila nu kutukomya. (Welengini Masamu 46:1-3.) Nupya twataila ukuti Yesu akutungulula umulimo wa kusimikila ukufuma ukwi yulu ukuomvya amaka yano Yeova wamupeela.—Mate. 28:18-20.

17. Landini vimwi ivyacitiike ivikulangilila umulandu uno tulinzile ukutwalilila ukusimikila.

¹⁷ Utailo ukalenga tusininkizye ukuti Yeova alatupaala pa milimo ino tukaomba, insita zimwi angatupaala mu nzila ino tutanga twenekele nu kwenekela. (Kasa. 11:6) Cila wanda antu yakalola matebo nu tumasitandi pano tukaika impapulo. Uzye ukuomvya inzila ii pa kusimikila kukaomba ningo? Ee! Mulimo Witu Uwa Wene uwa mu Novemba 2014 walanzile  pa mukazyana uwa pa Yunivesiti uwalondanga ukulemba ilyasi limwi pali ya Nte Yakwe Yeova. Wezizye ukulonda ukwayelile ing’anda ya Wene, nomba ataizanyile, lelo wazanyile iyatantika impapulo pa yunivesiti kwene nupya wazanyile ni vyeo vino walondanga. Pataalengile, wabatiziwe nupya ndakai lyene a painiya wa nsita yonsi. Nga tuvwa amalyasi ya musango uu tukakomeleziwa ukutwalilila ukulasimikila pano yakatulanga ukuti kucili kwaya antu aakalonda ukuvwa ilandwe lisuma ilya Wene.

18. U mulandu ci uno twasininkizizya ukuti umulimo wa kusimikila ilandwe lya Wene ulasila pa nsita ino Yeova akalonda?

¹⁸ Tungasininkizya ukuti umulimo wa kusimikila pa wene ulasila pa nsita ilinge. Elenganyini pali vino vyacitike mu manda yakwe Nowa. Yeova walangilile ningo ukuti akasunga insita. Imyaka 120 lino kutatala kwaya Mulamba Mukalamba, Yeova wimike insita ino mulamba wali nu kwizilapo. Pa cisila ca myaka iingi, Yeova wanenyile Nowa kukuula iciwato. Limwi pa myaka 40 nanti 50 lino mulamba ataatala wiza, Nowa watwalilile ukuombesya. Nanti icakuti antu yatuvwanga, watwalilile ukusimikila ilandwe lisuma mpaka lino Yeova wamunenyile ukwingizya inyama mu ciwato. Lino insita ino Yeova wimike yafisile, Yeova wayazile icisaasa.—Utan. 6:3; 7:1, 2, 16.

19. I vyani vino tungataila ukuti vilacitika nga twatwalilila ukwika mano ku mulimo wa kusimikila?

¹⁹ Likwene sile, Yeova alatumanyisya ukuti umulimo wa kusimikila ilandwe lisuma wasila, lyene alonona insi ii yakwe Satana nu kuleta insi ipya umulaya antu aakamuvwila. Lino tukuloleela insita iyo ikafike, lekini twakolanya Nowa, Habakuku na yauze aatwalilile ukuombesya ukusimikila ilandwe lisuma. Lekini tutwalilile ukwika amano ku mulimo wa kusimikila, kuteeka umwenzo nu kuya nu utailo ukome mu malayo yano Yeova watulaya.