CIPANDE CA KUSAMBILILAMO 39
Lino Wino Twatemwa Wata Ukuombela Yeova
“Pasi pa maila nu wingi . . . lino yamusakamikanga!”—MASA. 78:40.
LWIMBO NA. 102 ‘Mwa-azwa Atonte’
VINO TUMASAMBILILAPO *
1. Uzye yamwi yakayuvwa uli ndi cakuti lupwa wao wazingwa?
UZYE umwi wino mwatemwa wazingwa umu cilongano? Cico cingalenga mwauvwa sana uyi. Ya Hilda yatiile: “Lino ya wane ali na ucisinka yafwile pa cisila ca myaka 41 umu cupo, naweni ukuti ali cintu cimwi icipisye icancitikiile. * Nomba lino umwanane umonsi, mamakwe na ana yatiile ukulongana, nuvwile sana uyi.”
Yeova akalola vino mukauvwa uyi ndi cakuti wino mwatemwa wata ukumuombela (Lolini mapalaglafu 2-3) *
2-3. Ukulingana na Masamu 78:40, 41, uzye Yeova akauvwa uli ndi cakuti aomvi yakwe yata ukumuombela?
2 Tale elenganyini pali vino Yeova uvwile uyi lino ya malaika yamwi ali mu lupwa lwakwe yamupondokiile. (Yuda 6) Nupya elenganyini pali vino wayuvwanga lino aina Izlaeli yano watemilwe yamupondokelanga pa miku iingi. (Belengini Masamu 78:40, 41.) Mwaiusya ukuti Tata witu uwa kwi yulu uwaya nu kutemwa nawe kwene akauvwa uyi ndi cakuti wino mwatemwa wata ukumuombela. Akamanya ulanda uno mukweti. Alatwalilila ukumuteekezya nu kumukomelezya.
3 Mu cipande cii, tumalanda pali vino tungacita pakuti Yeova atwazwe lino tuli nu ulanda pa mulandu wakuti wino twatemwa wata ukumuombela. Tumasambilila na pali vino tungazwa yauze umu cilongano ndi cakuti lupwa wao wazingwa. Nomba lekini tutale tulande pa myelenganyizizye ino tulinzile ukutalukako.
MUTAIPEELA IMILANDU
4. Uzye avyazi aingi yakayuvwa uli ndi cakuti umwana wata ukuombela Yeova?
4 Ndi cakuti umwana wata ukuombela Yeova, ilingi avyazi yakaelenganya ukuti nga yacisilepo vimwi pakuti yazwe umwanao ukutwalilila ukuombela Yeova. Ya Luke yatiile: “Lino umwanane wazizinzilwe umu cilongano, nelenganyanga ukuti nene nalenzile. Nalotanga iviloto iviipe. Insita zimwi nalilanga nupya umwenzo wambayanga.” Nkazi Elizabeth uwakweti intazi ili imwi kwene, welenganyanga ukuti: “Uzye ale kuli vino naluvyanya ne nyina? Nayuvwile kwati ntisileko sana amano ukusambilizya umwanane ukutemwa Yeova.”
5. A weni uno mulinzile ukupeela imilandu nga umwi wata ukuombela Yeova?
5 Tulinzile ukwiusya ukuti Yeova watupeela swensi wenga na wenga uwila wa kuisoolwela. Cii cikupiliula ukuti tungasoololapo ukumuvwila nanti foo. Acance yamwi, avyazi yao yatacitanga ivintu vino ana yangasambililako, nomba yasoololapo ukuombela Yeova nu kutwalilila ukuya acisinka kuli aliwe. Yauze yene, avyazi yao yaombiisye ukuyasambilizya ukutemwa Yeova nomba lino yakuzile yatiile ukuombela Yeova. Fwandi swensi cila muntu tulinzile ukuisoolwela ndi cakuti tulinzile ukuombela Yeova. (Yoswa 24:15) Fwandi mwe yavyazi mwemuno ana inu yata ukuombela Yeova, mutaelenganya ukuti mwemwe mwalenga yate ukumuombela.
6. Uzye uwacance angayuvwa uli ndi cakuti umuvyazi wata ukuombela Leza?
6 Insita zimwi, isi nanti nyina angata ukuombela Yeova nu kusya ulupwa lwakwe. (Masa. 27:10) Cii cingatalila sana ana aacindike sana umuvyazi wiyo. Esther wino yaisi yazinzilwe, watiile: “Nalilanga sana pa mulandu wakuti yatata yatafumile sile umu cumi. Yapingwilepo ukuta ukuombela Yeova. Natemwa yatata, fwandi lino yazinzilwe, lyonsi nasakamalanga pali vino yali. Nizile intandika nu kusakamala sana.”
7. Uzye Yeova akauvwa uli pa yacance yano avyazi yao yazingwa?
7 Mwe yacance mwemuno avyazi yamwi yazingwa, tukamuvwila sana ulanda! Mungasininkizya ukuti Yeova wamanya ukuti mukauvwa uyi. Wamutemwa nupya waya ni nsansa pali vino mwatwalilila ukumuombela na ucisinka, nupya vivyo kwene avino swe ina na ya nkazi tukayuvwa pali mwemwe. Mwaiusya nu kuti asi mwemwe mwalenga avyazi inu kupingulapo vino yapingwilepo. Wakwe vino itusambililapo mpiti, Yeova wapeela cila muntu untungwa wa kuisolwela ndi cakuti akulonda ukumuombela nanti foo. Nupya umuntu wensi uwaipeela nu kubatiziwa “alaisendela icisendo cakwe.”—Gala. 6:5.
8. I vyani vino amu lupwa atwalilila ukuya na ucisinka yalinzile ukucita lino yakuloleela atemwikwa yao azingwa ukuwela kuli Yeova? (Loliniko na kambokosi kakuti “ Welini Kuli Yeova.”)
8 Lino wino mwatemwa wata ukuombela Yeova, caya sile ningo ukutaila ukuti wanda umwi alasuka awele kuli aliwe. I vyani vino mulinzile ukucita lino mukuloleela umuntu wiyo awele kuli Yeova? Mulinzile ukutwalilila ukucita vino mungakwanisya pakuti utailo winu utwalilile ukuya ukome. Ndi cakuti mwacita vivyo mungalenga na yauze umu lupwa ukucita vivyo kwene, na cico limwi cingalenga mwazwe nu muzingwe. Nupya mulakwata amaka aakalondekwa pakuti muzizimizye intazi. Lekini tusambilile pali vimwi vino mungacita pakuti mutwalilile ukuya nu utailo ukome.
VINO MUNGACITA PAKUTI MUTWALILILE UKUYA NU UTAILO UKOME
9. I vyani vino mulinzile ukucita pakuti mutwalilile ukuya nu utailo ukome? (Loliniko na kambokosi kakuti “ Malembo Angamukomelezya Ndi Cakuti Wino Mwatemwa Wata Ukombela Yeova.”)
9 Mwaezya na maka ukutwalilila ukuya nu utailo ukome. Cacindama ukutwalilila ukukomya utailo witu na wakwe yauze umu lupwa. Mungacita uli vivyo? Yeova angamupeela amaka nga mwatwalilila ukubelenga Baibo nu kwelenganyapo alino nu kuzanwa uku kulongana. Nkazi Joanna wino ya isi na nkazi wakwe yatiile ukuombela Yeova watiile: “Nkatekeziwa nga nabelenga pa antu yamwi yano Baibo yalandapo wakwe Abigelo, Esita, Yobo, Jozefu na Yesu. Ivyayacitikile vikankomelezya nu kungazwa ukulaelenganya pa visuma. Inyimbo Izipusaneko nazyo zikankomelezya sana.”
10. Uzye Masamu 32:6-8 ikatwazwa uli ukuzizimizya ndi cakuti tuli nu ulanda?
10 Mwanena Yeova vyonsi ivikumusakamika. Ndi cakuti muvwa ulanda mulinzile ukutwalilila ukupepa. Mwatwalilila ukulenga Yeova ukumwazwa ukulalola ivintu wakwe vino akavilola nu ‘kumusambilizya nu kumulanga inzila umwakupita.’ (Belengini Masamu 32:6-8.) Ukuya kwene cingamutalila ukunena Yeova vino mukuyuvwa. Nomba Yeova akamanya vino mukuyuvwa. Wamutemwa sana nupya akalonda mwamunena vyonsi vino mukuyuvwa.—Kufu. 34:6; Masa. 62:7, 8.
11. Ukulingana na Aebele 12:11, u mulandu ci uno tulinzile ukutailila ukuti ukusunda kwakwe Yeova iinzila ya kutulangilamo ukuti watutemwa? (Loliniko na kambokosi kakuti “ Kuzinga Kukalanga Ukuti Yeova Watutemwa.”)
11 Mwatungilila vino ya eluda yapingula. Kuzinga i nzila imwi ino Yeova watantika. Iinzila isuma iikaazwa uwatiile ukuombela Yeova alino na yonsi asyala. (Belengini Aebele 12:11.) Yamwi umu cilongano yangalanda ukuti ya eluda yatapingwile ningo. Nomba mwaiusya ukuti antu ya musango uwo yakalanda vivyo pa mulandu wakuti yasikulonda ukulanda iviipe pa muntu uwatayembuka. Tusimanya ivisinka vyonsi. Fwandi mwataila ukuti ya eluda aali muli komiti ya upinguzi yalondiile vino Baibo ikalanda nu kupingwilako Yeova.—2 Mila. 19:6.
12. I visuma ci ivyacitika kuli yamwi pa mulandu wa kutungilila ukusunda kwakwe Yeova?
12 Ndi cakuti mwatungilila vino ya eluda iyapingulapo ukuti wino mwatemwa azingwe, mungamwazwa ukuwela kuli Yeova. Ya Elizabeth yano itulandapo mpiti yatiile: “Catutalile sana ukukanaya capamwi nu kukanalanzyanya nu mwana witu mukalamba. Lino wawezile kuli Yeova wazumiile ukuti cali ningo vino yapingwilepo ukuti azingwe. Lino papisile insita, walanzile ukuti wasambilileko masambililo aingi acindame.” Ya Elizabeth yalanzile nu kuti: “Nasambilile ukuti ukusunda kwakwe Yeova kwazipa sana.” Ya iya ya Mark nayo yalanzile iyati: “Lino papisile insita, umwanitu watunenyile ukuti walondanga ukuwela pa mulandu wakuti twacisile vino twalondekwanga ukucita. Natemwa sana pali vino Yeova watwazwile ukuya ni cuvwila.”
13. I vyani vingamwazwa ukuta ukuya nu ulanda?
13 Mwalandako na ya cuza aamanyile vino mukuyuvwa. Mwaya pamwi na ina na ya nkazi aangamwazwa ukukanatoovoka. (Mapi. 12:25; 17:17) Nkazi Joanna wino itulandapo mpiti watiile: “Nazukilwanga sana. Nomba ukulanda na ya cuza yano nataila kwangazwile sana.” Nomba mungacita uli ndi cakuti umwi umu cilongano walanda vimwi ivyalenga mutovooke?
14. U mulandu ci uno tulinzile ukutwalilila “kuteekelelana nu kuitemelwa ukwelelana”?
14 Mwateekelela aina na ya nkazi. Tutalinzile ukwenekela ukuti aliwensi angalanda ivisuma. (Yako. 3:2) Swensi kwene tutamalilika, fwandi tutalinzile ukuzunguka ndi cakuti umwi atamanyile ivya kulanda nanti walanda vimwi ivyalenga tuvwe uyi nanti icakuti ataalakulonda ukucita vivyo. Mwaiusya ukusunda kwakwe Paulo ukwakuti: “Twalililini kuteekelelana nu kuitemelwa ukwelelana nanti cakuti umwi watakwata ica kuilizyanya pa muze.” (Kolo. 3:13) Nkazi umwi wino lupwa wakwe wazinzilwe walondolwile ukuti: “Yeova wangavwile ukweleela aina aalondanga ukungazwa lelo aansosyanga.” I vyani vino amu cilongano yangacita pakuti yakomelezye ya lupwa yano uwa mu lupwa lwao wazingwa?
AMU CILONGANO YANGATWAZWA
15. I vyani vino tulinzile ukucita pakuti twazwe yano lupwa wao wacizinzilwe?
15 Mwaya ni cikuuku kuli ya lupwa yakwe wino wazingwa. Nkazi wizina lyakuti Miriam walanzile ukuti uvwanga intete ukuya umu kulongana lino umutowakwe umulumendo wazinzilwe. Watiile: “Nasakamiile pali vino antu yali nu kulalanda. Lelo kwali aina aingi na ya nkazi asosile pali vino vyacitiike nupya yatalandanga ivili vyonsi iviipe pa mutowane uwazinzilwe. Na cico calenzile ntayuvwa ukuti nali nenga.” Nkazi muze watiile: “Lino umwanitu umulumendo wazinzilwe, ya cuza itu izile umu kutukomelezya. Yamwi yatunenanga ukuti yataamanyile na vino yangalanda. Yamwi yalililanga pamwi nani, yauze nayo yandembelanga makalata ya kunkomelezya. Vino yacisile vyangavwile sana!”
16. Uzye amu cilongano yangacita uli pakuti yateekezya nu kwazwa ya lupwa yakwe wino aatazingwa?
16 Twalililini ukwazwa amu lupwa acili yakuombela Yeova ni cisinka. Yakalondekwa ukuyalanga ukutemwa nu kuyasakamala sana sana ndakai. (Aeb. 10:24, 25) Insita zimwi amu lupwa muno mwaya umuzingwe yakalola ukuti yamwi umu cilongano yakata ukulanda nayo kwati nayo kwene yazingwa. Tutalinzile ukuleka ica musango uwo ukucitika! Tulinzile ukutaizya nu kukomelezya acance yano avyazi yao yata ukuombela Yeova. Ya Maria yano ya iya yazinzilwe nu kusya ulupwa, yalanzile iyati: “Ya cuza yane yamwi izanga mu kungazwa ukweleka ivyakulya nu kusambilizya ana. Yamanyile vino nayuvwanga nupya yalililanga pamwi nani. Yamvwangilanga ndi cakuti antu yatandika ukulanda ivya ufi pali nene. Yankomelizye sana.”—Loma 12:13, 15.
Amu cilongano yangalanga ukutemwa lino yakwazwa ya lupwa yakwe wino wazingwa (Lolini palaglafu 17) *
17. I vyani vino ya eluda yalinzile ukucita pakuti yateekezya ali nu ulanda?
17 Mwe ya eluda mwaezya na maka ukuomvya inzila izili zyonsi zino mungakwanisya ukukomelezya ya lupwa aatwalilila ukuombela Yeova ni cisinka. Mwakwata umulimo wa kukomelezya ya kapepa yauzo yano atemwikwa yao yata ukuombela Yeova. (1 Tesa. 5:14) Mwavwanga nayo lino mutatala mwatandika ukulongana na pa cisila ca kulongana pakuti muyakomelezye. Mwayatandalila nu kuyapepelako. Mwasimikila nayo nanti ukuyamako uku mwinu lino mukweti ukupepa kwa lupwa. Ya eluda yalinzile ukusakamala aaya nu ulanda nu kuyalanga icikuuku nu kutemwa.—1 Tesa. 2:7, 8.
TWALILILINI UKUTAILA UKUTI WINO WATAZINGWA ALAWELA KULI YEOVA NUPYA MWATAILA YEOVA
18. Ukulingana na 2 Petulo 3:9, i vyani vino Leza aakalonda yayo aata ukumuombela ukucita?
18 Yeova “asilonda umuntu ali wensi akononwe lelo akalonda antu yonsi yalapile.” (Belengini 2 Petulo 3:9.) Nanti cakuti umuntu angacita uluyembu ulwipisye, umi wakwe ukatwallilila ukuya ucindame kuli Leza. Mwaiusya ukuti Yeova walipiile umutengo ukulu sana kuli kuti umi wa Mwanakwe wino watemwa pakuti sile atukulule swensi. Yeova akaezya ukwazwa yonsi aata ukumuombela ukuwela kuli aliwe. Akataila ukuti wanda umwi yalapingulapo ukuwela kuli aliwe wakwe vino tukalola umu cilongililo cakwe Yesu ica mwana umuponge. (Luka 15:11-32) Yamwi atiile ukuombela Yeova yawezile kuli Isi wa kwi yulu uwaya nu kutemwa lino papisile insita. Nupya aina na ya nkazi yali ni nsansa ukuyapokelela nupya. Nkazi Elizabeth wino itulandapo mpiti watemilwe sana lino umwanakwe umulumendo waweziiwe. Watiile: “Naya sana ni nsansa pano aingi yankomelizye ukukanatoovoka.”
19. U mulandu ci uno tungatwalilila ukutaila Yeova?
19 Lyonsi twataila Yeova. Asitunena ukucita ivintu ivingatuletelela. A isi uwaya na ukapekape ni cikuuku nupya watemwa yonsi amutemwa nupya aakamupepa. Sininkizyini ukuti Yeova atalatala amusye umu nsita ya macuzi. (Aeb. 13:5, 6) Ya Mark yano itulandapo mpiti yatiile: “Yeova atatazile atusye. Alatwazwa lyonsi lino twaya ni ntazi.” Yeova alatwalilila ukutupeela “amaka acila maka ya yantu.” (2 Kol. 4:7) Fwandi mungatwalilila ukuya acisinka nu kutaila ukuti wanda umwi wino wazingwa angatandika ukuombela Yeova nupya.
LWIMBO NA. 44 Ipepo Lyakwe Wino Ali nu Ulanda
^ pala. 5 Tukauvwa sana uyi ndi cakuti wino twatemwa wata ukuombela Yeova. Mu cipande cii tumalola vino Leza akauvwa ndi cakuti ica musango uwo cacitika. Tumalanda na pali vino amu lupwa yangacita pakuti yateekeziwe nu kutwalilila ukuya nu utailo ukome ndi cakuti umwi umu lupwa wata ukuombela Yeova. Cipande cii cimalanda na pali vino yonsi umu cilongano yagakomelezya nu kwazwa ya lupwa.
^ pala. 1 Mazina yamwi ali mu cipande cii asi mazina yao acumicumi.
^ pala. 79 ULONDOLOZI WA CIKOPE: Lino umwina wata ukuombela Yeova nu kusya ulupwa, umuci na ana yasyala yakucuula.
^ pala. 81 ULONDOLOZI WA CIKOPE: Ya eluda yaili yaya umu kukomelezya ulupwa lwa mu cilongano cao.
