1-2. (a) I vyani vino tukusambilila pali Mapinda 16:31, pali vino tulinzile ukulola ina itu na ya nkazi akoloci? (b) A mauzyo ci yano tumaasuka umu cipande cii?

MAWE yano yakati daimondi nga mwayalola sile vivi kwene vino yaya yasiyengesa, icakuti tutange tuyatemwe nu kuyatemwa. Fwandi ndi cakuti muntu walola daimondi vivi kwene vino yaya atange ailuke nu kuti wazana iwe lya mutengo, angaipitilila nu kuipitilila.

² Wakwe daimondi, aina na ya nkazi akoloci i cuma ca mutengo. Izwi lyakwe Leza lyakolanya imvwi zyao uku cisote (cilongwe). (Belengini Mapinda 16:31; 20:29) Nomba insita zimwi tungafilwa ukwika mano uku yakoloci. Ndi cakuti acance yamanya ukuti akoloci yacindama, yangasambilila ivintu ivingi kuli aliyo ivicizile na pa cuma ca cumi cumi. Umu cipande cii tumaasuka mauzyo yatatu: U mulandu ci uno Yeova akalolela akoloci aya nu utailo ukuti i cuma ca mutengo? U mulandu ci uno aina na ya nkazi akoloci yacindamila umwi uvi lyakwe Yeova? I vyani vino tulinzile ukucita pakuti tusambilile kuli aliyo?

3. Ukulingana na Masamu 92:12-15, u mulandu ci uno akoloci aaya nu utailo yacindamila kuli Yeova?

³ Akoloci aaya nu utailo yacindama kuli Yeova Leza. Wamanya vino yaya, nupya watemwa imiyele yao isuma. Akaya ni nsansa ndi cakuti akoloci yakusambilizya acance ivintu vino yasambilila pa myaka iingi. (Yobo 12:12; Mapi.  1:1-4) Nupya Yeova wayatemwa pali vino yakazizimizya. (Malaki 3:16) Yakakwata intazi umu umi wao, lelo yatwalilila ukuya nu utailo ukome. Upaalilo wao pali vino vilacitika uku nkoleelo wakulilako ukucila vino cali lino yasambilile sile icumi. Nupya Yeova wayatemwa pano yatwalilila ukulanda api zina lyakwe “nalino yatiyakota kwene.”—Belengini Masamu 92:12-15.

4. I vyani vingakomelezya aina itu na ya nkazi akoloci?

⁴ Ndi cakuti mukuya mukukota, mwaiusya ukuti Yeova atilila imilimo ino mwamuombela uku cisila. (Aeb. 6:10) Mwatwalilila ukuombesya umu mulimo wa kusimikila, nupya cico cikalenga Tata witu uwa kwi yulu ukuya ni nsansa. Mwazizimizya intazi izingi, ukwikako sile ni intazi izikalenga mwaya sana nu ulanda. Mwatwalilila ukutungilila nu kulondela masunde aaya muli Baibo, mwaomba imilimo iingi icindame umwi uvi lyakwe Yeova. Mukaombesya pakuti mwalondela ukusenuka ukukacitika umwi uvi lyakwe Yeova. Mukatungilila nu kwazwa yauze ukulondesya ukuombako umulimo wa nsita yonsi. Yeova Leza wamutemwa sana pa mulandu wakuti mwaya na ucisinka. Walaya ukuti atalatazyela antu yakwe “acumi.” (Masa. 37:28) Walaya ukuti: “Namamusunganga, mpaka lino mulakota mukwate ni mvwi.” (Eza. 46:4) Fwandi mutaelenganya ukuti mutacindama umwi uvi lyakwe Yeova pa mulandu sile wakuti imukota. Mwacindama sana.

5. I cisinka ci cicindame sana cino akoloci yalinzile ukwiusya?

⁵ Akoloci yangaomba ivintu ivingi umwi uvi lyakwe Yeova. Nanti icakuti ndakai yatakwata amaka wakwe vino cali mpiti, yamanya ivintu ivingi pa mulandu na vino yapitamo. Yeova angatwalilila ukuyaomvya mu nzila izipusanepusane wakwe vino tumalola ku vilangililo vino tumalandapo.

6-7. Landini pa malyasi yamwi alembwa muli Baibo aakalanda pali vino Yeova walambwile akoloci yamwi aatwalilile ukumuombela na ucisinka.

⁶ Muli Baibo mwaya malyasi aakalanda pa antu aatwalilile ukuombela Yeova na  lino yali akote. Wakwe, lino Mose wali ni myaka 80 wizile aaya kasesema nupya intunguluzi ya luko lwa ina Izlaeli. Lino Danieli wali ni myaka ukucila pali 90, Yeova watwalilile ukumuomvya nga kasesema. Mutumwa Yoani nawe lino wali ni myaka ukucila pali 90, Yeova wamulenzile ukulemba ibuku lya Kusokolola.

⁷ Antu aingi ali nu utailo yatacindikwe nanti ukumanyikwa sana, nupya antu aingi yatayikangako amano. Lelo, Yeova waisileko sana amano nupya wayalambwile pali vino yali na ucisinka. Wakwe, Baibo yalandako sile panono pali Simyoni uwali “umulungami,” lelo Yeova wamupeezile isyuko lya kulola Yesu ala akanya nu kusoowela pa mwana kwene wii na nyina. (Luka 2:22, 25-35) Nupya elenganyini na pali kasesema umwanaci Ana. Wali ni myaka 84 lelo “atapuswanga api tempele.” Yeova wamupaazile pa mulandu wakuti lyonsi wazanwanga api tempele, nupya waweniko na Yesu ale akanya. Simyoni na Ana yonsi yali acindame kuli Yeova.—Luka 2:36-38.

8-9. I vyani vimwi vino mukamfwilwa umwi wacisile umwi uvi lyakwe Yeova?

⁸ Ndakai kwaya akoloci aingi aaya nu utailo yano acance yangakolanya. Lolini ivyacitikiile nkazi Lois Didur. Wali sile ni myaka 21 lino watandike ukuomba upainiya uiyele mu Canada. Lino watwazilwe, wene na ya iya yaomvile pa myaka iingi mu mulimo wa kutandalila ivilongano. Lyene yaomvileko na pa musambo wa ku Canada ukucila pa myaka 20. Lino ya Lois yali ni myaka 58, yene na ya John yayanenyile ukuya umu kuombela uku Ukraine. I vyani vino yali nu kucita? Uzye yali nu kulanda ukuti iyakota yatanga yaye umu kuombela uku mpanga yuze? Yazumile umulimo uno yapeezilwe, nupya ya John yayasonsile ukuya muli Komiti ya musambo. Lino papisile imyaka 7 ala ya John yafwa, ya Lois yapingwilepo ukutwalilila ukuomba umulimo uno yapeezilwe. Ndakai ya Lois yali ni myaka 81. Yacili yakaombela Yeova na ucisinka pa Betele ya ku Ukraine, nupya antu yonsi yayatemwa sana.

⁹ Ya mukamfwilwa wakwe ya Lois yatanga yaikeko amano wakwe vino cali ale ya iya apano yacili; lelo yacili yacindama sana. Yeova wacindika ya nkazi aatungilila ya iya pa myaka iingi nupya acili yakumuombela na ucisinka. (1 Tim. 5:3) Yakakomelezya na acance kwene.

10. I vyani vimwi vino ya Tony yacisile vino tungakolanya?

¹⁰ Akoloci aingi aaya na ucisinka aakaikala sile pa ng’anda nayo kwene yacindama. Wakwe, umwina wi zina lyakuti Tony, ndakai akaikala sile pa ng’anda. Wabatiziwe umu Ogasiti 1942 ala ali ni myaka 20 umu  Pennsylvania, ku U.S.A. Lino wabatiziwe sile, yamunenyile ukwingila usilika. Pa mulandu wakuti wakanyile, yamunyefile mu cifungo imyaka iili na hafu. Wene na mamakwe yakweti ana yaili nupya yayasambilizye icumi. Pa myaka iingi, ya Tony yaomvile ngu mwangalizi wa cilongano wino ndakai tukaama ukuti Kalemanya mwi Umba lyakwe ya eluda nupya yaomvileko ngu mwangalizi wa ukongano wa ciputulwa. Yayanga uku cifungo umu kutungulula ukulongana na masambililo ya Baibo. Ndakai yali ni myaka 98 nupya yasilonda ukuta ukuombela Yeova. Yacili yakaezya na maka ukuombela Yeova nu kuombela pamwi na ina na ya nkazi umu cilongano cino yayamo.

11. Tungalanga uli ukuti twacindika akoloci aakaikala sile pa ng’anda?

¹¹ Tungalanga uli ukuti twacindika akoloci aakaikala sile pa ng’anda? Ndi cakuti icilinga, ya eluda yangayazwa ukuzanwa uku kulongana nanti ukukutika uku kulongana nu kusimikila. Tungalanga ukuti ituyasakamala nga tukuyatandalila nanti ukuyatumila foni. Yamwi yangailola ukuti kusi wino yangalondolwela vino yakuyuvwa. Nomba tungaipakizya nga tukupaatulako insita ya kulanzyanya nayo nu kukutika lino yakutulondolwela pa visuma vino yaipakizya umwi uvi lyakwe Yeova.

12. A ina ya musango ci na ya nkazi yano tungazana umu cilongano citu?

¹² Tungazunguka sana ukumanya ukuti twakwata akoloci aingi aaya nu utailo umu cilongano citu. Nkazi uwi zina lyakuti Harriette waombela Yeova pa myaka iingi mu cilongano ca ku mwao mu New Jersey, ku U.S.A. Lyene wizile afumako aaya umu kwikala uku mwanakwe. Aina umu cilongano cino wakuukiile, yaombiisye pakuti yamumanye ningo nupya izile iiluka ukuti i cuma ca mutengo. Wayakomelezyanga lino wayasimikilanga malyasi pali vino vyamucitikilanga umu mulimo wa kusimikila muli ya 1925 ala alino wacisambilile sile icumi. Pa nsita iya, lyonsi wasendanga umuswaki nga akuya umu kusimikila pano welenganyanga ukuti insita ili yonsi yangamulema nu kumwika umu cifungo. Umu 1933 yamulemile nu kumwika umu cifungo imiku iili, nupya wamalangamo umulungu onga nga yamulema. Ya iya ataali ya Nte yakwe Yeova yamusakamalanga nupya lino wali umu cifungo, yasunganga anao yatatu. Ukwaula nu kutwisika, tulinzile ukucindika sana aina na ya nkazi aaya nu utailo wakwe nkazi Harriette!

13. I vyani vino mwasambilila pali vino akoloci yacindama umwi uvi lyakwe Yeova?

¹³ Aina na ya nkazi akoloci, yacindama kuli Yeova nu mwi uvi lyakwe. Yailolela vino Yeova watwalilila ukuyapaala nu kupaala iuvi lyakwe umu nzila izingi. Yasambilila masambililo acindame kuli vino yakaluvyanya. Mwayalola ukuti “intulo ya malango” nupya mwasambilila kuli aliyo. (Mapi. 18:4) Ndi cakuti mukupaatulako insita ya kuya pamwi nayo, utailo winu ulakomelako nupya mulasambilila ivingi kuli aliyo.

14. I vyani vino ilembo lya Malango 32:7 likakomelezya acance ukucita?

¹⁴ Mwaitandikilako ukulanzyanya nayo. (Belengini Malango 32:7.) I cacumi ukuti ndakai limwi yasilolekesya, yakapita panono, nupya yasilanda sana. Lelo yatwalilila ukuombesya ukupanga “izina lisuma” na  Yeova. (Kasa. 7:1) Mwaiusya umulandu uno Yeova wayacindikila. Mwatwalilila ukuyacindika. Mwakolanya Elisya. Walondesyanga ukutwalilila ukwikala na Eliya amanda yonsi. Pa miku itatu, Elisya walandanga ukuti: “Ntalakusya.”—2 Yamw. 2:2, 4, 6.

15. A mauzyo ci yano tunguzya akoloci?

¹⁵ Mwalanga ukuti mwika amano ku akoloci lino mukuyuzya mauzyo asuma. (Mapi. 1:5; 20:5; 1 Tim. 5:1, 2) Mwayuzya mauzyo wakwe: “Uzye lino mwali ance, i cani icalenzile musininkizye ukuti imuzana icumi?” “Uzye ivyamucitikila vyamwazwa uli ukupalama kuli Yeova?” “I vyani ivyamwazwa ukutwalilila ukuya ni nsansa umu mulimo wakwe Yeova?” (1 Tim. 6:6-8) Lyene mwakutikisya nga yatandika ukumilondolwela.

16. Uzye ukulanzyanya kungazwa uli akoloci na acance?

¹⁶ Ndi cakuti akoloci na acance yakulanzyanya, yonsi kwene yakakomeleziwa. (Loma 1:12) Mulayuvwa ukuti Yeova akasakamala antu yakwe, nupya akoloci yalayuvwa ukuti yatemwikwa. Yalaipakizya ukumilondolwela vino Yeova wayapaala.

17. U mulandu ci uno tungalandila ukuti akoloci yakaya yakuzipilako lino imyaka ikuya ikupita?

¹⁷ Usuma wa pa manso ukasila lino imyaka ikuya ikupita, lelo yayo aaya na ucisinka kuli Yeova yakazipilako sile cila mwaka. (1 Tesa. 1:2, 3) I cani cingalenga tusininkizye vivyo? A pa mulandu wakuti pa myaka iingi yakasambiliziwa na Yeova nupya wayazwa ukuya ni miyele isuma. Nga twika amano ku ina na ya nkazi akoloci, tulayacindika nupya tulasambililako kuli aliyo, na cico cilalenga twayalola ukuti i cuma ca mutengo!

18. I vyani vino tulasambilila umu cipande icilondelilepo?

¹⁸ Icilongano cikakomelako ndi cakuti akoloci na acance yakucindikana. Mu cipande icilondelilepo, tulasambilila vino akoloci yangalanga ukuti yacindika acance umu cilongano.