1. I vyani limwi vino ya kasukulu yanji nanti yano tukaomba nayo yangatuzyapo?

 UZYE mukauvwa uli ndi cakuti yano mukaomba nayo nanti yano mukasambilila nayo yamuzya pali vino mwazumilamo? Uzye mukauvwa intete? Sweingi avino tukayuvwa. Lelo amauzyo yamwi yakalanga vino umuntu umwi akayuvwa na vino wazumilamo, na cii cikalenga tukwate isyuko lya kuyasimikila api lyasi ilisuma. Nomba insita zimwi, umuntu anguzya iuzyo pakuti sile twapazyanya. Cii citalinzile ukutuzungusya. Pano antu yamwi yakayanena ivya ufi pali vino twazumilamo. (Mili. 28:22) Alino na cuze, tukwikala “umu manda akusyalikizya,” muno antu aingi ‘yasizumilizyanya na auze’ nupya “aankalwe.”—2 Tim. 3:1, 3.

2. U mulandu ci uno tukalondekelwa ukuya afuuke?

² Limwi mungayuzya ukuti, ‘Uzye ningaya uli umuteekele nu kulanda umu mucenjelo ndi cakuti umwi akulonda twapazyanya pali vino nazumilamo?’ Ukufuuka u kungamwazwa ukucita vivyo. Umuntu umufuuke akatwalilila ukuya umuteekele ndi cakuti yamwi yamusosya nanti ndi cakuti atamanyile ningo ivya kwasuka. (Mapi. 16:32) Limwi mungayuvwa ukuti cangupala ukulanda ukucila ukucita vino mukulanda. Mungacita uli pakuti muye afuuke? Mungaya uli afuuke lino mukwasuka umwi aakususya vino mwazumilamo? Nupya ndi cakuti mwemwe yavyazi mungacita uli pakuti mwazwe ana inu  ukulaasuka nu ufuuke ndi cakuti yamwi yayuzya pali vino yazumilamo? Lekini tulole.

3. U mulandu ci uno tungalandila ukuti kufuuka kusilangilila ukuti umwi watonta lelo wasipa? (2 Timoti 2:24, 25)

³ Ukufuuka kusilangilila ukuti umwi watonta lelo kukalangilila ukuti wasipa. Cikalondekwa ukuombesya pakuti mutwalilile kuteeke umwenzo nga mwakwata intazi. Ukufuuka kwaya pa “miyele iikafuma ku mupasi wa muzilo.” (Gala. 5:22, 23) Izwi lya Cigiliki lino yaomvya ilyakuti “ukufuuka” insita zimwi yaliomvyanga ukulanda pa mfwalasi ya mu mpanga ino yaleta umu muzi nu kuisambilizya. Elenganyini pa mfwalasi ya mu mpanga iteekele. Nanti icakuti iteekele nomba ikome. Nga swemo tungaya uli afuuke nupya pa insita ili imwi kwene akome? Tutanga tucite vivyo uku maka itu sweineco. Icingatwazwa u kupepa kuli Leza ukulenga umupasi wa muzilo pakuti utwazwe ukutwalilila ukuya ni miyele kwene ii isuma. Antu aingi yasambilila ukuya ni miyele ii. Wakwe aina na na ya nkazi aingi yakatwalilila ukuya afuuke ndi cakuti yamwi yayasosya nupya cii cikalenga aingi yaelenganya ivisuma pali ya Nte. (Belengini 2 Timoti 2:24, 25.) Uzye ukufuuka kungamwazwa uli umu umi winu?

4. I vyani vino tukusambilila kuli vino Isaki wali umufuuke?

⁴ Muli Baibo mwaya amalyasi aingi aakalangilila umulandu uno ukufuuka kwacindamila. Elenganyini pali vino vyacitikiile Isaki. Lino wikalanga umu Gelali umusumba uwa Ina Filisti, antu yamuvwilanga uzuwa fwandi yazisile ivifula vya manzi vino aomvi yakwe Abulahamu isi yimvile. Ukucila ukutandika ukulwisyanya nayo, Isaki wafumilepo nu kuya uku cifulo cuze kuno waile aimba ivifula. (Utan. 26:12-18) Nomba Ina Filisti yalanzile ukuti na yaya kwene yali amanzi yao. Nanti icakuti cali vii Isaki watwalilile ukuya nu mutende. (Utan. 26:19-25) I cani calenzile ukuti atwalilile ukuya umufuuke nanti icakuti yamucuzyanga? Ukwaula nu kutwisika, Isaki wasambilile uku ya vyazi yakwe, walolanga vino Abulahamu watemilwe umutende na vino Sala wali ‘umuteekele nupya umufuuke.’—1 Pet. 3:4-6; Utan. 21:22-34.

5. I vyani ivikalangilila ukuti avyazi Aina Klistu yangasambilizya ana yao umulandu uno ukufuuka kwacindamila?

⁵ Avyazi Aina Klistu yangazwa ana yao ukumanya umulandu uno cacindamila ukuya afuuke. Elenganyini pali vino vyacitikiile Maxence ali ni myaka 17. Wazananga antu akasoka zuwa uku sukulu na lino akuomba umulimo wa kusimikila. Avyazi yakwe yamuteekelile lino ya mwazwanga ukuya umufuuke. Avyazi yakwe yatile, “Maxence wizile amanya ukuti ukutwalilila ukuya umufuuke lino yamwi yakusosya kukalangilila ukuti wasipa ukucila ukwasuka ala watusoka.” Maxence wasambile ivyakuya umufuuke.

6. Uzye ipepo lingatwazwa uli ukuya afuuke?

⁶ Uzye tungacita uli ndi cakuti umwi watusosya, wakwe ukulanda iviipe pali Leza alino na pali Baibo? Tulinzile ukulenga umupasi wa muzilo kuli Yeova na mano akutwazwa ukuya afuuke lino tukwasuka umuntu wiyo. Nga ndi cakuti pa cisila cakumwasuka twazana ukuti tutaali twamwasuka ningo? Tulinzile ukupepelapo nu kwelenganya pali vino tulinzile ukucita ndi cakuti ica musango uwo cacitika nupya. Yeova nawe alatupeela umupasi wakwe uwa muzilo uwa kutwazwa ukutwalilila ukuya afuuke.

7. Uzye ukwiusya malembo yamwi kungatwazwa uli ukuya ni milandile isuma? (Mapinda 15:1, 18)

⁷ Amalembo amuli Baibo yangatwazwa  ukusoolola ningo amazwi akuomvya ndi cakuti yamwi yatusosya. Umupasi wakwe Leza ukatwazwa ukwiusya amalembo yayo. (Yoa. 14:26) Wakwe, ivinsite vino tukazana umwi buku lya Mapinda vingatwazwa ukuya afuuke. (Belengini Mapinda 15:1, 18.) Ibuku lii likatwazwa ukumanya cino cacindamila ukuya aicefye nga yamwi yatusosya.—Mapi. 10:19; 17:27; 21:23; 25:15.

8. U mulandu ci uno tulinzile ukwelenganyizizya pali vino vyativilenga umwi ukuzya iuzyo pali vino twazumilamo?

⁸ Ukwiluka nako kungatwazwa sana. (Mapi. 19:11) Umuntu aakailuka akaikanya nga yamwi yatandika ukulanda ivipusaneko na vino wazumilamo. Ilingi ndi cakuti umwi akutuuzya tusimanya umulandu uno akuzizya. Wakwe, vino umuntu akwelenganya i vikalenga ukuti auzye. Fwandi lino tutatala twasuka tulinzile ukwelenganya sana apa mulandu uwatiulenga umwi ukuzya iuzyo lilyo.—Mapi. 16:23.

9. Uzye Gidyoni walangizye uli ukwiluka nu ufuuke lino walanzyanyanga na onsi Aina Efulemu?

⁹ Elenganyini vino Gidyoni waswike aosi aina Efulemu. Yasosile pa mulandu wakuti yatayamile zuwa uku kuyalwisya alwani ya Ina Izlaeli. I cani calenzile ukuti yasoke sana? Limwi apa mulandu wakuti yali sana ni cilumba.  Lelo asi mulandu ni calenzile, Gidyoni wacindike vino yayuvwile nupya wayaswike umu ufuuke. Baibo ikatunena ukuti “lino walanzile vivyo, yateesile imyenzo.”—Yakapi. 8:1-3.

10. I vyani ivilatwazwa ukwasuka ningo yayo aakatwisika vino twazumilamo? (1 Petulo 3:15)

¹⁰ Limwi yano tukaomba nayo nanti yano tukasambilila nayo yangatuzya umulandu uno tukauvwila amasunde aya muli Baibo. Tukaezya ukuya nu mucinzi lino tukwasuka yamwi vino twazumilamo nu kulanga ukuti twacindika vino yazumilamo. (Belengini 1 Petulo 3:15.) Ukucila ukulaelenganya ukuti yakutwezya, tulinzile ukulilola ngi syuko ilyakumanya vino yacindika umu umi. Asi mulandu ni caticilenga umwi ukutuuzya iuzyo, tulinzile ukumwasuka umu nzila isuma. Vino tungayasuka vingalenga limwi yasenule imyelenganyizizye yao. Nanti icakuti imilandile yao isi ningo, tulinzile ukwezya na maka ukuya afuuke.—Loma 12:17.

11-12. (a) I vyani vino tufwile ukwelenganyapo lino tutatala twasuka iuzyo ilikome? (Loliniko ni cikope.) (b) Langililini vino iuzyo lingalenga mutandike ukulanzyanya.

¹¹ Wakwe, ndi cakuti uno tukaomba nawe watuuzya umulandu uno tusizevezyako uwanda wa kuvyalwa, tulinzile ukwelenganya pali vii: Uzye akwelenganya ukuti tutazumiliziwa ukukwata utusita utwakwizizya pamwi na yauze? Nanti limwi akwelenganya ukuti vino tusizevyako uwanda wa kuvyalwa tumaonona umutende wa pa kampani? Tulinzile ukutandikilapo ukutaizya uno tukaomba nawe pali vino watwalilila ukwika amano uku yantu yauze nupya tulinzile ukumulondolwela ukuti naswe kwene tukalondesya ukutwalilila ukuombela pamwi umu mutende. Limwi ukucita vii kungalenga tukwate insita isuma iyakulondolola pali vino Baibo ikalanda pa kuzevya uwanda wa kuvyalwa.

¹² Tungacita icili cimwi ndi cakuti umwi watuzya iuzyo ilikome. Limwi uno tukasambilila nawe angalanda ukuti ya Nte Yakwe Yeova yalinzile ukusenuka muli vino yakalola ukulaalana kwa onsi yatupu nanti anaci yatupu. Uzye limwi akalanda vivyo pa mulandu wakuti atamanya vino ya Nte Yakwe Yeova yakalola ukulaalana kwa onsi yatupu nanti anaci yatupu? Nanti limwi apa mulandu wakuti cuza wakwe nanti lupwa wakwe akacita vivyo? Uzye akaelenganya ukuti tutatemwa antu akacita vivyo? Tulinzile ukumwazwa ukumanya ukuti twatemwa antu yonsi nupya twacindika insambu zino cila muntu wakwata izyakuisoolwela ivyakucita. b (1 Pet. 2:17) Lyene tungamunena vino Baibo ikalanda na vino ukulondela vino ikalanda kukatwazwa ukuya ni nsansa umu umi.

13. Uzye mungazwa uli umuntu aatazumila muli Leza?

¹³ Ndi cakuti umwi akutwisika vino twazumilamo, tutalinzile ukulanda zuwa ukuti itumanya vino wazumilamo. (Tito 3:2) Wakwe, nga ndi cakuti kasukulu muzo walanda ukuti citayamo mano ukuzumila muli Leza? Uzye mungatandika ukwelenganya ukuti wazumila umu kusanguka nupya wamanya ivingi pa kusanguka? Limwi angaalanda vivyo pa mulandu na vino uvwile. Kucila ukuti mutandike ukupazyanya pali vino sayansi ikalanda, limwi mungamupeela ivya kwelenganyapo pa nsita yuze. Mungamulangako ivipande ivikalanda pa uumbo ivyaya pa jw.org. Limwi angatemwa ukuti mukalanzyanye icipande nanti vidyo ivyaya pa jw.org. Nga tuli nu mucinzi lino tukulanda nawe, cingalenga aalondesya ukumanyilapo na vyuze pali vino Baibo ikalanda.

14. Uzye Niall waomvizye uli ningo Webusaiti witu pa kwazwa umwi wino yasambililanga nawe uku sukulu ukumanya ningo ya Nte Yakwe Yeova?

 ¹⁴ Niall, uwacance waomvizye webusaiti itu apakulanga antu ukuti vino yakalanda pali ya Nte Yakwe Yeova ivya ufi. Walanzile ukuti, “Ilingi kasukulu munji wanenanga ukuti ntazumila ivisinka vino ya sayansi yakalanda pano nataila sana malyasi aufi aya muli Baibo.” Lino kasukulu wii wakanyile ukupeela Niall kasita kakuti alondolole vino wazumilamo, Niall wamulangizye iciputulwa icaya pa jw.org icakuti “Sayansi na Baibo.” Pa cisila, Niall waweni ukuti kasukulu wii afwile wabelenzile ivyaya pa ciputulwa cii nupya walondanga ukumanya ivingi pali vino umi watandike. Ivya musango uu vingamucitikila namwe kwene.

15. Uzye avyazi yangazwa uli ana ukwasuka umu ufuuke ndi cakuti yamwi yayuzya pali vino yazumilamo?

¹⁵ Avyazi yangasambilizya ana yao ivyakuya afuuke lino yakwasuka yamwi pali vino yazumilamo. (Yako. 3:13) Avyazi yamwi yakalangilila ana ivyakucita lino yali pa kupepa kwa lupwa. Yakalazyanya apa malyasi yano yangayuzyapo uku sukulu nu kuyalangilila ivyakwasuka alino nu kuyasambilizya ivyakuya afuuke lino yakwasuka.—Lolini kambokosi kakuti “ Ukulanzyanyizizya Limwi Ivyakucita Kungavwa Ulupwa Lwinu.”

16-17. Uzye ukulanzyanyizizya limwi ivyakucita kungazwa uli acance?

¹⁶ Kulanzyanya ivyakucita kungazwa Ina Klistu ukusininkizya umulandu uno yazumilila muli vino Baibo ikalanda alino nu kulanenako yauze. Ciputulwa cakuti “Acance Yakauzya” ca pa jw.org cakwata na pano acance yangalemba ivyeo. Iciputulwa cii capangilwe uku kukomya utailo wa yacance nu kuyazwa  ukupekanya amasuko umu mazwi yao. Ukusambilila capamwi icipande cii nu lupwa, kulatwazwa ukuya afuuke lino tukulondolwela umwi vino twazumilamo.

¹⁷ Matthew walondolwile vino ukupekanyizizya limwi ivyakucita kwamwazwile. Lino yali pa kupepa kwa lupwa, Matthew na vyazi yakwe yakalondelezya amalyasi yano ya kasukulu yakalandapo uku sukulu. Matthew watiile: “Tukaelenganya pa mauzyo yano yanguzya, alino nu kulazyanya vino tungasuka mauzyo yayo ukulingana na vino itulondelezya. Nga namanya ivisinka api lyasi limwi cisintalila ukulondolwelako yauze, nupya nkaya sana umuteekele lino nkuyalondolwela.”

18. I cintu ci icicindame cino Kolose 4:6 ikalandapo?

¹⁸ Kwene, ukulondolola ivisinka asi kungalenga umuntu azumile vino tukumunena. Lelo ukuya afuuke nu kulanda umu mucenjelo kungamwazwa. (Belengini Kolose 4:6.) Ukunenako yauze pali vino twazumilamo tungakukolanya uku kusumba bola. Tungasumba ningo bola nanti ukuisumba na maka. Ndi cakuti twasumba ningo bola, yano tukuteya nayo yanganka nupya yangatwalilila ukuteya. Vikwene avino caya, ndi cakuti tukulondolwela umwi umu mucenjelo nupya itufuuka, antu yangaitemelwa ukukutika nupya tungatwalilila ukulanzyanya. Nomba ndi cakuti umuntu akulonda sile twapazyanya, tusitwalilila ukulanzyanya. (Mapi. 26:4) Lelo asi yonsi akacita vivyo, aingi yakakutika.

19. I vyani ivilatwazwa ukuya afuuke lino tukulanda pali vino twazumilamo?

¹⁹ Ivintu vikazipa ndi cakuti twatwalilila ukuya afuuke. Mwapepa kuli Yeova ukulenga amaka yakwe akumwazwa ukutwalilila ukuya afuuke lino mukwasuka amauzyo akome. Mwaiusya ukuti ukufuuka kungalenga ukuti mutapazyanya. Nupya ukufuuka alino nu kwasuka nu mucinzi kungalenga yano mukulanzyanya nayo yasenule imyelenganyizizye yao pali sweswe alino na pa cumi icaya muli Baibo. Lyonsi “mwaya aipekanye ukwasuka wensi” pali vino mwazumilamo, lelo “mwacita vivyo nu ufuuke alino nu mucinzi sana.” (1 Pet. 3:15) Mu cumi ukufuuka kwacindama sana!