CIPANDE CA KUSAMBILILAMO 37
Mwataila Sana Yeova Wakwe Samusoni
“We Yeova Mwene wa Papelapela napaapata njiusye, nupya mpeeko maka.”—YAKAPI. 16:28.
LWIMBO NA. 30 A Tata, Leza Wane, Napya Cuza Wane
VINO TUMASAMBILILAPO a
1-2. U mulandu ci uno icizipila ukuti tusambilile pali Samusoni?
I VYANI vino mukaelenganyapo nga muvwa izina lyakuti Samusoni? Limwi mukaelenganya pa monsi uwali sana na maka. Kwene ica cumi. Lelo Samusoni atapingwilepo ningo pa vintu, i calenzile ukuti acuule sana. Nanti ciye vivyo, Yeova wisile mano kuli vino Samusoni wali uwa cisinka, nupya walenzile ukuti alembwe muli Baibo pakuti twasambililako.
2 Yeova waomvizye Samusoni ukuomba imilimo iya kuzunguka pakuti aazwe antu yakwe asoololwe Aina Izlaeli. Imyaka ingi pa cisila ca mfwa yakwe Samusoni, Yeova walenzile umutumwa Paulo ukulumbula Samusoni pamwi na aonsi aali nu utailo. (Aeb. 11:32-34) Vino Samusoni wacisile vingatukomelezya. Wataile sana Yeova na lino ivintu vyatazile. Umu cipande cii tumalanda pali vino tungasambilila kuli Samusoni na vino tungakomeleziwa kuli vino wacisile.
SAMUSONI WATAILE YEOVA
3. U mulimo ci uno yapeezile Samusoni?
3 Lino Samusoni waviilwe, Aina Filisti aliyo yateekanga Aina Izlaeli nupya yayacuzyanga. (Yakapi. 13:1) Vino Aina Filisti yali nu unkalwe vyalenzile ukuti Aina Izlaeli yacula sana. Yeova wasoolwile Samusoni “ukupususya Aina Izlaeli uku Ina Filisti.” (Yakapi. 13:5) Uu wali u mulimo ukome! Pakuti Samusoni aombe ningo umulimo uno wapeezilwe, walondekwanga ukutaila sana Yeova.
Samusoni wataile Yeova nupya waitemelwanga ukusenuka. Waomvizye ivintu vino wakweti pakuti acite ukulonda kwakwe Leza (Lolini mapalaglafu 4-5)
4. Uzye Yeova wazwile uli Samusoni ukuipususya uku Ina Filisti? (Yakapingula 15:14-16)
4 Lolini vimwi ivikalangilila ukuti Samusoni wataile ukuti Yeova wali nu kumwazwa. Pa nsita imwi, asilika Aina Filisti yaile umu kulema Samusoni uku Lehi umu musumba uwa Ayuda. Aonsi amu Yuda yuvwile intete fwandi yapeezile Samusoni uku yalwani yao. Antu yakwe Samusoni yamunyefile ni myando iili ipya nu kumutwala uku Ina Filisti. (Yakapi. 15:9-13) Lelo, “umupasi wakwe Yeova wizile” pali Samusoni nupya wamwazwile ukuputola imyando. Lyene waweni “uluzekete lwakwe punda wa kalume,” alutoola nu kuluomvya uku kukomelako aonsi Aina Filisti aali 1,000.—Belengini Yakapingula 15:14-16.
5. Uzye vino Samusoni waomvizye uluzekete lwakwe punda, vikalangilila uli ukuti wataile sana Yeova?
5 U mulandu ci uno Samusoni waomvizye uluzekete lwakwe punda? Uluzekete lutaali i canzo icaomviwanga. Ukwaula nu kutwisika Samusoni wamanyile ukuti wacimvizye pa mulandu wakuti Yeova wamwazwanga, asi canzo cino waomvizye. Umonsi wii uwali na ucisinka waomvizye vino wakweti uku kucita ukulonda kwakwe Yeova. Samusoni wacimvizye aonsi yaya pano wataile Yeova.
6. Uzye ilyasi lyakwe Samusoni likatusambilizya vyani lino tukuomba imilimo ino twapeelwa umwi iuvi?
6 Naswe kwene Yeova alatupeela amaka yano tukulondekwa pakuti tuombe umulimo uno watupeela nanti cakuti umulimo uwo ungaloleka ukome. Nupya Leza angatwazwa umu nzila iyakuzunguka. Mwataila ukuti Yeova alamwazwa ukucita ukulonda kwakwe ndi cakuti mwamutaila, wakwe vivi kwene vino wazwile Samusoni.—Mapi. 16:3.
7. I cani conga icikalangilila umulandu uno cacindamila ukutaila sana utunguluzi wakwe Yeova?
7 Aina na ya nkazi aingi aakaombako umulimo wa makuule yakalanga ukuti yataila muli Yeova. Uku cisila, aina yakuulanga Amang’anda ya Wene ni vikuulwa vyuze. Mukuya kwa nsita, pa mulandu wakuti antu aakubatiziwa yayanga yakuvulilako, iuvi lyalondekwanga ukusenulako vimwi. Aina aakatungulula umulimo uu yalenzile uwazwilizyo kuli Yeova nupya yezizyeko inzila izipya, wakwe ukukala ivikuulwa nu kuvizifya. Ya Robert yano yaombela pa vikuulwa vitu ivingi umu nsi yonsi umu myaka ya likwene yalanzile ukuti, “Apa kutandika citangwike kuli yamwi ukulondela inzila ipya.” Yalanzile nu kuti: “Vyapusine sana na vino twaombanga uku myaka ya ku cisila. Lelo aina yaitemilwe ukusenuka, nupya twalola vino Yeova akapaala ukusenuka kuu.” Ii inzila yonga ikalangilila vino Yeova akatungulula antu yakwe pakuti afikilizye ukulonda kwakwe. Cila nsita, swensi kwene tulinzile ukulayuzya ukuti, ‘Uzye nkaleka Yeova antungulula nu kuitemelwa ukusenuka lino nkumuombela?’
SAMUSONI WAOMVYANGA NINGO VINO YEOVA WAMUPEELANGA
8. I vyani vino Samusoni wacisile lino uvwile ulusala?
8 Limwi mukwiusya ivintu vimwi ivyakuzungusya vino Samusoni wacisile. Wakomile cisama nupya mukuya kwa nsita wakomile aonsi 30 Aina Filisti umu musumba wa Asyikeloni wenga sile. (Yakapi. 14:5, 6, 19) Samusoni wamanyile ukuti atanga acite ivintu vivi ukwaula ukwazwiwa na Yeova. Cii calolike na lino uvwile ulusala pa cisila ca kukoma Aina Filisti 1,000. I vyani vino wacisile? Kucila ukuitaila umwineco, wataile ukuti Yeova aliwe wali nu kumupeela amanzi.—Yakapi. 15:18.
9. Uzye Yeova waswike uli ipepo lyakwe Samusoni? (Yakapingula 15:19)
9 Yeova waswike Samusoni lino wamupeezile amanzi umu cizungusyo. Lino Samusoni wamwile, “maka yawezile nupya wapupulwike.” (Belengini Yakapingula 15:19.) Kafukoka kaa katwalilile ukuyako ukufika lino kasesema Samweli walemvile ibuku lyakwe Yakapingula. Lyonsi lino Aina Izlaeli yalola kafukoka kaa kafwile kaiusyangako ukuti ndi cakuti yataila sana Yeova, wali nu kulayazwa lyonsi lino yalondekwa uwazwilizyo.
Samusoni wakweti amaka pa cisila ca kumwa manzi yano Yeova wamupeezile. Naswe kwene tungakoma muli vyakwe Leza ndi cakuti tukuomvya ivintu vino Yeova watupeela ivya kutwazwa muli ukapepa (Lolini palaglafu 10)
10. I vyani vino tulinzile ukucita pakuti Yeova atwazwa? (Loliniko ni cikope.)
10 Naswe kwene tulinzile ukulasintilila sana pa kwazwa kwakwe Yeova asi mulandu ni vintu vino twamanya nanti vino twacita umu mulimo wakwe. Tulinzile ukuicefya nu kuzumila ukuti tungakwanisya sile ukucita vino Yeova akalonda ndi cakuti twamutaila. Wakwe vivi kwene vino Samusoni wakweti amaka pa cisila ca kumwa manzi yano Yeova wamupeezile, naswe kwene tungakoma muli vyakwe Leza ndi cakuti tukuomvya ivintu vino Yeova watupeela ivya kutwazwa muli ukapepa.—Mate. 11:28.
11. Tungacita uli pakuti twasintilila pa kwazwa kwakwe Yeova? Langililini.
11 Elenganyini pa Mwina Aleksey uwa ku Russia aakazizimizya ukucuziwa. I vyani ivyamwazwa ukutwalilila ukuya uwa cisinka? Wene na mamakwe ika sana mano uku kuisambilizya Baibo na mapepo ya lupwa. Watile: “Nkaezya ukutwalilila ukuisambilizya nu kubelenga Baibo cila wanda. Cila katondo, nemo na mamane tukalanzyanya ilembo lya wanda nu kupepa kuli Yeova.” I vyani vino tukusambililako? Ukucila ukuitaila, tulinzile ukutaila sana Yeova. Tungacita uli vivyo? Tungacita vivyo ndi cakuti tukukomya utailo witu kupitila umu kuisambilizya Baibo, kuzanwa uku kulongana, alino nu kulasimikila. Lyene Yeova alatupeela amaka aakutwalilila ukumuombela. Wapeezile Samusoni amaka, naswe kwene angatukomya.
SAMUSONI ATATOOVWIKE
12. I vyani vino Samusoni atapingwilepo ningo, nupya vyapusiine uli na vino wacisile uku cisila?
12 Samusoni ataali umumalilike wakwe sweswe, fwandi insita zimwi atapingulanga ningo pa vintu. Cintu conga cino atapingwilepo ningo calenzile ivintu ukwipa sana. Pa cisila ca kuomba nga kapingula pa nsita imwi, Samusoni “wizile atemwana nu mwanaci uwa mu mukonko wa Soleki uwi zina ilyakuti Delila.” (Yakapi. 16:4) Uku cisila, Samusoni wataisye umwanaci Umwina Filisti, lelo “Yeova u walenzile” ukuti ciye vivyo pano “walondanga inzila ya kulwisizyamo Aina Filisti.” Mukuya kwa nsita, Samusoni waile aikala umu ng’anda yakwe cizelele uku Gaza umu musumba wa Ina Filisti. Pa nsita iya, Leza wapeezile Samusoni amaka aakusimpula ivisaasa vya pa mpongolo, nu kulenga umusumba ukukanaya ucingililwe. (Yakapi. 14:1-4; 16:1-3) Lelo Delila wene afwile wali Umwina Izlaeli, fwandi ukuya pamwi nawe kutaali nu kumulenga acimvye Aina Filisti.
13. Uzye Delila waleteliile uli Samusoni?
13 Delila waposile impiya izingi sana uku Ina Filisti pakuti afutuke Samusoni. Pa mulandu wakuti Samusoni watemilwe sana Delila, wavizilwe ukumanya vino Delila walondanga ukucita. Delila wapatikizyanga Samusoni ukumunena icalenzile ukuti akwate sana amaka nupya Samusoni wasusile amunena. Ca ulanda icakuti vino Samusoni wacisile vyalenzile ate ukuya na maka nupya Yeova watile ukumutemwa pa nsita imwi.—Yakapi. 16:16-20.
14. I vyani ivyacitikiile Samusoni pa mulandu na vino wataile Delila?
14 Pa mulandu wakuti Samusoni wataile Delila kucila ukutaila Yeova, calenzile akwate intazi iipisye. Aina Filisti yalemile Samusoni nu kumutonkola manso. Yamunyefile uku Gaza, kuno pa kutandika wazewanyizye antu aakaikalamo, nupya yamupeezile umulimo wa kusya ingano. Lyene pa cisila Aina Filisti izile iyamuzewanya lino yakolongine uku kuzevya. Yapeezile malambo kuli Dagoni leza wao, pano yalandanga ukuti u walenzile yaleme Samusoni. Lyene yaile iyasenda Samusoni ukufuma umu cifungo pakuti ‘aize ayuvwisye ningo.’—Yakapi. 16:21-25.
Yeova wapeezile Samusoni amaka pakuti apingule Aina Filisti (Lolini palaglafu 15)
15. Uzye Samusoni wizile ataila uli Yeova nupya? (Yakapingula 16:28-30) (Lolini icikope icili pa nkupo.)
15 Samusoni waluvyanyizye sana, lelo atatoovwike. Walonzile inzila iyakucimvizyamo Aina Filisti, nupya ukwene ali mulimo uno Yeova wamupeeziile. (Belengini Yakapingula 16:28-30.) Samusoni wapapasile Yeova ukuti: “Leka ndandule uku Ina Filisti.” Leza wa cumi waswike ipepo lyakwe Samusoni nu kumupeela amaka nupya. Cii calenzile ukuti Samusoni akome Aina Filisti aingi ukucila pa kutandika.
16. I vyani vino tungasambilila kuli vino Samusoni waluvyanyizye?
16 Nanti cakuti Samusoni wacuzile sana pa mulandu nu kukanapingula ningo, atatile ukwezya ukucita ukulonda kwake Yeova. Nanti cakuti twaluvyanya nupya twasundwa nanti twapokwa imilimo, tutalinzile ukutoovoka. Mwaiusya ukuti Yeova waiteyanya ukutwelela. (Masa. 103:8-10) Asi mulandu na vino tukaluvyanya, Yeova angatupeela amaka akucita ukulonda kwakwe, wawe vino wacisile kuli Samusoni.
Samusoni afwile uvwile sana uyi pali vino waluvyanyizye, nomba atatoovwike, naswe kwene tutalinzile ukutoovoka (Lolini mapalaglafu 17-18)
17-18. Uzye ivyacitikiile ya Michael vingamukomelezya uli? (Loliniko ni cikope.)
17 Elenganyini ivyacitikiile umwina Michael. Wali u mucincile umu mulimo wakwe Yeova, wali u muomvi aakatumikila nupya painiya wa nsita yonsi. Lelo ca ulanda icakuti wizile aluvyanya nupya calenzile ukuti apokwe imilimo umu cilongano. Walanzile ukuti, “Naombesyanga umu mulimo wakwe Yeova. Lyene ukwaula nu kwenekela, naposilwe imilimo ino naombanga nupya nayuvwile kwati pasi ivili vyonsi vino ningacita umu mulimo wakwe Yeova. Ntatazile inelenganyapo ukuti Yeova angansya, lelo nasakamile ndi cakuti ucuza wane na aliwe ulatala uzipepo nupya, nanti ndi cakuti ndamuombelapo wakwe vino namuombelanga uku cisila.”
18 Icazifileko icakuti umwina Michael atatoovwike. Watiile: “Nisile amano uku kuzifya ucuza wane na Yeova kupitila umu kumunena vino nayuvwanga, kuisambilizya, alino nu kwelenganyapo.” Mukuya kwa nsita, ya Michael izile iyayapeela imilimo nupya umu cilongano. Ndakai aa eluda nupya aa painiya ya nsita yonsi. Yalanzile ukuti: “Vino aina yankomelezyanga, sana sana ya eluda, vyangazwile ukumanya ukuti Yeova acili wantemwa. Nu kumanya ukuti ningaombela Yeova nupya umu cilongano na kampingu musanguluke. Ivyancitikiile vyansambilizya ukuti Yeova akaelela yayo aakalapila umu cumi.” Tungasininkizya ukuti Yeova alatuomvya nupya alatupaala nanti cakuti twaluvyanya, ndi cakuti sile twaombesya ukuzifya ukapepa witu nu kutwalilila ukumutaila.—Masa. 86:5; Mapi. 28:13.
19. Uzye ivyacitikiile Samusoni vyamukomelezya uli?
19 Umu cipande cii, itulandako pa vintu vimwi ivyacitikiile Samusoni. Ataali umumalilike; lelo atatiile ukwezya na maka ukuombela Yeova, na pa cisila ca kulonda Delila. Nupya Yeova watwalilile ukumuomvya. Waomvizye Samusoni nupya kwene umu nzila yakuzunguka. Yeova walolanga Samusoni ukuti u monsi wautailo ukome, nupya walenzile ukuti alembwe pamwi na antu yauze autailo aalumbulwa umu Aebele icipande 11. Cikatukomelezya sana ukumanya ukuti tukaombela Tata witu uwa kwi yulu uwaya nu kutemwa nupya aakalondesya ukutukomya, sana sana lino tukulondekwa uwazwilizyo. Fwandi wakwe Samusoni, lekini twapapata Yeova ukuti: “Njiusye, nupya mpeeko maka.”—Yakapi. 16:28.
LWIMBO NA. 3 Wewe Maka Itu, Wewe Twasintililamo
a Samusoni iizina lya muntu uwalembwa muli Baibo lino antu aingi sana yamanya, kumwi sile na antu aatamanya ivingi pali Baibo. Ilyasi lyakwe yakalilemba umu mulyasi, umu nyimbo, alino nu mu mafilimu. Lelo ilyasi lyakwe litazipa sile ukukutikako nanti ukubelenga. Kwaya ivingi vino tungasambililako uku monsi wii uwali nu utailo.
