U mulandu ci wino umonsi wiya walandiile ukuti wali nu ‘konona’ ica upyanyi cakwe ndi cakuti watwala Luti? (Luti 4:1, 6)

Mu nsita ino ivyalumbulwa muli Baibo vyacitikanga ndi cakuti umonsi wafwa ukwaula ukuvyala umwana, i vyani ivyali nu kucitika uku mpanga alino ni vikwata vino wakweti? Uzye izina lya lupwa lyali nu kulowa? Masunde Yakwe Mose yasukanga mauzyo yaa.

I vyani vyali nu kucitika uku mpanga ndi cakuti umonsi wafwa nanti wakazya impanga pa mulandu nu upina? Umwina wakwe nanti lupwa muze sile wali nu kumupyana nanti ukukala impanga iyo. Cii cali nu kulenga impanga iyo itwalilile ukuya iya lupwa.—Levi 25:23-28; Mpe. 27:8-11.

Uzye cayanga uli pakuti izina lya muntu uwatafwa litalowa? Umwina wa monsi watolanga umuci wakwe uwatafwa nu kumupyana, nupya vikwene avino cali na kuli Luti. Umwina wapyananga mama pakuti angavyalamo umwana uwa kupyana izina lyakwe wino atafwa nu kupyana ivyuma vyakwe. Isunde lii lyalenganga mukamfwilwa asakamalwa ningo.—Malan. 25:5-7; Mate. 22:23-28.

Elenganyini pali vino vyacitikiile Naomi. Watwazilwe kuli Elimeleki. Lino Elimeleki na ana yakwe yaili yafwile, Naomi wasiile sile wenga ukwaula uwa kumusakamala. (Luti 1:1-5) Pa cisila cakuti Naomi na nyinavyala Luti yaswilila uku Yuda, wanenyile Luti ukuti anene Boasi ukuti akale impanga iya. Boasi uwali ali lupwa mupalamisye wakwe Elimeleki. (Luti 2:1, 19, 20; 3:1-4) Nomba Boasi wamanyile ukuti kwali lupwa na muze uwali umupalamisye sana. Fwandi wiya kwene u walinzile kusoololapo nga wali nu kupyana nanti foo.—Luti 3:9, 12, 13.

Pa kutandika, umonsi wiya wazumiile ukupyana. (Luti 4:1-4) Wamanyile ukuti wali nu kusumba impiya izingi pa kukala impanga, nupya wamanyile nu kuti Naomi wali umukote icakuti ataali nu kuvyala umwana uwali nu kupyana impanga yakwe Elimeleki. Fwandi impanga iya yali nu kuya iyakwe, acino waweni ukuti ii yali inzila isuma iya kusungilamo ivyuma vyakwe.

Nomba umonsi wiya wizile akana ukukala impanga iya lino wizile amanya ukuti walinzile nu kupyana Luti. Watiile: “Ntanga nkwanisye ukukala impanga yii, pano ningonona ica upyanyi cane.” (Luti 4:5, 6, NWT.) I cani calenzile ukuti atawe ukukala impanga?

Ndi cakuti umonsi wiya atwala Luti nu kuvyala umwana umonsi, umwana wiya nga wapyanyile impanga yakwe Elimeleki. Uzye ukucita vivyo kwali nu kulenga aonone uli “icaupyanyi” cakwe? Baibo italandapo, nomba kufwile kwali milandu iyalenzile.

• Ca kutandikilako, ndi cakuti akala impanga yakwe Elimeleki nga ononyile sile impiya pa mulandu wakuti impanga iya itali nu kutwalilila ukuya iyakwe. Yali nu kuya iya mwana wakwe Luti.

• Cakwe ciili, wali nu kulasakamala Naomi na Luti nu kulayalondela ivyakulya.

• Cakwe citatu, ndi cakuti Luti akwata ana ku muntu wiya, nga yankine ivya upyanyi na ana yauze yano wakweti.

• Cakwe 4, ndi cakuti umuntu wiya atakweti ana, umwana wino wali nu kuvyala muli Luti wali nu kupyana impanga yakwe Elimeleki ni ya monsi kwene wiya. Fwandi ndi cakuti wafwa, impanga yakwe yali nu kupeelwa ku mwana uwakweti izina lyakwe Elimeleki asi lyakwe foo. Fwandi umonsi wiya atalondanga ukonona ica upyanyi cakwe uku kwazwa Naomi. Wasoolwilepo kuleka Boasi aliwe apyane. Boasi wacisile vivyo pa mulandu wakuti walondanga “izina lya muntu uwafwa litwalilile umu ina yakwe.”—Luti 4:10.

Cino umonsi wiya walondesyanga u kusungilila izina ni ca upyanyi cakwe. Wali na ukaitemwe. Nomba nanti cakuti umonsi wiya walondanga ukusungilila izina lyakwe, ndakai tutamanya ni zina lyakwe. Nupya wapanyizye ica upe cicindame cino Boasi wapokelile. Boasi wizile aya icikolwe umwafumile Mesiya, Yesu Klistu. Ivyacitikiile umonsi wiya vitazifile pa mulandu wakuti wali na ukaitemwes nupya atalondanga ukwazwa uwalondekwanga uwazwilizyo!—Mate. 1:5; Luka 3:23, 32.