1-2. I vyani vikacitika ilingi ndi cakuti antu yakubatiziwa, nupya i vyani vino mulinzile ukwelenganyapo?

 UZYE mwatala mwazanwako kuno antu yakubatiziwa? Lino yatatala yabatiziwa mukauvwa kuno yakwasuka mauzyo yaili ala yakuvwika ukuti iyasininkizya vino yakwasuka. Mukalola kuno ya lupwa yao ni vyuza yali ni nsansa. Lino aakubatiziwa yakufuma umu manzi, mukauvwa antu yakutoota ala yali sana nu luzango. Nupya cila mulungu antu aingi yakapingulapo ukuipeela nu kubatiziwa ukuya ya Nte yakwe Yeova Leza.

² Nga mwemo? Ndi cakuti mukwelenganyapo pa kubatiziwa, imucindama sana umu nsi ii ipe pa mulandu wakuti mukulonda Yeova. (Masa. 14:1, 2) Icipande cii cilembiilwe mwemwe asi mulandu mwemwe yance nanti akote. Nomba naswe kwene swemuno twabatiziwa mpiti tukalondesya ukutwalilila ukuombela Yeova manda pe. Fwandi lekini tulande pa vintu vitatu ivicindame ivingalenga tutwalilile ukuombela Yeova.

3. U mulandu ci uno aomvi yakwe Yeova yatemelwa ivya cumi ni vilungame? (Masamu 119:128, 163)

³ Yeova wanena antu yakwe ukutemwa ‘ivya cumi.’ (Zaka. 8:19) Yesu wanenyile alondezi yakwe ukulalondesya umulinganya. (Mate. 5:6) Cii cikupiliula ukuti umuntu alinzile ukulalondesya ukucita ivilungame, ivisuma nu kuya umusanguluke kuli Leza. Uzye mwatemwa ivya cumi nupya ivilungame? Twasininkizya ukuti mwavitemwa. Mwapata ivya ufi ni viipe. (Belengini Masamu 119:128, 163.) Umuntu aakabepa akakolanya Satana kateeka wa nsi ii. (Yoa. 8:44; 12:31) Cintu conga cino Satana akalondesya u kulanda iviipe api  zina lya muzilo lyakwe Leza. Satana watwalilila ukulanda ivya ufi pali Leza ukufuma sile lino antu ya kutandikilako yapondokiile Leza umu calo ca Edeni. Akaezya na maka ukulenga antu yaelenganya ukuti Yeova waya na ukaitemwe nupya a Kateeka aataya ni cisinka, aakakana ukupeela antu vino yalinzile ukukwata. (Utan. 3:1, 4, 5) Ufi uno Satana akabepa pali Yeova walenga antu yaelenganya iviipe pali aliwe. Ndi cakuti antu yasoololapo ukukanatemwa ‘ivya cumi,’ Satana angalenga yatwalilile ukulacita ivintu iviipe ivya misango yonsi.—Loma 1:25-31.

4. Uzye Yeova walangilila uli ukuti a “Leza wacumi”? (Lolini ni cikope.)

⁴ Yeova a “Leza wacumi” nupya akasambilizya icumi kuli yonsi amutemwa. (Masa. 31:5) Nga wacita vivyo akayazwa ukukanauvwila ufi wakwe Satana. Yeova nupya akasambilizya aomvi yakwe ukuya acisinka nupya alungame. Nga caya vivyo yakalola ukuti yacindama nu kuya nu mutende. (Mapi. 13:5, 6) Uzye vivyo vyatala vyamucitikilapo lino mukuisambilizya Baibo? Mwasambilila ukuti vino Yeova akacitila antu yonsi kumwi namwe kwene vyaya i vilungame. (Masa. 77:13) Fwandi mukalonda ukucita vino Leza akalola ukuti i vilungame. (Mate. 6:33) Mukanena antu icumi nu kusinila Satana pali vino akalanda pali Leza witu Yeova ukuti i vya ufi. Mungacita uli vivyo?

5. Mungacita uli pa kulenga yauze ukumanya icumi nu ulungami?

⁵ Mungasoololapo ukulaikala umi uwa kulangilila antu yonsi ukuti mukakana ufi wakwe Satana nu kutungilila icumi. Mungalanga ukuti mukalonda Yeova ukuya Kateeka winu nu kuti mukalonda ukucita vino walanda ukuti ali vilungame. Mungacita uli vivyo? Mungacita vivyo ndi cakuti mwapepa kuli aliwe nu kuipeela alino nu kupingulapo ukubatiziwa. Ukutemwa icumi nu ulungami ali cintu icingalenga umwi ukubatiziwa.

6. I vyani vino ilembo lya Masamu 45:4 likalandapo ivingalenga mutemwe Yesu Klistu?

⁶ I vyani vyalenga mutemwe Yesu Klistu? Lolini vimwi vingalenga ivyaya pa Masamu 45:4. (Belengini.) Yesu watemwa icumi, ukuicefya nu ulungami. Ndi cakuti mwatemwa icumi nu ulungami ale mwatemwa na Yesu Klistu. Elenganyini pali vino Yesu walenganga antu ukumanya icumi nu ulungami.  (Yoa. 18:37) Uzye lyene Yesu walangilila uli ukuti waicefya?

7. I vyani vino mwatemwa sana pali vino Yesu waicefya?

⁷ Yesu akalanga ukuti waicefya muli vino akacita. Wakwe, akalenga Yeova awino alumbanyiziwa asi aliwe foo. (Mako 10:17, 18; Yoa. 5:19) Uzye mukayuvwa uli pali vino Yesu waicefya? Uzye cii cikalenga mutemwe sana Yesu Umwana wakwe Leza nu kulamulondela? Ee. U mulandu ci uno Yesu waicefyezya? Apa mulandu wakuti watemwa sana Isi uwaicefya nupya akamukolanya. (Masa. 18:35; Aeb. 1:3) Uzye pa mulandu wakuti Yesu akakolanya imiyele ino Yeova wakwata, cisimulenga mupalame kuli aliwe?

8. U mulandu ci uno twayela ni nsansa vino Yesu ali Mwene witu?

⁸ Twatemwa Yesu Umwene witu pa mulandu wakuti a Kateeka musuma. Yeova umwineco wasambilizya Umwanakwe nu kumusoolola ukuya Kateeka. (Eza. 50:4, 5) Elenganyini na pali vino Yesu walanga ukuti wamutemwa. (Yoa. 13:1) Pa mulandu wakuti Yesu ali Mwene winu, akalonda ukuti mwamutemwa. Walondolwile ukuti yonsi aamutemwa yano akaama ukuti aacuza yakwe yakalanga ukuti yamutemwa lino yakuvwila masunde yakwe. (Yoa. 14:15; 15:14, 15) I syuko sana ukuya ya cuza ya Mwana wakwe Yeova.

9. Uzye vino Aina Klistu yakabatiziwa ndakai vyakolana uli na vino Klistu wabatiziwe?

⁹ Yesu wanenyile alondezi yakwe ukuti yalinzile ukubatiziwa. (Mate. 28:19, 20) Wayalangilile vino yalinzile ukubatiziwa. Ulubatizyo lwakwe Yesu lwapusanako nu lubatizyo lwa yalondezi yakwe muli vimwi. (Lolini kambokosi kakuti “ Upusano Uwaya pa Lubatizyo Lwakwe Yesu nu Lubatizyo Lwa yalondezi Yakwe.”) Lelo lwakolana muli vimwi. Lino Yesu wabatiziwe, waipeezile umwineco uku kucita ukulonda kwakwe Isi. (Aeb. 10:7) Mu nzila ili imwi kwene, na Ina Klistu kwene nga yabatiziwa ala yalangilila yonsi ukuti yaipeela aineco kuli Yeova Leza. Nomba icintu cicindamisye sana umu umi wao asi kucita ukulonda kwao, lelo u kucita ukulonda kwakwe Leza. Fwandi yakakolanya Umwene wao.

10. U mulandu ci uno ukutemwa Yesu kulinzile ukumulenga mubatiziwe?

¹⁰ Mwazumila ukuti Yesu u Mwana wakwe Yeova uwavilwe sile wenga nupya ali Mwene wino wasonta ukututeeka. Mwamanya ukuti waicefya nupya akakolanya Isi. Mwasambilila ukuti walisyanga aali ni nzala, kuteekezya aali nu ulanda nu kupozya alwale. (Mate. 14:14-21) Mwalola vino akatungulula icilongano cakwe ndakai. (Mate. 23:10) Nupya mwamanya ni vintu visuma vino alacita uku nkoleelo vino wene u Mwene wa Wene Wakwe Leza. Mungalanga uli ukuti mwamutemwa? Mungacita vivyo nga mukumukolanya. (Yoa. 14:21) Cino mungatandikilapo ukumukolanya u kuipeela kuli Yeova nu kubatiziwa.

11. U mulandu ci ucindamisye uno tulinzile ukubatiziwilwa, nupya u mulandu ci uno twalandila vivyo?

¹¹ U mulandu ci ucindamisye uno tulinzile ukubatiziwilwa? Yesu walangilile isunde lyakwe Leza ilicindamisye, watiile: “Uwatemwa Yeova Leza wako nu mwenzo wako onsi, nu umi wako onsi na mano yako yonsi na maka yako yonsi.” (Mako 12:30) Uzye amazwi yaa yakulondolola vino mwatemwa Leza?

12. U mulandu ci uno mwatemelwa Yeova? (Lolini ni cikope.)

¹² Kwaya imilandu iingi iyalenga tutemwe Yeova. Mwasambilila ukuti ali “ntendekelo ya umi” nupya “ica upe consi icisuma nupya icimalilike” cikafuma kuli aliwe. (Masa. 36:9;  Yako. 1:17) Ivisuma vyonsi vino mukaipakizya vikafuma kuli Leza uwaya nu kutemwa na ukapekape.

13. U mulandu ci uno ilambo lyakwe Yesu lyayela upe usuma sana?

¹³ Ilambo uupe usuma sana uno Yeova watupeela. U mulandu ci uno tungalandila vivyo? Elenganyini pali ucuza uwaya pali Yeova nu Mwanakwe. Yesu watiile: ‘Tata wantemwa’ nani “natemwa Tata.” (Yoa. 10:17; 14:31) Ucuza wao watandike mpiti sana lino yali pamwi pa myaka iingi sana. (Mapi. 8:22, 23, 30) Nomba elenganyini vino Yeova uvwile uyi lino wazumilizye Umwanakwe ukucuula nu kufwa. Yeova watemwa sana antu kumwi namwe kwene icakuti waitemiilwe ukupeela Umwanakwe wino watemwisya ukumufwila pakuti mwemo na yauze mukikale amanda pe. (Yoa. 3:16; Gala. 2:20) Ukwene ali mulandu ucindame uwalenga tutemwe sana Leza.

14. Uuyo ci ucindamisye uno mungimika?

¹⁴ Ukutemwa kuno mwatemwa Yeova kwakulilako pa mulandu wakuti mwasambilila ivingi pali aliwe. Mukalonda sana ukupalama kuli aliwe ndakai nupya manda pe. Nupya vivyo vingacitika. Akamukomelezya ukuti mwalenga umwenzo wakwe ukuzanga. (Mapi. 23:15, 16) Mungacita vivyo muli vino mukalanda na vino mukacita. Vino mukacita  vilalanga ukuti mu cumi mwatemwa Yeova. (1 Yoa. 5:3) Uu ali uyo ucindamisye uno mungimika.

15. Mungalanga uli ukuti mwatemwa Yeova?

¹⁵ Mungalanga uli ukuti mwatemwa Yeova? Ca kutandikilako, mulinzile ukupepa kuli Leza wa cumi wenga ukumunena ukuti mwaipeela kuli aliwe. (Masa. 40:8) Lyene mulinzile ukubatiziwa pa kulanga antu yonsi ukuti mwaipeela. Wakwe vino itusambilila mpiti umu cipande cii, ulubatizyo lwacindama sana umu umi nupya lungalenga muye ni nsansa. Nga mwabatiziwa ala mwatandika umi upya asi wakucita ukulonda kwinu, lelo u wakucita ukulonda kwakwe Yeova. (Loma 14:8; 1 Pet. 4:1, 2) Cingatutalila sana ukupingulapo ukucita vivyo nupya citanguka. Nomba ukucita vivyo kungalenga mwaipakizya umi. Cingaya uli vivyo?

16. Wakwe vino ilembo lya Masamu 41:12 likalanda, uzye Yeova alalambula uli antu akaipeelesya ukumuombela?

¹⁶ Yeova waya sana na ukapekape. Asi mulandu na vino mungamupeela ala alamuwezezya nu kucilapo. (Mako 10:29, 30) Alamupeela umi usuma nupya uwa nsansa uno mungaipakizya na pali ndakai umu nsi ii ipe. Nupya iyo i ntandikilo sile. Umi usuma uukatandika ndi cakuti mwabatiziwa utalinzile ukupeleela. Mungatwalilila ukuombela Tata winu wino mwatemwa amanda pe. Nupya mulatwalilila ukumutemelwako. Alino mulatwalilila ukuya nu umi amanda pe.—Belengini Masamu 41:12.

17. I vyani vino mungapeela Yeova vino atakwata?

¹⁷ Ndi cakuti mwaipeela kuli Leza nu kubatiziwa ala mwakwata isyuko ilya kupeela Tata winu icintu cimwi cicindamisye. Wamupeela ivintu vyonsi visuma, umi wa nsansa uno mukaipakizya ndakai. Fwandi naswe tungapeela Umwineco wi yulu ni nsi icintu cicindamisye cino atakwata kuli kuti ukuipeelesya ukumuombela na ucisinka. (Yobo 1:8; 41:11; Mapi. 27:11) Fwandi uu ali umi usuma sana uno mungaisoolwela. Ukwaula nu kutwisika, vino mwatemwa Yeova ali cintu cicindamisye icilalenga mubatiziwe.

18. A mauzyo ci yano mungayuzya?

¹⁸ Uzye mungasuka uli iuzyo lyakuti, Uzye mulabatiziwa? A mwemwe sile mungasuka iuzyo lii. Nomba cingamwazwa sana ndi cakuti mwayuzya mweineco ukuti ‘Uzye injipekanya ukubatiziwa?’ (Mili. 8:36) Iusyini ivintu vitatu vino itulandapo. Ica kutandikilapo mwatemwa ivya cumi ni vilungame. Mungayuzya mweineco ukuti, ‘Uzye nkalondesya ukwizazanwako lino antu yonsi yalalanda icumi nu kucita ivilungame? Cakwe ciili mwatemwa Yesu Klistu. Mungayuzya mweineco ukuti, ‘Uzye nkalonda Umwana wakwe Leza ukuya Umwene wane nupya uzye nkalonda ukumukolanya?’ Na cakwe citatu cicindamisye i cakuti, mwatemwa Yeova. Mungayuzya mweineco ukuti, ‘Uzye nkalonda ukuzanzya Yeova lino nkumuombela?’ Ndi cakuti mwasuka ukuti ee uku mauzyo yonsi, ale i cani cikumulesya ukubatiziwa? Uzye imuipekanya ukubatiziwa?—Mili. 16:33.

19. U mulandu ci uno mutalinzile ukusitookela ukubatiziwa? Langililini. (Yoani 4:34)

¹⁹ Ndi cakuti mukumusitooke ukubatiziwa, uvwini icilangililo cino Yesu wapeezile. (Belengini Yoani 4:34.) Yesu wakolinye ukucita ukulonda kwakwe Isi uku vyakulya. U mulandu ci? Ivyakulya vyacindama sana. Yesu wamanyile ukuti vyonsi vino Yeova akatunena ukucita i visuma kuli sweswe. Yeova asilonda tucite icili consi icingonona umi witu. Uzye Yeova akalonda ukuti mubatiziwe? Ee. (Mili. 2:38) Fwandi mungasininkizya ukuti ukuvwila isunde lii kungalenga ivintu vimuzipile sana. Ndi cakuti mutange musitooke ukulya ivyakulya vino mwatemwa, u mulandu ci uno mukusitookela ukubatiziwa?

20. I vyani vino tulasambilila umu cipande icilondelilepo?

²⁰ Uzye imuipekanya ukubatiziwa? Aingi yangasuka ukuti, “Ntatala naipekanya.” Icisinka i cakuti nga mwapingulapo ukuipeela kuli Yeova nu kubatiziwa ala mwapingulapo ukucita icintu cimwi icicindamisye. Fwandi mulinzile ukwelenganyapo sana lino mutatala mwapingulapo alino cikalondekwa ukuombesya nupya palinzile ukupita insita. Nomba ndi cakuti mukulondesya ukubatiziwa, i vyani vino mulinzile ukuipekanyizizya ndakai? Tulasuka iuzyo lii umu cipande icilondelilepo.