1-2. Ndi cakuti mukuyuvwa ukuti mutatala mwalinga ukubatiziwa, u mulandu ci uno mutalinzile ukutoovokela? (Lolini icikope icili pa nkupo.)

 NDI cakuti mukulondesya ukubatiziwa, mwimika uyo usuma sana. Uzye imuipekanya ukubatiziwa likwene? Ndi cakuti imuipekanya nupya ya eluda yakuzumilizya, mutalinzile ukusitooka ukubatiziwa pa kulongana ukulondelilepo. Lyene nga mwacita vivyo mulaipakizya umi usuma lino mukuombela Yeova.

² Uzye umwi watala wamunenapo ukuti mulinzile ukulunduluka lino mutatala mwabatiziwa? Nanti limwi avino mukaelenganya sile mweineco? Nga avino cili mutalinzile ukutoovoka. Mungalunduluka nu kubatiziwa asi mulandu mwemwe yance nanti mwemwe ikolo.

3. I vyani vino mutungwi Umwina Etiopia uzizye Filipi, nupya i uzyo ci lino tunguzya? (Milimo 8:36, 38)

³ Belengini Milimo 8:36, 38. Mutungwi Umwina Etiopia uzizye Filipi kakosoola ukuti: “I cani icikundesya ukubatiziwa?” Umonsi umwina Etiopia walondanga ukubatiziwa, nomba uzye waipekinye ukubatiziwa?

4. I cani calangililanga ukuti umonsi umwina Etiopia walondesyanga ukutwalilila ukusambilila?

⁴ Umonsi umwina Etiopia “waile uku Yelusalemu mu kupepa.” (Mili. 8:27) Fwandi afwile wazumile imipepele ya Ayuda. Ukwaula nu kutwisika wasambilile pali Yeova umu Malembo ya Ciebele aamuzilo. Nomba nanti ciye vivyo walondesyanga ukusambilila na vyuze. Nupya, i vyani vino Filipi wazanyile mutungwi akucita lino wamukomenkinye umu nzila? Wamuzanyile  akubelenga umu cimfungwa umu usesemo wakwe Ezaya. (Mili. 8:28) Cico cali i cumi ca muli Baibo icicindamisye. Mutungwi atalondanga ukusambilila sile masambililo ya kutandikilapo lelo walondanga ukutwalilila ukusambilila.

5. I vyani vino umwina Etiopia wacisile pali vino wasambilile?

⁵ Umonsi wii wapeezilwe amaka ukufuma kuli Namwene Kandake nupya aliwe “wangalilanga ivyuma vyakwe namwene vyonsi.” (Mili. 8:27) Fwandi afwile wapamviwe sana pano wakweti imilimo iingi. Nomba wapaatulangako insita ya kupepa Yeova. Nanti cakuti wasambilile icumi walolanga ukuti walondekwanga ukusambilila na vyuze, na cico calenzile aomvya viivi kwene vino wasambilile. Fwandi wapisile intamfu itali ukufuma uku Etiopia ukuya uku Yelusalemu pakuti sile akapepe Yeova. Ulwendo lulu lufwile lwalondekwanga sana insita ni mpiya nomba umonsi wiya walondesyanga ukupepa Yeova asi mulandu ni vyalondekwanga.

6-7. Uzye ukutemwa kuno umonsi umwina Etiopia watemilwe Yeova kwakulilangako uli?

⁶ Umwina Etiopia wiya wasambilile icumi icicindame nupya pali vino wasambilile pali ni cumi cakuti Yesu wali ali Mesiya. (Mili. 8:34, 35) Vino wasambilile pali vino Yesu wamucitiile vyamufisile pa mwenzo. I vyani vino wacisile pa cisila ca kusambilila icumi cii? Limwi nga watwalilile ukuya viivi kwene vino wali kuli kuti umuntu uwasenwike ukuya Umuyuda umucindikwe. Lelo watwalilile ukutemelwako Yeova nu Mwanakwe. Na cico calenzile apingulepo ukucita icintu icicindame umu umi kuli kuti ukubatiziwa nu kuya umulondezi wakwe Yesu Klistu. Filipi waweni ukuti umonsi wiya waipekanyizye ukubatiziwa, fwandi wamubatizye.

⁷ Ndi cakuti mwacita vino umonsi umwina Etiopia wacisile, mulaipekanya ukubatiziwa. Namwe kwene mulalanda wakwe vino umonsi umwina Etiopia walanzile ukuti, “Uzye i cani icikundesya ukubatiziwa?” Lekini lyene tulande pali vino mungacita vino umonsi umwina Etiopia wacisile, watwalilile ukusambilila, ukuomvya vino wasambililanga, alino nu kutwalilila ukutemelwako Leza.

8. I vyani vino Yoani 17:3 ikalanda ukuti avino mulinzile ukucita?

⁸ Belengini Yoani 17:3. Uzye amazwi yaa yakwe Yesu yamwazwile ukupingulapo ukutandika ukusambilila Baibo? Vikwene avino cali kuli sweingi. Uzye amazwi ali yamwi kwene yakalenga mutwalilile ukusambilila? Ee. Tutalata “ukumanya . . . Leza wa cumi wenga.” (Kasa. 3:11) Tulatwalilila ukusambilila  amanda pe. Ndi cakuti twatwalilila ukusambilila pali Yeova tulapalama sana kuli aliwe.—Masa. 73:28.

9. I vyani vino tulinzile ukucita pa cisila ca kusambilila masambililo ya kutandikilapo amuli Baibo?

⁹ Lino twatandika ukusambilila pali Yeova tukasambilila sile masambililo akutandikilapo amuli Baibo. Muli kalata ino umutumwa Paulo walembiile Aebele, wamanga masambililo yaa ukuti “visambilizyo vya kutandikilako.” Lelo atalozyanga umu kuti “visambilizyo vya kutandikilako” vitacindime lelo wavikolinye uku mukaka uukaazwa umwana ukuya nu umi usuma. (Aeb. 5:12; 6:1) Lelo umutumwa Paulo wanenyile Aina Klistu ukuti yalinzile ukutwalilila ukusambilila masambililo ya kutandikilapo nu kusambilila icumi cizike. Uzye mukulondesya ukutwalilila ukusambilila masambililo acindame amuli Baibo? Uzye mukulonda ukutwalilila ukulunduluka, ukusambilila pali Yeova nu kulonda kwakwe?

10. U mulandu ci uno yamwi cikayatalila ukuisambilizya?

¹⁰ Sweingi cikatutalila ukuisambilizya. Nga mwemo? Uzye uku sukulu mwaipakizyanga ukubelenga nu kuisambilizya ningo? Uzye mwaipakizyanga ukusambilila nu kuyuvwa ukuti imusambilila ivingi? Nanti limwi mwelenganyanga ukuti mutange musambilile nanti acimwi nga mukuisambilizya? Vivyo kwene avino antu aingi yakayuvwa. Nomba Yeova angamwazwa. Wamalilika nupya a Kasambilizya musuma.

11. Uzye Yeova walangilila uli ukuti a Kasambilizya Mukalamba?

¹¹ Yeova umwineco akayama ukuti nene Kasambilizya Winu Mukalamba. (Eza. 30:20, 21) A kasambilizya musuma, aakateeka umwenzo, uwaya ni cikuuku, nupya aakauvwikisya asambi yakwe. Akalolamo ivisuma umu yasambi yakwe. (Masa. 130:3) Nupya asienekela ukuti twacita vino tutange tukwanisye ukucita. Iusyini ukuti vino wapanga ongo ongo winu, uupe usuma sana. (Masa. 139:14) Tukalondesya ukusambilila. Kaumba witu akalonda twaipakizya nu kutwalilila ukusambilila manda pe. Fwandi icicindama ‘ukulondesya’ ukusambilila icumi ca muli Baibo ndakai. (1 Pet. 2:2) Mwaimika mauyo yano mungafikilizya nu kutwalilila ukubelenga nu kuisambilizya Baibo lyonsi. (Yoswa 1:8) Yeova alamwazwa ukulaipakizya ukubelenga nu kusambilila pali aliwe.

12. U mulandu ci uno tulinzile ukulaisambilizya pali Yesu alino na vino wacitanga?

¹² Mwakwata insita ya kwelenganya pali Yesu alino na pa mulimo uno waombanga. Cacindama sana kuli sweswe ukulacita vino Yesu wacitanga nga tukulonda ukulaombela Yeova sana sana umu nsita ii itale. (1 Pet. 2:21) Yesu wanenyile asambi yakwe ukwaula nu kupita umumbali ukuti yali nu kukwata ntazi. (Luka 14:27, 28) Nomba, wasininkizye ukuti yali nu kutwalilila ukuya acisinka kuli Yeova, wakwe vino wene wacisile. (Yoa. 16:33) Mwaisambilizya pa umi wakwe Yesu nu kwimika uyo uwa kulondesya ukulamukolanya umu umi winu onsi.

13. I vyani vino mulinzile kutwalilila ukulenga Yeova, nupya u mulandu ci?

¹³ Ukuya na mano asi ali cintu sile icicindamisye. Amano yakatwazwa ukusambilila ivingi pali Yeova nu kukwata imiyele wakwe ukutemwa Yeova alino nu kumutaila. (1 Kol. 8:1-3) Lino mukutwalilila ukusambilila, mwatwalilila ukulenga Yeova ukuti amwazwa ukuya nu utailo ukome. (Luka 17:5) Akaitemelwa ukwasuka mapepo ya musango uwo. Ukuya nu utailo uwasintilila pa mano aaya umwi Izwi lyakwe Leza kulamwazwa ukutwalilila ukulunduluka.—Yako. 2:26.

14. Uzye umutumwa Petulo walanzile uli pa mulandu uno cacindamila ukulaomvya vino tukusambilila? (Lolini ni cikope.)

¹⁴ Umutumwa Petulo walanzile sana pa mulandu uno cacindamila uku yalondezi yakwe ukulaomvya vino yakusambilila. Walanzile api lyasi lya muli Baibo ilikalanda pali Nowa. Yeova wanenyile Nowa ukuti wali nu kuomvya mulamba mukalamba ukonona antu yonsi aipe aliko pa nsita iya. Fwandi ukumanya sile ukuti kwali nu kuya mulamba kutaali nu kulenga Nowa nu lupwa lwakwe ukupusuka. Petulo walandanga pa nsita lino kutatala kwaya Mulamba mukalamba “lino iciwato cakuulwanga.” (1 Pet. 3:20) Mu cumi Nowa nu lupwa lwakwe yuvwilile Yeova lino yakuuzile iciwato icikulu. (Aeb. 11:7) Lyene Petulo wakolinye vino Nowa wacisile ku lubatizyo lino walemvile ati: “Ivyacitiike umu manda yaya vyakolana nu lubatizyo ulukumupususya ndakai.” (1 Pet. 3:21) Fwandi tungakolanya vino mukucita ndakai pa kuipekanya ukuti mukabatiziwe uku mulimo uno Nowa nu lupwa lwakwe yaomvile uwa kupanga iciwato. I vyani vino mulinzile ukucita pakuti muipekanye ukubatiziwa?

15. Uzye ukulapila kwa cumi cumi kukapiliula cani?

¹⁵ Ica kutandikilapo cino tulinzile ukucita u kulapila ku membu zitu. (Mili. 2:37, 38) Ndi cakuti umuntu walapila umu cumi akasenuka sana. Uzye mwata ukucita ivintu vino Yeova wapata wakwe ukuya ni miyele iipe, kupeepa nu kuomvya amazwi aipe? (1 Kol. 6:9, 10; 2 Kol. 7:1; Efes. 4:29) Ndi cakuti mutatala mwata ukucita vivyo, twalililini ukwezya ukusenuka. Munganenako akamusambilizya Baibo nanti ya eluda aaya mu cilongano cinu ukuti yamwazwe. Ndi cakuti mwemwe yance nupya mukaikala na avyazi, mungayanena ukuti yamwazwe ukuta ukuya ni miyele iipe iingalenga mutalinga ukubatiziwa.

16. I vyani vino tulinzile ukucita pakuti twaombela Yeova lyonsi?

¹⁶ Nupya cacindama sana ukwika amano uku kuombela Yeova lyonsi. Mu kucita vivyo mwaya nu kuzanwa ku kulongana kwa Ina Klistu nu kwasukapo. (Aeb. 10:24, 25) Nupya ndi cakuti mwafikapo ukulaomba umulimo wa kusimikila, mwaombako lyonsi. Nga  mukuombesya mu mulimo uu uukaazwa antu kupusuka, mulaipakizya. (2 Tim. 4:5) Ndi cakuti mwemwe yacance nupya mukaikala pa avyazi, muyuzye muti: ‘Uzye nkaloleela avyazi aliyo yanjiusyeko ukuti ndinzile ukuya umu kulongana nanti mu mulimo wa kusimikila? Nanti uzye nkaitandikilako sile nemwineco? Nga mukucita vivyo mulalanga ukuti mwakwata utailo nu kuti mwatemwa Yeova Leza nupya mukataizya pali vyonsi vino akamupeela. Kucita vivyo u kuipeelesya “umu kuombela Leza” nupya i vya upe vino mungapeela Yeova. (2 Pet. 3:11; Aeb. 13:15) Ivya upe vyonsi vino tukaitemelwa ukupeela Yeova vikamuletela insansa. Tukacita vivyo pa mulandu wakuti tukaya ni nsansa nga tukupeela Yeova ukufuma pansi ya mwenzo.

17-18. I miyele ci icindame sana ilamwazwa kulunduluka pakuti mubatiziwe, nupya u mulandu ci? (Mapinda 3:3-6)

¹⁷ Lino mukulunduluka pakuti mukabatiziwe, mulaakwata intazi. Antu yamwi yangamucuzya pa mulandu na vino imuzumila. (2 Tim. 3:12) Limwi mukaezya ukuta ukucita vimwi iviipe, nomba insita zimwi mukaswilizyapo kuvicita. Nanti limwi cikamutalila ukuloleela pa mulandu wakuti vino mukulondesya ukucita vili uku nkoleelo sana. I cani cingamwazwa ukuzizimizya? I miyele icindame sana, kuli kuti ukutemwa Yeova.

¹⁸ Ukutemwa Yeova ali miyele isuma sana ino mungakwata. (Belengini Mapinda 3:3-6.) Kutemwa sana Leza kulamwazwa ukutwalilila ukumuombela na lino muli ni ntazi. Baibo ilingi ikalanda pali vino Yeova watemwa aomvi yakwe. Kutemwa kuko ukwa cumi kukapiliula ukuti atalatala atazyele aomvi yakwe acumi nanti ukuta ukuyatemwa. (Masa. 100:5) Mwapangwa umu cata cakwe Leza. (Utan. 1:26) Mungacita uli pakuti mwalanga ukutemwa wakwe kuno Leza wakwata?

19. Mungalanga uli ukuti mukataizya pali vino Yeova wamucitila? (Galatiya 2:20)

¹⁹ Mwatandikilapo ukutaizya. (1 Tesa. 5:18) Cila wanda mwayuzya imuti, ‘Uzye Yeova atalanga uli ukutemwa kuli nene? Lyene mwasininkizya ukuti mwataizya Yeova mu mapepo inu lino mukulumbula umu kulungatika pali vyonsi vino watamucitila. Mwalola vino akumucitila ivikulanga ukuti wamutemwa, vino akumutungulula nupya mwailuka ukuti Yeova akamucitila vivyo pa mulandu wakuti wamutemwa wakwe vino cali ku mutumwa Paulo. (Belengini Galatiya 2:20.) Muyuzye muti,  ‘Uzye nani nkalonda ukulanga ukuti namutemwa?’ Ukutemwa Yeova kulamwazwa kutwalilila ukucimvya amezyo ni ntazi zyuze. Kulamwazwa ukutwalilila ukuombela Yeova lyonsi nu kulanga Tata winu ukuti mwamutemwa cila wanda.

20. I vyani vino mulinzile ukucita pa kuipeela kuli Yeova, nupya u mulandu ci uno cacindamila ukucita vivyo?

²⁰ Lino insita ikuya ikupita, ukutemwa kuno mwatemwa Yeova kulalenga mupepe ipepo iliiyele kuli aliwe. Mulaipeela kuli Leza. Iusyini ukuti nga mwaipeela kuli Yeova mulakwata upaalilo usuma. Mulatwalilila ukuya ya cuza yakwe amanda yonsi. Nga mwaipeela kuli Yeova ala mwalaya ukuti mulamuombela asi mulandu ivintu vizipe nanti ukwipa. Mutalalondekwa ukulaipeela cila nsita nupya. Fwandi nga twaipeela, ala twasoololapo ukucita icintu cicindame. Nomba elenganyini pali cii: Mulapingulapo pa vintu ivingi mu umi winu, vimwi vilaya ivisuma sana, lelo kutalatala kuye icintu cicindamisye ukucila pa kuipeela kuli Yeova. (Masa. 50:14) Satana alatwalilila ukwezya ukumulenga ukuta ukutemwa Tata winu nu kulenga mute ukuya akaele. Mutalinzile ukuleka Satana acimvye! (Yobo 27:5) Ukutemwa kuno mwatemwa sana Yeova kulamwazwa ukutwalilila ukumuombela amanda pe nu kutwalilila ukupalama kuli Tata winu uwa kwi yulu.

21. U mulandu ci uno tungalandila ukuti ulubatizyo asi mpela lelo i ntandikilo?

²¹ Nga mwaipeela kuli Yeova, munganena ya eluda mu cilongano cinu pa cintu na cuze cicindamisye cino mukulonda ukucita. Lyonsi mwaiusya ukuti ulubatizyo asi mpela foo lelo i ntandikilo. Ali ntendekelo ya kutandika ukuombela Yeova. Fwandi mwakomya ucuza winu na Tata winu ndakai. Mwaimika mauyo pakuti kutemwa kwinu kwakulilako cila wanda. Kucita vivyo kulalenga mubatiziwe. Nupya uwanda uwo ulazipa sana. Nomba ii ilaya i ntandikilo sile. Lekini kutemwa kuno mwatemwa Yeova nu mwanakwe kwatwalilila kukulilako sile amanda pe!