Awe foo. Vino Devedi walemvile apilembo lii vyali i vya cumi.

Lolini vino walemvile umu vikomo vii nu mu vikomo ivikolineko, watiile: “Namakwimbililanga inyimbo zyakukuwanzya pee na pee. Alino namafikilizyanga ni vilayo vyane amanda yonsi ndi muno nakulaile.” “Namakulumbanyanga nu mwenzo wane onsi. We Mwene we Leza wane, namakucindikanga pee.” “Ndalumbanya ni zina lyako amanda yonsi.”—Masa. 61:8; 86:12; 145:1, 2.

Lino Devedi walemvile amazwi yaa, atelenganyanga ukuti ataali nu kufwa. Wamanyile ukuti Yeova walanzile ukuti umuntu wensi wali nu kufwa pa mulandu nu luyembu nupya wamanyile nu kuti nawe kwene wali u muyembu. (Utan. 3:3, 17-19; Masa. 51:4, 5) Wamanyile nu kuti na antu yano Leza watemilwe wakwe, Abulahamu, Isaki na Yakobo yafwile. Nupya Devedi wamanyile ukuti nawe kwene wali nu kufwa. (Masa. 37:25; 39:4) Nomba amazwi aaya pa Masamu 61:8 yakalangilila vino walondesyanga ukulumbanya Leza manda pe kuli kuti lino acili nu umi.—2 Sam. 7:12.

Insita zimwi Devedi walembanga pali vino vyamucitikilanga wakwe vino tukalola pa Masamu 18, 51, na 52. Mu Masamu 23 Devedi walondolwile Yeova ukuti a kacema aakatungulula, ukuteekezya nu kucingilila imfwele zyakwe. Devedi wali a kacema wa musango kwene uwo. Nupya walondanga ukuombela Leza ‘amanda yonsi aumi wakwe.’—Masa. 23:6.

Mwaiusya nu kuti Yeova u walenzile Devedi ukulemba ivintu vyonsi vino walemvile. Pali vino walemvile paya na mausesemo aakalanda pali vino vilacitika uku nkoleelo. Wakwe, mu Masamu 110 Devedi walanzile pa nsita ino Umwene wakwe alikala “ukwi kasa lilunji” lyakwe Leza ukwi yulu nu kupeelwa maka. I vyani vino alacita? Alacimvya aalwani yakwe Leza nu kupingula amu nko zyonsi pano nsi. Devedi wali i cikolwe cakwe Mesiya, aalateeka ukufuma ukwi yulu nu kuya “simapepo wakuyelelela.” (Masa. 110:1-6) Yesu watiile usesemo uwaya pa Masamu 110 walandanga pali aliwe nupya wali nu kufikiliziwa uku nkoleelo.—Mate. 22:41-45.

Yeova watungulwile Devedi ukulemba pa nsita zyonsi zyoili kuli kuti insita ino wali nu umi ni nsita ya ku nkoleelo lino alatuutululwa nu kuipakizya ukulumbanya Yeova manda pe. Fwandi ilembo lya Masamu 37:10, 11, 29 lingalozya uku nsita ino lyalembwanga nu ku nsita ya ku nkoleelo kuli kuti vino amazwi aaya apilembo lii yafikiliziwe umu nsita ya Ina Izlaeli na vino yalafikiliziwa uku nkoleelo lino Leza alafikilizya malayo yakwe.—Lolini palaglafu 8 umu cipande cakuti “Ulaya Nani Umu Paladaise” icili muli magazini kwene ii.

Pa Masamu 61:8 na pa vikomo vyuze ivikolineko pakalangilila ukuti Devedi walondanga ukucindika izina lyakwe Yeova umu Izlaeli monsi umi wakwe onsi. Nupya yakalangilila vino Devedi alacita uku nkoleelo lino Yeova alamutuutulula.