Lino Yeova wanenyile antu kuti “Muvyalane muvule mulimbe insi yonsi nu kuyangalila” walangilile ukuti walondanga insi yonsi ukuya paladaise. (Utan. 1:28) Yayo aalapyana insi manda pe yalalondekwa ukuvwila isunde kwene lii lya pa kutandika. Pa kutandika insi italaya paladaise pa mulandu wakuti kutalaya icalo ca Edeni. Pa cisila sile ica Amagedoni, tulakwata imilimo iingi iya kuomba pakuti tukaziifye monsi muno insi yononeka. Kwene uu ulaya u mulimo ukulu sana.

Cii calenga twiusye umulimo uno Aina Izlaeli yali nu kuomba lino yaswililemo ukufuma uku Babiloni. Umu mpanga yao mutikalanga aliwensi pa myaka 70. Nomba Ezaya wasoowile ukuti Yeova wali nu kuyazwa ukuzifya impanga yao. Usesemo ukati: “Nanti angala impanga yao yononeka, nemo ndaisangula wa mpanga ino nacisile umu Edeni.” (Eza. 51:3) Yeova wazwilizye Aina Izlaeli ukulenga impanga yao ukuya isuma. Vikwene avino cilaya nu ku nkoleelo, Yeova alaazwa yayo aalapyana insi ukuilenga ukuya paladaise.  Nupya na ndakai kwene mungalanga ukuti mukalondesya ukwizaombako umulimo uu.

Inzila yonga ino mungacitilamo vivyo u kwezya na maka ukusunga ing’anda inu iya usaka. Mungacita vivyo nanti cakuti yano mwapalamana nayo yasicita vivyo. Nupya mungazwilizyako ukuzifya ing’anda inu iya Wene nanti Cikuulwa ca Ukongano. Ndi cakuti mungakwanisya, mungalenga nu kulaazwilizyako ndi cakuti kwacitika uzanzo. Ukucita vivyo kulalanga ukuti mukalonda ukwazwa aina na ya nkazi aakulondekwa uwazwilizyo. Mungasambililako imilimo imwi ino mukulola ukuti mungiza mwaomba ndi cakuti Yeova wamuzumilizya ukwizaikala pano nsi manda pe.

Yesu walanzile ukuti yapeele mwana Yailo ivyakulya pa cisila ca kumutuutulula. (Mako 5:42, 43) Uu utali nu kuya umulimo ukome uwa kusakamala akakazyana ka myaka 12. Nomba tale elenganyini pa milimo ino tulaalondekwa ukuomba lino Yesu alafikilizya ulayo wakwe uwakuti: “Yonsi aya umu malindi yaliusiwa nupya yaluvwa izwi lyakwe nu kufumamo.” (Yoa. 5:28, 29) Nanti cakuti Baibo italanda ivingi pa vilacitika, tungamanya ukuti alatuutululwa yalalondekwa ivyakulya, umwakwikala ni vyakuzwala. Uzye mungalanga na ndakai ukuti mwaipekanya ukwizaazwilizyako? Mungelenganyako pa mauzyo yaa.

Ndi cakuti muvwa icimanyisyo cakuti umwangalizi wa ciputulwa alatandalila icilongano cinu, uzye mukaipeelesya ukumwamako uku cakulya? Ndi cakuti aya umu mulimo wa nsita yonsi yapeelwa imilimo yuze wakwe ukufuma pa Betele nu kuya umu kuomba upainiya nanti umwangalizi wa ciputulwa wata ukuomba umulimo wa kutandalila ivilongano, uzye mungayazwilizyako ukuzana umwakwikala? Ndi cakuti ku ncende inu kulaya ukongano wa citungu nanti uiyele, uzye mungaombako imilimo iikalondekwa lino ukongano utatala watandika nanti pa cisila ca ukongano nanti ukuipeelesya ukupokelela aenyi?

Ukulingana na Milimo 24:15, tukaenekela ukuti antu imintapendwa yalatuutululwa. Aingi pali yayo antu aatakweti isyuko lya kumanya Yeova. Nomba yalakwata isyuko lya kucita vivyo pa cisila ca kutuutululwa. a Aomvi aombela Leza pa myaka iingi nupya acisinka yalaombako umulimo uu uwa kusambilizya. (Eza. 11:9) Nkazi Shaloti uwaomba umulimo wa kusimikila umu Europe, mu South America, nu mu Africa akalondesya ukuti insita iyo ikafike. Akati: “Nkalondesya insita ikafike lino kulaya umulimo wa kusambilizya antu aalatuutululwa. Nga nabelenga pa antu yamwi aaliko mpiti, ilingi nkaelenganya ukuti: ‘Ndi cakuti umuntu wii wamanyile Yeova, umi wakwe nga utali vino wali.’ Nkalondesya ukwizanena antu aalatuutululwa pali Yeova ni visuma ivyali nu kuyacitikila ndi cakuti yasoololapo ukumuombela.”

Nanti sile aomvi yakwe Yeova acisinka aliko lino Yesu atatala wiza pano nsi yalalondekwa ukusambilila ivintu ivingi. Elenganyini pali vino tulaya ni nsansa na vino tulayuvwa ukulondolwela Danieli vino usesemo uno wasoowile wafikiliziwe umu manda itu nanti cakuti atauvwikisye sana. (Dan. 12:8) Nupya cilazipa sana ukwazwa Luti na Naomi ukumanya ukuti umu lupwa lwao u mwafumile ivikolwe vyakwe Mesiya. Tulaipakizya ukusambilizya antu umu nsi yonsi ukwaula ivyakutupumvyanya ivyayako ndakai umu nsi iipe.

I vyani vino mulinzile ukucita ndakai pa kuipekanyizizya ukwizasambilizya alatuutululwa? Inzila yonga u kuzifyako imisambilizizye itu pakuti tuye ya kasambilizya yasuma nu kulasimikila lyonsi. (Mate. 24:14) Nanti icakuti mutanga musimikile ukulingana na vino mukulonda pa mulandu nu musinku nanti vyuze, mungalanga ukuti mukalondesya ukwizasambilizya antu aalatuutululwa nga mukuomba ukulingana papezile amaka inu.

Icicindama ukuyuzya amauzyo yaa acindame sana a kuti, uzye imuipekanya ukwizaikala umu nsi ipya? Uzye mukalonda ukwizaombako umulimo wa kuzifya insi nu kusambilizya alatuutululwa? Mungalanga ukuti imupekanya ukwizaikala umu nsi ipya ndi cakuti mukuomvya insita yonsi ino mwasyukila ukuombako imilimo ino mulaomba umu nsi ipya.