1. I cani cikatulenga ukuya sana nu luzango?

 YEOVA akalonda ukuti twaya ni nsansa. Twamanya vivyo pano uluzango lwaya pa miyele iikafuma uku mupasi wa muzilo. (Gala. 5:22) Vino umu kupeela mwaya insansa izingi ukucila izyaya umu kupokeelela, tukaya sana nu luzango lino tukuombesya mu mulimo wa kusimikila nu kwazwa aina na ya nkazi mu nzila izipusanepusane—Mili. 20:35.

2-3. (a) Ukulingana na Galatiya 6:4, i vintu ci viili ivingatwavwa ukutwalilila ukuya nu luzango lino tukuombela Yeova? (b) I vyani vino tumasambilila umu cipande cii?

² Pali Galatiya 6:4, mutumwa Paulo walanzile pa vintu viili ivingatwazwa ukutwalilila ukuya nu luzango. (Belengini.) Ica nkoleelo, tulinzile ukulalondesya ukuombela Yeova kulingana na vino tungakwanisya. Fwandi nga tukumuombela apapezile amaka itu tungaya ni nsansa. (Mate. 22:36-38) Cakwe ciili, tutalinzile ukulailinganya kuli yauze. Fwandi imilimo yonsi ino tungakwanisya ukuomba pa mulandu na vino umi witu waya, vino twasambilila nanti milimo ino twamanya, tulinzile ukulataizya Yeova pa milimo iyo. Alino vyonsi vino twakwata vyafuma kuli aliwe. Nupya ndi cakuti yauze yakaomba ningo umulimo wa kusimikila kutucila, tulinzile ukuya nu luzango ukuti yakuomvya imilimo ino yamanya ku kulumbanyizizyamo Yeova, asi pakuti yauze yayataizya nanti pa mulandu na ukaitemwe. Fwandi ukucila ukulacimvyanya nayo, tulinzile ukusambilila kuli vino yakaomba.

³ Mu cipande cii, tumalola ivingatwavwa ukutwalilila ukuya nu luzango nanti cakuti tukufilwa ukuomba imilimo imwi ino tukalondesya kuomba mu mulimo wakwe Leza. Nupya tumasambilila pali vino tungaomvya ningo ivya upe vino twakwata alino na vino tungasambilila kuli yauze.

4. I vyani ivingalenga ukuti tutoovoke? Langililini.

⁴ Aomvi yakwe Yeova yamwi cikayatalila ukuombela Yeova ukulingana na vino yakulonda pa mulandu nu kukota nanti kulwalilila, na cii cikalenga yayuvwa kutoovoka. Vikwene i vyacitikiile ya Carol. Ya Carol yaombiilepo ukukalondekwa ya kasimikila aingi. Nupya pa nsita iya yatungulula masambililo ya Baibo 35, alino yazwilizye antu yamwi ukulunduluka cakuti iyaipeela nu kubatiziwa. Fwandi ya Carol yaombanga ningo umulimo wa kusimikila! Lyene izile iyalwala sana nupya insita ikulu ikalanga sile pa ng’anda. Ya Carol yalanzile iyati: “Pa mulandu nu kulwalilila ntanga nkwanisye ukuomba imilimo yonsi ino yauze yakaomba, lelo nkayuvwa ukuti yakwata utailo ukuncila. Kwene nkalonda ukuombesya lelo ntanga nkwanisye ukuomba vyonsi vino nkulonda, nupya cico cikalenga nayuvwa ukutoovoka.” Ya Carol yakalonda kuombela sana Yeova. Icumi kwene kucita vivyo kwaya ningo sana! Nupya tungasininkizya ukuti Leza witu uwaya ni cikuuku akataizya sana pa kuombesya kwao.

5. (a) I vyani vino tulinzile ukwiusya ndi cakuti tukuvwa ukutoovoka pa mulandu wakuti tutanga tuombe vimwi? (b) Kulingana na vino icikope cikulangilila, uzye umwina atalangilila uli ukuti akalonda ukuombela Yeova na maka yakwe yonsi?

⁵ Ndi cakuti insita zimwi mukayuvwa ukutoovoka pa mulandu wakuti mutanga mukwanisye ukuomba milimo imwi, mwayuzya ukuti, ‘I vyani vino Yeova akaenekela kuli nene?’ Akaenekela ukuti, mwaomba ukulingana na vino mungakwanisya. Elenganyini pa cilangililo cii: Nkazi ali ni myaka 80 akuvwa ukutoovoka pa mulandu wakuti asikuomba umulimo wa kusimikila wakwe vino waombanga lino wali ni myaka 40. Akwelenganya ukuti nanti cakuti akuombesya ukulingana na vino angakwanisya, kucita vivyo kusikuzanzya Yeova. Nomba uzye cico i ca cumi? Elenganyini pali vii. Ndi cakuti lino nkazi wii wali ni myaka 40 waombanga ukulingana na vino angakwanisya, nupya na lino aali ni myaka 80 kwene akuomba ukulingana na vino angakwanisya, ale ataaleka ukuombesya kulingana na papezile amaka yakwe. Fwandi nga tukuyuvwa ukuti imiombele itu isikuzanzya Yeova, tulinzile ukwiusya ukuti Yeova kwene u walanda ukuti twamuombela ukulingana na papezile amaka itu. Nupya ukucita vivyo kukamuzanzya. Acino nga tukuombesya apapezile amaka itu, Yeova alatuneena ati: “Wacita ningo!”—Loliniko na Mateo 25:20-23.

6. I vyani vino tungasambilila kuli ya Maliya?

⁶ Cingatwangukila ukuya nu luzango ndi cakuti tukwika amano kuli vino tungakwanisya asi kuli vino tutanga tukwanisye. Elenganyini pali nkazi Maliya uwakwata indwala iikalenga ukuti ataombesya umu mulimo wakwe vino waomba mpiti. Pa kutandika wasakamikwanga sana nupya wayuvwanga ukuti atacindama. Lyene wizile alola nkazi umwi uwa mu cilongano uwalwile sana icakuti walaalanga sile, fwandi nkazi Maliya wasoolwilepo ukumwazwa. Ya Maliya yalondolwile iyati: “Napekinye ukuti twaombela pamwi na nkazi wii umu mulimo wa kusimikila ukuomvya foni na makalata. Lyonsi lino naombela pamwi na nkazi wii umu mulimo wa kusimikila nayanga ni nsansa ukumanya ukuti inazwilizyako nkazi yane ukuomba umulimo.” Naswe kwene tungaya sana nu luzango ndi cakuti tukwika mano kuli vino tungakwanisya ukuomba asi kuli vino tutanga tukwanisye. Nomba nga ndi cakuti kwaya sile imilimo imwi ino twamanya ukuomba ningo sana umu mulimo wakwe Yeova?

7. U kusunda ci kuno umutumwa Petulo wapeezile aina Klistu?

⁷ Muli kalata iya kutandikilapo ino umutumwa Petulo walemvile, wakomelizye aina yakwe ukulaomvya ivya upe vyonsi vino yakweti alino ni milimo yonsi ino yamanyile uku  kukomelezezyako aina Klistu yauze. Petulo walemvile ukuti: “Ukulingana ni ca upe cino cila muntu wapokelela, mwaciomvya ku kuombela yauze wa yaomvi asuma yano Leza walanga icikuuku cikulu.” (1 Pet. 4:10) Tutalinzile ukulasitooka ukuomvya sana uupe onsi uno twapeelwa pa mulandu nu kwelenganya ukuti yauze yangauvwa uzuwa nanti yangatoovoka. Ukucita vivyo kungalenga ukuti tutazanzya Yeova ukulingana na vino tukulonda.

8. Kulingana na 1 Kolinto 4:6, 7, u mulandu cino uno tutalinzile ukuyeela ni cilumba pa mulandu nu upe uno twapeelwa?

⁸ Kwene tulinzile ukulaomvya sana ivya upe vino twapeelwa, lelo tulinzile ukucenjela pakuti ivya upe vivyo vitalenga twaya ni cilumba (Belengini 1 Kolinto 4:6, 7.) Wakwe, limwi mwamanya ningo sana ivya kutandika amasambililo ya Baibo. Mutalinzile ukusitooka ukulaomvya ica upe cico. Lelo mulinzile ukucenjela pakuti mutaya ni cilumba pa mulandu ni ca upe cico. Tuti limwi kwali ivisuma vimwi ivyamucitikiile lino mwali umu mulimo icakuti mutandika ni sambililo lya Baibo ku muntu umwi. Kwene mungalondesya ukuneena aa mwi iumba lino mwayamo pa visuma vivyo. Lelo lino mwaya mwakomaana ukwi iumba muvwa nkazi umwi akulondolola vino wasiliile umwi magazini lino wali umu mulimo. Fwandi nkazi wiyo wasiliile umwi magazini; lelo mwemo mwatandike isambililo. Uzye mungacita uli nga caya vivyo? Kwene ukunenako aa mwi umba ivyamucitikiile, kungayakomelezya. Lelo limwi mungasoololapo ukukanalandapo pa nsita iyo nu kuca landapo pa nsita yuze pano ala musikulonda ukuti nkazi uwasiliile sile umwi magazini atayuvwa ukuti asiomba ningo umulimo. Iyo ingaya inzila iya kulangilamo icikuuku. Lelo mutalinzile ukuta ukutandika masambililo ya Baibo, mwakwata ica upe, fwandi mwaciomvya!

9. Uzye tulinzile ukuomvya uli ivya upe?

⁹ Tulinzile ukulaiusya ukuti ivya upe vyonsi vino twakwata, vyafuma kuli Leza. Tulinzile ukuviomvya uku kukomelezezyako aa mu cilongano asi ukuilumbanyizizyako. (Filipi 2:3) Nga tukuomvya amaka itu ni milimo ino twamanya uku kucita ukulonda kwakwe Leza, tulaya ni nsansa pa mulandu wakuti ala tukuomvya ivya upe vino twakwata uku kulumbanyizizyako Yeova asi kuilinganya kuli yauze.

10. U mulandu ci uno ciipila ukuilinganya kuli yauze?

¹⁰ Ndi cakuti umuntu atacenjile, angatandika ukulinganya vino akaomba ningo kuli vino yauze yasiombamo ningo. Wakwe, umwina angalanda ningo sana amalyasi ya ku yantu yonsi. Nupya uwo uupe uno wakwata. Lelo limwi angatandika ukwelenganya ukuti wacindama ukucila umwina asilanda ningo malyasi. Lelo umwina wiyo  asilanda ningo malyasi, limwi nawe akaombesya ukupokelela aenyi, kusambilizya ana yakwe, nanti limwi akaombesya umu mulimo wa kusimikila. I syuko sana ukukwata aina na ya nkazi aingi amanyikisya ukuomba imilimo imwi, nupya akaomvya upe uno yakwata uku kuombela Yeova alino nu kwazwa antu yauze!

11. U mulandu ci uno tulinzile ukukolanyizizya Yesu?

¹¹ Nanti cakuti tutalinzile ukulailinganya kuli yauze, tungasambilila ivingi uku yaomvi acisinka yakwe Yeova. Wakwe, lekini tulandeko pali Yesu. Nanti icakuti wene wali umumalilike kwaya ivingi vino tungasambilila uku miyele yakwe ni vintu vino wacitanga. (1 Pet. 2:21) Nga tukwezya na maka itu yonsi ukumukolanya tukaya aomvi asuma yakwe Yeova, nupya tukatandika ukuomba ningo umulimo wa kusimikila.

12-13. I vyani vino tungasambilila uku Mwene Devedi?

¹² Mwi Izwi Lyakwe Leza, tukazanamo aonsi na anaci aali acisinka yano tungakolanya nanti cakuti yatali amaliilike. (Aeb. 6:12) Elenganyini pa Mwene Devedi wino Yeova wamile ukuti “muntu uno umwenzo wane watemwa” nanti, wakwe vino Mabaibo yauze yasenula ukuti, “umuntu akanzanzya sana.” (Mili. 13:22) Lelo, Devedi ataali umumalilike. Alino insita zimwi waluvyanyanga sana. Lelo asi mulandu na vivyo, kwaya vino tungasambilila kuli aliwe. U mulandu ci? Pano lino yamulungikanga ataipokololanga. Lelo wapokelelanga ukusunda nu kulenga uweleelo ukufuma pansi ya mwenzo. Na cii calenzile ukuti Yeova amweleele.—Masa. 51:3, 4, 10-12.

¹³ Tungasambilila kuli Devedi nga tukuyuzya sweineco amauzyo yaa: ‘Uzye nkacita uli nga yandungika? Uzye nkazumila ukuti induvyanya nanti nkatandika ukuipokolola? Uzye nkatandika ukupeela yauze imilandu? Uzye nkaezya na maka yane yonsi ukukanacitapo iviipe ivili vimwi kwene?’ Mungayauzya mauzyo ali yamwi kwene, na lino mukubelenga pa onsi na anaci yauze acisinka alembwa muli Baibo. Uzye yakweti intazi izili zimwi na zino mwakwata? I miyele ci ino yaakweti? Lyonsi kwene mwayuzya ukuti: ‘Ningakolanya uli aomvi yaa yakwe Yeova aali na ucisinka?’

14. Uzye ukusambilila kuli ya kapepa yanji kungatwazwa uli?

¹⁴ Nupya kwaya ivingi vino tungaipakizya ndi cakuti tukusambililako kuli ya kapepa yanji yaye aikolo nanti ance. Wakwe, uzye mungelenganyako pali umwi uwaya umu cilongano cinu uwatwalilila ukuya uwa cisinka nanti auze yakamupatikizya ukucita iviipe, ya lupwa yakamuzunya, nanti akalwalilila? Uzye kwaya imiyele imwi isuma ino umuntu wiyo wakwata ino mungatemwa ukukwata? Ndi cakuti mukusambilila uku muntu  wiyo mungalola inzila izisuma izingamwazwa ukuzizimizya intazi. Tukataizya sana pa kukwata aina yaa na ya nkazi akwata utailo uno tungakolanya!—Aeb. 13:7; Yako. 1:2, 3.

15. U kusunda ci kuno umutumwa Paulo wapeezile ukukatwavwa ukuya nu luzango lino tukuombela Yeova?

¹⁵ Swensi kwene tulinzile ukwezya apapezile amaka itu pakuti umu cilongano mwaya umutende nu kulemana. Elenganyini pa vyacitikile aina Klistu aakutandikilapo. Yakweti ivya upe ivipusanepusane ni milimo. (1 Kol. 12:4, 7-11) Lelo vivyo vitalenzile yatandike kucimvyanya nanti ukulwisyanya. Nupya, Paulo wayakomelizye ukuti yonsi kwene yalinzile ukucita ivikalondekwa pa “kukuula umwili wakwe Klistu.” Paulo walembiile aina Efeso ukuti: “Ndi cakuti cila cilundwa cikuomba ningo, cikalenga umwili onsi ukukula pakuti uye ukome umu kutemwa.” (Efes. 4:1-3, 11, 12, 16) Antu yonsi acitanga vivyo yalenganga umu cilongano ukuya mutende nu kulemana, imiyele ino tukalola umu vilongano vya ina Klistu ndakai.

16. I vyani vino tulinzile ukulalondesya ukucita? (Aebele 6:10)

¹⁶ Mutaezya ukuilinganya kuli yauze. Lelo mwasambilila kuli Yesu nupya mwatwalilila ukukolanya imiyele yakwe. Mwasambilila uku yantu aali nu utailo alembwa muli Baibo alino na ayako ndakai. Nupya lino mukutwalilila ukuombesya papezile amaka inu, mwaiusya ukuti, Yeova “asi wa lufyengo uwakuti ailile umulimo winu.” (Belengini Aebele 6:10.) Twalililini ukuya nu luzango lino mukuombela Yeova pano akataizya sana pali vino mukaombesya pakuti mwamuzanzya.