Umulapo yakaulondolola ukuti, “aamazwi ya mucinzi nanti ulayo uno umuntu akalaya ukuti alacita ivintu vimwi, nupya ilingi ala akulumbula na Leza ukuti aali kamboni.” Nupya umulapo ungaya uulembe nanti uwa kulanda sile.

Antu yamwi yakaelenganya ukuti citaya ningo ukulapa pano Yesu walanzile ati: “Utalinzile ukulapa [umulapo] . . . Lekini ‘Ee’ winu aye ee, na ‘Awe’ winu aye awe, pano ivyacila pali vii vikafuma uku mwipe.” (Mate. 5:33-37) Ukuya kwene, Yesu wamanyile ukuti Masunde Yakwe Mose yazumilizye antu ukulapa imilapo, na aomvi yakwe Leza acumi yalaapanga imilapo. (Utan. 14:22, 23; Kufu. 22:10, 11) Nupya wamanyile nu kuti na Yeova kwene walafile imilapo. (Aeb. 6:13-17) Fwandi Yesu atalandanga ukuti tutalinzile ukulapa imilapo ili yonsi. Lelo wacelulanga antu ukuti yatalinzile ukulapa na pa vintu ivitacindime. Tulinzile ukulaika sana amano kuli vino twalapa pano Yeova akalonda ukuti twacita vino twalapa.

Uzye lyene i vyani vino mulinzile ukucita nga yamuneena ukuti mulape umulapo? Ca nkoleelo, mwasininkizya ukuti mulafikilizya vino mwalapa ukuti mulacita. Cingazipa ukukanalaya ndi cakuti mutamanyile ningo nga mungafikilizya umulapo uwo nanti foo. Izwi Lyakwe Leza likatucelula ukuti: “Caziipa ukuntalaya kuluta kulaya nga lyene uposiwa nu kufikilizya.” (Kasa. 5:5) Lyene, mwalondelezya ivisinte ivyaya muli Baibo ivikalanda pali vino iyamuneena ukulapa alino imupingulapo ukulingana na vino kampingu inu iyasambiliziwa ningo ikumuneena. I visinte cii vimwi vivyo kwene?

Imilapo imwi ikauvwana nu kulonda kwakwe Leza. Wakwe, ya Nte Yakwe Yeova lino ya kutwalana yakalayana. Malayo yaayo nayo kwene i milapo. Siwinga na nawinga yakalapa pa manso yakwe Leza na antu ukuti, yalasungilila icupo cao, kutemwana, nu kucindikana “amanda yao yonsi aumi.” (Antu yamwi lino yakutwalana yasilanda amazwi yaayo, lelo nayo kwene yakalapa kuli Leza.) Lyene antu yaayo yakaya iya nu umuci nupya yalinzile ukutwalilila ukuya umu cupo amanda yonsi ya umi wao. (Utan. 2:24; 1 Kol. 7:39) Imilapo ino antu yakalapa lino yakutwalana yacindama nupya ikauvwana nu kulonda kwakwe Leza.

Imilapo imwi isiuvwana nu kulonda kwakwe Leza. Umwina Klistu wa cumi atanga alape imilapo imwi, wakwe, ukulapa ukuti alacingilila impanga ino akaikalamo ukuomvya ivyanzo nanti ukuta ukuya nu utailo muli Leza. Pano ukucita vivyo kusiuvwana na masunde yakwe Leza. Swe ina Klistu tutalinzile ukuya antu “aa mu nsi,” fwandi tutalinzile ukulacita ivikanza nanti ukuya umu ulwi.—Yoa. 15:19; Eza. 2:4; Yako. 1:27.

 Umwina Klistu alinzile ukuomvya kampingu yakwe nga angalapa imilapo imwi nanti foo. Insita zimwi nga tukusoololapo nga tungalapa umulapo umwi nanti foo, tulinzile ukulondela ukusunda kwakwe Yesu ukwakuti, “peelini vyakwe Kaisale kuli Kaisale na vyakwe Leza kuli Leza.”—Luka 20:25.

Katulangilile, tuti umwina Klistu akulonda ukukukila uku mpanga yuze nanti ukukopa icitupa cakuilapo uku mpanga yuze lyene wazana ukuti afwile ukulapa ukuti alatwalilila ukutungilila nu kuya uwa cumi ku uteeko wa mu mpanga iyo. Ndi cakuti umu mpanga iyo umuntu uwalapa umulapo uwo ala alaacita vintu ivisiuvwana na masunde yakwe Leza, umwina Klistu angaomvya kampingu iyasambiliziwa na Baibo pa kusoololapo nga angalapa nanti foo. Lelo limwi uteeko ungamuzumilizya ukukanalanda amazwi yamwi aalembwa umu mulapo uo pakuti alape ukulingana na vino kampingu yakwe ikumuzumilizya.

Nga wacita vivyo, cingalanga ukuti muntu wiyo akulondela icisinte icaya pali Loma 13:1, apakati: “Umuntu wensi afwile auvwila ya kateeka.” Fwandi cili sile ningo uku mwina Klistu ukulapa pa vintu vino Leza wazumilizya mpiti aina Klistu ukuti yalinzile ukucita.

Nupya cacindama sana ukuvwila kampingu iyasambiliziwa ningo na Baibo ndi cakuti yamuneena ukuomvya cimwi nanti ukucita ivintu vyuze lino mukulapa umulapo. Aina Loma na antu aa ku mpanga zyuze yaomvyanga ulupanga lino yakulapa pa kulangilila ukuti yaataile sana leza wa nkondo. Agiliki nayo iimikanga ikasa umupela lino yakulapa. Yacitanga vivyo pa kulangilila ukuti iyamanya ukuti kwaya leza uwika amano kuli vino yakulanda na vino yakucita, nupya leza kwene wiyo aakapingula antunze.

Kwene umuomvi wakwe Yeova atalinzile ukulapa uku cintu icili consi ica mu mpanga imwi icikauvwana nu kupepa kwa ufi. Nomba nga ndi cakuti aa mu cilye yamuneena ukuti mwike ikasa pali Baibo nu kulapa ukuti mumapeela unte uwa cisinka? Nga caya vivyo limwi mungasoololapo ukucita vivyo kwene, pano muli Baibo mwaya antu aali ni cisinka aomvizye amakasa alino nu kucita ivintu vyuze lino yalapanga. (Utan. 24:2, 3, 9; 47:29-31) Cacindama sana ukwiusya ukuti lino mukulapa umulapo uwo, ala mukulapa pa manso yakwe Leza ukuti mulalanda ivya cumi. Fwandi mulinzile ukuipekanya ukuya acumi lino mukwasuka amauzyo yonsi yano yangamuzya.

Pa mulandu wakuti twacindika sana ucuza witu na Yeova, tulinzile ukupepa nu kwelenganyapo ndi cakuti yatuneena ukulapa umulapo umwi, nupya tulinzile ukusininkizya ukuti ukucita vivyo kutamaonoona kampingu itu nanti kupusana ni visinte ivya muli Baibo. Nga mwasoololapo ukulapa umulapo mulinzile ukusininkizya ukuti mulafikilizya.—1 Pet. 2:12