Mauzyo Yano Aakabelenga Yakauzya
Ndi cakuti umwina Klistu wasoololapo kuta umuci wakwe pa mulandu usi uwa mu Malembo nu kutwala muze, uzye aa mu cilongano yalinzile kulalola uli icupo cico ni cupo cakwe ica mpiti?
Nga caya vivyo, limwi aa mu cilongano yangalola ukuti icupo ca mpiti casila nu kuti icupo icipya, i ca mwisunde. Pakuti tuvwikisye umulandu uno cingayeela vivyo lekini tulole vino Yesu walanzile pa kutaana nu kutwala nanti ukutwalwa cipya cipya.
Pali Mateo 19:9, Yesu walanzile umulandu sile onga uwa mu Malembo ungalenga ukuti atwalane yataane. Watiile: “Wensi uwata umuci lino pasi umulandu wa uzelele nu kutwala muze, ala wacita ucende.” Ku mazwi yano Yesu walanzile tukasambililako ivintu viili: (1) uzelele aali mulandu sile uwa mu Malembo uungalenga atwalane ukutaana na (2) umonsi uwata umuci wakwe apasi mulandu uwa mu Malembo nu kutwala muze, ala wacita ucende. *
Uzye lyene, amazwi yano Yesu walanzile yakapiliula ukuti umonsi uwacita ucende nu kuta umuci wakwe, ala akweti untungwa uwakutwala muze? Awe foo. Ndi cakuti umwi wacita ucende mu cupo, ala uwakaele akweti insambu izya kusoololapo nga angeleela uwakwe nanti foo. Ndi cakuti wakana ukumweleela nupya yataana kulingana ni isunde lya uteeko, ala iya akweti untungwa uwa kutwala muze nu muci nawe akweti untungwa uwa kutwalwa kuuze.
Nomba insita zyuze nazyo, limwi uwakaele angalondesya kutwalilila ukuya umu cupo na iya wakwe nupya angaitemelwa ukumweleela. Nomba nga ndi cakuti iya uwatacita ucende asikulonda kutwalilila ukuya nu muci wakwe nanti cakuti watamweleela nupya wasoololapo nu kumuta, cingaya uli? Pa mulandu wakuti umuci wataitemelwa ukumweleela nupya akulonda ukuti yatwalilile ukuya umu cupo, umonsi wiyo ala atakweti untungwa uwakutwala muze. Ndi cakuti umonsi wapatikizya ukuta umuci wakwe nu kutwala muze nanti icakuti atakweti untungwa uwa kucita vivyo, ala wacita ucende nupya kwene. Na cii cingalenga ukuti aombelwepo na komiti ya upinguzi na yuze kwene mu cilongano.—1 Kol. 5:1, 2; 6:9, 10.
Ndi cakuti umonsi watwala nanti cakuti atakweti insambu zya kucita vivyo, uzye aa mu cilongano yalinzile ukulola uli cupo cico ni cupo ica mpiti? Kulingana na vino Baibo ikalanda, uzye icupo ca mpiti ala ci cili icupo? Uzye nupya kwene uwakaele angasoololapo ukweleela nanti ukukanaeleela iya wakwe? Uzye aa mu cilongano yalinzile ukulalola iya nu muci wakwe umupya ukuti yakucita sile ucende?
Mpiti aa mu cilongano yalolanga icupo icipya ukuti iya nu muci yakucita sile ucende ndi cakuti uwakaele acili nu umi, ataatwalwa nupya ataapeelwa umulandu wa kucita uzelele. Lelo Yesu atalanzile pa muntu wakaele lino walandanga pa kutaana nu kutwala cipya cipya. Nomba walondolwile ukuti umonsi uwata umuci wakwe lino pasi umulandu uwa mu Malembo nu kutwala muze, ala wacita ucende. Nga caya vivyo, ukuta nu kutwala muze kuno Yesu walanzile ukuti u kucita ucende, vikalenga icupo ca mpiti ukusila.
“Wensi uwata umuci lino pasi umulandu wa uzelele nu kutwala muze, ala wacita ucende.”—Mate. 19:9
Ndi cakuti umonsi wata umuci wakwe nu kutwala muze, ala icisila umuci wakwe uwakaele atanga amweleele pakuti yawezyanye. Fwandi atalinzile kuipeela cisendo ica kweleela nanti kukanaeleela iya wakwe. Acino, vino aa mu cilongano yakalola icupo icipya vitanga visenuke pa mulandu sile wakuti uwakaele wafwa, watwalwa nanti wacita uzelele. *
Wakwe vino twalola, icati cilenga ukuti atwalane yataane, a pa mulandu wakuti iya aatacita ucende. Nomba nga ndi cakuti iya atacisile ucende, lelo wasoololapo kuta uwakwe nu kutwala muze? Nanti nga ndi cakuti iya ataacisile uzelele lino ataatala wata umuci wakwe, lelo wacita vivyo pa cisila ca kuta umuci wakwe, nupya watwala na muze nanti cakuti umuci wakwe akulondesya ukumweleela? Ndi cakuti ivili vyonsi vino twalandapo vyacitika kuli kuti kucita ucende, vingalenga ukuti icupo ca pa kutandika cisile. Nupya icupo icipya cilinzile ukuya aali cupo ca mwi sunde. Lupungu Lwa Mulinzi lwakwe Novemba 15, 1979, ifwa 32 lwalondolwile ukuti: “Lyene iya ataingila umu cupo cuze, nupya atanga amale sile icupo cico nu kuswilila ku muci wakwe uwa pa kutandika pano icupo ca pa kutandika casizile pa mulandu nu kutaana, ucende nu kutwala muze.”
Kusenuka kuu, kusikupiliula ukuti aina Klistu yasilola icupo ukuti i ca muzilo nanti ukuti ukucita ucende asi luyembu lwipisye. Umonsi uwata umuci wakwe apasi umulandu wa mu Malembo nu kutwala muze nanti icakuti atakweti untungwa wa kucita vivyo, alinzile kuombelwapo na komiti ya upinguzi pano aatacita ucende. (Ndi cakuti umuci wakwe umupya u mwina Klistu, nawe kwene alinzile kuombelwapo na komiti ya upinguzi pa mulandu wa kucita ucende.) Nanti cakuti aa mu cilongano yatalaalola atwalane yaayo ukuti yakucita sile ucende, umonsi atanga apeelwe imilimo iiyele umu cilongano pa myaka ingi kufika lino antu yano wasosizye pa viipe vino wacisile, yata ukuvwa uyi. Nupya lino ya eluda yacili kumupeela imilimo ili yonsi, yalinzile ukwelenganya pali vino uwali umuci wakwe akuyuvwa alino na pa yana ndi cakuti wakwetiko.—Malaki 2:14-16.
Kulingana na vino twalandapo pa viipe ivikafumamo ndi cakuti umuntu atalondiile vino Baibo ikalanda pa kutaana nu kutwala cipya cipya, Aina Klistu yalinzile ukulakolanya Yeova nu kulalola icupo ukuti i ca muzilo.—Kasa. 5:4, 5; Ayeb. 13:4.
^ pala. 2 Mu cipande cii nga twalanda ukuti uwatacita ucende, ala tukulanda pa monsi nupya nga twati uwakaele ala tukulanda pa mwanaci. Nomba pali Mako 10:11, 12, Yesu walangilile ningo ukuti wasundanga yonsi kwene, umonsi nu mwanaci.
^ pala. 1 Vii i vyativisenuka pali vino twamanyile mpiti ukuti, tulinzile kulalola atwalane yaayo ukuti yakucita sile ucende kufika lino uwakaele wafwa, watwalwa kuze nanti wacita uzelele.
