CIPANDE CA KUSAMBILILAMO 18
Mwakomelezyanya Lino Muli pa Kulongana
“Lekini twasakamalana . . . , twakomelezyanya.” —AEB. 10:24, 25.
LWIMBO NA. 88 Ngazwe Ukumanya Inzila Zyako
VINO TUMASAMBILILAPO a
1. U mulandu ci uno tukaasukila pa kulongana?
U MULANDU ci uno tukazanilwa umu kulongana? Cintu icikalamba, tukaya umu kulumbanya Yeova. (Masa. 26:12; 111:1) Nupya tukazanwa umu kulongana pakuti twakomelezyanya umu nsita zii izitale. (1 Tesa. 5:11) Tukacita ivintu vii viili ndi cakuti tukwasuka pa kulongana.
2. A nsita ci lino tungakwata isyuko ilya kwasuka pa kulongana?
2 Cila mulungu tukakwata isyuko ilya kwasuka pa kulongana. Wakwe pa kulongana ukwa pa mpela ya mulungu, tungasukapo api sambililo lya Lupungu Lwa Mulinzi. Umu kulongana kwa mukasi ka mulungu, tungasuka apa ciputulwa icakuti Ukuvwikisya Sana Ivyaya Umu Malembo, Sambililo Lya Baibo pa Cilongano, nanti umu malyasi yauze aakulanzyanya.
3. Iintazi ci zino tungakwata, nupya uzye amazwi aaya pa Aebele 10:24, 25 yangatwazwa uli?
3 Swensi kwene tukalonda ukulumbanya Yeova nu kukomelezya yakapepa yanji. Nomba lino tukulonda ukwasukapo, kungaya ivintu viili ivingalenga citutalile: (1) Intete zya kwasukapo. (2) Tungalonda ukwasukapo nomba limwi yatanga yatusonte. I vyani ivingatwazwa ndi cakuti ivya musango uu vikutucitikila? Vino Paulo walembiile Aebele vingatwazwa ukuzana icasuko. Lino walandanga pa mulandu uno cacindamila ukuzanwa umu kulongana, watiile tulinzile ukwika mano ‘uku kukomelezyanya.’ (Belengini Aebele 10:24, 25.) Ndi cakuti twiusya ukuti yauze umwi umba yamakomeleziwa nanti cakuti twasuka icasuko iciipi, tutalauvwa intete izya kwasuka. Nupya ndi cakuti yatatusonsile lino twimika ikasa, tungaya ni nsansa ukumanya ukuti yauze yamakwata isyuko ilya kwasukapo.—1 Pet. 3:8.
4. I visinka ci vino tumalandapo umu cipande cii?
4 Umu cipande cii, tumatandikilapo ukulanda pali vino tungakomelezyanya ndi cakuti twaya umu cilongano umwaya antu anono aakwasukapo. Lyene tumalanda na pali vino tungacita ndi cakuti umu cilongano umwaya antu aingi aakwasukapo. Nu mu kusyalikizya, tumalanda pali vino tungacita pakuti vino tukwasukapo viye ivya kukomelezya nupya ivyuvwike.
MWAKOMELEZYANYA NDI CAKUTI MWAYA UMU CILONGANO UMWAYA ANTU ANONO
5. Tungacita uli pakuti twakomelezyanya ndi cakuti twacepa umu cilongano?
5 Umu vilongano ivinono, musiya antu aingi akwasukapo. Fwandi insita zimwi, katungulula alinzile ukulolela pakuti umwi aimike ikasa. Nga caya vii ukulongana kungaloleka kwati kukuvwisya ukasu. Nomba mungacita uli? Mwaitemelwa ukwasukapo imiku iingi. Nga mukucita vii, mungakomelezya yauze ukulasukapo.
6-7. Uzye tungacita uli pakuti tutauvwa sana intete lino tukulonda ukwasukapo?
6 Mungacita uli ndi cakuti mukuvwa intete izya kwasukapo? Vivyo kwene avino aingi yakayuvwa. Ndi cakuti mukulonda ukulakomelezya aina na ya nkazi, mwalola vimwi ivingamwazwa pakuti mutauvwa intete lino mukulonda ukwasuka. Mungacita uli vivyo?
7 Cingamwazwa sana ndi cakuti mwapituluka umu vipande ivya Lupungu Lwa Mulinzi vino twasambilile uku cisila. b Wakwe, ukupekanya ningo. (Mapi. 21:5) Ndi cakuti mwapekanya ningo ukulongana, cilamwangukila ukuitemelwa ukwasukapo. Nupya, mwaipimpazya ivyasuko. (Mapi. 15:23; 17:27) Ndi cakuti mukwasuka ivyasuko iviipi, mutalauvwa sana intete. Icasuko iciipi icikweti icisinka conga nanti viili cingangukila aina na ya nkazi ukuvwikisya icikulandwapo ukucila icasuko icitali nupya icikweti ivisinka ivingi. Nga mukwasuka ivyasuko iviipi umu mazwi inu, mulalangilila ukuti imumanya ningo ivyeo nupya imupekanya ukulongana.
8. Uzye Yeova akalola uli pali vino tukaombesya ukulingana na pano tungapezya?
8 Nga ndi cakuti mwazana ukuti imwezya inzila zii zino twalandapo nomba ala mucili mukuvwa sana intete, mungacita uli? Mwasininkizya ukuti Yeova akataizya sana pali vino mukaezya na maka. (Luka 21:1-4) Yeova asienekela ukuti twacita ivintu vino tutanga tukwanisye ukucita. (Filipi 4:5) Mwapanga ivya kucita, mwaimika uyo uwa kufikilizya vino mwapanga, nupya mwapepa pakuti mwateeka umwenzo. Limwi uyo uuwo, ungaya u wa kwasuka icasuko iciipi.
MWAKOMELEZYANYA NDI CAKUTI UMU CILONGANO UMWAYA ANTU AINGI
9. Iintazi ci ingayapo umu vilongano umwaya ya kasimikila aingi?
9 Ndi cakuti mwaya umu cilongano umwaya ya kasimikila aingi, limwi mungakwata intazi ipusaneko. Limwi aina aingi na ya nkazi yakaimika makasa icakuti ni kasa linu iyafilwa ukulilola. Wakwe, nkazi Danielle waipakizyanga sana ukwasukapo lino ali pa kulongana. c Walolanga ukuti yali inzila iya kupepelamo, kukomelezya aina na ya nkazi, nu kuti yali inzila iya kulenga utailo wakwe ukukomelako. Nomba lino wakukiile uku cilongano cuze ukwali ya kasimikila aingi, yatamusontanga sana nupya insita zimwi nu kulongana kwasilanga ukwaula ukuti yamusonte. Watiile: “Nasosile sana. Nuvwanga kwati iyampoka masyuko yamwi. Ndi cakuti ivya musango uu vikucitika imiku iingi, ungauvwa kwati yakucitila uku mufulo.”
10. Tungacita uli pakuti twakwata amasyuko aingi aakwasukapo?
10 Uzye namwe mwatala mwayuvwapo wakwe vino nkazi Danielle wayuvwanga? Nga avino cili, limwi mungatandika ukulayuvwa ukuti mumaleka ukwimika ikasa nu kutandika sile ukulakutika kuli puloglamu. Nomba mutalinzile ukuta ukwimika ikasa. I vyani vino mulinzile ukucita? Icingamwazwa u kwasuka ivyasuko ivingi vino mungaipekanya ukuya asuka pa kulongana. Lyene ndi cakuti yatamusonsile lino mwatanzika ukusambilila icipande, limwi mungasuka umu mapalaglafu aalondelapo. Lino mukupekanya isambililo lya Lupungu, mwalola vino palaglafu yonga na yonga ikulemenkana ni sambililo lyonsi. Nga mukucita vivyo, mulakwata ivisinka na vyuze vino mungalandapo umwi sambililo. Na vyuze vino mungacita, ukupekanya palaglafu umuli ivisinka ivitale ukulondolola. (1 Kol. 2:10) U mulandu ci uno mulinzile ukucitila vivyo? A pa mulandu wakuti limwi antu anono sile aangatemwa ukwasukapo. Nomba i vyani vino mungacita ndi cakuti mwezya inzila zyonsi zii nomba ala yasikumusonta pakuti mwasuke pa kulongana? Munganena katungulula iuzyo lino mukulonda mwize mwasuke lino ukulongana kutatala kwatandika.
11. Uzye ilembo lyakwe Filipi 2:4 likatukomelezya ukucita cani?
11 Belengini Filipi 2:4. Leza walenzile umutumwa Paulo ukukomelezya aina klistu ukwika mano uku vintu ivingazipila yauze. Uzye tungaomvya ukusunda kuu lino tuli pa kulongana? Tulinzile ukwiusya ukuti na yauze kwene yakulonda ukwasukapo?
Viivi kwene vino mukaleka yauze ukulandapo lino muli pa kulongana, avino mulinzile ukuleka yauze ukwasukapo pa kulongana (Lolini palaglafu 12)
12. Iinzila ci yonga ino tungaomvya pa kukomelezya aina na ya nkazi lino tuli pa kulongana?
12 Elenganyini pali cii. Uzye ndi cakuti mukulanzyanya na cuza winu, mungatemwa sile ukuti mwalanda sile mwenga ukwaula ukuti umuzo alandepo? Awe foo. Mungatemwa ukuti nawe kwene alandapo. Ndi cakuti asikulandapo, cingalenga ayuvwa ukuti mutamwisileko mano. Umu nzila imwi kwene, tukalonda ukuti aina na ya nkazi yaasukapo pa kulongana. Umu cumi ii yaya iinzila yonga ino tungaomvya pa kukomelezya aina na ya nkazi nga tukuleka ukuti nayo yayalanda pa utailo wao. (1 Kol. 10:24) Lekini tulande pali vino tungacita vivyo.
13. Tungacita uli pakuti antu na yauze yaasukapo pa kulongana?
13 Cimwi cino tulinzile ukucita u kwasuka ivyasuko iviipi, pakuti na yauze yangasukapo. Ya eluda na ya kasimikila aakula muli vyakwe Leza aalinzile ukuya pa nkoleelo umu kucita vivyo. Nanti cakuti mukwasuka icasuko iciipi, mutaasuka ivisinka ivingi. Nga mwasuka ivyasuko vyonsi ivili muli palaglafu, ala yauze yatamakwata ivyakulandapo. Wakwe muli palaglafu kwene ii, iyatunena ukwasuka ivyasuko iviipi nu kukanaasuka ivisinka vyonsi. Fwandi ndi cakuti mwemwe yatandikilapo ukusonta pa kuti mwasuke muli palaglafu ii, mutalinzile ukwasuka ivisinka vyonsi.
A lilaci lino tungasoololapo ukukanaimika ikasa pa kulongana? (Lolini palaglafu 14) f
14. I cani icingatwazwa ukumanya imiku ino tungiimika?
14 Mwaya aacenjele ukulola imiku ino mungimika pakuti mwasuke. Ndi cakuti tukwimika ikasa imiku iingi, cingalenga ukuti katungululula apatikiziwe ukutusonta na lino kuli atiyimika aatatala yasukapo. Cii cingalenga yauze ukutoovaka nu kuta ukwimika.—Kasa. 3:7.
15. (a) Uzye tulinzile ukucita uli ndi cakuti yatatusonsile? (b) Uzye ya katungulula yangalanga uli ukuti yakwika mano kuli yonsi? (Lolini kambokosi akakuti “ Vino Mulinzile Ukucita Lino Mukutungulula.”)
15 Ndi cakuti ya kasimikila aingi yakukatusya amakasa, limwi tutanga twasuke imiku ino tukulonda ukwasukapo. Insita zimwi, limwi katungulula atanga atusonte. Kwene ndi cakuti yatatusonsile tunguvwa uyi, nomba tutalinzile ukusoka.—Kasa. 7:9.
16. Tungacita uli pakuti tukomelezye yauze ali yasuka?
16 Ndi cakuti mutaswikepo ukulingana na vino imukulonda, uzye citanga cizipe ukwika mano lino yauze yakwasuka nu kwizayataizya pali vino iyasuka? Ukutaizya aina na ya nkazi pali vino iyasuka cingaya kwati ukwasuka icasuko ica kukomelezya. (Mapi. 10:21) Ukutaizya yauze yaya iinzila na yuze iya kukomelezyanya.
INZILA NA ZYUZE ZINO TUNGAOMVYA PA KUKOMELEZYANYA
17. (a) Uzye avyazi yangazwa uli ana yao ukupekanya ivyasuko ukulingana nu musinku wao? (b) Ukulingana na vidyo, i vintu cii 4 vino mulinzile ukucita lino mukupekanya ivyasuko?
17 I vyani na vyuze vino tungacita pakuti twakomelezyanya lino tuli pa kulongana? Mwe yavyazi, mwaazwa ana inu ukupekanya ivyasuko ukulingana nu musinku wao. (Mate. 21:16) Insita zimwi lino tukusambilila icipande, tukasambilila pa vipande ivikalanda pa ntazi izya mu cupo na pa malyasi akome, lelo mukaya na palaglafu yonga nanti yaili yano ana yangalandapo. Nupya mwaazwa ana ukumanya umulandu uno limwi yatanga yayasonte lino iimika ikasa. Nga mukuyalondolwela yatanga yasoka nga yasonta yauze.—1 Tim. 6:18. d
18. Tungacita uli pakuti tutaika sana mano kuli sweineco lino tukwasuka? (Mapinda 27:2)
18 Swensi kwene tungapekanya ivyasuko ivingalenga Yeova ukulumbanyiziwa nupya ivingakomelezya Aina Klistu yanji. (Mapi. 25:11) Nanti cakuti insita zimwi tungalanda pali vino vyatucitikiile, tulinzile ukucenjela sana pakuti tutaalanda sana pali sweineco. (Belengini Mapinda 27:2; 2 Kol. 10:18) Lelo lino tukwasukapo tulinzile ukulaelenganya pali Yeova, api Izwi lyakwe, alino na pa yantu yakwe. (Kuso. 4:11) Kwene ndi cakuti iuzyo ilili umu palaglafu likulondekwa tulondolole ivyatucitikila, cingazipa ukucita vivyo. Vii vino twalandapo vimalandwa na muli palaglafu iyalondelelapo.
19. (a) I visuma ci ivilacitika ndi cakutii tukwika amano kuli yonsi atiiza mu kulongana? (Loma 1:11, 12) (b) I visuma ci vino mwalola ivikacitika nga mukwika mano kuli yauze lino muli pa kulongana?
19 Nanti cakuti kutaya amasunde aakalanda pali vino tulinzile ukwasuka, tulinzile ukwezya na maka ukwasuka amasuko aangakomelezya yonsi. Limwi pakuti tucite vii tutalinzile ukulaasuka sana. Nanti limwi tulinzile ukulaasuka ivyasuko vya mu kulungatika, nga tukucita vii tulauvwa ningo ukuti yauze nayo iyakwata isyuko lya kwasukapo. Nga tukwika mano kuli yauze lino tuli pa kulongana tungaipakizya ‘ukukomelezyanya’ capamwi nayo.—Belengini Loma 1:11, 12.
LWIMBO NA. 93 Tupaale pa Kulongana Kwitu
a Tukakomelezyanya lino tukwasuka pa kulongana. Nomba, yamwi yakauvwa intete ukwasukapo. Yamwi yakaipakizya ukwasukapo nupya yakalonda ukuti yayasonta imiku iingi. Nomba asi mulandu na vino tukayuvwa, uzye tungalanga uli ukuti tukasamalana nu kukomelezyanya? Nupya tungaasuka uli ivyasuko ivya kukomelezya ivingalenga aina na ya nkazi ukuya nu kutemwa nu kuomba imilimo isuma? Icipande cii cimaasuka mauzyo yaa.
b Pakuti mumanyilepo na vyuze, mukapituluke mu Lupungu lwa Mulinzi lwakwe Januwale 2019 pa mafwa 8-13, na lwakwe Sepetemba 1, 2003 pa mafwa 19-22.
c Asi zina lyakwe ilya cumi
d Tambini vidyo iyaya pa jw.org iyakuti Uye Cuza Wako Yeova—Uwapekanya Ivyasuko.
f ULONDOLOZI WA CIKOPE: Umu cilongano umwaya antu aingi, umwina uwataasukapo mpiti waleka ukuti na yauze yasukepo pa kulongana.
