CIPANDE CA KUSAMBILILAMO 19
Tungacita Uli Pakuti Tukomye Utailo Witu Uwakuti Kulaya Insi Ipya?
“Wene [Yeova] akavwanga nu kufikilizya cino watavwanga.” —MPE. 23:19.
LWIMBO NA. 142 Twalukutaila Ukuti Vintu Vilaziipa
VINO TUMASAMBILILAPO a
1-2. I vyani vino tulinzile ukucita lino tukuloleela insi ipya?
TWATEMWA ulayo wakwe Yeova uwakuti alaleta insi ipya lino alafumyapo iviipe. (2 Pet. 3:13) Nanti cakuti tutaamanya lino kulaya insi ipya, ivikacitika vikalangilila ukuti insi ipya yasya iize.—Mate. 24:32-34, 36; Mili. 1:7.
2 Asi mulandu ni myaka ino ituombela Yeova, swensi kwene tulinzile ukukomya utailo witu umu ulayo uu. U mulandu ci? Pano utailo witu ungatonta. Acino umutumwa Paulo walandiile ukuti ukukanaya nu utailo u “luyembu ulukatulema zuwa.” (Aeb. 12:1) Pakuti utailo witu utononeka, tulinzile ukutwalilila ukulaelenganya pali vino vikalangilila ukuti likwene kwasya kuye insi ipya.—Aeb. 11:1.
3. I vyani vino tumasambilila umu cipande cii?
3 Umu cipande cii, tumalanda pa vintu vitatu ivingalenga tukomye utailo witu umu ulayo uno Yeova watulaya uwakuti kulaya insi ipya, kuli kuti: (1) ukwelenganya sana api lambo, (2) ukwelenganya pa maka yano Yeova wakwata, na (3) ukucita ivintu ivingalenga tupalame sana kuli Yeova. Lyene tumalanda na pali vino ilyasi lino Yeova wanenyile Habakuku likakomya utailo witu ndakai. Lekini tale tulande pali vimwi ivikacitika ivingalondekwa ukuti tuye nu utailo ukome umu ulayo wakuti kulaya insi ipya.
IVINGACITIKA IVINGALONDEKWA TUYE NU UTAILO UKOME
4. I vintu ci vimwi ivingalondekwa ukuya nu utailo ukome lino tukupingulapo?
4 Cila wanda tukapingula pa vintu vimwi ivikalondekwa ukuya nu utailo ukome. Wakwe, tukapingula pali yano yangaya ivyuza vitu, ivya kuizanzya, masambililo, yano tungatwalana nayo, aana, ni ncito. Fwandi cingazipa ukuyuzya ukuti, ‘Uzye vino nkapingulapo ukucita, vikalangilila ukuti nazumila ukuti insi ii yasya iyononwe nu kupyanikiziwapo ni nsi ipya yakwe Leza? Nanti uzye nkansololapo ukucita ivintu ivili vimwi na vino antu aatazumila ukuti yalikala amanda pe yakacita?’ (Mate. 6:19, 20; Luka 12:16-21) Tulapingula ningo pa vintu nga tukwiusya ukuti insi ipya yasya iize.
5-6. U mulandu cino uno tukalondekelwa ukuya nu utailo ukome nga twakwata intazi? Langililini.
5 Naswe kwene tukakwata intazi izikalondekwa ukuya nu utailo ukome. Tungakwata intazi izili wa kucuziwa, kulwala indwala iipisye, nanti sile ivintu vyuze ivingalenga tutoovoke. Pa kutandika tungalola ukuti tungacimvya intazi zizyo. Nupya intazi zii limwi zingatwalilila pa nsita itali, fwandi cingalondekwa ukuya nu utailo ukome pakuti tuzizimizye nu kutwalilila ukuombela Yeova nu Luzango.—Loma 12:12; 1 Pet. 1:6, 7.
6 Ndi cakuti tuli ni ntazi, limwi tungatandika ukwelenganya ukuti insi ipya yakwe Yeova italatala iize. Uzye nga tukwelenganya vii, ala cikupiliula ukuti tutakweti utailo? Awe foo. Elenganyini pa cilangililo cii. Nga tuli umu cisiku, cikaloleka kwati kutalatala kuye icisanya. Nomba ala kulaya icisanya. Vikwene avino cikaya, ndi cakuti itusakamikwa sana tungatandika ukwelenganya ukuti kutalatala kuye insi ipya. Ndi cakuti tukweti utailo ukome, tulamanya ukuti amalayo yakwe Yeova yalafikiliziwa. (Masa. 94:3, 14, 15; Aeb. 6:17-19) Ukumanya vii, kulalenga lyonsi twakolezya ukuombela Yeova umu umi witu.
7. I myelenganyizizye ya musango ci ino tulinzile ukutaalukako?
7 Ukuomba umulimo wa kusimikila nako kwene kukalondekwa ukuya nu utailo ukome. Antu aingi yano tukasimikilako “ilyasi lisuma” ilyakuti likwene kwasya kuye insi ipya yakwe Leza, yakalola ukuti vitanga vicitike. (Mate. 24:14; Ezek. 33:32) Tutalinzile ukulatwisika vino Yeova akatusambilizya wakwe vino yene yakatwisika. Pakuti ica musango uu citakacitike, tulinzile ukutwalilila ukulakomya utailo witu. Lekini tulande pa nzila zitatu izingatwazwa ukucita vivyo.
MWAELENGANYA API LAMBO
8-9. Uzye ukwelenganya sana api lambo kungakomya uli utailo witu?
8 Inzila yonga ino tungaomvya pa kukomya utailo witu u kulaelenganya sana api lambo. Ilambo lyalenga tusininkizye ukuti Leza alafikilizya amalyo yakwe. Nga tukwelenganya sana pa mulandu uno kwayela ilambo na vino Yeova waipeelisye, tulakomya utailo witu umu ulayo uno Leza walaya uwakuti umi wa manda pe umu nsi ipya ulafikiliziwa. U mulandu ci uno tungalandila vivyo?
9 I vyani ivyaya umwi lambo? Yeova watumile Umwanakwe wino watemwisya ukufuma ukwi yulu ukwizavyalwa umuntu umumalilike. Lino wali pano nsi wazizimizye intazi zingi sana. Lyene wacuzile nu kufwa imfwa iipisye. Uu wali u mutengo ukulu uno Yeova walipile. Leza witu uwaya nu kutemwa nga atazumilizye Umwanakwe ukwizacula nu kufwa pakuti tuipakizye umi pa nsita inono. (Yoa. 3:16; 1 Pet. 1:18, 19) Pa mulandu wakuti Yeova wapeezile Umwanakwe wino watemwa ukuti aize atukulule, alalenga ukuti tukikale amanda pe umu nsi ipya.
MWAELENGANYA SANA PA MAKA YANO YEOVA WAKWATA
10. Ukulingana na Efeso 3:20, i vyani vino Yeova angacita?
10 Iinzila na yuze ino tungakomezyamo utailo witu u kulaelenganya pa maka yano Yeova wakwata. Wakwata amaka ya kufikilizya vyonsi vino walaya. Cisinka i cakuti ulayo wa kuti kulaya umi wa manda pe umu nsi ipya ungaloleka kwati utanga ufikiliziwe. Nomba ilingi vino Yeova akalaya vikaloleka kwati vitanga vifikiliziwe. Angafikilizya vino walaya pa mulandu wakuti a Leza wa Maka yonsi. (Yobo 42:2; Mako 10:27) Fwandi cisituzungusya vino watulaya ivintu ivisuma.—Belengini Efeso 3:20.
11. A malayo ci yano Yeova walavile alolekanga kwati yatanga yafikiliziwe? (Lolini kambokosi kakuti “Malayo Yamwi Acindame Sana Afikiliziwe.”)
11 Elenganyini pa vintu vimwi ivyalolekanga kwati vitanga vicitike vino Yeova walavile antu yakwe aliko uku cisila. Wanenyile Abulahamu na Sala ukuti yali nu kukwata umwana mu ukote. (Utan. 17:15-17) Nupya wanenyile Abulahamu ukuti amu luko lwakwe yali nu kupyana impanga ya Kenani. Pa mulandu wa kuti amu luko lwakwe Abulahamu aina Izlaeli ikazile imyaka ingi umu uzya uku Ejipti, yafwile yantandike ukulola kwati ulayo wakwe Yeova utali nu kufikiliziwa. Nomba wafikilizye vino walavile. Lino papisile insita. Yeova walanzile ukuti Elizabeti uwali umukote wali nu kukwata umwana. Nupya Yeova wanenyile Maliya nacisungu ukuti wali nu kukwata Umwana umonsi, wino Yeova walavile imyaka ingi ukucisila umu calo ca Edeni! —tan. 3:15
12. Uzye amazwi aaya pali Yoswa 23:14 na Ezaya 55:10, 11 yakalanda vyani pa maka yano Yeova wakwata?
12 Utailo witu ukakomelako nga tukwelenganya pa malayo yano Yeova walavile na vino yafikiliziwe, cii cikalenga tusininkizye ukuti wakwata amaka sana. Fwandi utailo witu uwakuti kulaya insi ipya ukakomelako. (Belengini Yoswa 23:14; Eza. 55:10, 11.) Tukaazwa yauze ukumanya ukuti ulayo wakuti kulaya insi ipya asi ciloto nanti ivyakwelenganya sile. Yeova umwineco walanda ukuti ali nu kupanga iyulu lipya ni nsi ipya: “Mazwi yaa acumi nupya yalinzile kutailwa.”—Kuso. 21:1, 5.
MWACITA IVINTU IVINGALENGA MUPALAME KULI YEOVA
KULONGANA
Uzye ukucita ivintu vii kungakomya uli utailo winu? (Lolini palaglafu 13)
13. Uzye ukulongana kungakomya uli utailo witu? Londololini.
13 Icintu na cuze icingalenga tukomye utailo witu ukulacita ivingalenga tupalame kuli Yeova. Wakwe elenganyini pali vino tukaipangaizya lino tuli pa kulongana. Ya Anna atiyaomba imyaka ingi umu mulimo wa nsita yonsi, yalanzile iyati: “Ukulongana kwangazwa ukutwalilila ukuya nu tailo ukome. Nanti sile alino kalanda wi lyasi atakweti ivyeo ivingi nanti ivipya, nkaikako sana amano pa kuti nuvwe ivisinka vimwi ivingangazwa ukuvwikisya icumi ca muli Baibo nu kukomya ukailo wane.” bUtailo witu ukakomelako nga tuvwa ivyasuko ukufuma uku ina na ya nkazi lino tuli pa kulongana.—Loma 1:11, 12; 10:17.
MULIMO WA KUSIMIKILA
Uzye ukucita ivintu vii kungakomya uli utailo winu? (Lolini palaglafu 14)
14. Uzye umulimo wa kusimikila ungakomya uli utailo witu?
14 Nupya tukakomya utailo witu lino tukuombako umulimo wakusimikila. (Aeb. 10:23) Ya Barbara atiyaombela Yeova apa myaka 70, yalanzile ukuti: “Ukuomba umulimo wa kusimikila kwangazwa sana ukukomya utailo wane. Lino nkulanda na antu pa malayo yano Yeova watulaya, utailo wane ukakomelako.
KUISAMBILIZYA BAIBO
Uzye ukucita ivintu vii kungakomya uli utailo winu? (Lolini palaglafu 15)
15. Uzye kuisambilizya Baibo kungakomya uli utailo witu? (Loliniko ni cikope.)
15 Icintu na cuze icingatwazwa ukukomya utailo witu, u kuisambilizya Baibo. Ya Susan yalanzile ukuti cikaanguka sana ukuisambilizya Baibo ndi cakuti utuipekanyizizya limwi. Yatile: “Pa mulungu nkapekanya icipande ca mu Lupungu lwa Mulinzi cino tulasambilila umu mulungu ulondelilepo. Pa Mande na pali Ciili nkapekanya kulongana kwa mukasi ka mulungu. Lyene amanda asyala nkapekanyizizyamo isambililo lya pa lwane.” Ukucita vii, kwazwa ya Susan ukutwalilila ukukomya utailo wao. Ya Irene atiyaombela pa Maofesi Yakalamba mu Nsi Yonsi yalanzile ukuti ukuisambilizya pa masesemo aya muli Baibo kwayazwa ukukomya utailo wao. Yatile “I cakuzunguka ukumanya ukuti amalayo yano Yeova walaya yakuya ya kufikiliziwa pano pano.” c.
“WENE ULAFIKILIZIWA UKWAULA KUCELWA”
16. Uzye vino Yeova wanenyile Habakuku vingatwazwa uli ndakai? (Aebele 10:36, 37)
16 Aomvi ya kwe Yeova yamwi yatwalilila ukulolela impelelekezyo ya insi pa myaka iingi. Antu yamwi yakaelenganya ukuti impelelekezyo ikulengela ukwiza. Nomba Yeova wanenyile kasesema Habakuku ukuti: “Uumbwilo uu uli nu kufikiliziwa apa nsita yakweo ilingine, ino ili nu kufika ukwaula kuzimba. Nupya ulacitika ukwaula kutwisika. Lelo ndi mwalola ukuti wene wazimba, nemo nkuti muulolele mutazukuwa. Wene ulafikiliziwa ukwaula kucelwa nanti ukulezyalezya.” (Haba. 2:3) Uzye Leza wanenanga sile Habakuku? Nanti, uzye amazwi yaa yangatwazwa naswe ndakai? Yeova walenzile Umutumwa Paulo aomvye amazwi yaa uku kukomelezya Aina Klistu alolelanga insi ipya. (Belengini Aebele 10:36, 37.) Nanti cakuti ulayo uno Yeova watulaya uwakuti wasya atupususye ukuloleka ukuti iulengela, tungasininkizya ukuti ulayo uu “ulafikiliziwa ukwaula kucelwa nanti ukulezyalezya!”
17. Uzye nkazi umwi waomvizye uli ukusunda kuno Yeova wanenyile Habakuku?
17 Aomvi yakwe Yeova aingi yaomvya ukusunda kuu lino yatwalilila ukuloleela pa myaka iingi. Wakwe, nkazi Louise uwatandiike ukuombela Yeova umu 1939, watiile: “Pa nsita iya, nelenganyanga kwati Amagedoni yali nu kwiza ala ncili ukumala isukulu. Nomba vino nelenganyanga vitaacitike. Apa myaka iingi, ukulabelenga pa malyasi aakalanda pa yantu yakwe Yeova aalolezile pa nsita itali pakuti vino wayalavile vifikiliziwe, kwangazwile ukutwalilila ukuloleela lino Yeova alafikilizya amalayo yakwe. Ukutaila ukuti ulayo wakwe Yeova ulafikiliziwa, kwangazwa nu kwazwa yauze ukuti insi ipya ili umupiipi.” Aina aingi na ya nkazi aombela Yeova pa myaka iingi yangazumilizyako.
18. Uzye ukwelenganya pali vino Yeova waumba kungatwazwa uli ukukomya utailo witu uwakuti kulaya insi ipya?
18 I cacumi ukuti insi ipya itatala iiza. Nomba tale elenganyini pa vintu vimwi vino tukaalola wakwe intanda, imiti, inyama, alino na antunze. Kusi aangatwisika ukuti ivintu vii visi vya cumi nanti cakuti pa nsita imwi vitaaliko. Nomba lyene akuno vyaya pano Yeova waviumvile. (Utan. 1:1, 26, 27) Leza witu watulaya ukuti kulaya insi ipya. Alafikilizya ulayo uu uno walaya. Umu nsi ipya, antu yalaipakizya umi umaliilike. Tungasininkizya ukuti kulaya insi ipya ukulingana na vino Leza watantika.—Eza. 65:17; Kuso. 21:3, 4.
19. Mungakomya uli utailo winu?
19 Pa nsita ii, mwacita vino mungakwanisya pakuti sile mukomye utailo winu. Mwataizya api lambo. Mwaelenganya pa maka yano Yeova wakwata. Mwacita ivintu ivingalenga mupalame kuli Yeova. Ukucita vii kulalenga muye pa yantu “yano yapokelile vino Leza walavile pa mulandu wa utailo nu kuteeka imyenzo.”—Aeb. 6:11, 12; Loma 5:5.
LWIMBO NA. 139 Mwaelenganya Ukuti Muli Umu Nsi Ipya
a Antu aingi ndakai, yatazumila umu ulayo uwa muli Baibo uwakuti kulaya insi ipya. Yakaelenganya ukuti i ciloto nanti ilyasi ilya kwelenganya sile. Nomba twasininkizya ukuti amalayo yonsi yano Yeova watulaya yalafikiliziwa. Nanti ciye vivyo, tulinzile ukutwalilila ukuombesya pakuti tuye nu utailo ukome. Tungacita uli vivyo? Icipande cii cimalondolola vino tungacita.
b Asi mazina yao acumi cumi.
c Ivipande ivingi ivikalanda pa masesemo aa muli Baibo tungavizana nga twaya umu Cisontelelo Ica Mpapulo apa kamutwe akakuti “Masesemo.” Wakwe lolini icipande icali umu Lupungu Lwa Mulinzi lwakwe Januwale 1, 2008, icatangi “Vino Yeova Walaya Vikafikiliziwa” mu Ciyemba ni Ciswahili.
