1, 2. (a) I cani calenga tusininkizye ukuti antu yangaya ya cuza yakwe Leza? (b) I vyani vino tumasambilila umu cipande cii?

UKUFUMA sile lino twavyalwa ukufika nu wanda wa kufwa, tukalonda ukutemwikwa. Antu yakalonda ukuya na yacuza aayatemwa, asi sile ukutemwa ukukaya pa monsi nu mwanaci. Nomba cino tukalondesya, u kutemwikwa kuli Yeova. Antu aingi yatazumila ukuti antu yangaya yacuza yakwe Leza, pano wene asiloleka nupya wakulisya. Lelo swemo twamanya icumi!

² Twamanya vino Baibo ikalanda pa antu yamwi aali ya cuza yakwe Leza. Tulinzile ukusambilila kuli aliyo. U mulandu ci? Pano ukuya cuza wakwe Leza icintu cicindame sana cino tukalonda ukukwata umu umi witu. Fwandi lekini tusambilile pali Abulaamu. (Welengini Yakobo 2:23.) Uzye cali uli pakuti Abulaamu aize aye cuza wakwe Leza? Abulaamu wakwete  utailo ali cino wayelile cuza wakwe Leza nupya ali mulandu uno akaamilwa ukuti “cikowe ca antu yonsi ataila Leza.” (Loma 4:11) Lino mumasambililanga pali Abulaamu mwayuzya mweineco ukuti, ‘Uzye ningacita uli pakuti nakolanya utailo wakwe Abulaamu nu kukomya ucuza wane na Yeova?’

3, 4. (a) Landini vino utailo wakwe Abulaamu weziwe. (b) U mulandu ci uno Abulaamu waitemiilwe ukuti apeele umwanakwe impolelwa?

³ Elenganyini Abulaamu ala papo ali ni myaka apiipi na 125 akupita panono panono akulemela umwamba. ^[1] (Mazwi pa mpela ya cipande.) Isaki umwanakwe wamukonkanga icisila ala papo nawe ali ni myaka 25. Isaki wasenzile inkwi, Abulaamu nawe wasenzile umupeni ni vintu vyuze ivyalondekwanga pa kukozya umoto. Ulwendo lulu lufwile lwatalile sana Abulaamu. Nomba asi pa mulandu nu kukota. Pano ala acili sana na maka. Lelo lufwile lwamutalile sana pa mulandu wakuti Yeova wamunenyile ukupeela umwanakwe impolelwa!—Utandiko 22:1-8.

⁴ Kwene uu wali uwezyo kuli Abulaamu. Antu yamwi yakati Leza wali umunkalwe vino wanenyile Abulaamu ukuti apeele umwanakwe impolelwa. Yauze nayo yakati Abulaamu wazumile ukupeela umwanakwe impolelwa pano atamutemilwe. Antu yakalanda vii pano yatakwata utailo nupya yatamanya vino utailo ukome waya nanti vino ukaomba. (1 Kolinto 2:14-16) Abulaamu welenginyepo lino atali auvwile Leza. Uvwilile Yeova pano wakweti utailo ukome. Wamanyile ukuti Yeova atanga amunene ukucita icintu icipe. Abulaamu wamanyile ukuti ndi cakuti uvwila Yeova wali nu kumulambula pamwi nu mwanakwe kwene. I vyani vino Abulaamu wali nu kucita pa kukwata utailo ukome? Walondekwanga ukusambilila kuli vino vyamucitikiile alino nu kumanya Leza.

5. Uzye cali uli pakuti Abulaamu asambilile pali Yeova, nupya uvwile uli?

⁵ Ukumanya. Abulaamu wakulile umu musumba wa Uli. Antu ali mu musumba uuwa yapepanga tuleza twaufi, na isi wakwe  Abulaamu nawe kwene wapepanga tuleza twaufi. (Yoswa 24:2) Nomba cali uli pakuti Abulaamu asambilile pali Yeova? Baibo ikalangilila ukuti mwana Nowa, Shemu, wali a lupwa wakwe Abulaamu. Nupya wizile afwa lino Abulaamu wali ni myaka 150. Shemu wali sana nu utailo, nupya afwile wanenangako yalupwa yakwe pali Yeova. Tutamanya ningo ningo vino cali, lelo Abulaamu afwile ali kuno wasambiliile pali Yeova. Vino Abulaamu wasambilile vyalenzile atemwe sana Yeova, nupya camwazwizye nu kuya sana nu utailo.

6, 7. Uzye ivyacitikiile Abulaamu vyalenzile uli ukuti utailo wakwe ukomeleko?

⁶ Ivyamucitikile. I vyani ivyacitikile Abulaamu ivyalenzile ataile sana Yeova? Yamwi yakati vino umuntu akaelenganya vikalolekela uku vicitwa vyakwe. Vino Abulaamu wasambilile pali Leza vyamufisile apa mwenzo, nupya calenzile acindika sana Yeova “Leza wapapelapela kaumba wa nsi ni yulu.” (Utandiko 14:22) Baibo ikati umucinzi uno Abulaamu wakwatile Yeova walangilile ukuti “waicefizye nu kuya uwa cumi” kuli aliwe. (Ayebulai 5:7) Pakuti tuye na ucuza ukome na Yeova tulinzile ukuicefya nu kuya acumi kuli aliwe. (Masamu 25:14) Ukuicefya nu kuya uwa cumi icalenzile Abulaamu ukuvwila Yeova.

⁷ Leza wanenyile Abulaamu na Sala kusya vyonsi umu musumba wa Uli nu ukufumamo ukukukila uku mpanga yuze. Pa nsita iyo walanga ala iyakula, fwandi yali nu kutwalilila ukulaikala umu mataalu mpaka nu kufwa. Nanti icakuti Abulaamu wamanyile ukuti ukwikala umu mataalu kungaleta mazanzo, wene uvwililile sile vino Yeova wamunenyile. Leza wapolelile Abulaamu pano wali ni cuvwila. Yeova wacingililanga Abulaamu na mamakwe Sala imiku iingi wakwe vino wayacingiliile pa nsita imwi lino Sala umuci wakwe Abulaamu yamusenzile iyalonda nu kukoma Abulaamu. (Utandiko 12:10-20; 20:2-7, 10-12, 17, 18) Vintu kwene vii ivyacitike vyalenzile utailo wakwe Abulaamu ukomeleko.

8. Uzye tungacita uli pakuti tumanye Yeova nu kumanya vino akatucitila pakuti ucuza witu na aliwe ukome?

⁸ Uzye tungaya yacuza yakwe Yeova? Ee, tungaya! Wakwe Abulaamu, nafwe tulinzile ukusambilila sana pali Yeova. Naswe kwene tungasambilila pali Yeova alino nu kumanya vino tungaamuombela ningo. Ndakai twakwata ivingi ivingatwazwa ukumanya Yeova ukucila vino Abulaamu  wakweti. (Danieli 12:4; Loma 11:33) Muli Baibo mwaya ivingi vino tukalonda ukumanya pali “Kaumba wa nsi ni yulu.” Vino tukasambilila pali Yeova vikalenga tumutemwe sana nu kutwazwa ukuya sana nu mucinzi kuli aliwe. Ukutemwa kuno twatemwa Leza nu mucinzi uno tukamupeela vikalenga ukuti twamuvwila. Ndi tukuvwila Yeova tulalola vino akacingilila nu kupaala antu aakacita vivyo nupya utailo witu ulakomelako. Ndi cakuti tukuombela Yeova lyonsi tulaya nu umi usuma, tulaya nu mutende, nupya tulaya ni nsansa. (Masamu 34:8; Mapinda 10:22) Ndi twamanya ivingi nu kutandika ukuomba ningo, ucuza witu na Yeova ulakomelako.

9, 10. (a) I cani icikalondekwa pakuti ucuza ukome? (b) I cani calenga tusininkizye ukuti Abulaamu watemilwe sana Yeova nupya watwalilile ukuya cuza wakwe?

⁹ Ucuza usuma waya kwati icintu cimwi icamutengo. (Welengini Mapinda 17:17.) Ucuza witu na Yeova utaya sile kwati ideko lya mutengo. Waya wiluwa lisuma cuze lino likalondekwa sana ukukontelela nu kulisakamala. Abulaamu watemilwe sana Yeova nupya watwalilile ukuya cuza wakwe. Wacisile uli vivyo?

¹⁰ Abulaamu watwalilile ukuya umuicefye nu kuya uwa cumi nupya lyonsi wali ni cuvwila. Pa nsita imwi lino wayanga uku Kenani nu lupwa lwakwe na aomvi yakwe, walesile Yeova kuti aliwe amutungulula lino akusoolola ivyakucita. Lino kwasiile umwaka onga kuti Isaki avyalwe, ala Abulaamu ali ni myaka 99, Yeova wamunenyile ukuti asilamule aonsi yonsi amu ng’anda yakwe. Uzye Abulaamu watwisike vino Yeova wamunenyile nanti ukulonda umwa kusombekezya pakuti atacita vino Yeova wamunenyile? Awe, wataile Yeova nu kucita vino wamunenyile “uwanda kwene ulya” —Utandiko 17:10-14, 23.

11. U mulandu ci uno Abulaamu wasakamalile lino Yeova walondanga ukonona Sodoma na Gomola, nupya Yeova wamwavwile uli?

¹¹ Pa mulandu wakuti Abulaamu uvwilanga Yeova lyonsi, ucuza wao wakomile sana. Walolanga ukuti anganena Yeova icili consi cino akulonda ukulanda nanti sile ukumuzya mauzyo yamwi akome yano akulonda ukumanya amasuko. Lino Yeova walondanga ukonona imisumba ya Sodoma na Gomola Abulaamu wasakamile sana. U mulandu cii? Wasakamile ukuti na antu asuma yalafwila kumwi na aipe. Limwi afwile wasakamile sana pali Loti umwipwa wakwe uwikalanga umu Sodoma. Abulaamu wataile sana Yeova, “Kapingula wa antu amu nsi yonsi” fwandi wanenyile Yeova vino vyamusakamike. Yeova wamuteekile umwenzo lino wamunenanga nu kumulanga ukuti wali nu luse. Yeova walondolwile ukuti nanti cakuti waleta upinguzi akalonda  antu yonsi asuma nu kuyapususya.—Utandiko 18:22-33.

12, 13. (a) Uzye vino Abulaamu wasambilile pali Leza alino na vino Leza wamucitiile vyamwazwilizye uli? (b) I cani icikalanga ukuti Abulaamu wataile sana Yeova?

¹² Fwandi calangilila paswe ukuti vino Abulaamu wamanyile pali Yeova na vyonsi ivyamucitikile vyamwazwile ukukomya ucuza wakwe na Yeova. Fwandi lino Yeova wizile anena Abulaamu ukuti apeele umwanakwe impolelwa, Abulaamu wamanyile ukuti Yeova akateeka umwenzo, wakwata uluse, walinga ukutailwa, nupya akamucingilila. Abulaamu wasininkizye ukuti Yeova atange asenuke aye umwipe! U mulandu ci uno twalandila vivyo?

¹³ Lino Abulamu atatala wasya aomvi yakwe wayanenyile ati: “Syalini pano na punda, Isaki nani twaya mu kupepa. Tumawela kunomuli.” (Utandiko 22:5) Uzye abulaamu walozizye mwi lino walanzile amazwi yayo? Uzye wasombanga lino walanzile ukuti tumawela kuno muli, ala atamanya ukuti akuya umukupeela umwanakwe impolelwa? Awe. Baibo ikati Abulaamu wamanyile ukuti Yeova wali nu kutuutulula Isaki. (Welengini Ayebulai 11:19.) Abulaamu wamanyile ukuti Yeova wamupiile amaka ya kuvyala umwana nanti icakuti wene na Sala yali akote. (Ayebulai 11:11, 12, 18) Fwandi wilwike ukuti kutaali nanti cimwi cino Yeova wali nu kuvilwa ukucita. Abulaamu atamanyile icali nu kucitika uwanda uwa. Lelo wali nu utailo wakuti, Yeova wali nu kutuutulula umwanakwe pakuti malayo yonsi yano Yeova walavile yakafikiliziwe. Uli mulandu uno Abulaamu akaamilwa ukuti “cikolwe ca antu yonsi ataila Leza.”

14. Iintazi ci zino mukaya nazyo lino mukuombela Yeova, nupya mungaakolanya uli Abulaamu?

¹⁴ Ndakai Yeova asitunena ukupeela ana itu impolelwa, lelo akatunena ukuti twauvwila amasunde yakwe. Insita zimwi tutange tuvwikisye umulandu uno kuyelile isunde lilyo nanti limwi cingatutalila ukulikonka. Uzye tukatala tuyuvwapo vivyo? Yamwi umulimo wa kusimikila ukayatalila. Limwi yakaumvwa insonyi nupya yakafilwa ukulanda na antu yano yatamanya. Yauze nayo yasilonda ukuloleka apusaneko na yano yakaomba nayo nanti yano yakasambilila nayo. (Kufuma 23:2; 1 Tesalonika 2:2) Ndi cakuti yamunena ukucita icintu cimwi icitale, mwatala mwelenganya pa utailo uno Abulaamu wakweti na vino wasifile. Ndi tukwelenganya sana pa onsi na anaci akweti utailo, cilatwazwa ukuyakolanya nu kukomya ucuza witu na Yeova.—Ayebulai 12:1, 2.

15. U mulandu ci uno twasininkizizya ukuti Abulaamu atizile aiseka pali vino wali ni cuvwila kuli Yeova?

¹⁵ Uzye Abulaamu wizile aiseka pali vino  uvwilanga Yeova? Baibo ikati Abulaamu ‘wafwile pa musinku wa kukota cuze, umukombe uwali nu luzango.’ (Utandiko 25:8) Lino Abulaamu wali ni myaka 175, welenganyanga pali vino vyamucitikilanga umu myaka ya kucisila, nupya wali sana nu luzango. U mulandu ci? Pano ucuza wakwe na Leza aali cintu cino cacindime sana kuli aliwe. Nomba nanti cakuti Abulaamu wali ‘umukombe uwali nu luzango,’ cisikupiliula ukuti atalondanga ukwizaya nu umi ukunkolelo.

16. I vyani ivilalenga ukuti Abulaamu akaye ni nsansa umu paladaise?

¹⁶ Baibo ikati Abulaamu “walolanga umusumba ukulu uno kelenganya na kakuula wakweo a Leza, nga nu mufula wakweo uwa manda pe.” (Ayebulai 11:10) Abulaamu wataile ukuti wanda umwi alalola umusumba uwo, kuli kuti Uwene Wakwe Leza ulateeka insi yonsi. Nu mu cumi alaulola! Elenganyini vino Abulaamu alaya ni nsansa lino alaikala umu paladaise nu kutwalilila ukukomya ucuza wakwe na Leza. Alaya ni nsansa ukwizamanya ukuti utailo uno wakweti wazwilizye aomvi yakwe Leza pa myaka iingi! Umu paladaise alazana ukuti impolelwa ya pa Mwamba wa Moliya cali icilangililo ca cintu icicindame icali nu kucitika ukunkoleelo. (Ayebulai 11:19) Nupya alamanya nu kuti vino uvwile uyi lino wateyanyanga ukuti apeele umwanakwe impolelwa, cazwa antu aingi ukumanya vino Yeova uvwile uyi lino wazumilizye ukuti umwanakwe Yesu Klistu atuule umi wakwe kuti akulule antu. (Yoane 3:16) Utailo uno Abulaamu wakweti walenga ukuti fwensi twataizya sana pa mfwa yakwe Yesu nu kutemwa kuno watutemwa!

17. I vyani vino mumalondesyanga ukucita, nupya i vyani vino tulasambilila umu cipande icilondelilepo?

¹⁷ Lekini fwensi twalondesya ukuya sana nu utailo wakwe Abulaamu. Naswe tulinzile ukumanya Yeova nupya tulinzile ukulola vino Yeova akatucitila. Ndi cakuti twatwalilila ukusambilila pali Yeova nu kumuvwila tulalola vino Yeova akatupaala nu kutucingilila. (Welengini Ayebulai 6:10-12.) Lekini Yeova atwalilile ukuya cuza witu amanda pe! Umu cipande icilondelilepo, tulasambilila pa antu yamwi ali nu tailo nupya ali sana ya cuza yakwe Leza.