IUSYINI uwanda uno mwali sana nu luzango. Uzye u wanda uno mwatwazilwe nanti ukutwala nanti uzye u wanda uno mwakweti umwana wa kutandikilako? Nanti uzye u wanda uno mwawatiziwe? Kwene uwanda uno mwawatiziwe ufwile wacindime sana umu umi winu nupya wamuletile sana uluzango. Uwanda uwo aina inu na yankazi yali sana nu luzango lino mwalangilile vino mwatemwa Leza nu mwenzo winu onsi, nu umi winu onsi, na mano inu yonsi, na maka inu yonsi!—Mako 12:30.

Kwaula nu kutwisika mufwile mwalola insansa izyaya umu kuombela Yeova ukufuma pano mwawatiziwilwe. Luzango luno ya kasimikila aingi yakweti lwasila. U mulandu ci? U mulandu ci uno tulinzile ukutwalilila ukuombela Yeova nu luzango?

Ilandwe lya Wene likatuletela sana uluzango. U mulandu ci? Pano Yeova watulaya ukuti Uwene wasya usisyepo insi ii ipe nupya ulaleta insi ipya yakwe Leza. Pali Zefaniya 1:14 pakaati: “Uwanda ukulu wakwe [Yeova] uli mupipi, watiupalama, ala pasi pakukalauka ukufika!” Nomba ndi cakuti tukaelenganya ukuti uwanda ukulu wakwe Leza ucili ukutali, uluzango luno twakwata lungasila. Cingalenga ukuti tute ukuombesya umu mulimo wakwe Leza.—Mapinda 13:12.

Ndi cakuti tukuzanwa sana na ina itu na yankazi tulakomeleziwa sana ukutwalilila ukuombela Yeova nu luzango. Imiyele isuma ino antu yakwe Yeova yakwata, limwi iyalenzile tuye umu kupepa kwa cumi nupya limwi icalenzile tutandike ukuombela Leza nu luzango. (1 Petulo 2:12) Nomba i cani cingacitika ndi cakuti umwina umwi nanti nkazi wazingwa pa mulandu wakuti aatuvwilile masunde yakwe Leza? Limwi yamwi umu cilongano yangatoovoka nu kuta ukuya nu luzango.

Ukutemwisya impiya nako kungalenga uluzango luno twakwata ukusila. U mulandu ci? Antu aya umu nsi ii yakwe Satana yangezya na maka ukutulenga twaelenganya ukuti tufwile ukukwata ivintu ivingi ni visilondekwa sana. Fwandi lekini twaiusya amazwi yano Yesu walanzile akuti: “Pasi umuntu angaombela aene yaili; pano angapata wenga nu kutemwa umuze, nupya angayela wenga nu kusula umuze. Mutangaombela Leza nga ni vyuma.” (Mateo 6:24) Tutange tuombele Yeova nu luzango alino pa nsita iliimwi kwene ala tukulondesya ukukwata ivintu ivyaya muno nsi.

Ukuombela Yeova asi icisendo kuli yayo atemwa Yeova. (1 Yoane 5:3) Iusyini ukuti Yesu watiile: “Izini kunondi, mwensi mwe yatonte nupya anyomelwa, nani namamupeela upuzo. Zwalini ikoli lyane, musambilile kunondi, pano nene wa mutembo, nupya nkaicefya mu mwenzo, nga mumazana upuzo mu myenzo inu. Pano ikoli lyane lino nkazwika ilyangupale, ni cisendo cino nkatwika citanyooma.”  (Mateo 11:28-30) Ukuya umu kupepa kwa cumi kukatuletela sana uluzango. Fwandi kwaya imilandu iingi isuma iikaalenga ukuti twaombela Yeova nu luzango. Lekini tulande pa milandu itatu.—Habakuku 3:18.

Tukaombela Leza u watupeela umi, nupya a Leza wa luzango. (Milimo 17:28; 1 Timoti 1:11) Twaiusya ukuti umi uno takwata uwakwe kaumba witu. Fwandi lekini tutwalilile ukumuombela nu luzango nanti icakuti pano twawatiziwilwe patipalengela.

Uvwini vino cali kuli ya Héctor, aombela Yeova umu mulimo wakutandalila ivilongano pa myaka 40. Nanti icakuti “yatiyakota,” yacili yakaipakizya ukuombela Yeova nu luzango. (Masamu 92:12-14) Pa mulandu wakuti aci yao yakalwalilila, yata ukuombesya umu mulimo wakwe Yeova, nomba ya Héctor yacili yakaombela Yeova nu luzango. Yatiile: “Nanti icakuti ukulwala kwakwe mamane kukuya kukwipilako nupya cisicanguke ukumusakamala, ntazumilizya ukuti cii cilenge inte ukuombela Leza wa cumi nu luzango. Ukumanya ukuti Yeova uwaumvile antu yonsi u wampeela umi, kwaleenga ukuti imutemwe sana nu kulamuombela nu mwenzo wane onsi. Nkaezya sana na maka ukutwalilila ukulasimikila sana, nu kulataila sana muli vino Yeova watulaya pakuti ntata ukuya nu luzango.”

Yeova watutumila umwanakwe ukwiza tufwila pakuti tuye ni nsansa. Cumi kwene “Leza watemilwe amu nsi nga apeela Mwana wakwe wino uwavilwe wenga, kuti wensi wino wataila munoli atakalowe, lelo aye nu umi wape.” (Yoane 3:16) Maifyo itu yangelelwa nupya tungaya nu umi wa pe ndi cakuti twataila sana umu wila uno Leza watupeela, kuli kuti umi wa mwana wakwe. Fwandi uu umulandu ukalamba uno tulinzile ukutaizizya Leza! Nupya ndi tukutaizya, cilalenga ukuti tuye nu luzango lino tukuombela Yeova.

Umwina Jesús uwikalanga uku Mexico, watile: “Nali nene muzya wa ncito ino naombanga, insita zimwi naombanga ni nsita ino ntalinzile ukuomba nanti icakuti asi vino isunde lyali. Naombanga vivyo pakuti sile inkwate impiya. Lyene nasambilile pali Yeova na pali vino watutumiile umwanakwe kuti aize atufwile. Natandike ukulondesya ukumuombela. Fwandi naipeezile kuli Yeova, lyene napingwilepo ukuta incito nanti icakuti naomvile pa kampani iya imyaka 28, nupya natandike umulimo wa nsita yonsi.” Ali vino Jesús watandike ukuombela Yeova nu luzango.

Twaya asanguluke na cii cikatuletela uluzango. Uzye mukwiusya vino mwali lino mutali musambilile pali Yeova? Umutumwa Paulo wanenyile Aina Klitu aku Loma ukuti “mwali yazya akuyela maifyo” nomba ndakai mwemwe “yazya akacita  vyawololoke.” Pa mulandu wakuti yali ni miyele isuma, yataile ukuti yali nu kwizaikala manda pe. (Loma 6:17-22) Pa mulandu wakuti tukacita vino Yeova akalonda, tusiya nu ulanda pa mulandu ni iviipe ivikacitika. Mu cumi twaya nu luzango!

Ya Jaime, aatataile ukuti Leza akuno waya, yatangi ivintu vyasangwike sile, nupya yaombanga umulimo wa kulwa ulwete lwa kucimvyanya. Ya Jaime yatandike ukuya uku kulongana nupya yuvwile ningo sana lino yaweni vino antu yano yazanyile yatemwana. Pakuti ya Jaime yate ukucita vyonsi vino yacitanga, yapefile kuli Yeova ukuti ayazwe ukumutaila. Ya Jaime yalanzile yati: “Panono panono nizile imanya ukuti mu cumi Leza uwakwata ukutemwa nupya uwa luse akuno waya.” Ukucita vino Yeova akalonda cangazwa sana. Nga ntasenuka, pansita ii nga nafwa wakwe vino cali uku yanji yamwi. Pa myaka yonsi ya umi wane, imyaka ino naombela Yeova ali ino naya sana nu luzango.”

Uzye tulinzile ukuvwa uli lino tukulolela impelelekezyo ya nsi ii? Iusyini ukuti tukacita ukulonda kwakwe Leza nupya tukaloleela ukwiza ikala manda pe. “Acino mutaatonta mu kwazwana. Pano ndi musikutonta, lyene muli nu kupelwa cilambu lino nsita ilafika.” (Galatiya 6:8, 9) Lekini tutwalilile ukuzizimizya, ukuya ni miyele ilaalondekwa pakuti tukapusuke umu “ucuzi ukulu cuze,” nu kutwalilila ukuombela Yeova nu luzango.—Umbwilo 7:9, 13, 14; Yakobo 1:2-4.

Tutanga tutwisike ukuti Yeova alatwazwa lino tukutwalilila ukuzizimizya pano asiilila vino twamuombela nu kutemwa kuno twamutemwa. Ndi cakuti twatwalilila ukumuombela nu luzango, tulaya wakwe kalemba wa Masamu Davidi, uwalanzile ati: “Lyonsi nkumanya ukuti Yeova ali panondi, ali pipi ukwi kasa lilunji lyane, fwandi kusi icingantenkanya. Caleka umwenzo wane uli ni nsansa, na mazwi yane aluzango pano nanti angala nene mwina kufwa umwili wane nao utakweti icifinya mwili.”—Masamu 16:8, 9.