1-2. I vyani vino tulinzile ukutwalilila ukucita pa cisila ca kubatiziwa? Londololini.

 I MIKU inga ino mukaziifya umu ng’anda? Limwi lino mutatala mwakuukilamo, mwaziifizyemo ningo sana. Nomba i vyani vingacitika ndi cakuti mwata ukuziifya lino papita insita? Mungafiita nupya kwene. Pakuti umu ng’anda mutwalilile ukulaloleka ningo, mulinzile ukulaziifyamo lyonsi.

² Umu nzila ili imwi kwene tulinzile ukutwalilila ukuziifya imyelenganyizizye itu ni miyele. Ukuya kwene, lino tutatala twabatiziwa twaombesyanga ukusenuka pakuti “tuisangulule kuli vyonsi ivikakowezya umwili nu mupasi.” (2 Kol. 7:1) Nomba ndakai tulinzile ukuvwila ukusunda kwa mutumwa Paulo kuli kuti “ukutwalilila ukuya na melenganyo apya.” (Efes. 4:23) U mulandu ci uno tulinzile ukutwalilila ukusenuka? A pa mulandu wakuti imiyele iipe iya mu nsi ii ingalenga tukowele. Pakuti tutwalilile ukuzanzya Yeova, tulinzile lyonsi ukulaceceta imyelenganyizizye itu, imiyele itu na vino tukalondesya ukucita.

3. Uzye cikapiliula cani ukusenula imyelenganyizizye inu? (Loma 12:2)

³ I vyani vino tulinzile ukucita pakuti tusenule imyelenganyizizye itu? (Belengini Loma 12:2.) Amazwi ya Cigiliki aasenulwa ukuti “kusenula imyelenganyizizye inu” yangasenulwa nu kuti “kuziifya melenganyo inu.” Fwandi cii cisikupiliula ukuti tulinzile twacita ningo umu vintu sile ivinono. Lelo tulinzile  ukwelenganya pali vino twaya nu kusenuka pakuti twaezya na maka ukuvwila masunde yakwe Yeova. Tutalinzile sile ukucita vivyo pa muku onga, lelo tulinzile ukutwalilila ukucita vivyo.

4. Uzye tungacita uli pakuti tutatungululwa ni myelenganyizizye ya mu nsi ii?

⁴ Lino tulamalilika, lyonsi tulazanzya Yeova muli vyonsi. Pa nsita ii, tulinzile ukutwalilila ukuombesya ukuzanzya Yeova. Pali Loma 12:2 Paulo walanzile ukuti tulinzile ukusenula imyelenganyizizye itu pakuti tumanye vino Leza akalonda twacita. Ukucila ukuleka insi ii ipe yatutungulula, tulinzile ukulaiceeceta lyonsi pakuti tumanye vino imyelenganyizizye yakwe Yeova ikututungulula ukucila ukuleka insi ii yatutungulula lino tukwimika mauyo nanti lino tukupingula pali vimwi.

5. Uzye tungaceeceta uli vino tukaelenganya pa kupalama kwa wanda wakwe Yeova? (Lolini cikope.)

⁵ Lekini tulangilile. Yeova akalonda twaelenganya sana “pa kuyapo kwa wanda wakwe Yeova.” (2 Pet. 3:12) Yuzyini mweineco muti: ‘Uzye vino nkacita vikalanga ukuti namanya ningo ukuti insi ii yasya iyononwe? Uzye vino nkapingulapo pa masambililo na pa ncito vikalanga ukuti ukuombela Yeova ali cintu cicindame umu umi wane? Uzye nataila ukuti Yeova alampeela nu kupeela ulupwa lwane vino tukalondekwa nanti uzye ilingi nkasakamala pa vintu vino tukalondekwa?’ Elenganyini vino Yeova akauvwa ningo ndi cakuti walola tukwezya na maka ukucita ivintu ukulingana nu kulonda kwakwe.—Mate. 6:25-27, 33; Filipi 4:12, 13.

6. I vyani vino tulinzile ukutwalilila ukucita?

⁶ Tulinzile ukulaceeceta amelenganyo itu lyonsi nu kusenuka muno tulinzile ukusenuka. Paulo wanenyile Aina Kolinto ukuti: “Mwayezya pakuti mumanye ndi cakuti mwaya nu utailo; mwaikako mano pakuti mumanye vino mwaya.” (2 Kol. 13:5) Ukuya “nu utailo” cisipiliula ukuti tulinzile sile ukulaya  umu kulongana nu kulasimikila lyonsi, lelo kuli na vyuze vino tulinzile ukucita. Tulinzile nu kuceeceta vino tukaelenganya na vino tukalondesya ukucita. Fwandi tulinzile ukusenula imyelenganyizizye itu lino tukubelenga Izwi Lyakwe Leza, ukusambilila ukulaelenganya wakwe vino Yeova akaelenganya nu kucita vyonsi vino tungacita pakuti twamuzanzya.—1 Kol. 2:14-16.

7. Ukulingana na Efeso 4:31, 32, i vyani vyuze vino tulinzile ukucita, nupya u mulandu ci uno cingatalila ukucita vivyo?

⁷ Belengini Efeso 4:31, 32. Ukulunda pa kusenula imyelenganyizizye itu, tulinzile nu “kuzwala untu upya.” (Efes. 4:24) Tulinzile ukuombesya pakuti tucite vivyo. Vimwi vino tungacita, u kwezya na maka ukuta ukuya ni miyele iipe wakwe, lupato, icipyu nu kusoka. U mulandu ci uno cingatutalila ukucita vivyo? A pa mulandu wakuti cingatutalila ukusenula imiyele imwi iipe. Wakwe, Baibo ikati “Amelenganyo ya antu yaya ankota ukufuma ku civyalilwa.” (Utan. 8:21) Umuntu uwakwata imiyele ii iipe alinzile ukutwalilila ukwezya na maka pakuti asenuke na pa cisila ca kubatiziwa wakwe vino tumasambilila kuli vino vyacitikile umwina umwi.

8-9. Uzye ivyacitikiile ya Stephen vikutulangilila uli ukuti tulinzile ukutwalilila ukuzuula untu wa mpiti?

⁸ Cataliile sana ya Stephen ukuta ukusoka zuwa. Yatiile: “Na pa cisila ca kubatiziwa nali nu kutwalilila ukwezya na maka ukuta ukusoka zuwa. Wakwe, wanda umwi lino nasimikilanga uku ng’anda ni ng’anda, naweni umwi wiya ledyo muli motoka yane fwadi namuzinginye. Lino nayanga nkumupalamila, wasile wasumba ledyo nu kutuuka. Lino nasimikiileko yauze vino cali pakuti mpoke ledyo eluda umwi uwa mwi umba litu wanguzizye ati: ‘Ya Stephen, ndi cakuti mulema umuntu wiyo ngi mwamucita uli?’ Iuzyo lii lyalenzile nelenganyepo sana nupya lyankomelizye ukutwalilila ukuya uwa mutende.” b

⁹ Ivyacitikile ya Stephen vikutulangilila ukuti tungalanga imiyele ii iipe ukwaula ukwenekela na lino tukwelenganya ukuti twata ukuya ni miyele ii. Ndi cakuti ivya musango uwo vyamucitikila, mutalinzile ukutoovoka nu kwelenganya ukuti imufilwa ukucita vino Umwina Klistu alinzile ukucita. Nanti sile umutumwa Paulo walanzile ukuti: “Lino nkulonda ukucita icisuma, nkazana ukuti nkucita iciipe.” (Loma 7:21-23) Aina Klistu yonsi yatamalilika fwandi ali wensi wakwata imiyele imwi iipe iikatwalilila ukuwela wakwe viivi kwene vino ulukungu ni vikona vikafisya umu mang’anda itu nga papita insita. Tulinzile ukutwalilila ukuombesya pakuti tuye ni miyele isuma. Tungacita uli vivyo?

10. Tungacita uli pakuti tucimvye imiyele iipe? (1 Yoani 5:14, 15)

¹⁰ Mwanena Yeova pa miyele iipe ikumutalila ukusenula nu kutaila ukuti aluvwa ipepo linu nu kumwazwa. (Belengini 1 Yoani 5:14, 15.) Nanti cakuti Yeova atange afumyepo imiyele iyo, angamupeela amaka pakuti mutwalilile ukwezya ukukanaya ni miyele iyo. (1 Pet. 5:10) Pa nsita ii mwaezya na maka ukucita ivintu kulingana na vino mukupepelapo nu kukanacita ivintu ivingalanga ukuti muli ni miyele ya untu wa mpiti. Wakwe, mwaya acenjele pakuti mutaasoolola mafyumu, mapuloglamu ya pa TV nanti ivya kubelenga ivikatungilila imiyele iipe ino mukulonda ukuta ukuya nayo. Nupya mutatwalilila ukwelenganya pa vintu iviipe.—Filipi 4:8; Kolo. 3:2.

11. I vyani vino tulinzile ukucita pakuti tutwalilile ukuzwala untu upya?

 ¹¹ Nanti cakuti twazula untu wa mpiti, cacindama sana ukutwalilila ukuzwala untu upya. Mungacita uli vivyo? Mulinzile ukwimika uyo uwa kutandika ukukolanya Yeova lino mu kuisambilizya pa miyele yakwe. (Efes. 5:1, 2) Wakwe, ndi cakuti mukubelenga ilyasi lya muli Baibo ilikulanda pali vino Yeova akaeleela mwayuzya mweineco muti, ‘Uzye nkaeleela yauze?’ Ndi cakuti mukubelenga pali vino Yeova akalanga uluse uku yapiina, mwayuzya mweineco imuti, ‘Uzye nani nkaika mano uku Ina Klistu yanji aakulondekwa uwazwilizyo, nupya ningalanga uli imiyele iyo muli vino nkacita?’ Pakuti tuzwale untu upya tulinzile ukutwalilila ukusenula imyelenganyizizye itu nu kuteeka umwenzo lino tukucita vivyo.

12. Uzye ivyacitikiile ya Stephen vikalangilila uli ukuti Baibo yakwata amaka ya kusenula antu?

¹² Ya Stephen yano itulandapo mpiti yazanyile ukuti yatandike ukuzwala untu upya panono panono. Yatiile: “Ukufuma pano nabatiziwilwe nakwata intazi izipusanepusane muno nalondekwanga ukwezya na maka pakuti ntasoka. Nasambilila ukuti ndi cakuti yamwi yansosya ndinzile ukufumapo sile nanti ukucitapo vimwi ivingalenga intazi iyo ukukanaipilako. Antu aingi ukwikako sile na mamane yakantaizya pali vino natwalilile ukuya umuteekele lino nakwatanga intazi zii. Nani kwene nemwineco nkazunguka. Nsielenganya ukuti nasenuka uku maka yane. Lelo namanya ukuti vino nasenuka vikalangilila ukuti Baibo yakwata maka ya kusenula antu.”

13. I cani cilatwazwa ukuya ni miyele isuma? (Galatiya 5:16)

¹³ Belengini Galatiya 5:16. Pakuti tucimvye imiyele iipe nu kulacita ivisuma Yeova akatupeela umupasi wakwe uwa muzilo. Nga tukuisambilizya Izwi Lyakwe Leza, tukalenga umupasi wakwe ukulatutungulula. Nupya tukapokelela umupasi wa muzilo ndi cakuti twazanwa umu kulongana. Pa kulongana kuu kwa Ina Klistu, tukaya pamwi na ina na ya nkazi aakaezya na maka ukucita ivisuma wakwe vino tukacita na cico cikatukomelezya. (Aeb. 10:24, 25; 13:7) Nupya nga twapepa kuli Yeova ukufuma pansi ya mwenzo nu kumupaapata ukuti atwazwe, alatupeela umupasi wa muzilo uulatwazwa ukutwalilila ukucimvya imiyele iipe. Ukucita ivintu vyonsi vii kutalalenga imiyele iipe ukusila, lelo kulatwazwa ukutaluka uku miyele kwene iyo. Wakwe vino Galatiya 5:16 ikalanda, yayo akatungululwa nu mupasi yatalaalondela “vino imili ikalonda.”

14. U mulandu ci uno cacindamila ukutwalilila ukwezya na maka ukuya ni miyele isuma?

¹⁴ Ndi cakuti twatandika ukucita ivintu ivingatwazwa ukuya na ucuza usuma na Yeova icicindama ukutwalilila ukucita vivyo kwene nu kutwalilila ukwezya na maka ukuya ni miyele isuma. U mulandu ci? A pa mulandu wakuti umulwani witu asita ukutulwisya. Umulwani wiyo i tunko lya kucita iviipe. Na pa cisila ca kubatiziwa tungazana ukuti tukucita ivintu vino tutalinzile ukucita wakwe, ukusitika, ukumwesya uwengwa nanti ukutamba vikope vya ucizelele. (Efes. 5:3, 4) Umwina umwi uwacance watiile: “Icintu cimwi citale sana cino nkalwisyanya naco u kulonda ukulaala na alumendo yanji. Nalolanga ukuti vino nayuvwanga ivya pa kasita sile nomba ncili nkayuvwa vivyo kwene.” I cani cingamwazwa ndi cakuti cikumutalila ukuta imiyele iipe?

15. U mulandu ci uno cikatukomelezezya ukumanya ukuti kusi uwezyo uli onsi uno tukapitamo “uusicitikila antu yonsi”? (Lolini icikope.)

¹⁵ Lino mukwezya na maka ukulwisya imiyele ii iipe, mwaiusya ukuti mutaya mwenga.  Baibo ikalanda ukuti: “Kutaaya uwezyo uwiza pali mwemwe uusicitikila antu yonsi.” (1 Kol. 10:13a) Ya kasenula yamwi yasenula icikomo cii ukuti: “Ukweziwa konsi kuno kukamucitikila, ukuli kumwi kwene ukukacitikila antu yauze.” Amazwi yaa yalembiilwe Aina Klistu aonsi na anaci aikalanga umu Kolinto. Yamwi mpiti yacitanga ucende, ukulaalana aonsi yatupu nanti anaci yatupu, nupya yali aacakolwa. (1 Kol. 6:9-11) Uzye mukwelenganya ukuti pa cisila ca kubatiziwa yatakweti imiyele iipe ili yonsi? Awe foo. Yonsi kwene yali Aina Klistu apakwe, nomba nanti ciye vivyo yatali amalilike. Ukwaula nu kutwisika yalwisyanyanga ni miyele iipe pa nsita zimwi. Cii catukomelezya. U mulandu ci? Pano cikutulangilila ukuti imiyele iipe yonsi ino tukulwisyanya nayo yauze yene yaicimvya. Ukwaula nu kutwisika mungaya “akome mu utailo, pano mwamanya ukuti intazi zino mukaculako azino na ina inu umu nsi yonsi yakaculako.”—1 Pet. 5:9.

16. Iintazi ci ino tulinzile ukutalukako, nupya u mulandu ci?

¹⁶ Tutalinzile ukulaelenganya ukuti kusi anguvwikisya intazi zino tukupitamo. Imyelenganyizizye ya musango uu ingalenga mutandike ukwelenganya ukuti kusi angamwazwa nupya mutange mukwanisye ukucimvya imiyele iipe. Vikwene avino Baibo ikalanda. Ikati: “Leza u wa cumi, nupya atalaleka ukuti mweziwe ukucila pali vino mungazizimizya, lelo lino mweziwa alapekanya inzila iyakuti mufumilemo pakuti mungazizimizya.” (1 Kol. 10:13) Fwandi tungatwalilila ukuya acisinka kuli Yeova na lino cikututalila ukucimvya imiyele iipe. Ndi cakuti Yeova watwazwa tungatwalilila ukucimvya imiyele iipe.

17. Nanti cakuti tutange tukwanisye ukusisyapo imiyele iipe, i vyani vino tungacita?

¹⁷ Lyonsi mwaiusya vii: Apa mulandu wakuti tutamalilika tutange tukwanisye ukusisyapo imiyele iipe. Nomba nga twalola ukuti twatandika ukuya ni miyele iipe, tulinzile ukukana  imiyele iyo wakwe vino Jozefu wacisile lino wakanyile ukulaala na muka Potifa nu kuutuka. (Utan. 39:12) Mutalinzile ukucita ivintu ivingalenga muye ni miyele iipe.

18-19. A mauzyo ci yano tulinzile kuyuzya lino tukwezya na maka ukusenula imyelenganyizizye itu?

¹⁸ Ukusenula imyelenganyizizye itu kukalondekwa ukutwalilila ukuombesya pakuti twaelenganya nu kucita ivintu ukulingana na vino Yeova akalonda. Fwandi tulinzile ukulaiceeceta lyonsi nu kuyuzya ukuti: ‘Uzye vino nkacita vikalanga ukuti namanya ukuti tukwikala umu manda ya kusyalikizya? Uzye nkuombesya ukutwalilila ukuzwala untu upya? Uzye nkaleka umupasi wakwe Yeova ukuntungulula pakuti nataaluka uku vintu vino imili ikalonda?’

¹⁹ Lino mukuiceeceta mutaenekela ukucita ivintu wa antu aamalilike lelo mwaya ni nsansa nga mwalola ukuti mukucita ningo muno mutacitanga ningo mpiti. Ndi cakuti mwalola ukuti muli mumwi muno mulinzile ukuombelapo, mutalinzile ukutoovoka. Lelo mwalondela ukusunda ukwaya pali Filipi 3:16 ukukati: “Asi mulandu na pano twafika ukulunduluka, lekini tutwalilile ukulunduluka vikwene.” Nga mwacita vivyo mulalola vino Yeova alamupaala pali vino mukuombesya ukusenula imyelenganyizizye inu.