1-2. (a) Uzye tungayuvwa uli nga tukwelenganya pa umi wakwe Yesu nu mulimo uno waombanga? (b) I vyani vino tumasambilila umu cipande cii?

 NDI cakuti wino twatemwa wafwa, tukatandika ukumuluuka sana. Pa kutandika tungauvwa sana uyi nga twelenganya lino twali nu mutemwikwa witu lino atatala wafwa, sana sana ndi cakuti wacuzile sana pakuti afwe. Nomba lino insita ikuya ikupita tungatandika ukuya ni nsansa ndi cakuti twatandika ukwelenganya pali vimwi vino watusambilizye, vino wacitanga, vino walandanga ivyatukomelezyanga nanti ivyalenganga tuye ni nsansa.

² Vikwene avino tukauvwa ndi cakuti twelenganya pali vino Yesu wacuzile nu kufwa. Umu manda ya Ciusyo tukaelenganya sana pali vino imfwa yakwe Yesu yacindama. (1 Kol. 11:24, 25) Tukaya sana ni nsansa nga twelenganya pali vino Yesu walanzile na vino wacitanga lino wali pano nsi. Nupya cikatukomelezya sana nga twelenganya pali vino akucita ndakai na pali vino alacita uku nkoleelo. Nga tukwelenganya pa vintu vii na pali vino watutemwa cilalenga twamutaizya sana, wakwe vino tumasambilila umu cipande cii.

3. I vyani vimwi ivikalenga twataizya api lambo lyakwe Yesu?

³ Nga twelenganya pa umi wakwe Yesu na pa mfwa yakwe cikalenga twataizya. Lino Yesu wali pano nsi wasambilizyanga antu apa visuma vino Uwene Wakwe Leza wali nu kucita. Tukataizya sana pali vino Baibo ikatusambilizya api lambo lyakwe Yesu na pa visuma ivilacitika pa mulandu ni lambo kwene  lii. Nupya tukataizya sana api lambo pano lyalenga twaipakizya ucuza usuma na Yeova alino na Yesu. Yayo akwata utailo muli Yesu yakwata nu upaalilo uwa kwikala amanda pe nu kulola atemwikwa yao afwa nupya. (Yoa. 5: 28, 29; Loma 6: 23) Pasi vino twacita pakuti tupokelele mapaalo yaa nupya pasi vino tungalipila Yeova na Yesu pali vino yatucitila. (Loma. 5:8, 20, 21) Nomba tungalanga ukuti tukataizya. Tungalanga uli vivyo?

4. Uzye Maliya uwa ku Magadala walangilile uli ukuti wataizye pali vino Yesu wamuciitile? (Lolini cikope.)

⁴ Elenganyini pa mwanaci Umuyuda uwizina lyakuti Maliya uwa ku Magadala. Waculanga sana pa mulandu wakuti iviwa 7 vyamucuzyanga. Afwile wayuvwanga ukuti kusi aliwensi uwali nu kumwavwa. Fwandi elenganyini vino wataizye lino Yesu wamufumizizye iviwa ivyamucuzyanga sana! Wasoolwilepo ukuya umulondezi wakwe nupya waomvizye insita, amaka, alino ni vikwatwa vyakwe uku kutungilila umulimo wa kusimikila. (Luka 8:1-3) Nanti cakuti Maliya wataizye pali vino Yesu wamucitiile, afwile ataamanyile vino Yesu wali nu kumucitila uku nkoleelo. Wali nu kupeela umi wakwe “pakuti wensi uwataila muli aliwe” akaye nu umi wa pe. (Yoa. 3: 16) Lelo watwalilile ukulanga ukuti wataizyanga pali vino wamucitiile pano watwalilile ukuya uwa cisinka kuli Yesu. Lino Yesu wali umupipi nu kufwa apa cimuti ca kucuziwilwapo, Maliya wimilile umupipi pano wasakamalanga Yesu nupya walondanga ukutekezya yauze azanyilweko. (Yoa. 19:25) Lino Yesu wafwile, Maliya na anaci yaili yakazile amafuta anunkile pakuti yakapake umwili wakwe Yesu pa wanda wa kuziika. (Mako 16:1, 2) Yeova walambwile Maliya pali vino wali uwa cisinka kuli Yesu. Yesu walolekiile kuli Maliya nu kulanda nawe pa cisila ca kutuutululwa. Asambi sile anono akweti isyuko lii.—Yoa. 20:11-18.

5. Tungalanga uli ukuti tukataizya pali vino Yeova na Yesu yatucitila?

⁵ Naswe kwene tungalanga ukuti tukataizya pali vino Yeova na Yesu yatucitila lino  tukuomvya insita itu, amaka itu, impiya zitu, uku kuombela Yeova. Wakwe, tungazwilizya umu mulimo wa makuule nu ukuzifya ivikuulwa vino tukapepelamo Yeova.

6. U mulandu ci uno tungalandila ukuti ilambo uupe kuli swensi wenga na wenga?

⁶ Nga twelenganya pali vino Yeova na Yesu yatutemwa cikalenga naswe tuyatemwe. (1 Yoa. 4:10, 19) Tukayatemelwako sana ndi cakuti twelenganya ukuti Yesu watufwilile swensi wenga na wenga. Umutumwa Paulo wasininkizye icisinka cii lino walembiile Aina Galatiya ukuti: “Umwana wakwe Leza, uwantemilwe nupya uwapeezile umi wakwe pa mulandu wane.” (Gala. 2:20) Ilambo lyakwe Yesu lyalenga Yeova atupalamike kuli aliwe alino nu kuya ya cuza yakwe. (Yoa. 6:44) Uzye cisimukomelezya ukumanya ukuti Yeova akalola ivisuma muli mwemwe nu kuti walipila umutengo ukulu pakuti mutwalilile ukuya cuza wakwe? Uzye cisimulenga mwatemelwako sana Yeova na Yesu? Fwandi tulinzile ukuyuzya sweineco ukuti, ‘Uzye ukutemwa kukulenga nalondesya ukucita vyani?

7. Uzye swensi tungalanga uli ukuti twatemwa Yeova na Yesu? (2 Kolinto 5:14, 15; 6:1, 2)

⁷ Ukutemwa kuno twatemwa Yeova na Yesu kulinzile ukutulenga twatemwa antu yauze. (Belengini 2 Kolinto 5:14, 15; 6:1, 2.) Inzila yonga ino tungalangilamo ukutemwa kuu u kuombesya umu mulimo wa kusimikila. Tukalanzyanya na yonsi yano twazana. Tusikana ukulanda na antu pa mulandu nu kupusana kwa nkanda, umutundu, mikalile nanti inkulilo. Nga tukucita vivyo ala tukuomba ukulingana nu kulonda kwakwe Yeova ukwa kuti “antu amisango yonsi yace yapusuke nu kumanya ningo icumi.”—1 Tim. 2:4.

8. Tungalanga uli ukuti twatemwa aina na ya nkazi?

 ⁸ Nupya tukalanga ukuti twatemwa Leza na Klistu nga tukulanga ukutemwa uku ina na ya nkazi. (1 Yoa. 4:21) Tukaipeelesya ukuyazwa muli vyonsi vino yakulondekwa lino yali ni ntazi. Tukayakomelezya nga yafwilwa atemwikwa yao, ukuyapempula nga yalwala, alino nu kwezya na maka ukuyakomelezya nga yatoovoka. (2 Kol. 1:3-7; 1 Tesa. 5:11, 14) Tukatwalilila ukuyapepelako pano twamanya ukuti “Ipepo lya kupaapata kwa mulungami lyakwata sana amaka.”—Yako. 5:16.

9. I vyani na vyuze vino tungacita pa kulanga ukuti twatemwa aina na ya nkazi?

⁹ Tukalanga ukuti twatemwa aina na ya nkazi lino tukuombesya ukupanga umutende nayo. Tukaezya ukukolanya vino Yeova akaeleela. Ndi cakuti Yeova waitemiilwe ukuleka umwanakwe ukwizatufwila, fwandi naswe kwene tulinzile ukuya aiteyanye ukweleela aina itu na ya nkazi ndi cakuti yatuluvyanya. Tusilonda ukuya wa muzya umwipe uwa mu mulumbe wakwe Yesu. Wakanyile ukweleela umuzya muze uwamukwatiile inkongole izinono na pa cisila cakuti umusambazi wakwe wamweleela pa mulandu ni nkongole izingi zino wamukwatiile. (Mate. 18:23-35) Ndi cakuti mwapusana na umwi umu cilongano, uzye citange cizipe ukuwikizyanya lino Iciusyo citatala cafika? (Mate. 5:23, 24) Ndi cakuti mwacita vivyo mulalanga ukuti mwatemwa Yeova na Yesu.

10-11. Uzye ya eluda yangalanga uli ukuti yatemwa Yeova na Yesu? (1 Petulo 5:1, 2)

¹⁰ Uzye ya eluda yangalanga uli ukuti yatemwa Yeova na Yesu? Inzila yonga icindame ino yangacitilamo vivyo u kusakamala imfwele zyakwe Yesu. (Belengini 1 Petulo 5:1, 2.) Yesu walondolwile ningo icisinka cii ku mutumwa Petulo. Pa cisila cakuti Petulo wakana Yesu imiku itatu, walondanga ukucita vyonsi vino angakwanisya pakuti alange ukuti watemilwe Yesu. Pa cisila ca kutuutululwa, Yesu uzizye Petulo ati: “Simoni mwana Yoani, uzye wantemwa ukucila ivintu vii?” Tungasininkizya ukuti Petulo wacisile ivili vyonsi vino angakwanisya pa kulanga ukuti watemilwe Umwene wakwe. Yesu wanenyile Petulo ukuti: “Cema utwana twa mfwele utwane.” (Yoa. 21:15-17) Nupya Petulo wikanga sana mano uku mfwele zya Mwene umi wakwe onsi pa kulangilila ukuti watemilwe sana Yesu.

¹¹ Mwe ya eluda, uzye mungalanga uli ukuti mwacindika amazwi yano Yesu wanenyile Petulo lino kutatala kwaya Iciusyo na pa cisila ca Ciusyo? Mungalanga ukuti mwatemwa Yeova na Yesu nga mukucema imfwele nu kwazwa atonte ukuwela kuli Yeova. (Ezek. 34:11, 12) Nupya mulinzile ukwika mano uku yasambi ya Baibo nu ku yapya aazanwa uku Ciusyo nu kwezya na maka ukucita ivili vyonsi ivingalenga yuvwe ukuti iyapokeelelwa.

12. Uzye ukwelenganya pa mazwi yano Yesu walanzile usiku pa wanda wa kusyalikizyako lino atatala wafwa kungalenga uli tuye asipe? (Yoani 16:32, 33)

¹² Usiku pa wanda wa kusyalikizyako lino Yesu atatala wafwa, wanenyile asambi yakwe ukuti: “Mu nsi yii mulaakwata intazi, lelo sipini! Nemo incimvya insi.” (Belengini Yoani 16:32, 33.) I cani calenzile Yesu ukuya umusipe lino alwani yakwe yamutiinyanga nu kutwalilila ukuya uwa cisinka kufikila ni mfwa yakwe? Wataile Yeova. Pa mulandu wakuti wamanyile ukuti alondezi yakwe yali nu kukwata intazi izili zimwi, walenzile Yeova ukuti ayasakamala. (Yoa. 17:11) U mulandu ci uno cii cikatwazwila ukuya asipe? A  pa mulandu wakuti Yeova wakwatisya amaka ukucila alwani itu. (1 Yoa. 4:4) Yeova akalola vyonsi. Twasininkizya ukuti nga twamutaila tulata ukuya ni ntete nupya tulaya asipe.

13. Uzye Jozefu uwa ku Alimatiya walangilile uli ukuti wali umusipe?

¹³ Uvwini vino Jozefu wa ku Alimatiya wacisile. Ayuda yamucindike sana. Waombanga umu cilye ca Sanihedilini icilye icikalamba sana ica Ayuda. Lelo lino Yesu waombanga umulimo wa kusimikila pano nsi, Jozefu walangilile ukuti wali u musipe. Yoani walanzile ati “wali u musambi wakwe Yesu nomba aatalondanga ukumanyikwa pa mulandu wa kutiina Ayuda.” (Yoa. 19:38) Nanti cakuti Jozefu walondesyanga sana ukuvwa ukwi lyasi lisuma ilya Wene, atalondanga antu yamanye ukuti wataile Yesu. Watiinanga ukuti antu yali nu kuta ukumupeela umucinzi ndi cakuti yamanya ukuti wali umusambi wakwe Yesu. Lelo Baibo ikatunena ukuti pa cisila ca mfwa yakwe Yesu, Jozefu “wasifile aya kuli Pilato nu kuyalenga umwili wakwe Yesu.” (Mako 15:42, 43) Pa nsita ii Jozefu atalondanga ukufisa ukuti wali umusambi wakwe Yesu.

14. Mungacita uli ndi cakuti mukatiina antu?

¹⁴ Uzye catala camucitikilapo ukutiina antu wakwe vino cali kuli Jozefu? Uzye mukauvwa insonyi ukuimanyisya ukuti mwemwe Inte Yakwe Yeova lino muli uku sukulu nanti uku ncito? Uzye mukatiina ukuya ya kasimikila nanti ukubatiziwa pa mulandu wakuti mukasakamala pali vino yauze yalaelenganya pali mwemwe? Mutaleka ivya musango uwo vyamulesya ukucita vino imumanya ukuti i vya mpomvu. Mwapepa kuli Yeova nu mwenzo onsi. Mwamulenga ukuti amwazwa ukuya asipe lino mukucita ukulonda kwakwe. Nga mwalola vino Yeova akwasuka mapepo inu, mulaya akome sana nupya asipe.—Eza. 41:10, 13.

15. I vyani vino asambi yakwe Yesu yacisile pa mulandu nu luzango luno yali nalo lino Yesu walolekiile kuli aliyo? (Luka 24:52, 53)

¹⁵ Asambi yali sana nu ulanda lino Yesu wafwile. Elenganyini vino mwali nu kuvwa ndi cakuti akuno mwali lino Yesu wafwile. Yatafwililwe sile cuza wao lelo yayuvwile nu kuti yatiile ukuya nu upaalilo. (Luka 24:17-21) Nomba lino Yesu walolekiile kuli aliyo, wikazile nayo insita ikulu kuyazwa ukuvwikisya ukuti wafikilizyanga usesemo wa muli Baibo. Nupya wayapeezile nu mulimo ucindame. (Luka 24:26, 27, 45-48) Lino Yesu waswililanga  ukwi yulu pa cisila ca manda 40 ala asambi yakwe iyata ukuya nu ulanda nupya yali nu luzango. Yali ni nsansa pa mulandu wakuti yamanyile ukuti Yesu watuutulwilwe nupya wali nu kulayazwa lino yakuomba umulimo uno wayapeezile. Luzango luno yali nalo lwalenzile yalumbanya Yeova ukwaula ukuta.—Belengini Luka 24:52, 53; Mili. 5:42.

16. Uzye tungakolanya uli asambi yakwe Yesu?

¹⁶ Uzye tungakolanya uli asambi yakwe Yesu? Tungaya nu luzango nga tukupepa Yeova asi mu nsita sile iya Ciusyo lelo umwaka onsi. Pakuti tucite vivyo tulinzile ukulakoleezya Uwene Wakwe Leza. Aingi yasenulako imiombele yao pakuti yaombako umulimo wa kusimikila, ukuzanwa umu kulongana nu kukwata ukupepa kwa lupwa. Yamwi yasoololapo ukukanakwata ivintu vimwi vino yauze yakalola ukuti vyacindama pakuti yaombesya umu cilongano nanti ukuya umu kuombela ukukalondekwa ya kasimikila aingi. Nanti cakuti lyonsi tukalondekwa ukuzizimizya pakuti tutwalilile ukuombela Yeova, watulaya ukuti alatupaala nga tukukoleezya Uwene.—Mapi. 10:22; Mate. 6:32, 33.

17. I vyani vino mukulondesya ukucita umu nsita ya Ciusyo umwaka uu?

¹⁷ Tukulondesya ukuzanwa uku Ciusyo pali Ciili pa 4 Epuleo. Nomba mutalinzile ukuloleela insita iyo ikafike pakuti mukatandike ukwelenganya pa umi wakwe Yesu, pa mfwa yakwe alino na pali vino wene na Yeova yatutemwa. Mwaomvya kasita konsi kano mwasyukila ukwelenganya pali vii umu nsita ya Ciusyo. Mwapaatulako insita iya kubelenga nu kwelenganya pali vino vyacitiike ivyaya muli cati yakuti “Ivyacitikiile Yesu Umu Mulungu wa Kusyalikizyako Ukuya Pano Nsi” iyaya umu kabuku ka kuomvya pa kulongana kakwe Epuleo 2019. Lino mukucita vivyo mwabelenga malembo aangamwazwa ukulataizya sana, ukulanga ukutemwa, ukuya asipe alino nu luzango. Lyene mwaezya ukwelenganya pa nzila zino mungalangilamo ukuti mukataizya. Mungasininkizya ukuti Yesu alatemwa sana pali vyonsi vino mulacita pa kumwiusya umu nsita ii iya Ciusyo.—Kuso. 2:19.