CIPANDE CA KUSAMBILILAMO 4
Yeova Akatupaala Pali Vino Tukaezya na Maka Ukuzanwa Uku Ciusyo
“Mwacita cii pa kunjiusya.”—LUKA 22:19.
LWIMBO NA. 19 Cakulya ca Manguzi Ica Mwene
VINO TUMASAMBILILAPO a
1-2. U mulandu ci uno tukazanilwa uku Ciusyo cila mwaka?
PA MYAKA umupiipi na 2,000 yatipitapo, Yesu wapeezile umi wakwe pa mulandu witu na cico calenga tukwate isyuko lya kwizaya nu umi wa pe. Usiku pa wanda wa kusyalikizyako lino Yesu atatala wafwa, wanenyile alondezi yakwe ukulaiusya ilambo lino wapeezile ukuomvya sile umukate na waini pa kuzevya.—1 Kol. 11:23-26.
2 Tukauvwila isunde lyakwe Yesu pa mulandu wakuti twamutemwa sana. (Yoa. 14:15) Cila mwaka umu nsita ya Ciusyo, tukalanga ukuti tukataizya pali vino watucitila nga tukwelenganya nu kupepela pali vino imfwa yakwe ikapiliula kuli sweswe. Nupya tukaya ni nsansa ukuombesya umu mulimo wa kusimikila, ukukomelezya yauze ukuzanwako uku kuzevya kuu kucindamisye. Nupya tusileka icili consi ukutulesya ukuzanwa uku Ciusyo.
3. I vyani vino tumasambililapo umu cipande cii?
3 Umu cipande cii tumasambilila pa nzila zitatu muno antu yakwe Yeova yakaezya na maka ukuzanwa uku kuzevya imfwa yakwe Yesu kuli kuti (1) lino yakuzevya Iciusyo ukulingana na vino Yesu wasambilizye, (2) lino yakwamako yauze uku Ciusyo, (3) lino yakuzevyako Iciusyo asi mulandu ivintu ivitala.
KUZEVYA ICIUSYO UKULINGANA NA VINO YESU WASAMBILIZYE
4. A mauzyo ci akaasukwa cila mwaka pa Ciusyo, nupya u mulandu ci uno ukumanya masuko yayo kwacindamila sana kuli sweswe? (Luka 22:19, 20)
4 Cila mwaka pa Ciusyo tukakutika ukwi lyasi lya Baibo ilikaasuka mauzyo aingi. Tukasambilila umulandu uno antu yakalondekwa ilambo na vino imfwa ya muntu wenga ingakulula antu aingi ukufuma uku luyembu. Tukasambilila na vino umukate na waini vikapiliula na alinzile ukulyako mukate nu kumwa waini. (Belengini Luka 22:19, 20.) Tukaelenganya pa visuma ivilacitikila yayo aalikala pano nsi amanda pe. (Eza. 35:5, 6; 65:17, 21-23) Tulinzile ukwika sana mano uku vintu vii vino tukasambilila. Antu aingi sana yatamanya ivintu vii nupya yatamanya na vino ilambo lyakwe Yesu lyacindama. Nupya yasizevya Iciusyo ukulingana na vino Yesu wasambilizye alondezi yakwe ukulacita. U mulandu ci?
5. Uzye antu yatandike ukuzevya uli imfwa yakwe Yesu pa cisila lino atumwa ingi yafwa?
5 Patalengile ukufuma pano atumwa ingi yakwe Yesu yafwilile, umu vilongano ivingi mwizile imutandika ukuya Aina Klistu ya ufi. (Mate. 13:24-27, 37-39) Yatandike “ukusambilizya ivya ufi pakuti yaponzye asambi nu kuti yayalondela.” (Mili. 20:29, 30) Icintu conga pa vintu “vya ufi” vino Aina Klistu ya ufi yasambilizyanga i cakuti Yesu ataafwile sile “umuku sile onga pakuti afumyepo imembu zya yantu aingi” wakwe vino Baibo ikalanda, lelo alinzile ukulaswilizyapo ukupeela ilambo lilyo. (Aeb. 9:27, 28) Ndakai antu aingi yazumila ivisambilizyo vivyo. Yakaya uku maceici cila mulungu insita zimwi na cila wanda ku kuzefya ilambo lyakwe Yesu kuno yakaama ukuti “Cintamba.” Antu amu maceici yauze yakazevya imfwa yakwe Yesu pa miku iingi nomba yatamanya ningo vino ilambo lyakwe Yesu likapiliula. Yamwi yangayuzya ukuti, ‘Uzye imfwa yakwe Yesu ingalenga imembu zyane ukwelelwa?’ U mulandu ci uno yakayuzizya iuzyo lii? A pa mulandu na vino aantu aakaelenganya ukuti imembu zitu zitange zyelelwe pa mulandu ni mfwa yakwe Yesu yayanena. Uzye alondezi yakwe Yesu yazwa uli antu aingi ukumanya vino ilambo lyakwe Yesu likapiliula na vino yalinzile ukucita pa kuzevya imfwa yakwe?
6. I vyani vino iumba lya yasambi lizile ilimanya umu 1872?
6 Uku kusila kwa mwaka wa 1870 iumba lya yasambi ya Baibo ilyatungululwanga na Charles Taze Russell lyatandike ukusambilila sana Malembo. Yalondanga ukumanya icumi pali vino ilambo lyakwe Yesu likapiliula na vino yalinzile ukucita pa kuzevya imfwa yakwe. Lino cafikanga umu 1872 ala yamanya mpiti vino Baibo ikalanda ukuti umu cumi Yesu wapeezile ilambo pakuti akulule antu yonsi. Yatalondanga ukuimanyila sile vino yasambilile. Lelo yanenyileko yauze vino yasambilile ukupitila umu mabuku, manyuzipepa na ya magazini. Patalengiile, pa kulanga ukuti yakolanyanga Aina Klistu ya kutandikilapo yatandike ukukomaana umuku onga pa mwaka uku kuzevya Ciusyo.
7. Uzye vino asambi ya Baibo aakutandikilapo yalondelizye vikatwazwa uli?
7 Vino Aina Klistu yaya yalondelizye imyaka iingi uku cisila vikatwazwa sana ndakai. Vikatwazwa uli? Yeova watwazwa ukumanya ningo vino ilambo lyakwe Yesu likapiliula na vino lingazwa antu yonsi. (1 Yoa. 2:1, 2) Nupya twasambilila na pali vino Baibo ikalondolola pali vino vilacitikila antu aakazanzya Leza kuli kuti yamwi yakwata upaalilo wa kwikala ukwi yulu, yauze nayo uwa kwikala pano nsi manda pe. Tukapalama kuli Yeova nga tukwelenganya pali vino watutemwa na pa visuma vino tukaipakizya pa mulandu ni lambo lyakwe Yesu. (1 Pet. 3:18; 1 Yoa. 4:9) Fwandi wa ina itu aaliko mpiti acisinka, tulinzile ukulaamako yauze ukwiza umu kuzevya Iciusyo ukulingana na vino Yesu wasambilizye.
ANTU YAKWE YEOVA YAKAAMAKO ANTU YAUZE UKU CIUSYO
I vyani vino mungacita pakuti muombeko kampeni ya kwama antu ku Ciusyo? (Lolini mapalaglafu 8-10) c
8. I vyani vino antu yakwe Yeova yacita pakuti yaamako antu yauze uku Ciusyo? (Lolini cikope.)
8 Ukufuma na mpiti antu yakwe Yeova yakaama yauze uku Ciusyo. Uku kutandika kwa mwaka wa 1881, aina na ya nkazi umu United States yayamile ukuyakomaana umu ng’anda ya mwina umwi uku Allegheny, mu Pennsylvania, ku kuzevya uwanda uu ucindamisye. Lino papisile insita, cila cilongano catandike ukuizevezya Iciusyo. Umu Maaci 1940, ya kasimikila yayanenyile ukuti yangamako aliwensi umu vifulo vyao ivya kusimikilamo aakulonda ukusambilila. Umu 1960 iofesi lya musambo lyapeezile amu vilongano utupepala twa kwamilapo antu pa muku wa kutandikilako. Ukufuma papo kwene utupepala twa kwamilapo antu uku Ciusyo utwingi tukapeelwa. U mulandu ci uno tukaombesya ukwamako yauze?
9-10. Aaweni yano tukaamako uku Ciusyo? (Yoani 3:16)
9 Umulandu onga uno tukaamilako yauze ukwizazanwa uku Ciusyo u wakuti tukalonda yonsi aatiyazanwako pa muku wa kutandikilapo ukusambilila icumi pali vino Yeova na Yesu yatucitila. (Belengini Yoani 3:16.) Tukataila ukuti vino yamalola nu kuvwa lino yali pa Ciusyo vimalenga yalondesya ukusambilila na vyuze nu kuya aomvi yakwe Yeova. Nomba kuli na yauze aakaipakizya ukuzanwako.
10 Tukaamako na yayo aata ukulongana nu kusimikila. Tukacita vivyo pakuti tuiusyeko ukuti Leza acili wayatemwa. Aingi yakaiza iyazanwako nupya tukauvwa ningo sana ukuyalola. Ukuzanwa uku Ciusyo kukaiusyako vino yaipakizyanga ukuombela Yeova mpiti. Uvwini ivyacitikiile ya Monika. b Yatandike ukusimikila nupya umu nsita ya ulwale wakwe COVID-19. Pa cisila ca kuzanwa uku Ciusyo umu 2021 yatiile: “Iciusyo cii icicindama sana kuli nene. Uu u muku wa kutandikilapo ukusimikila antu nu kuyamako uku Ciusyo ukufuma pano nateelile ukusimikila imyaka 20 iyatipita. Nezizye na maka yonsi ukwamako yauze pa mulandu wakuti nkataizya sana pali vino Yeova na Yesu yancitila.” (Masa. 103:1-4) Asi mulandu antu yazumila ulwamo luu nanti foo, tulinzile ukwezya na maka ukwamako yauze uku Ciusyo pano ala itumanya ukuti Yeova akataizya sana pali vino tukaombesya.
11. Uzye Yeova akapaala uli umulimo uno tukaomba uwa kwama antu ku Ciusyo? (Hagai 2:7)
11 Yeova akapaala sana umulimo uno tukaomba uwa kwama antu uku Ciusyo. Asi mulandu na vino ivintu vyali pa mulandu nu ulwale wakwe COVID-19 umu 2021 antu 21,367,603 yazanyilwe uku Ciusyo. Impendwa yakwe ya Nte Yakwe Yeova umu nsi yonsi ingingilamo imiku iili na citika. Kwene, Yeova asiika sile mano uku mpendwa ya antu aakazanwa uku Ciusyo. Lelo akaika mano nu ku muntu wenga na wenga uwatazanwako. (Luka 15:7; 1 Tim. 2:3, 4) Tungasininkizya ukuti nga tukwama antu uku Ciusyo, Yeova akatwazwa ukuzana antu aakalondesya ukusambilila.—Belengini Hagai 2:7.
ANTU YAKWE YEOVA YAKAZANWA UKU CIUSYO ASI MULANDU NI NTAZI
Yeova akatupaala pali vino tukaezya na maka ukuzanwa uku Ciusyo (Lolini palaglafu 12) d
12. I vyani vimwi ivingalenga citutalile ukuzanwa uku Ciusyo? (Lolini cikope.)
12 Yesu wasoowile ukuti umu manda aakusyalikizya swensi tulakwata intazi wakwe ukukaanya ukufuma kuli ya lupwa, ukucuziwa, inkondo, ivikuko alino na vyuze. (Mate. 10:36; Mako 13:9; Luka 21:10, 11) Insita zimwi, ivintu vii vingalenga citutalile ukuzanwa uku kuzevya imfwa yakwe Yesu. I vyani vino aina na ya nkazi yakacita pa kucimvya intazi zii nupya Yeova akayazwa uli?
13. Uzye Yeova wapaazile uli ya Artem pali vino yasifile na vino yalondesyanga ukukwata Iciusyo lino yali umu cifungo?
13 Kunyepwa. Aina aanyepwa pa mulandu nu utailo wao yakaombesya pakuti iusye imfwa yakwe Yesu. Uvwini ivyacitikiile ya Artem. Umu 2020 umu nsita ya Ciusyo yayanyefile nu kuika umu kamuputule akanono nupya muno ikanga afungwa 5 pa muku onga. Asi mulandu nu kunyepwa yakwanisye ukukwata ivintu vimwi ivikalondekwa pa Ciusyo nupya yapekanyizye ukuilandila ilyasi. Nomba yano yali nayo umu cifungo yapeepanga nu kutukana sana. I vyani vino ya Artem yacisile? Yayalenzile ndi cakuti yangata ukupeepa nu kutukana api awala lyonga sile. Antu yaa yazumiile ukuti yataali nu kupeepa nanti ukutukana pa nsita ya Ciusyo na cii cazungwisye sana ya Artem. Ya Artem yatiile: “Nayalavile ukuti nali nu kuyanenako pa Ciusyo.” Nanti cakuti yakanyile ukuti yatalondanga ukuvwa ivili vyonsi pa Ciusyo, pa cisila ca kulola nu kuvwa vino ya Artem yacisile pa Ciusyo yuzizyepo.
14. Uzye antu yakwe Yeova yacitanga uli pakuti yazevye Iciusyo asi mulandu nu ulwale wakwe COVID-19?
14 Ulwale wakwe COVID-19. Lino ulwale uu watandike, antu yakwe Yeova yataali nu kulakongana pamwi uku kuzevya Iciusyo. Nomba cico citaali nu kuyalesya ukukwata Iciusyo. Ivilongano ivyakweti intaneti vyakwatanga Iciusyo ukuomvya zoom. Nga yano yatakweti intaneti yene yacitanga uli? Umu mpanga zimwi yapekinye ukutambisya ilyasi pa TV nanti ukwika pa ledyo. Nupya, imisambo yakofile ilyasi umu ndimi ukucila pali 500 pakuti na yano yaya umu mizi sana yangakwata Iciusyo. Nupya aina yatwalilanga aina aku ncende zii malyasi aakopwe.
15. I vyani vino mukusambilila uku musambi wa Baibo uwizina lyakuti Su?
15 Kukaanya ukufuma kuli ya lupwa. Yamwi cikayatalila ukuzevya Iciusyo pa mulandu nu kukaanya ukufuma kuli ya lupwa. Uvwini ivyacitikiile musambi wa Baibo uwizina lyakuti Su. Umu 2021 ala kwasyala uwanda onga kuti kuye Iciusyo, Su wanenyile uwamusambilizya Baibo ukuti ataali nu kuzanwa uku Ciusyo pa mulandu na vino ya lupwa yamukaanyanga. Nkazi uwamusambilizyanga wabelenzile Luka 22:44. Lyene wamulondolwelile ukuti nga twakwata intazi tulinzile ukukolanya Yesu lino tukupepa kuli Yeova nu kumutaila. Uwanda uwalondeliilepo, Su wapanzile umukate nu kulonda waini nupya watamvile na Mapepo ya Katondo aiyele pa jw.org. Uwanda kwene uwa manguzi waile umu muputule wa kulaalamo nu kukutika uku Ciusyo ukuomvya zoom. Pa cisila walembiile aamusambilizyanga ukuti: “Mwankomelizye sana mutondo. Inezya na maka ukucita vino ningacita pakuti nzanwe uku Ciusyo nupya Yeova iwangazwa. Ntange ndondolole insansa zino nkweti nupya nkutaizya sana pali vino Yeova wancitiila.” Uzye mukwelenganya ukuti Yeova angamwazwa ndi cakuti mwakwata intazi ili imwi?
16. U mulandu ci uno twasininkizizya ukuti Yeova alatupaala pali vino tukaezya na maka ukuzanwa uku Ciusyo? (Loma 8:31, 32)
16 Yeova akatemwa sana pali vino tukaezya na maka ukwiusya imfwa yakwe Yesu. Tungasininkizya ukuti alatupaala nga tukulanga ukuti tukataizya pali vino watucitila. (Belengini Loma 8:31, 32.) Fwandi lekini twalondesya ukuti tukazanwe uku Ciusyo umwaka uu nupya pakuti tucite vivyo lekini twalondesya ukuombesya umu mulimo wakwe Yeova.
LWIMBO NA. 18 Tukataizya Pali Vino Twakululwa
a Pali Ciili, pa 4 Epuleo 2023 antu aingi ukuzinguluka insi yalazevya Iciusyo ca mfwa yakwe Klistu. Aingi ulaya u muku wa kutandikilako ukuzanwako. Yauze aalazwanwako aayaya aata ukulongana nu kusimikila nupya yazanyilwe mpiti uku Ciusyo. Yamwi pa mulandu ni vikuyacitikila cilayatalila ukuzanwa uku Ciusyo nomba yalezya na maka ukuzanwako. Asi mulandu na vino ivintu vili mungasininkizya ukuti Yeova alatemwa nga mwaombesya pakuti muzanweko.
b Aakaya uku maceici yazumila ukuti umukate na waini vikasanguka ukuya umwili wa cumi cumi wakwe Yesu nu wazi wakwe. Yakaelenganya ukuti umwili nu wazi vyakwe Yesu vikapeelwa lyonsi lino yazanwa uku Cintamba.
