CIPANDE CA KUSAMBILILAMO 30
Usesemo wa Mpiti Uwacindama Sana Kuli Mwemwe
“Nika uwanisi pakasi kako nu mwanaci.”—UTAN. 3:15.
LWIMBO NA. 15 Tulumbanye Yesu Iyeli Lyakwe Yeova!
VINO TUMASAMBILILAPO *
1. I vyani vino Yeova wacisile lino Adamu na Eva yayembwike sile?
LINO Adamu na Eva yayembwike sile, Yeova walenzile ana yano yali nu kukwata ukutaila ukuti yali nu kwikala manda pe ukupitila mu usesemo ucindame. Vino walanzile vyalembwa pa Utandiko 3:15—Belengini
2. U mulandu ci uno usesemo uu wacindamila?
2 Usesemo uu waya umwi buku lya kutandikilapo ilya muli Baibo. Lelo mabuku yonsi aaya muli Baibo yalemana na vino usesemo uu ukalanda umu nzila imwi. Wakwe vivi kwene vino gulu ikalemanya mapepala amwi buku, amazwi aaya pa Utandiko 3:15 yakalemanya amazwi aaya mu mabuku yonsi amuli Baibo ukuya icintu conga, kuli kuti Leza wali nu kutuma kapususya alonona ciwa na yonsi aakamulondela. * Cico cilaya i cintu icisuma sana kuli yayo atemwa Yeova!
3. I vyani vino tumasambilila umu cipande cii?
3 Umu cipande cii, tumaasuka mauzyo pa usesemo uwaya pa Utandiko 3:15 aakuti: Aaweni aalandwapo umu usesemo uu? Uzye usesemo uu ukufikiliziwa uli? Nupya ukatwazwa uli?
AAWENI AALANDWAPO UMU USESEMO UU?
4. Uzye “inzoka a weni,” nupya twamanya uli?
4 Ilembo lya Utandiko 3:14, 15 lyalanda pa “nzoka,” “umwana wa nzoka,” “umwanaci,” alino nu “mwana wa mwanaci.” Baibo ikatwazwa ukumanya vino conga na conga cikaimililako. * Lekini tutandikile ukulanda pa “nzoka.” Ndi cakuti inzoka ii yali inzoka ya cumi cumi, itaali nu kumanya vino Yeova walanzile umu calo ca Edeni. Fwandi Yeova afwile wapingwile iciumbwa icakweti mano. Uzye lyene tungati a weni wiyo kwene wino Yeova walandanga nawe? Kusokolola 12:9 ikatulondolwela ningo wino inzoka ikaimililako. Api lembo lii, icizoka ca pa kutandika cikaimililako Satana Ciwa. Nomba uzye ana ya nzoka aaweni?
INZOKA
A Satana Ciwa, wino ilembo lya ku Kusokolola 12:9 lyalondolola ukuti “icizoka ca pa kutandika” (Lolini palaglafu 4)
5. Uzye ana ya nzoka aaweni?
5 Baibo nga yalanda pa “mwana” wa unkolanya ale ikulozya kuli yayo aakaelenganya nu kucita ivintu wakwe isi wao uwa unkolanya. Fwandi ana ya nzoka aa malaika ataya na ucisinka, na antu aakacita ivintu wakwe Satana nu kukana Yeova Leza alino nu kucuzya antu yakwe. Paya na ya malaika aafumile ukwi yulu mu manda yakwe Nowa na antu aakacita ivintu iviipe wakwe isi, kuli kuti Ciwa.—Utan. 6:1, 2, Yoa. 8:44, 1 Yoa. 5:19, Yuda 6.
UMWANA WA NZOKA
I viumbwa vya mupasi iviipe na antu akakana Yeova Leza nu kucuzya antu yakwe (Lolini palaglafu 5)
6. U mulandu ci uno tungalandila ukuti “umwanaci” uwalandwa paa asi Eva?
6 Lekini lyene tusambilile pakuti tumanye “umwanaci” kwene wii. Umwanaci wii atanga aye a Eva. U mulandu ci uno twalandila vivyo? Uvwini umulandu onga. Usesemo ukalanda ukuti umwana wa mwanaci alafwamfwanta umutwe wa nzoka. Wakwe vino twasambilila, inzoka ikaimililako malaika umwipe Satana. Nupya kusi umuntu atamalilika umwana wakwe Eva angamufwanfwanta. Uzye lyene Satana wali nu kononwa uli?
7. Ukulingana na Kusokolola 12:1, 2, 5, 10, uzye umwanaci uwalandwapo pa Utandiko 3:15 a weni?
7 Ibuku lya kusyalikizyako ilya muli Baibo likatunena pa mwanaci wa kusyalikizyako uwalandwapo pa Utandiko 3:15. (Belengini Kusokolola 12:1, 2, 5, 10.) Umwanaci wii asi wa pano nsi. Walyata pa mwezi nupya wazwala intanda 12 ku mutwe. Wakwata umwana muiyele, kuli kuti Uwene wakwe Leza. Uwene uu u wa kwi yulu. Fwandi nu mwanaci kwene alinzile ukuya ukwi yulu. Akaimililako iuvi lyakwe Yeova ilyaya ukwi yulu ilyapangwa na ya malaika aya na ucisinka.—Gala. 4:26.
UMWANACI
Iiuvi lyakwe Yeova ilya kwi yulu ilyapangwa ni viumbwa vya mupasi ivyaya ni cisinka kuli aliwe (Lolini palaglafu 7)
8. Uzye umwana wa mwanaci umucindamisye a weni, nupya a lilaci lino wizile aya umucindamisye? (Utandiko 22:15-18)
8 Nupya Izwi Lyakwe Leza likatwazwa ukumanya umwana wa mwanaci umucindamisye. Umwana wii wali nu kufuma muli Abulahamu. (Belengini Utandiko 22:15-18.) Kulingana na vino usesemo wasoowile, Yesu wizile aya umwana wa monsi wii uwali nu utailo. (Luka 3:23, 34.) Nomba umwana wii wali nu kukwata sana amaka ukucila antu, pano wali nu kufwamfwanta Satana Ciwa. Lino Yesu wali ni myaka uku ma 30, wapasilwe nu mupasi wa muzilo ukuya umwana wakwe Leza. Lino Yesu wapasilwe, wizile aya umwana mucindamisye uwa mwanaci. (Gala. 3:16) Pa cisila ca mfwa yakwe Yesu nu kutuutululwa, Leza wamupeezile ululumbi nu mucinzi nupya wamupeezile amaka yonsi umwi yulu na pano nsi ukwikako sile na maka ya konona imilimo yakwe Ciwa.—Aeb. 2:7, Mate. 27:18, 1 Yoa. 3:8.
UMWANA WA MWANACI
Yesu Klistu na ya 144,000 yano yalateeka pamwi nawe (Lolini mapalaglafu 8-9)
9-10. (a) Aaweni na yauze aaya pa mwana wa mwanaci, nupya a lilaci lino yakaya vivyo? (b) I vyani lyene vino tumalandapo?
9 Nomba kwali na yauze ali nu kuya pa mwana wa mwanaci. Umutumwa Paulo walanzile pa ciputulwa conga ica mwana lino wanenanga Aina Klistu apakwe aali Ayuda na ataali Ayuda ukuti: “Ndi cakuti mwemwe yakwe Klistu ale umu cumi mwemwe yana yakwe Abulahamu nupya mulapokelela upyanyi wakwe vino Leza walavile.” (Gala. 3:28,29) Ndi cakuti Yeova wapaka umwina Klistu nu mupasi wakwe uwa muzilo, akaya mu lupwa lwa mwana wa mwanaci. Fwandi umu mwana wa mwanaci mwaya Yesu Klistu na ya 144,000 yano yalateeka pamwi nawe. (Kuso. 14:1) Yonsi yaa yakaelenganya nu kucita ivintu wakwe Isi Yeova Leza.
10 Lyene vino twamanya yano ilembo lya Utandiko 3:15 likalandapo, lekini lyene tusambilile pali vino Yeova wacita pa kufikilizya usesemo uu na vino ukatwazwa ndakai.
I VYANI VINO YEOVA WACITA PA KUFIKILIZYA USESEMO UU?
11. Uzye usesemo wakuti umwana wa mwanaci yalamuluma uku “cintunta” ukalozya mwi?
11 Ukulingana nu usesemo uwaya pa Utandiko 3:15, inzoka yali nu kuluma umwana wa mwanaci uku cintunta. Satana wacisile vivyo lino waomvizye Ayuda na ina Loma ukukoma Umwana wakwe Leza. (Luka 23:13, 20-24) Wakwe vivi kwene vino umuntu angafilwa ukupita ningo ndi cakuti waicisa ukwi kuulu, avino cali na kuli Yesu lino wafwile. Atacitanga icili consi pa manda yatatu lino wali umwi lindi.—Mate. 16:21.
12. A lilaci lino yali nu kufwamfwanta umutwe wa nzoka, nupya yali nu kuufwamfwanta uli?
12 Usesemo uwaya pa Utandiko 3:15 ukalangilila ukuti Yesu atali nu kutwalilila ukuya umwi lindi. U mulandu ci? A pa mulandu wakuti ukulingana nu usesemo, umwana wa mwanaci wali nu kufwamfwanta inzoka uku mutwe. Cii capiliulanga ukuti Yesu wali nu kutuutuluka, nupya vikwene i vyacitiike. Pa wanda wakwe citatu ukufuma pano wafwilile, Yesu watuutulukiile ukwi yulu nu mwili usifwa. Pa nsita ino Leza wimika, Yesu alafwamfwanta Satana. (Aeb. 2:14) Klistu na yano yalateeka pamwi nawe yalonona alwani yakwe Leza kuli kuti umwana wa nzoka.—Kuso. 17:14, 20:4, 10. *
UZYE USESEMO UU UKUTWAZWA ULI NDAKAI?
13. Uzye vino usesemo uu wafikiliziwa vikatwazwa uli?
13 Ndi cakuti mwemwe yaomvi yakwe Yeova, ukufikiliziwa kwa usesemo uu kukamwazwa. Yesu wizile pano nsi nu mwili wa untunze. Akakolanya imiyele yakwe Isi yonsi. (Yoa. 14:9) Fwandi ukupitila muli aliwe, twamanya vino Yeova Leza waya nupya twamutemwa. Nupya vino Yesu akatusambilizya nu kututungulula lino akutungulula icilongano ca Ina Klistu ndakai vikatwazwa. Watusambilizya na vino tungikala mu nzila iingatwazwa ukulazanzya Yeova. Nupya vino Yesu yamulumile uku cintunta nanti tuti ukufwa, vikatwazwa. Vikatwazwa uli? Lino Yesu watuutulwilwe, wapeezile uwazi wakwe ukuya ilambo ilimalilike ilikatusangulula uku membu zitu zyonsi.—1 Yoa. 1:7.
14. Uzye twamanya uli ukuti usesemo uno Yeova wasoowile umu calo ca Edeni utafikiliziwe papo kwene? Londololini.
14 Vino Yeova walanzile umu usesemo uwa, vyalangilile ukuti utali nu kufikiliziwa pa nsita kwene iya. Pali nu kupita ínsita pakuti umwanaci akwate umwana uwalavilwe, ciwa akolonganike alondezi yakwe na pakuti pa maumba yaa yoili paye ulwani. Ndi cakuti twamanya ningo usesemo uu cilatwazwa ukumanya ukuti antu aaya umu nsi ii ikatungululwa na Satana yapata antu yakwe Yeova. Cikwene acino Yesu wacelwilepo na alondezi yakwe lino papisile insita. (Mako 13:13, Yoa. 17:14.) Twalolako vimwi ivyafikiliziwa umu usesemo uu sana sana umu myaka 100 iyapitapo. U mu nzila ci?
15. U mulandu ci uno antu amu nsi iyapatila sana umwana wa mwanaci ndakai ukucila vino cali mpiti, nomba u mulandu ci uno tusitiinila Satana?
15 Lino papisile sile insita inono ukufuma pano Yesu yamwisile ukuya Umwene wa Umesiya umu 1914, Satana yamusuumbile pano nsi ukufuma ukwi yulu. Satana lyene waya pano nsi. Akalolela ukononwa. (Kuso. 12:9, 12) Nomba ukufuma pano yamusumbiile pano nsi, wapamviwa sana. Wasoka sana nupya akazanza antu yakwe Leza. (Kuso. 12:13, 17) Ali mulandu uno antu aya umu nsi yakwe Satana yatupatila sana. Nomba tutalinzile ukutina Satana na antu yakwe. Lelo tungaya nu utailo ukome wakwe uno umutumwa Paulo wakweti lino walemvile ukuti: “Ndi cakuti Leza ali naswe, uzye a weni angatulwisya?” (Loma 8:31) Wakwe vino itulola, tungataila sana Yeova pa mulandu wakuti ivingi ivyaya umu usesemo uwaya pa Utandiko 3:15 vyafikiliziwa.
16-18. Uzye vino ya Curtis, ya Ursula, na ya Jessica yuvwikisya usesemo uwaya pa Utandiko 3:15 vyayazwa uli?
16 Ulayo wakwe Yeova uwaya pa Utandiko 3:15 ungatwazwa ukuzizimizya intazi izili zyonsi zino tungakwata. Ya Curtis aakaomba umisyonali ku Guam yatiile: “Insita zimwi ivintu ivyacitikanga umu umi wane vvyalenganga cantalila ukuya uwa cisinka kuli Yeova. Nomba ukwelenganya pa usesemo uwaya pa Utandiko 3:15 kwangavwile ukutwalilila ukutaila sana Tata wane uwa kwi yulu.” Ya Curtis yakaloleela uwanda uno Yeova alafumyapo intazi zyonsi.
17 Nkazi uwa ku Bavaria uwi zina lyakuti Asula walanzile ukuti ukuvwila mazwi aaya pa Utandiko 3:15 kwangazwa ukusininkizya ukuti Baibo Iizwi lyakwe Leza Ilya muzilo. Waweni vino mausesemo yauze yalemana sana nu usesemo uu, nupya cico camukomelizye sana. Walanzile ukuti: “Lino nasambilile ukuti lilyo kwene sile Yeova wacisilepo vimwi pakuti tuye nu upalilo calenzile mutemelweko sana.”
18 Nkazi Jesika uwa ku Micronesia watiile, “Ncili nkaiusya vino nayuvwile lino nilwike ukuti inzana icumi! Usesemo uwaya pa Utandiko 3:15 wafikiliziwe. Wangazwa ukulaiusya ukuti ivikatucitikila ndakai asi vino Yeova walondanga ukuti vyatucitikila. Usesemo uu wangazwa nu kutaila ukuti ukuombela Yeova kungalenga umi wane ukuzipa ndakai nupya uku nkoleelo ulazipisya.”
19. U mulandu ci uno tungatailila ukuti iciputulwa ca kusyalikizya ica usesemo cilafikiliziwa?
19 Wakwe vino itusambilila, usesemo uwaya pa Utandiko 3:15 ucili ukufikiliziwa. Umwana wa mwanaci nu mwana wa nzoka yamanyikwa. Icilonda ca ku cintunta ica mwana umucindamisye uwa mwanaci kuli kuti Yesu, capola nupya ndakai u Mwene wa maka aatalatala afwe. Ndakai Yeova ali mupipi nu kumala ukusoolola yayo alateeka pamwi na Yesu ukwi yulu. Pa mulandu wakuti ciputulwa ca kutandikilako ica usesemo cafikiliziwa, calenga tutaile ukuti ni ciputulwa ca kusyalikizyako ica kufwamfwanta inzoka uku mutwe, naco kwene cilafikiliziwa. Antu yakwe Leza yalaya sana ni nsansa lino Satana alononwa. Fwandi lino mukuloleela insita iyo, mutalinzile ukutoovoka. Leza witu u wa kutailwa. Alacitila antu amu nko zyonsi muno nsi ivintu ivingi ivisuma ukupitila mu mwana wa mwanaci.”—Utan. 22:18.
LWIMBO NA. 23 Yeova Watandika Ukuteeka
^ Tutanga tuvwikisye vino Baibo ikalanda ndi cakuti tutuvwikisye usesemo uwaya pa Utandiko 3:15. Ukusambilila pa usesemo uu kungatwazwa ukutaila sana Yeova nu kusininkizya ukuti alafikilizya malayo yakwe yonsi.
^ Lolini ciputulwa cakuti “Ilyasi Lya Muli Baibo” umu kabuku kakuti Kabuku Akakutwazwa Ukusambilila Izwi Lyakwe Leza.
^ Lolini kambokosi kakuti “Yano Ilembo Lya Utandiko 3:14, 16 likalandapo.
^ Lolini kambokosi kakuti “ Ivintu Vimwi Vicindame Ivilinzile Ukucitika pa Kufikilizya Usesemo Uwaya pa Utandiko 3:15.”
