Avyazi yane yafumile uku Estonia lino kwali Nkondo ya Nsi Yonsi yakwe ciili nu kuya uku Germany, nupya kuuku kwene akuno navyalilwe. Pa cisila ca kuvyalwa, avyazi yane yatandike ukupekanya ukukuukila uku Canada. Ing’anda ino twatandikilepo ukwikalamo yayelile umupiipi nu musumba uwa Ottawa mu Canada, nupya muno yayeliile amuno yateekelanga inkoko. Twali apiina sana, nomba nanti cali vivyo, cila wanda akatondo twalyanga amayayi.

Uwanda umwi, ya Ya Nte Yakwe Yeova yabelengiile ya mayo ilembo lya Kusokolola 21:3, 4. Vino yayabelengiile vyayafisile sana pa mwenzo nupya yatandike ukulila. Ya tata na ya mayo yatwalilile ukusambilila Baibo nupya lino papisile sile insita inono yabatiziwe.

Avyazi yane yatamanyile sana Icizungu, lelo yali aacincile umu kuombela Yeova. Cila mulungu pa Cibelusi, pa cisila ca kuomba usiku onsi muno yengulwilanga mawe yano yakaama ukuti nickel umu Sudbury, mu Ontario, ya tata yatusendanga na kaci wane Sylvia umu kusimikila. Nupya swensi pa ng’anda twasambililanga Lupungu Lwa Mulinzi cila mulungu. Ya mayo na ya tata yangazwile ukutemwa Leza. Na cii calenzile ukuti lino nali ni myaka 10 umu 1956 njipeele kuli Yeova nu kubatiziwa. Ukwelenganya pali vino avyazi yane yatemilwe Yeova, kwalenganga ukuti nalondesya ukumuombela.

Lino namazile isukulu, nalesile ukwika sana mano uku kuombela Yeova. Nalondanga ukutandika upainiya, nomba nelenginye ukuti ntalatala nkwate ulupiya ulwingi nupya ntalatala nkwele ni ndeke. Nizile intandika ukuomba umulimo uwa kulizya inyimbo pa mulabasa, umulimo uno natemilwe sana. Pa mulandu wakuti naombanga manguzi, ntazanwanga sana umu kulongana nupya nazanwanga sana na antu aatatemilwe Leza. Vino kampingu wane wasambiliziwe ningo Baibo, calenzile ntandike ukusenuka.

Nakukiile umu musumba uwa Oshawa, mu Ontario. Kuuku kwene ali kuno twamanyine na ya Ray Norman pamwi na ya nkazi yao ya Lesli, alino na ya painiya yamwi. Yonsi kwene yampokeliile ningo. Ukulola vino yali ni nsansa, kwalenzile nelenganyepo nupya pa mauyo yano nimiike. Yankomelizye ukutandika upainiya, nupya nizile intandika ukuomba upainiya umu 1966. Nali sana ni nsansa nupya naipakizyanga umi. Nanti cali vivyo, kwali ivintu na vyuze ivyali nu kulenga umi wane ukusenuka.

Lino nali uku sekondale, nalemvile fomu iya kuzizyapo ukuya umu kuombela pa Betele umu Toronto ku Canada. Lino papisile insita ala nkaomba upainiya, yangamile ukuya umu kuombela pa Betele pa myaka 4. Nomba pa mulandu na vino natemilwe Lesli, ntalondanga  ukuzumila ulwamo pano nelenganyanga ukuti ntalatala mulolepo nupya. Pa cisila ica kupepelapo sana kuli Yeova, nazumile ukuya uku Betele nomba nuvwile sana uyi ukusya Lesli.

Naombelanga muno yakafulila ivyakuzwala nupya pa cisila nizile inja kalemba. Pataalengile, Lesli wizile aya painiya umuiyele umu musumba uwa Gatineau, umu Quebec. Insita izingi, nelenganyanga pali vino waombanga nupya nasakamalanga ndi cakuti napingwilepo ningo pali vino nasoolwile. Lyene kwali icintu cimwi icanzungwisye sana. Ray isilenzi wakwe Lesli yamwamile uku Betele. Twatandike ukwikala nawe umu muputule uli umwi. Nupya cii calenzile tutandike ukulanzyanya na Lesli nupya. Pa 27 Febuluwale, umu 1971, ali wanda uno twatwaline nupya wali ali uwanda uwa kusyalikizyako umu myaka 4 ino yangamile ukuombela pa Betele.

Pa cisila ca kutwalana, izile iyatupeela umulimo uwa kuombela umu cilongano icaomvyanga ululimi ulwa Cifrench umu Quebec. Lino papisile imyaka inono ala indi ni myaka 28, nazungwike sana lino yanenyile ukuti naomba umulimo uwa kutandalila ivilongano. Nayuvwile ukuti nene mwance sana nu kuti ntanga nkwanisye. Lelo amazwi aaya pali Yelemiya 1:7, 8 yankomelizye. Nanti cali vivyo, mamane Lesli wakweti intazi umu milalile pa mulandu wakuti wazanwanga umu mazanzo aingi aa pa museo muli motoka. Fwandi twelenginye ukuti cali nu kututalila ukuomba umulimo uwa kutandalila ivilongano. Lelo mamane watiile: “Ndi cakuti Yeova watunena ukuomba umulimo umwi, tulinzile ukucita vino watatunena.” Twazumiile ukuomba nupya twaipakizye ukuomba umulimo uu pa myaka 17.

Napamviwanga sana umu mulimo uwa kutandalila ivilongano nupya ntakwatanga sana insita iya kuya pamwi na mamane Lesli. Nasambilile isambililo na lyuze. Uwanda umwi katondo pa Mande, Nuvwile yamwi yakunkonkosya uku cisaasa. Lino nayuzile ntazanyilepo ali wensi, lelo nazanyile sile basiketi ala muli ivyakulya vino yakapangila nu mukaka, vizao, buledi, botolo lyako waini, makapu, kasalu akakwanzika, alino na kalipepa apalemvilwe amazwi aakuti, “Kiizizyini pamwi na mamako uku ncende yuze.” Uwanda uu waciile ningo sana. Lelo nanenyile mamane Lesli ukuti ilelo vitanga viombe pano inkwata malyasi aakupekanya. Kuvwa kwene uvwile, nomba ataatemilwe. Lino natenzi pa cilimba, kampingu watandike ukuncuzya. Nelenginye pa mazwi aaya pali Efeso 5:25, 28. Naweni ukuti amazwi aaya api lembo lii ali nzila ino Yeova waomvizye pa kunjiusya ukwelenganya pali vino mamane wayuvwanga. Pa cisila ica kupepelapo, namunenyile ukuti, “Katwapita.” Nupya amazwi yaa yalenzile auvwe ningo sana. Twaile uku ncende isuma sana uku piipi nu luzi, twavungulwile kasalu nu kwikapo ivyakulya, nupya uwanda uu wali pa manda yano twaipakizye sana ukuya capamwi. Nupya nakweti ni nsita iya kupekanya malyasi.

Umulimo uwa kutandalila ivilongano walenganga twaya sana ni nsansa, nupya pa miku iingi twafumanga uku British Columbia ukuya uku Newfoundland. Vintu vino nalondanga lino nali umwance vyacitikanga. Nalondanga ukuya ukwi Sukulu Lya Gilyadi, nomba ntalondanga ukuya umu kuombela uku mpanga yuze. Nelenganyanga ukuti ya misyonali yali aantu yamwi aacindame sana nu kuti nemo ntalinzile ukuya misyonali. Nupya nasakamiile ukuti limwi yangaca yantume  umu Africa umwali sana indwala nupya umwacitikanga sana izya nkondo. Nuvwanga ningo ukuombela umu Canada.

Umu 1992, Ya Nte Yakwe Yeova yatandike nupya ukusimikila ukuli konsi umu mpanga izyali umu kaungwe ka Soviet Union. Na cii calenzile ukuti aina yatutume nga ya misyonali ukuya umu kuombela uku mpanga iya Estonia. Twazungwike sana lino yatwamile nupya twapepiilepo. Nupya kwene twelenginye ukuti, ‘Ndi cakuti Yeova watunena ukuomba umulimo umwi, tulinzile ukucita vino watatunena.’ Twazumiile vino yatunenyile, nupya nuvwile ningo ukumanya ukuti tusikuya uku Africa.

Lilyo kwene sile twatandike ukusambilila Iciestonia. Nupya pa cisila ca kwikala imyezi inono umu Estonia, yatunenyile ukutandika ukuomba umulimo wa kutandalila ivilongano. Twali nu kulatandalila ivilongano 46 kumwi na maumba ayelile umu Estonia, mu Latvia, alino nu mu Lithuania kumwi nu mu musumba uwa Kaliningrad umu Russia. Cii cikupiliula ukuti twali nu kusambilila Icilatvia, Cilithuania, alino ni Cirussia. Ukuya kwene citaali icanguke. Nomba aina na ya nkazi yuvwanga ningo vino twaombesyanga ukusambilila indimi zyao nupya yatwazwanga ukusambilila. Umu 1999, umu Estonia mwizile imuya iofesi ilya musambo, nupya izile iyansonta ukuya muli komiti wa musambo pamwi na ya Toomas Edur, ya Lembit Reile, alino na ya Tommi Kauko.

Twizile itumanyana na ya Nte aingi yano yazingiile uku Siberia. Asi mulandu na vino yayacuzya umu cifungo na vino yatali pamwi na ya lupwa yao, yataatovwike. Yatwalilile ukuya nu luzango nu kuya aacincile umu mulimo uwa kusimikila. Vino yacisile, vyatwazwa ukumanya ukuti tungazizimizya nu kutwalilila ukuya ni nsansa nanti cakuti itukwata intazi.

Pa myaka iingi twaombesyanga nupya tutakwatanga insita ikulu iya kupuuza, na cii calenzile ukuti Lesli atandike ukuvwa ukutoonta. Tutilwike zuwa ukuti Lesli walwile ulwale ukaamwa ukuti fibromyalgia uwalenganga auvwa sana ukutoonta. Na cii calenzile twelenganyepo pa kuswilila uku Canada. Lino yatwamile ukuyazanwa ukwi sukulu lyakwe yano yaya muli komiti ya musambo na yamama yao ilyayelile umu Patterson mu New York uku U.S.A., ntelenginyepo ukuti tungayako. Nomba pa cisila ica kupepelapo sana twazumiile. Yeova wapaazile vino twapingwilepo. Lino twali ukwi sukulu lii, ali lino mamane walwaziwe ukulingana na vino walondekwanga. Nupya pa cisila icakuti mamane walwaziwa, twizile itutandika ukuomba wakwe vino twaombanga mpiti.

Uwanda umwi usiku umu 2008, lino twali umu Estonia, aku Maofesi Yakalamba mu Nsi Yonsi yantumiile nu kunguzya ndi cakuti ningatemwa ukuya umu kuombela uku Congo. Canzungwisye, sana sana vino yanenyile ukuti nkayasuke uwanda uwalondelilepo. Ntanenyile mamane pano nelenganyanga ukuti atali nu kukasula usiku. Lelo, nene ntaakaswile nupya napepelanga pali vino vyansakamikanga uku Africa.

Uwanda uwalondelilepo lino nanenyile Lesli, twelenginyepo nupya twatiile, “Yeova akulonda ukuti tuye uku Africa. Uzye tungamanya uli ndi cakuti tungakwanisya ukuombela umu Africa nanti foo ndi cakuti tutaileko?” Fwandi pa cisila ica kuomba imyaka 16 umu Estonia, twaile uku Congo. Umusambo uwa ku Congo wakweti incende isuma nupya pali a pa mutende. Icintu ca kutandikilapo cino Lesli wisile umu muputule a kadi  ino wafumile nayo uku Canada. Pali kadi wiyo pali amazwi aakuti, “Uwaya ni nsansa konsi kuno uli.” Ukuzanwa na ina na ya nkazi, ukutungulula masambililo ya Baibo, alino nu kwelenganya pa visuma vino twaipakizyanga umu mulimo wa umisyonali kwalenzile ukuti twalondesya kuombela Yeova. Nupya umukuya kwa nsita, twizile itukwata isyuko ilya kuya aimilizi ukufuma uku maofesi yakalamba lino twatandalile imisambo 13 umu mpanga izya mu Africa. Ukucita vii kwalenzile ukuti tusambilile ivingi alino nu kulalola ivisuma umu yantu. Intete zino nakweti izya kuombela umu Africa zyasizile, nupya twataizye Yeova pali vino watutumile umu kuombela umu Africa.

Lino twali umu Congo, yatusambilizye ukulya ivyakulya vimwi vino twelenganyanga ukuti tutanga tulye. Nomba ukulola kuno aina na ya nkazi yakuipakizya ukulya ivyakulya vii, kwalenzile naswe kwene tutandike ukulya nupya twaipakizyanga.

Lino twali umu Congo, twalungiime ukukatunkila ilanzi pakuti tukakomelezye aina na ya nkazi nu kuyatwalila vino yalondekwanga. Uku ncende ii kwayanga utumaumba twa yantu aakakatukila uteeko tuno twazanzanga antu umu mizi, ukucuzya anaci alino na ana. Aina aingi na ya nkazi yali aapiina. Nanti cali vivyo, upaalilo uno yakweti uwakuti kulaya ukutuutuluka, kutemwa kuno yatemilwe Yeova, alino na vino yali na ucisinka ukwi iuvi vyalenzile ukuti tukomeleziwe. Vino yacitanga vyalenzile twelenganye pa mulandu uno twaombelanga Yeova na vino twali nu kukomya utailo witu. Mang’anda ya ina yamwi yononiike kumwi ni vyakulya vino yalimile. Cii calenzile niluke ukuti tungaponzya ivintu vino twakwata zuwa zuwa nu kuti ucuza witu na Yeova ali cintu icicindamisye. Asi mulandu ni ntazi zino aina yakwatanga, yatailizyanyanga sana. Imiyele isuma ino yakweti yatukomelizye ukuzizimizya intazi zino twakweti alino nu kulwala.

Yatupeezile umulimo na uze. Yatutumile uku musambo uwa ku Hong Kong. Tutatazile itwelenganyapo ukuti tungikala uku Asia. Lelo pa mulandu na vino twailolelanga vino Yeova watulanganga ukutemwa umu milimo na yuze ino twaombanga, twazumiile ukuya uku Asia. Umu 2013, twali sana nu ulanda lino twafumile umu Africa nu kusya ivyuza alino ni vintu ivisuma ivya mu Africa nupya tutaamanyile ivyali nu kucitika uku nkoleelo.

Twalinzile ukusenuka sana pakuti tukikale uku Hong Kong, pano wali umusumba umwali antu aingi sana. Citangwike ukusambilila ululimi ulwa Cichinese. Nomba  aina aa kuu, yatupokelile ningo nupya twaipakizye ivyakulya ivya ku ncende iya. Imilimo yayanga ikuvulilako pa musambo, nomba pa nsita ili imwi kwene ivintu vyayanga vikulundwako zuwa zuwa. Fwandi Iumba Ilikatungulula lyapingwilepo ukukazyapo vimwi. Patalengile, umu 2015 twakukiile uku South Korea kuno twatwalilile ukuomba umulimo witu. Lino twali uku Korea twalondekwanga ukusambilila ululimi na luze ulutale kuli kuti Icikorea, nanti cakuti tutavwanganga ningo, lelo aina na ya nkazi yatukomelezyanga ukuti mukucita ningo sana mwasya mumanye ukulanda Icikorea.

Citangupala ukupanga ivyuza, nomba twazanyile ukuti ndi cakuti tukuya ca pamwi na antu yauze, cingalenga ukuti tumanyane zuwa. Twazana ukuti aina na ya nkazi yaya sile icili cimwi asi mulandu na vino yapusana imilolekele nu kuti Yeova watupanga umu nzila isuma iikalenga twaya ni cikuuku alino nu kulanga ukutemwa uku yantu yonsi.—2 Kol. 6:11.

Twazana ukuti tulinzile ukulalola antu wakwe vino Yeova akayalola alino nu kwika mano uku vintu ivikalangilila ukuti Yeova watutemwa nu kuti akatutungulula. Lyonsi lino twayuvwa ukutoovoka nanti lino tukulola ukuti limwi aina yatatupokeliile, twabelenganga nupya umu makadi nu mu makalata yano ya cuza itu yatulembelanga. Twailolela vino Yeova akaasuka mapepo itu, vino akatulanga ukuti watutemwa, alino na vino akatukomelezya pakuti tutwalilile ukuomba.

Apa myaka iingi ino ituombela pamwi, nemo na mamane twailolela usuma uwaya umu kukwata insita iya kuya capamwi asi mulandu cila muntu watapamviwa. Nupya twazana ukuti cacindama sana ukulasekana ndi cakuti umwi waluvyanya, sana sana lino tukusambilila ululimi luze. Nupya cila manguzi, tukaezya ukwelenganya pa visuma ivyativitucitikila vino tungataizizyapo Yeova.

Ukulanda sile icisinka, ntaatazile inelenganyapo ukuti ningaya misyonali nanti ukuyaikala uku mpanga yuze. Naya nu luzango nupya nasambilila ukuti Yeova angalenga ivintu vyonsi ukucitika. Nkaelenganya pa mazwi yano kasesema Yelemiya walanzile aakuti: “Iye mwe we Yawe! Avino wandyongwisye.” (Yele. 20:7) Umu cumi, Yeova watupaala wakwe cimwi nupya watucitila ivintu ivingi sana vino tutatazile itwelenganya napo, nu uyo wane uno nalondanga uwa kukwela umu ndeke wafikiliziwe. Twatandalila impanga izingi sana ukucila na vino nelenganyanga lino nali umwance, nupya natandaliile imisambo iingi sana umu ncende izipusanepusane. Nkataizya sana mamane Lesli pali vino akantungilila umu milimo yonsi ino napeelwa.

Tukatwalilila ukwiusya ukuti umu milimo yonsi ino tukaomba, tukaomba pa mulandu wakuti twatemwa Yeova. Ivisuma vino tukaipakizya ndakai, vikalangalila sile ukuti uku nkoleelo tulaipakizya ivintu ivingi sana lino tulaikala amanda pe nupya lino Yeova ‘alikusya consi ica umi vino cikulonda.’—Masa. 145:16.