1. Ukulingana na Aebele 12:1, i vyani vino tulinzile ukucita pakuti tutwalilile ukusimula ulwilo lwa ku umi ukufika nu ku mpela?

 BAIBO yakolanya umi wa Ina Klistu uku kusimula ulwilo. Aalasimula ukufika nu ku mpela aalapokelela umi wa pe. (2 Tim. 4:7, 8) Tulinzile ukutwalilila ukuombesya lino tukusimula ulwilo luu pano tuli mupipi nu kufika uku mpela. Umutumwa Paulo uwasimwile ukufika nu ku mpela, walanzile pali vimwi ivingatwazwa ukucimvya umu lwilo luu. Watunenyile ukuti “tuzuule consi icinyome . . . tusimule nu kuzizimizya umu lwilo ululi inkoleelo itu.”—Belengini Aebele 12:1.

2. Uzye cikapiliula cani ukuzula “consi icinyome”?

² Lino Paulo walanzile ukuti “tuzuule consi icinyome,” uzye walozizye umukuti pasi icili consi cino Umwina Klistu alinzile ukucita? Awe foo. Lelo walozyanga umukuti tulinzile ukusumba ivintu ivitalinzile ivingalenga catutalila ukusimula ningo ulwilo lwa ku umi. Ivintu vii vingatutonsya lino tukusimula. Fwandi pakuti twazizimizya, tulinzile ukumanya ivintu vivyo nu kuvizula. Apa nsita ili imwi kwene, tutalinzile ukusumba ivintu vino tulinzile ukusenda. Pano ukucita vii kungalenga tutatwalilila ukusimula ulwilo luu. (2 Tim. 2:5) I vintu ci vino tulinzile ukusenda?

3. (a) Ukulingana na Galatiya 6:5, i vyani tulinzile ukusenda? (b) I vyani vino tumasambilila umu cipande cii, nupya u mulandu ci?

³ Belengini Galatiya 6:5. Paulo walanzile pa vintu vimwi vino tulinzile ukusenda. Walemvile ukuti “cila muntu alaisendela icisendo cakwe.” Paa Paulo walandanga pa vintu vino Leza akalonda ukuti swensi wenga na wenga twacita, vintu vino kusi aliwensi angatucitilako. Umu cipande cii tumalanda pa vintu vivyo na vino tungacita pakuti tutwalilile ukucita vivyo.  Nupya tumalanda na pa vintu vino tutalinzile ukucita na vino tungacita pakuti tusumbe ivintu vivyo. Ukusenda ivisendo vitu nu kusumba vino tutalinzile ukusenda kungatwazwa ukusimula ningo ulwilo lwaku umi.

4. U mulandu ci uno ukuipeela kuli Leza kutayela icisendo? (Loliniko ni cikope.)

⁴ Umulapo uno twalafile kuli Yeova ukuti tulamuombela amanda pe. Lino twaipeezile kuli Yeova, twalavile ukuti tulamupepa nu kulacita ukulonda kwakwe. Tulinzile ukufikilizya vino twalavile. Ukulacita ivintu ukulingana na vino twalavile asi mulimo uwangupale, lelo asi icisendo. Alino, Yeova watupanzile ukuti twacita ukulonda kwakwe. (Kuso. 4:11.) Watuumvile umu nzila yakuti twalondesya ukumumanya nu kulamupepa nupya watupanzile umu cata cakwe. Cii calenga ukuti twapalama sana kuli aliwe nu kulazangila umu kucita ukulonda kwakwe. (Masa. 40:8) Nupya nga tukucita ukulonda kwakwe Leza nu kulondela Umwanakwe, tulazana upuzo.—Mate. 11:28-30.

5. I vyani ivingamwazwa ukufikilizya vino mwalavile? (1 Yoani 5:3)

 ⁵ Mungacita uli pakuti mwaikala ukulingana na vino mwalavile? Kwaya ivintu viili ivingatwazwa. Cakutandikilapo, mwatwalilila ukutemelwako Yeova. Mungacita vivyo nga mukwelenganya sana pa visuma vino wamucitila na vino alamupaala uku nkoleelo. Ndi cakuti mwatemwa sana Leza, cilamwangukila ukulamuvwila. (Belengini 1 Yoani 5:3.) Cakwe ciili, mwakolanya Yesu. Watwalilile ukucita ukulonda kwakwe Leza pano walenganga uwazwilizyo kuli Yeova nupya wisile amano apa cilambu. (Aeb. 5:7; 12:2) Wakwe Yesu, mwalenga Yeova ukuti amukomya nu kulaelenganya sana pa upaalilo uwa kwikala amanda pe. Ndi cakuti mwatwalilila ukutemwa Leza nu kukolanya Umwanakwe, mulafikilizya umulapo winu.

6. U mulandu ci uno tulinzile ukwikila amano uku lupwa? (Loliniko ni cikope.)

⁶ Imilimo ino twakwata umu lupwa. Umu lwilo lwitu ulwa ku umi, tulinzile ukutemwa Yeova na Yesu ukucila vino twatemwa ya lupwa itu. (Mate. 10:37) Cii cisikupiliula ukuti tulinzile ukwililako uku milimo uno twapelwa umu ulupwa. Lelo pakuti twazanzya Leza na Yesu tulinzile ukulaomba imilimo ino twapelwa ukuomba umu ulupwa. (1 Tim. 5:4, 8) Ndi cakuti tukucita vivyo tulaya ni nsansa. Yeova wamanya ukuti amulupwa yangaya ni nsansa ndi cakuti ya iya na aci yakucindikana nu kutemwana, avyazi yakutemwa nu kusambilzya ana yao, alino ana nayo nga yakuvwila avyazi yao.—Efes. 5:33; 6:1, 4.

7. Mungacita uli pakuti mwacita vino Yeova akalonda mwacita umu lupwa?

⁷ Mungacita uli pakuti mwaomba ningo imilimo ino mwakwata umu lupwa? Nga mwemwe ya iya, aci, nanti ana mwataila ukusunda ukwaya muli Baibo, mutacita ivintu ukulingana na vino mukuyuvwa nanti vino antu aingi yakacita kuno mukaikala. (Mapi. 24:3, 4) Mwaovya sana impapulo zitu izikalanda pali Baibo. Umwaya vino tungacita pakuti twaomvya ivisinte vya muli Baibo. Wakwe, pa webusaiti itu iya jw.org paya ivyeo ivikalondolola pa ntazi zino atwalane, avyazi, alino na alumendo na akazyana yakakwata ndakai. b Mwaomvya vino mukasambilila muli Baibo nanti cakuti amu lupwa yamwi yasikucita vivyo. Nga mukucita vivyo, amu lupwa yalaipakizya, nupya mulaipakizya amapaalo akafuma kuli Yeova.—1 Pet. 3:1, 2.

8. Uzye vino tukapingulapo ukucita vikatukuma uli?

⁸ Vino tukapingulapo apa vintu. Yeova watupeela uwila wa kuipingwila pali vino tukulonda ukucita nupya akalonda twaipakizya ivisuma ivikacitika ndi cakuti twapingulapo ningo. Nomba asitucingilila uku viipe ivikacitika ndi cakuti tutapingwilepo ningo. (Gala. 6:7, 8) Fwandi, tulinzile ukumanya ukuti ndi cakuti tusikupingula ningo pa vintu tulailetela intazi. Fwandi vino tungapingulapo ukucita vingalenga twacula na kampingu nanti foo. Nomba ukumanya ukuti tulinzile ukuipingwila pa vintu kungalenga tusokolole uluyembu luno twacisile nu kuombelapo nu kukanaswilizyapo uluyembu lulo. Ukucita vii kungalenga tutwalilile ukusimula ulwilo lwaku umi.

9. I vyani vino mungacita ndi cakuti mutaapingwile ningo pali vimwi? (Loliniko ni cikope.)

⁹ Mungacita uli pakuti mwapingula ningo pa vintu? Ndi cakuti mutaapingwilepo ningo pali vimwi, i vyani vino mungacita? Mwaiusya ukuti mutanga musenule vino mwacisile  mpiti. Mutaaomvya insita inu uku kwezya ukulenga yauze yasininkizye ukuti mutaluvyanyizye nanti ukupeela yauze imilandu pali vino mwacisile. Lelo, mwazumila ukuti mwaluvyanyizye nupya mwaombesya pakuti mutakaswilizyepo icili cimwi. Ndi cakuti mukuyuvwa sana amulandu pali vino mwaluvyanyizye, mwapepa kuli Yeova, mwazumila ukuti mwaluvyanyizye, nupya mwamulenga ukuti amwelele. (Masa. 25:11; 51:3, 4) Mwalenga uwelelo kuli yano mwaluvyanyizye, nupya ndi cakuti calondekwa, mwalenga uwazwilizyo kuli ya eluda. (Yako. 5:14, 15) Mwasambilila kuli vino mwaluvyanyizye, nupya mwaezya ukukanaswilizyapo vino mwacisile. Nga mwacita vivyo, mulasininkizya ukuti Yeova alamulanga uluse nupya alamwazwa.—Masa. 103:8-13.

10. U mulandu ci uno ukulondesya ukucita vino tutanga tukwanisye ukucita kwayela i cisendo icinyome? (Galatiya 6:4)

¹⁰ Kulondesya ukucita vino tutanga tukwanisye ukucita. Ukuikolanya kuli yauze kungalenga tutoovoke. (Belengini Galatiya 6:4.) Ndi cakuti lyonsi tukuikolanya kuli yauze, tungaya nu uzuwa nupya tungacimvyanya. (Gala. 5:26) Tungaika umu uzanzo ndi cakuti twatandika ukucita vino yauze yakucita nanti cakuti itumanya ukuti tutanga tukwanisye ukucita vivyo. Nupya elenganyini pali cii: Baibo ikatunena ukuti ukuloleela cimwi kukawavya umwenzo. (Mapi. 13:12) Fwandi ukuloleela ivintu vino tutalatala tukwate, kungatutoovola sana. Nupya cii cingalenga ukuti tutasimula ningo umu lwilo lwa ku umi.—Mapi. 24:10.

11. I vyani ivingamwazwa ukukanalondesya ukucita vino mutanga mukwanisye ukucita?

¹¹ Mungacita uli pakuti musumbe icisendo cii? Mutalondesya ukucita ivintu ivingi vino Yeova asienekela kuli mwemwe. Asienekela ukuti mwacita ivintu vino mutanga mukwanisye ukucita. (2 Kol. 8:12) Mwaiusya ukuti Yeova asilinganya vino mukacita kuli vino yauze yakacita. (Mate. 25:20-23) Akamutaizya pali vino mukaombesya nu mwenzo onsi umu mulimo wakwe, vino mwaya acisinka, na vino mukazizimizya. Mwaicefya nupya mwaiusya ukuti asi vyonsi vino mungakwanisya ukucita ndakai pa mulandu nu musinku, umi winu, alino ni vintu ivikacitika. Wakwe Balizilai, mwaitemelwa ukukana imilimo imwi ndi cakuti umi winu nanti umusinku winu ungalenga cimutalile ukuomba imilimo iyo. (2 Sam. 19:35, 36) Wakwe Mose, mwazumila uwazwilizyo nupya mwapeelako yauze imilimo ndi cakuti calinga ukucita vivyo. (Kufu. 18:21, 22) Ndi cakuti mwaicefya, mutalalondesya ukucita ivintu vino mutanga mukwanisye ivingamutonsya lino mukusimula ulwilo lwa ku umi.

12. Uzye tulinzile ukuipeela imilandu pali vino yauze yasikupingula ningo pa vintu? Londololini.

¹² Kuipeela imulandu pali vino yauze yataapingwilepo ningo pa vintu. Tutanga tupingwilepo yauze ivyakucita, nupya tutanga tuyacingilile uku viipe ivikacita ndi cakuti yakana ukupingula ningo pa vintu. Wakwe, limwi umwana angapingulapo ukuta ukuombela Yeova. Nupya vino wapingulapo vingalenga avyazi ukuvwa sana uyi. Lelo avyazi aakaipeela sana imilandu pali vino umwana wapingulapo ukucita, yakaya sana ni cisendo icinyome. Cisendo cino Yeova asienekela ukuti yasenda.—Loma 14:12.

13. Uzye avyazi yangacita uli ndi cakuti umwana wao atasoololwile ningo pali vimwi?

¹³ Mungacita uli pakuti musumbe icisendo cii? Mwaiusya ukuti swensi kwene Yeova  watupeela insambu zya kuisoolwela pa vintu. Akaleka cila muntu ukuipingwila pa vintu. Pa vintu vii paya nu kupingulapo ukumuombela. Yeova wamanya ukuti mutamalilika, akalonda sile ukuti mwaomba pano mungapezya ukusambilizya ana inu. Umwana winu nga wapingulapo ukucita vimwi, mutalinzile ukuipeela imilandu. (Mapi. 20:11) Nanti ciye vivyo, limwi mungatandika ukwelenganya pali vino mutaomvile ningo wa muvyazi. Nga caya vivyo, mwanena Yeova vino mukuyuvwa nupya mwalenga uwelelo. Wamanya ukuti mutanga musenule ivyacitika mpiti. Nupya asienekela ukuti mucingilile umwana winu uku kuzombola vino wakomiile. Mwaiusya ukuti ndi cakuti umwana winu waombesya ukuwela kuli Yeova, alamupokelela.—Luka 15:18-20.

14. U mulandu ci uno ukutwalilila ukuyuvwa sana amulandu i cisendo cino tulinzile ukusumba?

¹⁴ Kutwalilila kuyuvwa uwa mulandu. Ndi cakuti twayembuka, citaipa ukuyuvwa amulandu. Nomba nga twatwalilila ukuyuvwa amulandu, cikaya icisendo. Icisendo cino tulinzile ukusumba. Tungamanya uli ukuti itutwalilila ukuyuvwa sana amulandu? Ndi cakuti twasokolwile uluyembu, twalapile, nupya tukuombesya ukukanaswilizyapo uluyembu luno twacisile, tungasininkizya ukuti Yeova watwelela. (Mili. 3:19) Pa cisila cakucita ivintu vii, Yeova asilonda ukuti twatwalilila ukuyuvwa amulandu. Wamanya ukuti tungaika umu uzanzo ndi cakuti twatwalilila ukuyuvwa amulandu. (Masa. 31:10) Ndi cakuti twatwalilila ukuvwa sana ulanda, tungatoovoka.—2 Kol. 2:7.

15. I vyani ivingamwazwa ukuta ukutwalilila kuyuvwa uwa mulandu? (1 Yoani 3:19, 20) (Loliniko ni cikope.)

¹⁵ Mungacita uli pakuti musumbe icisendo cii? Ndi cakuti mwatwalilila ukuyuvwa sana amulandu, mwaika mano pali vino Yeova akaelela. (Masa. 130:4) Ndi cakuti Leza welela yayo aakalapila umu cumi, walaya ukuti: “Ntalatala nupya niusye amaifyo yao.” (Yele.  31:34)) Cii cikupiliula ukuti Yeova atalatwalilila ukwiusya uluyembu luno wamyelezile. Fwandi mutaelenganya ukuti Yeova atamwelela ndi cakuti mwakwata intazi pa mulandu nu luyembu luno mwacisile. Nupya mutatwalilila ukusoka ndi cakuti yamipoka imilimo imwi ino mwaombanga umu cilongano. Yeova asitwalilila ukwelenganya pali vino mwaluvyanyizye mpiti, nupya namwe kwene ali vino mulinzile ukucita.—Belengini 1 Yoani 3:19, 20.

16. I vyani vino tulinzile ukwiusya lino tukusimula ulwilo lwa ku umi?

¹⁶ Lino tukusimula ulwilo lwa ku umi, tulinzile ‘ukulasimula ningo pakuti tukacimvye.’ (1 Kol. 9:24) Tungacita vivyo ndi cakuti twamanya ivintu vino tulinzile ukusenda ni visendo vino tulinzile ukusumba. Umu cipande cii, itulandako sile pa vintu ivinono vino tulinzile ukusenda na vino tulinzile ukusumba. Lelo kuli na vyuze vino tungalandapo. Yesu walanzile ukuti tungalaukilwa ku “kuliisya nu kumwesya alino nu ku masakamika ya mu wikazi.” (Luka 21:34) Malembo yaa na malembo yauze yangamwazwa ukumanya muno mulinzile ukusenuka lino mukusimula ulwilo lwa ku umi.

17. U mulandu ci uno tungasininkizizya ukuti tulacimvya umu lwilo lwa ku umi?

¹⁷ Tungasininkizya ukuti tulacimvya umu lwilo lwa ku umi pano Yeova akatupeela amaka yano tukalondekwa. (Eza. 40:29-31) Fwandi mutawelela icisila! Mwakolanya umutumwa Paulo uwaombisye ukupoka icilambu. (Filipi 3:13, 14) Kusi umuntu angamisimwililako ulwilo luu, lelo Yeova nga wamwazwa mungakwanisya. Yeova angamwazwa ukutwalilila ukucita vino mulinzile ukucita nu kusumba vino mutalinzile ukusenda lino mukusimula ulwilo lwa ku umi. (Masa. 68:19) Yeova nga ali namwe, mulatwalilila ukusimula nu kuzizimizya nupya mulacimvya.