Uzye mwawelenga ningo ya magazini afumile likwene aa Lupungu Lwa Mulinzi? Lolini vino mungasuka amauzyo aali apisika:

Uzye uusininkizyo ci uwa mu Malembelo ukalanga ukuti Leza watukwatila amizu?

Lino aina Izlaeli yali umu uzya umu Eguputo, Leza wamanyile intazi zino yakweti nupya uvwanga sana uyi. (Kufu. 3:7; Eza. 63:9) Twaumbwa umu cata cakwe Leza, nupya naswe tungalanga ukuti twaya na mizu. Wene akalanga mizu kuli sweswe na lino tukuyuvwa ukuti atalinzile ukutulanga ukutemwa.— wp18.3, mafwa 8-9.

Uzye vino Yesu wasambilizyanga vyazwilizye uli antu ukucimvya ulupato?

Ayuda aingi umu nsita ino Yesu wali pano nsi yali nu lupato. Yesu walanzile sana pa ucindami uwaya umu kuicefya na pa uyi uwaya umu kulola kwati umutundu umwi wacindama sana ukucila imitundu yuze. Wakomelizye alondezi yakwe ukulolana ukuti yonsi aina.—w18.06, mafwa 9-10.

I vyani vino tukasambilila kuli vino Leza atazumilizye Mose ukwingila umu Mpanga ya Ulayo?

Mose wali sana cuza wakwe Yeova. (Malan. 34:10) Uku kusila kwa myaka 40 umu lwanga, antu yailizyanyizye pa muku wakwe ciili pa kuulilwa manzi. Leza wanenyile Mose ukulanda uku ciliwe. Lelo, Mose umile umu ciliwe. Limwi Yeova wasosile pano Mose atalondiile vino wamunenyile nanti limwi Mose ataalesile ukuti ululumbi luye kuli Leza pa cizungusyo icacitiike. (Mpe. 20:6-12) Cii cikatusambilizya pa ucindami uwaya umu kuvwila Yeova nu kuleka ululumbi lwaya kuli aliwe.—w18.07, mafwa 13-14.

Uzye u kuluvyanya ci limwi ukungayapo ndi cakuti tukupingula antu pa mulandu ni milolekele ya kunzi?

Kwaya ivintu vitatu ivikalenga antu aingi yalola pa milolekele ya muntu iya kunzi: Imilolekele ya nkanda nanti umutundu, vino umuntu wakwata, nu musinku. Cacindama sana ukulola yauze wakwe vino Leza akayalola ukwaula kapatulula! (Mili. 10:34, 35)—w18.08, mafwa 8-12.

U munzila ci zimwi muno Aina Klistu aikolo yangazwilamo yauze?

Yeova acili watemwa sana Umwina Klistu aliwensi uwikolo wino yapeela imilimo yuze nupya aangazwa sana yauze. Angazwa antu aasi ya kapepa atwala nanti ukutwalwa uku Ina Klistu, ukwazwa atonte, ukutungulula masambililo, nu kulundulula umulimo wa kusimikila.—w18.09, mafwa 8-11.

I viombelo ci vino Aina Klistu yakwata ivyaya pa Viombelo Vya Kuomvya pa Kusambilizya?

Paya utumakadi twakwe jw.org nu twakwamilapo antu. Paya nu utupepala twi landwe utwapangwa ningo sana alino na ya magazini ya Lupungu na Zyukini!. Apa viombelo vya kuomvya pa kusambilizya paya nu tumabuku tumwi, amabuku yaili acindame sana, na mavidyo 4 asuma sana, apaaya na vidyo yakuti U mulandu ci Uno Mulinzile Ukusambilila Baibo?—w18.10, ifwa 16.

Uzye Aina Klistu ‘yangakala uli icumi,’ wakwe vino pa Mapinda 23:23 pakalanda?

Tusiomvya impiya pa kukala icumi. Lelo, tulinzile ukusumba insita nu kuomvya amaka itu pakuti tucikwate.—w18.11, ifwa 4.

I cani cino tungasambilila kuli vino Oseya waomvile na Gomeli, umuci wakwe?

Gomeli wacitanga sana ucende, nomba Oseya wamuyelile uluse nu kutwalilila ukwikala nawe. Ndi cakuti Umwina Klistu wacita uzelele, uwakwe uwa kaele angamwelela. Ndi cakuti uwa kaele watandika nupya ukupanga icupo nu watacita uzelele, ala umulandu wa mu Malembelo uwa kutaanilapo wasila.—w18.12, ifwa 13.