1-2. (a) Uzye amazwi aalembwa pali Ezaya 41:10 yazwilizye uli nkazi Yoshiko? (b) Aaweni yano amazwi aafuma kuli Yeova aalembwa pali Ezaya 41:10 yangazwa?

NKAZI wa utailo Yoshiko wapokeelile ilyasi iliipe. Dokota wakwe wamunenyile ukuti wasiile sile ni myezi inono ukuti afwe. Uzye nkazi wii wacisile uli? Nkazi Yoshiko wiwisye ilembelo lino watemilwe sana lyakwe Ezaya 41:10. (Welengini.) Lyene nkazi wanenyile dokota ala watateeka umwenzo ukuti atuvwanga intete pano Yeova wamukomyanga. * Mazwi akuteekezya aakazanwa umwi lembelo lii yazwilizye nkazi witu ukutaila sana Yeova. Ilembelo kwene lii ilili limwi lingatwazwa ukuya ateekele lino tukuomba ni ntazi izitale. Pakuti tumanye vino tungacita vivyo, lekini tale tulande pa mulandu uno Leza waneniile Ezaya ukulemba amazwi yaa.

² Yeova wanenyile Ezaya ukulemba amazwi yaa akuteekezya Ayuda aali nu kusendwa uku Babiloni umu uzya. Nomba Yeova walondanga amazwi yaa ukusungwa pakuti yavwe antu yakwe yonsi aikala pano nsi ukufika na ayako pali ino nsita, asi Ayuda sile. (Eza. 40:8; Loma 15:4) Ndakai tukaikala umu “tusita tutale” ukucila vino caali mpiti, tukulondekwa sana ukukomeleziwa ukukazanwa umwi buku lyakwe Ezaya.—2 Tim. 3:1.

3. (a) A malayo ci aaya pali Ezaya 41:10, ilembelo ilyasoololwa ilya mwaka wakwe 2019? (b) U mulandu ci uno tukalondekwa malayo yaa?

³ Umu cipande cii, tumalanda sana pa malayo yatatu yano  Yeova watulaya aalembwa pali Ezaya 41:10: (1) Yeova alaya naswe, (2) a Leza witu, na (3) alaatwazwa. Wakwe nkazi Yoshiko tukalondekwa malayo * yaa pa mulandu wakuti tukakwata sana intazi umu umi. Nupya twakwata intazi pa mulandu ni vintu viipe ivikacitika umu nsi. Swe yamwi tukazizimizya nu kuzunyiwa na mauteeko ya maka. Lekini tulande pa malayo yatatu.

4. (a) Uulayo ci uwakutandikilapo uno tumalandapo? (Lolini na futunoti.) (b) Uzye Yeova akalanga uli vino akayuvwa pali sweswe? (c) Uzye amazwi yakwe Leza yakalenga mwauvwa uli?

⁴ Yeova watandikile ukututeekezya na mazwi yakuti: “Mutaopa, nemo namayanga pe namwe.” * Yeova akalanga ukuti ali naswe lino akutwikako amano nu kututemwa. Elenganyini pali vino akatusakamala nu kutulanga icikuuku. Yeova watiile: “Wemo wacindama wakwe cimwi . . . Pano wewe wamutengo ukulu pa manso yane, nupya nakutemwa.” (Eza. 43:4) Kusi icili consi muno nsi icingalenga Yeova ukuta ukutemwa yonsi akamuombela, asiita ukuya uwa cisinka kuli sweswe. (Eza. 54:10) Ukutemwa kwakwe na ucuza wakwe ukalenga tusipe. Akatucingilila ndakai wakwe vivi kwene vino wacingililanga Abulamu (Abulaamu) cuzakwe. Yeova wamunenyile ukuti: “Utuvwa intete, Abulamu, kunuli indi wa cisyangu cakukucinga.”—Utan. 15:1.

5-6. (a) Uzye twamanya uli ukuti Yeova akalondesya ukutwazwa lino tukweziwa? (b) I vyani vino tukusambilila kuli vino vyacitikile nkazi Yoshiko?

⁵ Twamanya ukuti Yeova wika amano uku kutwazwa ndi twaya ni ntazi pa mulandu wakuti walaya antu yakwe ukuti: “Lino wapita umu manzi azike, namayanga nawe, na lino ukulamba uluzi, utalamwela awe. Lino wapita umu moto, utalapya awe. Icimbilimbili cakweo citalakwambukila awe.” (Eza. 43:2) Uzye amazwi yaa yakulozya mwi?

⁶ Yeova asitulaya ukuti alafumyapo intazi izikalenga umi witu ukutala, lelo atalazumilizya intazi ili wa ”luzi” ukututoovola nanti amavya aali wa “cimbilimbili” ukutulesya  ukuombela Yeova. Watulaya ukuti alaya naswe, alaatwazwa ‘ukupita’ umu ntazi zizyo. I vyani vino Yeova alacita? Alatwazwa ukuta ukutiina pakuti tungatwalilila ukuya acisinka kuli aliwe nanti icakuti itumanya ukuti tumafwa. (Eza. 41:13) Nkazi Yoshiko wino itulandapo mpiti wasininkizye vivyo. Umwanakwe umukazyana walanzile ukuti: “Tuvwile sana ningo pali vino ya Mayo yateesile umwenzo. Mu cumi cumi twaweni vino Yeova wayazwilizye ukuya nu mutende. Ya Mayo yalanzyanyanga na ya nasi na alwale yauze pali Yeova na malayo yakwe ukufikila lino yafwile.” I vyani vino tukusambilila kuli vino vyacitikile nkazi Yoshiko? Ndi cakuti twataila ulayo uno Leza watulaya uwakuti “namayanga pe namwe,” naswe kwene tulaya asipe nupya akome lino tukuzizimizya amezyo.

7-8. (a) Uulayo ci wakwe ciili uno tumalandapo, nupya ukupiliula cani? (b) U mulandu ci uno Yeova waneniile Ayuda ukuti: “Mutasakamala nanti cimwi”? (c) A mazwi ci aaya pali Ezaya 46:3, 4 aatekiizye antu yakwe Leza?

⁷ Uvwini pa ulayo wakwe ciili uno Ezaya walemvile uwakuti: “Mutasakamala nanti cimwi pano nene indi Leza winu.” Uzye amazwi yaa akulanda pa kusakamala yakupiliula cani? Umu cikomo cii umu lulimi luno izwi lyakuti “ukusakamala” lyalembiilwemo lyapiliulanga “ukupeepela sana icisila pa mulandu wakuti ukuvwa intete pali cimwi nanti pa muntu umwi umwipe aangakucita iviipe” nanti “ukucelecensya wa muntu ali umu uzanzo.”

⁸ U mulandu ci uno Yeova waneniile Ayuda ali nu kusendwa uku Babiloni ukuti “mutasakamala”? A pa mulandu wakuti wamanyile ukuti aikalanga umu Babiloni yaali nu kuya sana ni ntete. U mulandu ci uno yali nu kuyela ni ntete? Mupipi nu ku kusila kwa mwaka wakwe 70 uwa Yayuda aasenzilwe mu uzya, umusumba wa Babiloni waali nu kuzanzwa na asilika ya maka aku Medya na Pesya. Yeova wali nu kuomvya asilika yaa ukukulula antu yakwe ukufuma umu uzya umu Babiloni. (Eza. 41:2-4) Lino aina Babiloni na antu yauze amu misumba yuze aaliko pa nsita iya yamanyile ukuti alwani yao yali umupipi nu kuyazanza, yezyanga ukutwalilila ukuya asipe lino yakulanda kuli cila muntu amazwi yakuti: “Komelekini.” Nupya yapanzile tuleza utwingi tuno yatailanga ukuti twali nu kuyacingilila. (Eza. 41:5-7) Nomba ala Yeova wene akuteekezya Ayuda aali umu uzya na mazwi yakuti: “Mwe ina Izlaeli [ukupusanako na yauze] mwemwe yaomvi yane . . . Mutasakamala nanti cimwi pano nene indi Leza winu.” (Eza. 41:8-10) Uvwini ukuti Yeova walanzile ukuti: “Nene indi Leza winu.” Yeova wazwilizye ya kapepa yakwe acisinka ukuta ukusakamala lino wayanenga ukuti atailila, acili a Leza wao nupya yaali antu yakwe. Wayanenyile ukuti: “Nene namamwazwanga nu kumutuula.” Mazwi yayo akukomelezya nupya akuteekezya yakomeliizye sana Ayuda.—Welengini Ezaya 46:3, 4.

9-10. U mulandu ci uno tutalinzile ukutiinila? Langililini.

⁹ Ndakai ukucila vino caali mpiti, antu atuzinguluka yakasakamala sana pa mulandu wa kuti ivintu iviipe vikuya vikuvulilako sile. Ukuya kwene, naswe kwene tukasakamala pa ntazi zizyo. Nomba tutalinzile ukutiina. Yeova akatunena ukuti: “Nene indi Leza winu.” U mulandu ci uno amazwi yayo yangatwazwila ukutwalilila ukuteeka umwenzo?

¹⁰ Elenganyini pa cilangililo cii: Antu yaili Jim na Ben iiyakwela umu ndeke iikupita umu cimuza. Lino icimuza cikutwala indeke papela na pansi, kapisya wa ndeke wanena yonsi ali mu ndeke ukuti: “Zwalini misipi  ya pa vilimba vino imwikalapo. Tumatwalilila ukupita umu cimuza cii pa nsita italiko.” Jim wasakamala sana. Nomba kapisya wa ndeke walundapo amazwi yakuti: “Mutasakamala nanti cimwi. Ne kapisya winu nene nkulanda.” Pa nsita ii lyene, Jim wakunta umutwe nu kulanda ukuti: “U kukomelezya kwa musango ci kuu?” Nomba nanti ciye vivyo walola Ben wene asikuloleka ukusakamala. Jim wamuzya wati: “U mulandu ci uno watuteekela umwenzo vii?” Ben waseka nu kulanda ukuti: “A pa mulandu wakuti kapisya wa ndeke namumanya sana. Aatata.” Lyene Ben walanda nu kuti: “Leka nkulondolwele ivingi pali ya tata. Natimanya ukuti ndi wamanya ningo vino yaya na vino yamanya ukupisya indeke, umateeka umwenzo.”

11. I vyani vino tungasambilila uku cilangililo ca yantu yaili akwezile umu ndeke?

¹¹ I vyani vino tungasambilila uku cilangililo cii? Wakwe Ben, twateeka umwenzo pa mulandu wakuti twamanya ningo sana Tata witu wa kwi yulu, Yeova. Twamanya ukuti alatutungulula lino tukupita umu ntazi zino tukakwata umu manda yaa akusyalikizya. (Eza. 35:4) Twataila Yeova, fwandi tungatwalilila ukuteeka umwenzo lino antu amu nsi ii yali sana ni ntete. (Eza. 30:15) Nupya tukacita wakwe vino Ben wacisile lino tukunenako yauze umulandu uno twatailila Leza. Nayo kwene yangasininkizya ukuti Yeova alayazwa asi mulandu ni ntazi zino yakupitamo.

12. (a) Ulayo ci wakwe citatu uno tumasambililapo? (b) Uzye amazwi aya pali Ezaya 40:10 yakatwiusyako cisinka ci?

¹² Elenganyini pa ulayo wakwe citatu uno Ezaya walemvile, watiile: “Nene namamukomyanga nupya namamwavwanga.” Ezaya walanga watalondolola mpiti vino Yeova akacita pa kukomya antu yakwe, watiile:  “Umwene mucindami akwiza ku kuteeka na maka.” (Eza. 40:10) Mazwi yaa yakutwiusyako ukuti Yeova a Kateeka wa maka. Waomvizye amaka yakwe uku kwazwa nu kucingilila antu yakwe ampiti, nupya akatwalilila ukukomya nu kucingilila yonsi akamutaila ndakai.—Malan. 1:30, 31; Eza. 43:10.

13. (a) A lilaci lino Yeova akafikilizya ulayo wakwe uwakuti amatukomyanga? (b) Uulayo ci ukatukomya nu kutupeela utailo?

¹³ Lino alwani itu yakutuzunya, Yeova akatwalilila ukufikilizya ulayo wakwe uwakuti: “Namamukomyanga.” Umu mpanga zimwi ndakai, alwani itu yakwezya na maka ukulesya umulimo witu wa kusimikila nu kuinda imilimo itu yonsi ino iuvi likaomba. Nanti ciye vivyo tusisakamala sana. Yeova watupeela usininkizyo wakuti alatukomya nu kutupeela utailo. Watulaya ukuti: “Icanzo consi cino yasuzile apakukulwisya, cilaposiwa ukuomba.” (Eza. 54:16, 17) Amazwi yaa yakatwiusyako pa vintu vitatu vicindame.

14. U mulandu ci uno tutange tuzungukile ukuti alwani yakwe Leza yakatuzunya?

¹⁴ Icakutandikilako, swe yalondezi yakwe Klistu tukaenekela ukuti yalatupata. (Mate. 10:22) Yesu wasoowile ukuti asambi yakwe yaali nu kuzunyiwa sana umu manda akusyalikizya. (Mate. 24:9; Yoa. 15:20) Cakwe ciili, usesemo wakwe Ezaya watucelwilile limwi ukuti alwani itu yatalatupata sile lelo yalacita ivingi ivicizile napo, kuli kuti yalaomvya ivyanzo pa kutuzunya. Alwani itu yangaomvya ufi wao uukuloleka kwati ali cumi, yangatusombezya nanti sile ukutuuma nu kutucisa. (Mate. 5:11) Yeova atalalesya alwani iitu ukuta ukuomvya ivyanzo pa kutulwisya. (Efes. 6:12; Umbw. 12:17) Nomba tutalinzile ukuvwa intete. U mulandu ci?

15, 16. (a) I cisinka ci cakwe citatu cino tulinzile ukwiusya, nupya amazwi aaya pali Ezaya 25:4, 5 yakatungilila uli icisinka cico? (b) Uzye pali Ezaya 41:11, 12 pakalondolola uli ivilacitikila antu aakatulwisya?

¹⁵ Elenganyini pa cisinka cakwe citatu cino tulinzile ukwiusya. Yeova walanzile ukuti  “icanzo consi” cino yalaomvya pa kutulwisya “cilaposiwa ukuomba.” Wakwe vivi kwene vino iciumba cikatucingilila uku mvula ya cipunga, avino na Yeova akatucingilila ku “antu yaluzazwe.” (Welengini Ezaya 25:4, 5.) Alwani itu yatalatucimvya foo lino yakutulwisya.—Eza. 65:17.

¹⁶ Nupya Yeova akakomya utailo witu muli aliwe pa kutulondolwela ningo ivintu ivilacitikila yayo yonsi ‘aakatusokela.’ (Welengini Ezaya 41:11, 12.) Asi mulandu na vino alwani itu yangezya na maka ukutulwisya nanti vino ulwi ungaya ukalamba, ivilacitika vyene i vili vimwi: Alwani ya antu yakwe Leza yonsi ‘yalafwa.’

17-18. (a) Uzye ukuwelenga Baibo kungakomya uli utailo witu muli Leza? Langililini. (b) Uzye ukwelenganya pi lembelo lya mwaka wakwe 2019 kungatwazwa uli?

¹⁷ Tukakomya utailo witu muli Yeova ndi cakuti twamumanya ningo. Nupya inzila yonga ino tungamanyilamo Leza u kuwelenga ningo Baibo nu kwelenganya pali vino tukuwelenga. Muli Baibo mwaya malyasi ya cumi aakalanda pali vino Yeova wacingilile antu yakwe mpiti. Malyasi yayo yakalenga tuye sana nu utailo uwakuti alatwalilila ukutusakamala.

¹⁸ Elenganyini pa vintu usuma vino Ezaya walanzilepo umu cilangililo cino wapeezile pali vino Yeova akatucingilila. Wakolinye Yeova kuli kacema na antu yakwe uku mfwele. Ezaya walanzile ukuti: “Amakolonganikanga utwana twa mfwele, nu kutupakatila apa minwe yakwe.” (Eza. 40:11) Ndi cakuti twalola vino Yeova watutemwa tukayuvwa acingililwe nupya tukateeka umwenzo. Pakuti tuteeke umwenzo asi mulandu ni ntazi zino tukupitamo, muomvi mutailwe uwa mano watasoolola ilembelo lyakwe Ezaya 41:10 ukuya ilembelo lya mwaka wakwe 2019 ilikuti: “Mutasakamala nanti cimwi pano nene indi Leza winu.” Mwaelenganya lyonsi pa mazwi yayo. Yalamukomya lino mukupita umu ntazi izili uku nkoleelo.